১৪. এতদগ্গৰগ্গো

(১৪) ১. পঠমএতদগ্গৰগ্গো

এতদগ্গপদৰণ্ণনা

১৮৮. এতদগ্গেসু পঠমৰগ্গস্স পঠমে এতদগ্গন্তি এতং অগ্গং. এত্থ চ অযং অগ্গসদ্দো আদিকোটিকোট্ঠাসসেট্ঠেসু দিস্সতি. ‘‘অজ্জতগ্গে, সম্ম দোৰারিক, আৰরামি দ্ৰারং নিগণ্ঠানং নিগণ্ঠীন’’ন্তিআদীসু (ম. নি. ২.৭০) হি আদিম্হি দিস্সতি. ‘‘তেনেৰ অঙ্গুলগ্গেন তং অঙ্গুলগ্গং পরামসেয্য (কথা. ৪৪১), উচ্ছগ্গং ৰেল়গ্গ’’ন্তিআদীসু কোটিযং. ‘‘অম্বিলগ্গং ৰা মধুরগ্গং ৰা তিত্তকগ্গং ৰা (সং. নি. ৫.৩৭৪), অনুজানামি, ভিক্খৰে, ৰিহারগ্গেন ৰা পরিৰেণগ্গেন ৰা ভাজেতু’’ন্তিআদীসু (চূল়ৰ. ৩১৮) কোট্ঠাসে. ‘‘যাৰতা, ভিক্খৰে, সত্তা অপদা ৰা…পে… তথাগতো তেসং অগ্গমক্খাযতী’’তিআদীসু (অ. নি. ৪.৩৪; ইতিৰু. ৯০) সেট্ঠে. স্ৰাযমিধ কোটিযম্পি ৰট্টতি সেট্ঠেপি. তে হি থেরা অত্তনো অত্তনো ঠানে কোটিভূতাতিপি অগ্গা, সেট্ঠভূতাতিপি. তস্মা এতদগ্গন্তি এসা কোটি এসো সেট্ঠোতি অযমেত্থ অত্থো. এসেৰ নযো সব্বসুত্তেসু.

অযঞ্চ এতদগ্গসন্নিক্খেপো নাম চতূহি কারণেহি লব্ভতি অট্ঠুপ্পত্তিতো আগমনতো চিণ্ণৰসিতো গুণাতিরেকতোতি. তত্থ কোচি থেরো একেন কারণেন এতদগ্গট্ঠানং লভতি, কোচি দ্ৰীহি, কোচি তীহি, কোচি সব্বেহেৰ চতূহিপি আযস্মা সারিপুত্তত্থেরো ৰিয. সো হি অট্ঠুপ্পত্তিতোপি মহাপঞ্ঞতায এতদগ্গট্ঠানং লভি আগমনাদীহিপি. কথং? একস্মিং হি সমযে সত্থা জেতৰনমহাৰিহারে ৰিহরন্তো কণ্ডম্বরুক্খমূলে তিত্থিযমদ্দনং যমকপাটিহারিযং দস্সেত্ৰা ‘‘কহং নু খো পুরিমবুদ্ধা যমকপাটিহারিযং কত্ৰা ৰস্সং উপগচ্ছন্তী’’তি আৰজ্জেন্তো ‘‘তাৰতিংসভৰনে’’তি ঞত্ৰা দ্ৰে পদন্তরানি দস্সেত্ৰা ততিযেন পদেন তাৰতিংসভৰনে পচ্চুট্ঠাসি. সক্কো দেৰরাজা ভগৰন্তং দিস্ৰা পণ্ডুকম্বলসিলাতো উট্ঠায সদ্ধিং দেৰগণেন পচ্চুগ্গমনং অগমাসি. দেৰা চিন্তযিংসু – ‘‘সক্কো দেৰরাজা দেৰগণপরিৰুতো সট্ঠিযোজনাযামায পণ্ডুকম্বলসিলায নিসীদিত্ৰা সম্পত্তিং অনুভৰতি, বুদ্ধানং নাম নিসিন্নকালতো পট্ঠায ন সক্কা অঞ্ঞেন এত্থ হত্থম্পি ঠপেতু’’ন্তি. সত্থাপি তত্থ নিসিন্নো তেসং চিত্তাচারং ঞত্ৰা মহাপংসুকূলিকো ৰিয মুণ্ডপীঠকং সব্বমেৰ পণ্ডুকম্বলসিলং অৰত্থরিত্ৰা নিসীদি. এৰং নিসীদন্তো পন অত্তনো ৰা সরীরং মহন্তং কত্ৰা মাপেসি, পণ্ডুকম্বলসিলং ৰা খুদ্দকং অকাসীতি ন সল্লক্খেতব্বং. অচিন্তেয্যো হি বুদ্ধৰিসযো. এৰং নিসিন্নো পন মাতরং কাযসক্খিং কত্ৰা দসসহস্সচক্কৰাল়দেৰতানং ‘‘কুসলা ধম্মা অকুসলা ধম্মা অব্যাকতা ধম্মা’’তি অভিধম্মপিটকং দেসেসি.

পাটিহারিযট্ঠানেপি সব্বাপি দ্ৰাদসযোজনিকা পরিসা অনুরুদ্ধত্থেরং উপসঙ্কমিত্ৰা ‘‘কহং, ভন্তে, দসবলো গতো’’তি পুচ্ছি. তাৰতিংসভৰনে পণ্ডুকম্বলসিলাযং ৰস্সং উপগন্ত্ৰা অভিধম্মকথং দেসেতুং গতোতি. ভন্তে, ন মযং সত্থারং অদিস্ৰা গমিস্সাম. কদা সত্থা আগমিস্সতীতি সত্থু আগমনকালং জানাথাতি? মহামোগ্গল্লানত্থেরস্স ভারং করোথ, সো বুদ্ধানং সন্তিকং গন্ত্ৰা সাসনং আহরিস্সতীতি. কিং পন থেরস্স তত্থ গন্তুং বলং নত্থীতি? অত্থি, ৰিসেসৰন্তানং পন ৰিসেসং পস্সন্তূতি এৰমাহ. মহাজনো মহামোগ্গল্লানত্থেরং উপসঙ্কমিত্ৰা সত্থু সাসনং গহেত্ৰা আগমনত্থায যাচি. থেরো পস্সন্তেযেৰ মহাজনে পথৰিযং নিমুজ্জিত্ৰা অন্তোসিনেরুনা গন্ত্ৰা সত্থারং ৰন্দিত্ৰা আহ – ‘‘ভন্তে, মহাজনো তুম্হাকং দস্সনকামো, আগমনদিৰসং ৰো জানিতুং ইচ্ছতী’’তি. তেন হি ‘‘ইতো তেমাসচ্চযেন সঙ্কস্সনগরদ্ৰারে পস্সথা’’তিস্স ৰদেহীতি. থেরো ভগৰতো সাসনং আহরিত্ৰা মহাজনস্স কথেসি. মহাজনো তত্থেৰ তেমাসং খন্ধাৰারং বন্ধিত্ৰা ৰসি. চূল়অনাথপিণ্ডিকো দ্ৰাদসযোজনায পরিসায তেমাসং যাগুভত্তং আদাসি.

সত্থাপি সত্তপ্পকরণানি দেসেত্ৰা মনুস্সলোকং আগমনত্থায আকপ্পং দস্সেসি. সক্কো দেৰরাজা ৰিস্সকম্মং আমন্তেত্ৰা তথাগতস্স ওতরণত্থায সোপানং মাপেতুং আণাপেসি. সো একতো সোৰণ্ণমযং একতো রজতমযং সোপানং মাপেত্ৰা মজ্ঝে মণিমযং মাপেসি. সত্থা মণিমযে সোপানে ঠত্ৰা ‘‘মহাজনো মং পস্সতূ’’তি অধিট্ঠাসি. অত্তনো আনুভাৰেনেৰ ‘‘মহাজনো অৰীচিমহানিরযং পস্সতূ’’তিপি অধিট্ঠাসি. নিরযদস্সনেন চস্স উপ্পন্নসংৰেগতং ঞত্ৰা দেৰলোকং দস্সেসি. অথস্স ওতরন্তস্স মহাব্রহ্মা ছত্তং ধারেসি, সক্কো দেৰরাজা পত্তং গণ্হি, সুযামো দেৰরাজা দিব্বং ৰাল়বীজনিং বীজি, পঞ্চসিখো গন্ধব্বদেৰপুত্তো বেলুৰপণ্ডুৰীণং সমপঞ্ঞাসায মুচ্ছনাহি মুচ্ছিত্ৰা ৰাদেন্তো পুরতো ওতরি. বুদ্ধানং পথৰিযং পতিট্ঠিতকালে ‘‘অহং পঠমং ৰন্দিস্সামি, অহং পঠমং ৰন্দিস্সামী’’তি মহাজনো অট্ঠাসি. সহ মহাপথৰীঅক্কমনেন পন ভগৰতো নেৰ মহাজনো ন অসীতিমহাসাৰকা পঠমকৰন্দনং সম্পাপুণিংসু, ধম্মসেনাপতি সারিপুত্তত্থেরোযেৰ পন সম্পাপুণি.

অথ সত্থা দ্ৰাদসযোজনায পরিসায অন্তরে ‘‘থেরস্স পঞ্ঞানুভাৰং জানন্তূ’’তি পুথুজ্জনপঞ্চকং পঞ্হং আরভি. পঠমং লোকিযমহাজনো সল্লক্খেস্সতীতি পুথুজ্জনপঞ্হং পুচ্ছি. যে যে সল্লক্খিংসু, তে তে কথযিংসু. দুতিযং পুথুজ্জনৰিসযং অতিক্কমিত্ৰা সোতাপত্তিমগ্গে পঞ্হং পুচ্ছি. পুথুজ্জনা তুণ্হী অহেসুং, সোতাপন্নাৰ কথযিংসু. ততো সোতাপন্নানং ৰিসযং অতিক্কমিত্ৰা সকদাগামিমগ্গে পঞ্হং পুচ্ছি. সোতাপন্না তুণ্হী অহেসুং, সকদাগামিনোৰ কথযিংসু. তেসম্পি ৰিসযং অতিক্কমিত্ৰা অনাগামিমগ্গে পঞ্হং পুচ্ছি. সকদাগামিনো তুণ্হী অহেসুং, অনাগামিনোৰ কথযিংসু. তেসম্পি ৰিসযং অতিক্কমিত্ৰা অরহত্তমগ্গে পঞ্হং পুচ্ছি. অনাগামিনো তুণ্হী অহেসুং, অরহন্তাৰ কথযিংসু. ততো হেট্ঠিমকোটিতো পট্ঠায অভিঞ্ঞাতে অভিঞ্ঞাতে সাৰকে পুচ্ছি, তে অত্তনো অত্তনো পটিসম্ভিদাৰিসযে ঠত্ৰা কথযিংসু. অথ মহামোগ্গল্লানং পুচ্ছি, সেসসাৰকা তুণ্হী অহেসুং, থেরোৰ কথেসি. তস্সাপি ৰিসযং অতিক্কমিত্ৰা সারিপুত্তত্থেরস্স ৰিসযে পঞ্হং পুচ্ছি. মহামোগ্গল্লানো তুণ্হী অহোসি, সারিপুত্তত্থেরোৰ কথেসি. থেরস্সাপি ৰিসযং অতিক্কমিত্ৰা বুদ্ধৰিসযে পঞ্হং পুচ্ছি. ধম্মসেনাপতি আৰজ্জেন্তোপি পস্সিতুং ন সক্কোতি, পুরত্থিমপচ্ছিমুত্তরদক্খিণা চতস্সো দিসা চতস্সো অনুদিসাতি ইতো চিতো চ ওলোকেন্তো পঞ্হুপ্পত্তিট্ঠানং সল্লক্খেতুং নাসক্খি.

সত্থা থেরস্স কিলমনভাৰং জানিত্ৰা ‘‘সারিপুত্তো কিলমতি, নযমুখমস্স দস্সেস্সামী’’তি ‘‘আগমেহি ত্ৰং, সারিপুত্তা’’তি ৰত্ৰা ‘‘নাযং তুয্হং ৰিসযো পঞ্হো, বুদ্ধানং এস ৰিসযো সব্বঞ্ঞূনং যসস্সীন’’ন্তি বুদ্ধৰিসযভাৰং আচিক্খিত্ৰা ‘‘ভূতমিদন্তি, সারিপুত্ত, সমনুপস্সসী’’তি আহ. থেরো ‘‘চতুমহাভূতিককাযপরিগ্গহং মে ভগৰা আচিক্খতী’’তি ঞত্ৰা ‘‘অঞ্ঞাতং ভগৰা, অঞ্ঞাতং সুগতা’’তি আহ. এতস্মিং ঠানে অযং কথা উদপাদি – মহাপঞ্ঞো ৰত, ভো, সারিপুত্তত্থেরো, যত্র হি নাম সব্বেহি অনঞ্ঞাতং পঞ্হং কথেসি, বুদ্ধেহি চ দিন্ননযে ঠত্ৰা বুদ্ধৰিসযে পঞ্হং কথেসি, ইতি থেরস্স পঞ্ঞানুভাৰো যত্তকং ঠানং বুদ্ধানং কিত্তিসদ্দেন ওত্থটং, সব্বং অজ্ঝোত্থরিত্ৰা গতোতি এৰং তাৰ থেরো অট্ঠুপ্পত্তিতো মহাপঞ্ঞতায এতদগ্গট্ঠানং লভি.

কথং আগমনতো? ইমিস্সাযেৰ হি অট্ঠুপ্পত্তিযা সত্থা আহ – সারিপুত্তো ন ইদানেৰ পঞ্ঞৰা, অতীতে পঞ্চ জাতিসতানি ইসিপব্বজ্জং পব্বজিত্ৰাপি মহাপঞ্ঞোৰ অহোসি –

‘‘যো পব্বজী জাতিসতানি পঞ্চ,

পহায কামানি মনোরমানি;

তং ৰীতরাগং সুসমাহিতিন্দ্রিযং,

পরিনিব্বুতং ৰন্দথ সারিপুত্ত’’ন্তি.

এৰং পব্বজ্জং উপব্রূহযমানো একস্মিং সমযে বারাণসিযং ব্রাহ্মণকুলে নিব্বত্তো. তযো ৰেদে উগ্গণ্হিত্ৰা তত্থ সারং অপস্সন্তো ‘‘পব্বজিত্ৰা একং মোক্খধম্মং গৰেসিতুং ৰট্টতী’’তি চিত্তং উপ্পাদেসি. তস্মিং কালে বোধিসত্তোপি কাসিরট্ঠে উদিচ্চব্রাহ্মণমহাসালকুলে নিব্বত্তো ৰুদ্ধিমন্ৰায উগ্গহিতসিপ্পো কামেসু আদীনৰং নেক্খম্মে চ আনিসংসং দিস্ৰা ঘরাৰাসং পহায হিমৰন্তং পৰিসিত্ৰা কসিণপরিকম্মং কত্ৰা পঞ্চ অভিঞ্ঞা অট্ঠ সমাপত্তিযো নিব্বত্তেত্ৰা ৰনমূলফলাহারো হিমৰন্তপ্পদেসে ৰসতি. সোপি মাণৰো নিক্খমিত্ৰা তস্সেৰ সন্তিকে পব্বজি. পরিৰারো মহা অহোসি পঞ্চসতমত্তা ইসযো.

অথস্স সো জেট্ঠন্তেৰাসিকো একদেসং পরিসং গহেত্ৰা লোণম্বিলসেৰনত্থং মনুস্সপথং অগমাসি. তস্মিং সমযে বোধিসত্তো তস্মিংযেৰ হিমৰন্তপ্পদেসে কালং অকাসি. কালকিরিযসমযেৰ নং অন্তেৰাসিকা সন্নিপতিত্ৰা পুচ্ছিংসু – ‘‘অত্থি তুম্হেহি কোচি ৰিসেসো অধিগতো’’তি. বোধিসত্তো ‘‘নত্থি কিঞ্চী’’তি ৰত্ৰা অপরিহীনজ্ঝানো আভস্সরব্রহ্মলোকে নিব্বত্তো. সো কিঞ্চাপি আকিঞ্চঞ্ঞাযতনস্স লাভী, বোধিসত্তানং পন অরূপাৰচরে পটিসন্ধি নাম ন হোতি. কস্মা? অভব্বট্ঠানত্তা. ইতি সো অরূপসমাপত্তিলাভী সমানোপি রূপাৰচরে নিব্বত্তি. অন্তেৰাসিকাপিস্স ‘‘আচরিযো ‘নত্থি কিঞ্চী’তি আহ, মোঘা তস্স কালকিরিযা’’তি ন কিঞ্চি সক্কারসম্মানং অকংসু. অথ সো জেট্ঠন্তেৰাসিকো অতিক্কন্তে ৰস্সাৰাসে আগন্ত্ৰা ‘‘কহং আচরিযো’’তি পুচ্ছি. কালং কতোতি. অপি নু আচরিযেন লদ্ধগুণং পুচ্ছিত্থাতি? আম পুচ্ছিম্হাতি. কিং ৰদেতীতি? নত্থি কিঞ্চীতি. মযম্পি ‘‘আচরিযেন লদ্ধগুণো নাম নত্থী’’তি নাস্স সক্কারসম্মানং করিম্হাতি. তুম্হে ভাসিতস্স অত্থং ন জানিত্থ, আচরিযো আকিঞ্চঞ্ঞাযতনস্স লাভীতি.

অথ তে জেট্ঠন্তেৰাসিকস্স কথং ন সদ্দহিংসু. সো পুনপ্পুনং কথেন্তোপি সদ্দহাপেতুং নাসক্খি. অথ বোধিসত্তো আৰজ্জমানো ‘‘অন্ধবালো মহাজনো ময্হং জেট্ঠন্তেৰাসিকস্স কথং ন গণ্হাতি, ইমং কারণং পাকটং করিস্সামী’’তি ব্রহ্মলোকতো ওতরিত্ৰা অস্সমপদমত্থকে ঠিতো আকাসগতোৰ জেট্ঠন্তেৰাসিকস্স পঞ্ঞানুভাৰং ৰণ্ণেত্ৰা ইমং গাথং অভাসি –

‘‘পরোসহস্সম্পি সমাগতানং,

কন্দেয্যুং তে ৰস্সসতং অপঞ্ঞা;

একোৰ সেয্যো পুরিসো সপঞ্ঞো,

যো ভাসিতস্স ৰিজানাতি অত্থ’’ন্তি. (জা. ১.১.১০১);

এৰং ইসিগণং সঞ্ঞাপেত্ৰা বোধিসত্তো ব্রহ্মলোকমেৰ গতো. সেসইসিগণোপি অপরিহীনজ্ঝানো হুত্ৰা কালং কত্ৰা ব্রহ্মলোকপরাযণো জাতো. তত্থ বোধিসত্তো সব্বঞ্ঞুতং পত্তো, জেট্ঠন্তেৰাসিকো সারিপুত্তত্থেরো জাতো, সেসা ইসযো বুদ্ধপরিসা জাতাতি এৰং অতীতেপি সারিপুত্তো মহাপঞ্ঞোৰ সংখিত্তেন ভাসিতস্স ৰিত্থারেন অত্থং জানিতুং সমত্থোতি ৰেদিতব্বো.

ইদমেৰ চ পুথুজ্জনপঞ্চকং অট্ঠুপ্পত্তিং কত্ৰা –

‘‘পরোসতঞ্চেপি সমাগতানং,

ঝাযেয্যুং তে ৰস্সসতং অপঞ্ঞা;

একোৰ সেয্যো পুরিসো সপঞ্ঞো,

সো ভাসিতস্স ৰিজানাতি অত্থ’’ন্তি. (জা. ১.১.১০১) –

ইমম্পি জাতকং কথেসি. তস্স পুরিমজাতকে ৰুত্তনযেনেৰ অত্থো ৰেদিতব্বো.

অপরম্পি ইদমেৰ পুথুজ্জনপঞ্চকং অট্ঠুপ্পত্তিং কত্ৰা –

‘‘যে সঞ্ঞিনো তেপি দুগ্গতা, যেপি অসঞ্ঞিনো তেপি দুগ্গতা;

এতং উভযং ৰিৰজ্জয, তং সমাপত্তিসুখং অনঙ্গণ’’ন্তি. (জা. ১.১.১৩৪) –

ইমং অনঙ্গণজাতকং কথেসি. এত্থ চ আচরিযো কালং করোন্তো অন্তেৰাসিকেহি পুচ্ছিতো ‘‘নেৰসঞ্ঞী নাসঞ্ঞী’’তি আহ. সেসং ৰুত্তনযেনেৰ ৰেদিতব্বং.

অপরম্পি ইদমেৰ পুথুজ্জনপঞ্চকং অট্ঠুপ্পত্তিং কত্ৰা –

‘‘চন্দাভং সূরিযাভঞ্চ, যোধ পঞ্ঞায গাধতি;

অৰিতক্কেন ঝানেন, হোতি আভস্সরূপগো’’তি. (জা. ১.১.১৩৫) –

ইদং চন্দাভজাতকং কথেসি. এত্থাপি আচরিযো কালং করোন্তো অন্তেৰাসিকেহি পুচ্ছিতো ‘‘ওদাতকসিণং চন্দাভং নাম, পীতকসিণং সূরিযাভং নামাতি তং উভযং যো পঞ্ঞায গাধতি পৰিসতি পক্খন্দতি, সো অৰিতক্কেন দুতিযজ্ঝানেন আভস্সরূপগো হোতি, তাদিসো অহ’’ন্তি সন্ধায – ‘‘চন্দাভং সূরিযাভ’’ন্তি আহ. সেসং পুরিমনযেনেৰ ৰেদিতব্বং.

ইদমেৰ চ পুথুজ্জনপঞ্চকং অট্ঠুপ্পত্তিং কত্ৰা –

‘‘আসীসেথেৰ পুরিসো, ন নিব্বিন্দেয্য পণ্ডিতো;

পস্সামি ৰোহং অত্তানং, যথা ইচ্ছিং তথা অহু.

‘‘আসীসেথেৰ পুরিসো, ন নিব্বিন্দেয্য পণ্ডিতো;

পস্সামি ৰোহং অত্তানং, উদকা থলমুব্ভতং.

‘‘ৰাযমেথেৰ পুরিসো, ন নিব্বিন্দেয্য পণ্ডিতো;

পস্সামি ৰোহং অত্তানং, যথা ইচ্ছিং তথা অহু.

‘‘ৰাযমেথেৰ পুরিসো, ন নিব্বিন্দেয্য পণ্ডিতো;

পস্সামি ৰোহং অত্তানং, উদকা থলমুব্ভতং.

‘‘দুক্খূপনীতোপি নরো সপঞ্ঞো,

আসং ন ছিন্দেয্য সুখাগমায;

বহূ হি ফস্সা অহিতা হিতা চ,

অৰিতক্কিতা মচ্চমুপব্বজন্তি.

‘‘অচিন্তিতম্পি ভৰতি, চিন্তিতম্পি ৰিনস্সতি;

ন হি চিন্তামযা ভোগা, ইত্থিযা পুরিসস্স ৰা.

‘‘সরভং গিরিদুগ্গস্মিং, যং ত্ৰং অনুসরী পুরে;

অলীনচিত্তস্স তুৰং, ৰিক্কন্তমনুজীৰসি.

‘‘যো তং ৰিদুগ্গা নরকা সমুদ্ধরি,

সিলায যোগ্গং সরভো করিত্ৰা;

দুক্খূপনীতং মচ্চুমুখা পমোচযি,

অলীনচিত্তং ত মিগং ৰদেসি.

‘‘কিং ত্ৰং নু তত্থেৰ তদা অহোসি,

উদাহু তে কোচি নং এতদক্খা;

ৰিৰট্টচ্ছদ্দো নুসি সব্বদস্সী,

ঞাণং নু তে ব্রাহ্মণ ভিংসরূপং.

‘‘ন চেৰহং তত্থ তদা অহোসিং,

ন চাপি মে কোচি নং এতদক্খা;

গাথাপদানঞ্চ সুভাসিতানং,

অত্থং তদানেন্তি জনিন্দ ধীরা’’তি. (জা. ১.১৩.১৩৪-১৪৩) –

ইমং তেরসনিপাতে সরভজাতকঞ্চ কথেসি. ইমানি পন পঞ্চপি জাতকানি অতীতেপি সংখিত্তেন ভাসিতস্স ৰিত্থারেন অত্থং ময্হং পুত্তো জানাতীতি সত্থারা ধম্মসেনাপতিসারিপুত্তত্থেরস্স পঞ্ঞানুভাৰপ্পকাসনত্থমেৰ কথিতানীতি এৰং আগমনতোপি থেরো মহাপঞ্ঞতায এতদগ্গট্ঠানং লভি.

কথং চিণ্ণৰসিতোতি? চিণ্ণং কিরেতং থেরস্স চতুপরিসমজ্ঝে ধম্মং কথেন্তো চত্তারি সচ্চানি অমুঞ্চিত্ৰা কথেতীতি এৰং চিণ্ণৰসিতোপি থেরো মহাপঞ্ঞতায এতদগ্গট্ঠানং লভি.

কথং গুণাতিরেকতোতি? ঠপেত্ৰা হি দসবলং অঞ্ঞো কোচি একসাৰকোপি মহাপঞ্ঞতায ধম্মসেনাপতিনা সদিসো নাম নত্থীতি এৰং গুণাতিরেকতোপি থেরো মহাপঞ্ঞতায এতদগ্গট্ঠানং লভি.

যথা চ সারিপুত্তত্থেরো, এৰং মহামোগ্গল্লানত্থেরোপি সব্বেহেৰ চতূহিপি ইমেহি কারণেহি এতদগ্গট্ঠানং লভি. কথং? থেরো হি মহিদ্ধিকো মহানুভাৰো নন্দোপনন্দসদিসম্পি নাগরাজানং দমেসীতি এৰং তাৰ অট্ঠুপ্পত্তিতো লভি. ন পনেস ইদানেৰ মহিদ্ধিকো মহানুভাৰো, অতীতে পঞ্চ জাতিসতানি ইসিপব্বজ্জং পব্বজিতোপি মহিদ্ধিকো মহানুভাৰো অহোসীতি.

‘‘যো পব্বজী জাতিসতানি পঞ্চ,

পহায কামানি মনোরমানি;

তং ৰীতরাগং সুসমাহিতিন্দ্রিযং,

পরিনিব্বুতং ৰন্দথ মোগ্গল্লান’’ন্তি. –

এৰং আগমনতোপি লভি. চিণ্ণং চেতং থেরস্স নিরযং গন্ত্ৰা অত্তনো ইদ্ধিবলেন নিরযসত্তানং অস্সাসজননত্থং সীতং অধিট্ঠায চক্কমত্তং পদুমং মাপেত্ৰা পদুমকণ্ণিকাযং নিসীদিত্ৰা ধম্মকথং কথেতি, দেৰলোকং গন্ত্ৰা দেৰসঙ্ঘং কম্মগতিং জানাপেত্ৰা সচ্চকথং কথেতীতি এৰং চিণ্ণৰসিতো লভি. ঠপেত্ৰা চ সম্মাসম্বুদ্ধং অঞ্ঞো সাৰকো মহামোগ্গল্লানো ৰিয মহিদ্ধিকো মহানুভাৰো নত্থীতি এৰং গুণাতিরেকতো লভি.

যথা চেস, এৰং মহাকস্সপত্থেরোপি সব্বেহেৰিমেহি কারণেহি এতদগ্গট্ঠানং লভি. কথং? সম্মাসম্বুদ্ধো হি থেরস্স তিগাৰুতং মগ্গং পচ্চুগ্গমনং কত্ৰা তীহি ওৰাদেহি উপসম্পাদেত্ৰা চীৰরং পরিৰত্তেত্ৰা অদাসি. তস্মিং সমযে মহাপথৰী উদকপরিযন্তং কত্ৰা কম্পি, মহাজনস্স অব্ভন্তরে থেরস্স কিত্তিসদ্দো অজ্ঝোত্থরিত্ৰা গতো. এৰং অট্ঠুপ্পত্তিতো লভি. ন চেস ইদানেৰ ধুতধরো, অতীতে পঞ্চ জাতিসতানি ইসিপব্বজ্জং পব্বজিতোপি ধুতধরোৰ অহোসি.

‘‘যো পব্বজী জাতিসতানি পঞ্চ,

পহায কামানি মনোরমানি;

তং ৰীতরাগং সুসমাহিতিন্দ্রিযং,

পরিনিব্বুতং ৰন্দথ মহাকস্সপ’’ন্তি. –

এৰং আগমনতোপি লভি. চিণ্ণং চেতং থেরস্স চতুপরিসমজ্ঝগতো ধম্মং কথেন্তো দস কথাৰত্থূনি অৰিজহিত্ৰাৰ কথেতীতি এৰং চিণ্ণৰসিতো লভি. ঠপেত্ৰা চ সম্মাসম্বুদ্ধং অঞ্ঞো সাৰকো তেরসহি ধুতগুণেহি মহাকস্সপসদিসো নত্থীতি এৰং গুণাতিরেকতো লভি. ইমিনাৰ নিযামেন তেসং তেসং থেরানং যথালাভতো গুণে কিত্তেতুং ৰট্টতি.

গুণৰসেনেৰ হি সম্মাসম্বুদ্ধো যথা নাম রাজা চক্কৰত্তী চক্করতনানুভাৰেন চক্কৰাল়গব্ভে রজ্জসিরিং পত্ৰা ‘‘পত্তব্বং মে পত্তং, কিং মে ইদানি মহাজনেন ওলোকিতেনা’’তি ন অপ্পোস্সুক্কো হুত্ৰা রজ্জসিরিংযেৰ অনুভোতি, কালেন পন কালং ৰিনিচ্ছযট্ঠানে নিসীদিত্ৰা নিগ্গহেতব্বে নিগ্গণ্হাতি, পগ্গহেতব্বে পগ্গণ্হাতি, ঠানন্তরেসু চ ঠপেতব্বযুত্তকে ঠানন্তরেসু ঠপেতি, এৰমেৰং মহাবোধিমণ্ডে অধিগতস্স সব্বঞ্ঞুতঞ্ঞাণস্স আনুভাৰেন অনুপ্পত্তধম্মরজ্জো ধম্মরাজাপি ‘‘কিং মে ইদানি লোকেন ওলোকিতেন, অনুত্তরং ফলসমাপত্তিসুখং অনুভৰিস্সামী’’তি অপ্পোস্সুক্কতং অনাপজ্জিত্ৰা চতুপরিসমজ্ঝে পঞ্ঞত্তৰরবুদ্ধাসনে নিসিন্নো অট্ঠঙ্গসমন্নাগতং ব্রহ্মস্সরং নিচ্ছারেত্ৰা ধম্মং দেসযমানো নিগ্গহেতব্বযুত্তে কণ্হধম্মে পুগ্গলে সিনেরুপাদে পক্খিপন্তো ৰিয অপাযভযসন্তজ্জনেন নিগ্গহেত্ৰা পগ্গহেতব্বযুত্তে কল্যাণধম্মে পুগ্গলে উক্খিপিত্ৰা ভৰগ্গে নিসীদাপেন্তো ৰিয পগ্গণ্হিত্ৰা ঠানন্তরেসু ঠপেতব্বযুত্তকে অঞ্ঞাসিকোণ্ডঞ্ঞত্থেরাদযো সাৰকে যাথাৰসরসগুণৰসেনেৰ ঠানন্তরেসু ঠপেন্তো এতদগ্গং, ভিক্খৰে, মম সাৰকানং ভিক্খূনং রত্তঞ্ঞূনং, যদিদং অঞ্ঞাসিকোণ্ডঞ্ঞোতিআদিমাহ.

অঞ্ঞাসিকোণ্ডঞ্ঞত্থেরৰত্থু

তত্থ এতদগ্গন্তি পদং ৰুত্তত্থমেৰ. রত্তঞ্ঞূনন্তি রত্তিযো জানন্তানং. ঠপেত্ৰা হি সম্মাসম্বুদ্ধং অঞ্ঞো সাৰকো অঞ্ঞাসিকোণ্ডঞ্ঞত্থেরতো পঠমতরং পব্বজিতো নাম নত্থীতি পব্বজিতকালতো পট্ঠায থেরো চিরকালং রত্তিযো জানাতীতি রত্তঞ্ঞূ. সব্বপঠমং ধম্মস্স পটিৰিদ্ধত্তা যদা তেন ধম্মো পটিৰিদ্ধো, চিরকালতো পট্ঠায তং রত্তিং জানাতীতিপি রত্তঞ্ঞূ. অপিচ খীণাসৰানং রত্তিদিৰসপরিচ্ছেদো পাকটোৰ হোতি, অযঞ্চ পঠমখীণাসৰোতি এৰম্পি রত্তঞ্ঞূনং সাৰকানং অযমেৰ অগ্গো পুরিমকোটিভূতো সেট্ঠো. তেন ৰুত্তং – ‘‘রত্তঞ্ঞূনং যদিদং অঞ্ঞাসিকোণ্ডঞ্ঞো’’তি.

এত্থ চ যদিদন্তি নিপাতো, তস্স থেরং অৰেক্খিত্ৰা যো এসোতি, অগ্গসদ্দং অৰেক্খিত্ৰা যং এতন্তি অত্থো. অঞ্ঞাসিকোণ্ডঞ্ঞোতি ঞাতকোণ্ডঞ্ঞো পটিৰিদ্ধকোণ্ডঞ্ঞো. তেনেৰাহ – ‘‘অঞ্ঞাসি ৰত, ভো, কোণ্ডঞ্ঞো, অঞ্ঞাসি ৰত, ভো, কোণ্ডঞ্ঞোতি. ইতি হিদং আযস্মতো কোণ্ডঞ্ঞস্স অঞ্ঞাসিকোণ্ডঞ্ঞো ত্ৰেৰ নামং অহোসী’’তি (সং. নি. ৫.১০৮১; মহাৰ. ১৭).

অযং পন থেরো কতরবুদ্ধকালে পুব্বপত্থনং অভিনীহারং অকাসি, কদা পব্বজিতো, কদানেন পঠমং ধম্মো অধিগতো, কদা ঠানন্তরে ঠপিতোতি ইমিনা নযেন সব্বেসুপি এতদগ্গেসু পঞ্হকম্মং ৰেদিতব্বং.

তত্থ ইমস্স তাৰ থেরস্স পঞ্হকম্মে অযমনুপুব্বিকথা – ইতো কপ্পসতসহস্সমত্থকে পদুমুত্তরো নাম বুদ্ধো লোকে উদপাদি, তস্স পটিৰিদ্ধসব্বঞ্ঞুতঞ্ঞাণস্স মহাবোধিপল্লঙ্কতো উট্ঠহন্তস্স মহাপথৰিযং ঠপেতুং পাদে উক্খিত্তমত্তে পাদসম্পটিচ্ছনত্থং মহন্তং পদুমপুপ্ফং উগ্গঞ্ছি, তস্স ধুরপত্তানি নৰুতিহত্থানি হোন্তি, কেসরং তিংসহত্থং, কণ্ণিকা দ্ৰাদসহত্থা, পাদেন পতিট্ঠিতট্ঠানং একাদসহত্থং. তস্স পন ভগৰতো সরীরং অট্ঠপণ্ণাসহত্থুব্বেধং অহোসি. তস্স পদুমকণ্ণিকায দক্খিণপাদে পতিট্ঠহন্তে মহাতুম্বমত্তা রেণু উগ্গন্ত্ৰা সরীরং ওকিরমানা ওতরি, ৰামপাদস্স ঠপনকালেপি তথারূপংযেৰ পদুমং উগ্গন্ত্ৰা পাদং সম্পটিচ্ছি. ততোপি উগ্গন্ত্ৰা ৰুত্তপ্পমাণাৰ রেণু সরীরং ওকিরি. তং পন রেণুং অভিভৰমানা তস্স ভগৰতো সরীরপ্পভা নিক্খমিত্ৰা যন্তনাল়িকায ৰিস্সট্ঠসুৰণ্ণরসধারা ৰিয সমন্তা দ্ৰাদসযোজনট্ঠানং একোভাসং অকাসি. ততিযপাদুদ্ধরণকালে পথমুগ্গতং পদুমং অন্তরধাযি, পাদসম্পটিচ্ছনত্থং অঞ্ঞং নৰং পদুমং উগ্গঞ্ছি. ইমিনাৰ নিযামেন যত্থ যত্থ গন্তুকামো হোতি, তত্থ তত্থাপি মহাপদুমং উগ্গচ্ছতি. তেনেৰস্স ‘‘পদুমুত্তরসম্মাসম্বুদ্ধো’’তি নামং অহোসি.

এৰং সো ভগৰা লোকে উপ্পজ্জিত্ৰা ভিক্খুসতসহস্সপরিৰারো মহাজনস্স সঙ্গহত্থায গামনিগমরাজধানীসু ভিক্খায চরন্তো হংসৰতীনগরং সম্পাপুণি. তস্স আগতভাৰং সুত্ৰা পিতা মহারাজা পচ্চুগ্গমনং অকাসি. সত্থা তস্স ধম্মকথং কথেসি. দেসনাপরিযোসানে কেচি সোতাপন্না কেচি সকদাগামী কেচি অনাগামী কেচি অরহত্তং পাপুণিংসু. রাজা স্ৰাতনায দসবলং নিমন্তেত্ৰা পুনদিৰসে কালং আরোচাপেত্ৰা ভিক্খুসতসহস্সপরিৰারস্স ভগৰতো সকনিৰেসনে মহাদানং অদাসি. সত্থা ভত্তানুমোদনং কত্ৰা ৰিহারমেৰ গতো. তেনেৰ নিযামেন পুনদিৰসে নাগরা, পুনদিৰসে রাজাতি দীঘমদ্ধানং দানং অদংসু.

তস্মিং কালে অযং থেরো হংসৰতীনগরে গহপতিমহাসালকুলে নিব্বত্তো. একদিৰসং বুদ্ধানং ধম্মদেসনাকালে হংসৰতীনগরৰাসিনো গন্ধমালাদিহত্থে যেন বুদ্ধো, যেন ধম্মো, যেন সঙ্ঘো, তন্নিন্নে তপ্পোণে তপ্পব্ভারে গচ্ছন্তে দিস্ৰা তেন মহাজনেন সদ্ধিং ধম্মদেসনট্ঠানং অগমাসি. তস্মিঞ্চ সমযে পদুমুত্তরো ভগৰা অত্তনো সাসনে পঠমং পটিৰিদ্ধধম্মং একং ভিক্খুং এতদগ্গট্ঠানে ঠপেসি. সো কুলপুত্তো তং কারণং সুত্ৰা ‘‘মহা ৰতাযং ভিক্খু, ঠপেত্ৰা কির বুদ্ধং অঞ্ঞো ইমিনা পঠমতরং পটিৰিদ্ধধম্মো নাম নত্থি. অহো ৰতাহম্পি অনাগতে একস্স বুদ্ধস্স সাসনে পঠমং ধম্মং পটিৰিজ্ঝনসমত্থো ভৰেয্য’’ন্তি চিন্তেত্ৰা দেসনাপরিযোসানে ভগৰন্তং উপসঙ্কমিত্ৰা ‘‘স্ৰে ময্হং ভিক্খং গণ্হথা’’তি নিমন্তেসি. সত্থা অধিৰাসেসি.

সো ভগৰন্তং অভিৰাদেত্ৰা পদক্খিণং কত্ৰা সকনিৰেসনং গন্ত্ৰা সব্বরত্তিং বুদ্ধানং নিসজ্জনট্ঠানং গন্ধদামমালাদামাদীহি অলঙ্করিত্ৰা পণীতং খাদনীযং ভোজনীযং পটিযাদাপেত্ৰা তস্সা রত্তিযা অচ্চযেন সকনিৰেসনে ভিক্খুসতসহস্সপরিৰারস্স ভগৰতো ৰিচিত্রযাগুখজ্জকপরিৰারং নানারসসূপব্যঞ্জনং গন্ধসালিভোজনং দত্ৰা ভত্তকিচ্চপরিযোসানে তিচীৰরপহোনকে ৰঙ্গপট্টে তথাগতস্স পাদমূলে ঠপেত্ৰা চিন্তেসি – ‘‘নাহং পরিত্তকস্স ঠানস্সত্থায চরামি, মহন্তং ঠানং পত্থেন্তো চরামি, ন খো পন সক্কা একমেৰ দিৰসং দানং দত্ৰা তং ঠানন্তরং পত্থেতু’’ন্তি ‘‘অনুপটিপাটিযা সত্ত দিৰসানি মহাদানং দত্ৰা পত্থেস্সামী’’তি. সো তেনেৰ নিযামেন সত্ত দিৰসানি মহাদানং দত্ৰা ভত্তকিচ্চপরিযোসানে দুস্সকোট্ঠাগারং ৰিৰরাপেত্ৰা উত্তমসুখুমৰত্থং বুদ্ধানং পাদমূলে ঠপেত্ৰা ভিক্খুসতসহস্সং তিচীৰরেন অচ্ছাদেত্ৰা তথাগতং উপসঙ্কমিত্ৰা, ‘‘ভন্তে, যো তুম্হেহি ইতো সত্তদিৰসমত্থকে ভিক্খু এতদগ্গে ঠপিতো, অহম্পি সো ভিক্খু ৰিয অনাগতে উপ্পজ্জনকবুদ্ধস্স সাসনে পব্বজিত্ৰা পঠমং ধম্মং পটিৰিজ্ঝিতুং সমত্থো ভৰেয্য’’ন্তি ৰত্ৰা সত্থু পাদমূলে সীসং কত্ৰা নিপজ্জি.

সত্থা তস্স ৰচনং সুত্ৰা ‘‘ইমিনা কুলপুত্তেন মহাঅধিকারো কতো, সমিজ্ঝিস্সতি নু খো এতস্স অযং পত্থনা নো’’তি অনাগতংসঞাণং পেসেত্ৰা আৰজ্জেন্তো ‘‘সমিজ্ঝিস্সতী’’তি পস্সি. বুদ্ধানঞ্হি অতীতং ৰা অনাগতং ৰা পচ্চুপ্পন্নং ৰা আরব্ভ আৰজ্জেন্তানং আৰরণং নাম নত্থি, অনেককপ্পকোটিসতসহস্সন্তরম্পি চ অতীতং ৰা অনাগতং ৰা চক্কৰাল়সহস্সন্তরম্পি চ পচ্চুপ্পন্নং ৰা আৰজ্জনপটিবদ্ধমেৰ মনসিকারপটিবদ্ধমেৰ হোতি. এৰং অপ্পটিৰত্তিযেন ঞাণেন সো ভগৰা ইদং অদ্দস – ‘‘অনাগতে সতসহস্সকপ্পপরিযোসানে গোতমো নাম বুদ্ধো লোকে উপ্পজ্জিস্সতি, তদা ইমস্স পত্থনা সমিজ্ঝিস্সতী’’তি. অথ নং এৰমাহ – ‘‘অম্ভো, কুলপুত্ত, অনাগতে সতসহস্সকপ্পপরিযোসানে গোতমো নাম বুদ্ধো লোকে উপ্পজ্জিস্সতি, ত্ৰং তস্স পঠমকধম্মদেসনায তেপরিৰট্টধম্মচক্কপ্পৰত্তনসুত্তন্তপরিযোসানে অট্ঠারসহি ব্রহ্মকোটীহি সদ্ধিং সহস্সনযসম্পন্নে সোতাপত্তিফলে পতিট্ঠহিস্সসী’’তি.

ইতি সত্থা তং কুলপুত্তং ব্যাকরিত্ৰা চতুরাসীতি ধম্মক্খন্ধসহস্সানি দেসেত্ৰা অনুপাদিসেসায নিব্বানধাতুযা পরিনিব্বাযি. তস্স পরিনিব্বুতস্স সরীরং সুৰণ্ণক্খন্ধো ৰিয একগ্ঘনং অহোসি, সরীরচেতিযং পনস্সুব্বেধেন সত্তযোজনিকং অকংসু. ইট্ঠকা সুৰণ্ণমযা অহেসুং, হরিতালমনোসিলায মত্তিকাকিচ্চং, তেলেন উদককিচ্চং সাধযিংসু. বুদ্ধানং ধরমানকালে সরীরপ্পভা দ্ৰাদসযোজনিকং ফরি, পরিনিব্বুতানং পন তেসং রস্মি নিক্খমিত্ৰা সমন্তা যোজনসতং অৰত্থরি.

অযং সেট্ঠি বুদ্ধানং সরীরচেতিযং পরিৰারেত্ৰা সহস্সরতনগ্ঘিযানি কারেসি. চেতিযপতিট্ঠাপনদিৰসে অন্তোচেতিযে রতনঘরং কারেসি. সো ৰস্সসতসহস্সং মহন্তং দানাদিমযং কল্যাণকম্মং কত্ৰা ততো চুতো দেৰপুরে নিব্বত্তি. তস্স দেৰেসু চ মনুস্সেসু চ সংসরন্তস্সেৰ নৰনৰুতি কপ্পসহস্সানি নৰ কপ্পসতানি নৰ চ কপ্পা সমতিক্কন্তা. এত্তকস্স কালস্স অচ্চযেন ইতো একনৰুতিকপ্পমত্থকে অযং কুলপুত্তো বন্ধুমতীনগরস্স দ্ৰারসমীপে গামে কুটুম্বিযগেহে নিব্বত্তো. তস্স মহাকালোতি নামং অহোসি, কনিট্ঠভাতা পনস্স চূল়কালো নাম.

তস্মিং সমযে ৰিপস্সী বোধিসত্তো তুসিতপুরা চৰিত্ৰা বন্ধুমতীনগরে বন্ধুমস্স রঞ্ঞো অগ্গমহেসিযা কুচ্ছিস্মিং নিব্বত্তো. অনুক্কমেন সব্বঞ্ঞুতং পত্ৰা ধম্মদেসনত্থায মহাব্রহ্মুনা আযাচিতো ‘‘কস্স নু খো পঠমং ধম্মং দেসেস্সামী’’তি চিন্তেত্ৰা অত্তনো কনিট্ঠং খণ্ডং নাম রাজকুমারং তিস্সঞ্চ পুরোহিতপুত্তং ‘‘পঠমং ধম্মং পটিৰিজ্ঝিতুং সমত্থা’’তি দিস্ৰা ‘‘তেসঞ্চ ধম্মং দেসেস্সামি, পিতু চ সঙ্গহং করিস্সামী’’তি বোধিমণ্ডতো আকাসেনেৰ আগন্ত্ৰা খেমে মিগদাযে ওতিণ্ণো তে পক্কোসাপেত্ৰা ধম্মং দেসেসি. দেসনাপরিযোসানে তে দ্ৰেপি জনা চতুরাসীতিযা পাণসহস্সেহি সদ্ধিং অরহত্তফলে পতিট্ঠহিংসু.

অথাপরেপি বোধিসত্তকালে অনুপব্বজিতা চতুরাসীতিসহস্সা কুলপুত্তা তং পৰত্তিং সুত্ৰা সত্থু সন্তিকং আগন্ত্ৰা ধম্মদেসনং সুত্ৰা অরহত্তফলে পতিট্ঠহিংসু. সত্থা তং তত্থেৰ খণ্ডত্থেরং অগ্গসাৰকট্ঠানে, তিস্সত্থেরং দুতিযসাৰকট্ঠানে ঠপেসি. রাজাপি তং পৰত্তিং সুত্ৰা ‘‘পুত্তং পস্সিস্সামী’’তি উয্যানং গন্ত্ৰা ধম্মদেসনং সুত্ৰা তীসু সরণেসু পতিট্ঠায সত্থারং স্ৰাতনায নিমন্তেত্ৰা অভিৰাদেত্ৰা পদক্খিণং কত্ৰা পক্কামি.

সো পাসাদৰরগতো নিসীদিত্ৰা চিন্তেসি – ‘‘ময্হং জেট্ঠপুত্তো নিক্খমিত্ৰা বুদ্ধো জাতো, দুতিযপুত্তো মে অগ্গসাৰকো, পুরোহিতপুত্তো দুতিযসাৰকো. ইমে চ অৰসেসভিক্খূ গিহিকালেপি ময্হং পুত্তমেৰ পরিৰারেত্ৰা ৰিচরিংসু, ইমে পুব্বেপি দানিপি ময্হমেৰ ভারা, অহমেৰ তে চতূহি পচ্চযেহি উপট্ঠহিস্সামি, অঞ্ঞেসং ওকাসং ন দস্সামী’’তি. ৰিহারদ্ৰারকোট্ঠকতো পট্ঠায যাৰ রাজগেহদ্ৰারা উভোসু পস্সেসু খদিরপাকারং কারেত্ৰা ৰত্থেহি পটিচ্ছাদাপেত্ৰা উপরি সুৰণ্ণতারকৰিচিত্তং সমোলম্বিততালক্খন্ধমত্তৰিৰিধপুপ্ফদামৰিতানং কারেত্ৰা হেট্ঠাভূমিং ৰিচিত্তত্থরণেহি সন্থরাপেত্ৰা অন্তো উভোসু পস্সেসু মালাগচ্ছকেসু পুণ্ণঘটে সকলমগ্গৰাসত্থায চ গন্ধন্তরেসু পুপ্ফানি পুপ্ফন্তরেসু গন্ধে চ ঠপাপেত্ৰা ভগৰতো কালং আরোচাপেসি. ভগৰা ভিক্খুসঙ্ঘপরিৰুতো অন্তোসাণিযাৰ রাজগেহং গন্ত্ৰা ভত্তকিচ্চং কত্ৰা ৰিহারং পচ্চাগচ্ছতি. অঞ্ঞো কোচি দট্ঠুম্পি ন লভতি, কুতো পন ভিক্খং ৰা দাতুং পূজং ৰা কাতুং.

নাগরা চিন্তেসুং – ‘‘অজ্জ সত্থু লোকে উপ্পন্নস্স সত্তমাসাধিকানি সত্ত সংৰচ্ছরানি, মযঞ্চ দট্ঠুম্পি ন লভাম, পগেৰ ভিক্খং ৰা দাতুং পূজং ৰা কাতুং ধম্মং ৰা সোতুং. রাজা ‘ময্হং এৰ বুদ্ধো, ময্হং ধম্মো, ময্হং সঙ্ঘো’তি মমাযিত্ৰা সযমেৰ উপট্ঠহতি. সত্থা চ উপ্পজ্জমানো সদেৰকস্স লোকস্স অত্থায উপ্পন্নো, ন রঞ্ঞোযেৰ অত্থায. ন হি রঞ্ঞোযেৰ নিরযো উণ্হো, অঞ্ঞেসং নীলুপ্পলৰনসদিসো. তস্মা রাজানং এৰং ৰদাম ‘সচে নো সত্থারং দেতি, ইচ্চেতং কুসলং. নো চে দেতি, রঞ্ঞা সদ্ধিং যুজ্ঝিত্ৰা সঙ্ঘং গহেত্ৰা দানাদীনি পুঞ্ঞানি করোম. ন সক্কা খো পন সুদ্ধনাগরেহেৰ এৰং কাতুং, একং জেট্ঠকপুরিসম্পি গণ্হামা’’’তি সেনাপতিং উপসঙ্কমিত্ৰা তস্স তমত্থং আরোচেত্ৰা ‘‘সামি কিং অম্হাকং পক্খো হোহিসি, উদাহু রঞ্ঞো’’তি আহংসু. সো আহ – ‘‘তুম্হাকং পক্খো হোমি, অপিচ খো পন পঠমদিৰসো ময্হং দাতব্বো’’তি. তে সম্পটিচ্ছিংসু.

সো রাজানং উপসঙ্কমিত্ৰা ‘‘নাগরা, দেৰ, তুম্হাকং কুপিতা’’তি আহ. কিমত্থং তাতাতি? সত্থারং কির তুম্হেৰ উপট্ঠহথ, অম্হে ন লভামাতি. সচে ইদানিপি লভন্তি, ন কুপ্পন্তি. অলভন্তা তুম্হেহি সদ্ধিং যুজ্ঝিতুকামা, দেৰাতি. যুজ্ঝামি, তাত, ন ভিক্খুসঙ্ঘং দেমীতি. দেৰ, তুম্হাকং দাসা তুম্হেহি সদ্ধিং যুজ্ঝামাতি ৰদন্তি, তুম্হে কং গণ্হিত্ৰা যুজ্ঝিস্সথাতি? ননু ত্ৰং সেনাপতীতি? নাগরেহি ৰিনা অসমত্থো অহং, দেৰাতি. ততো রাজা ‘‘বলৰন্তো নাগরা, সেনাপতিপি তেসংযেৰ পক্খো’’তি ঞত্ৰা ‘‘অঞ্ঞানি সত্তমাসাধিকানি সত্ত সংৰচ্ছরানি ময্হং ভিক্খুসঙ্ঘং দেন্তূ’’তি আহ. নাগরা ন সম্পটিচ্ছিংসু. রাজা ‘‘ছব্বস্সানি পঞ্চৰস্সানী’’তি এৰং হাপেত্ৰা অঞ্ঞে সত্ত দিৰসে যাচি. নাগরা ‘‘অতিকক্খল়ং দানি রঞ্ঞা সদ্ধিং কাতুং ন ৰট্টতী’’তি অনুজানিংসু. রাজা সত্তমাসাধিকানং সত্তন্নং সংৰচ্ছরানং সজ্জিতং দানমুখং সত্তন্নমেৰ দিৰসানং সজ্জেত্ৰা ছ দিৰসে কেসঞ্চি অপস্সন্তানংযেৰ দানং দত্ৰা সত্তমে দিৰসে নাগরে পক্কোসাপেত্ৰা ‘‘সক্খিস্সথ, তাতা, এৰরূপং দানং দাতু’’ন্তি আহ. তেপি ‘‘ননু অম্হেযেৰ নিস্সাযেতং দেৰস্স উপ্পন্ন’’ন্তি ৰত্ৰা ‘‘সক্খিস্সামা’’তি আহংসু. রাজা পিট্ঠিহত্থেন অস্সূনি পুঞ্ছমানো ভগৰন্তং ৰন্দিত্ৰা, ‘‘ভন্তে, অট্ঠসট্ঠিভিক্খুসতসহস্সং অঞ্ঞস্সু ভারং অকত্ৰা যাৰজীৰং চতূহি পচ্চযেহি উপট্ঠহিস্সামীতি চিন্তেসিং, নাগরানং দানি মে অনুঞ্ঞাতং, নাগরা হি ‘মযং দানং দাতুং ন লভামা’তি ভগৰা কুপ্পন্তি. স্ৰেৰ পট্ঠায তেসং অনুগ্গহং করোথা’’তি আহ.

অথ দুতিযদিৰসে সেনাপতি মহাদানং অদাসি. ততো নাগরা রঞ্ঞা কতসক্কারতো উত্তরিতরং সক্কারসম্মানং কত্ৰা দানং অদংসু. এতেনেৰ নিযামেন সকলনগরস্স পটিপাটিযা গতায দ্ৰারগামৰাসিনো সক্কারসম্মানং সজ্জযিংসু. মহাকালকুটুম্বিকো চূল়কালং আহ – ‘‘দসবলস্স সক্কারসম্মানং স্ৰেৰ অম্হাকং পাপুণাতি, কিং সক্কারং করিস্সামা’’তি? ত্ৰমেৰ ভাতিক জানাহীতি. সচে ময্হং রুচিযা করোসি, অম্হাকং সোল়সকরীসমত্তেসু খেত্তেসু গহিতগব্ভা সালিযো অত্থি. সালিগব্ভং ফালেত্ৰা আদায বুদ্ধানং অনুচ্ছৰিকং পচাপেমাতি. এৰং কযিরমানে কস্সচি উপকারো ন হোতি, তস্মা নেতং ময্হং রুচ্চতীতি. সচে ত্ৰং এৰং ন করোসি, অহং ময্হং সন্তকং মমাযিতুং লভামীতি সোল়সকরীসমত্তং খেত্তং মজ্ঝে ভিন্দিত্ৰা অট্ঠকরীসট্ঠানে সীমং ঠপেত্ৰা সালিগব্ভং ফালেত্ৰা আদায অসম্ভিন্নে খীরে পচাপেত্ৰা চতুমধুরং পক্খিপিত্ৰা বুদ্ধপ্পমুখস্স সঙ্ঘস্স অদাসি. কুটুম্বিকস্স খো গব্ভং ফালেত্ৰা গহিতগহিতট্ঠানং পুন পূরতি. পুথুককালে পুথুকগ্গং নাম অদাসি, গামৰাসীহি সদ্ধিং অগ্গসস্সং নাম অদাসি, লাযনে লাযনগ্গং, ৰেণিকরণে ৰেণগ্গং, কলাপাদীসু কলাপগ্গং খলগ্গং খলভণ্ডগ্গং কোট্ঠগ্গন্তি. এৰং সো একসস্সেৰ নৰ ৰারে অগ্গদানং অদাসি. তম্পি সস্সং অতিরেকং উট্ঠানসম্পন্নং অহোসি.

যাৰ বুদ্ধা ধরতি, যাৰ চ সঙ্ঘো ধরতি, এতেনেৰ নিযামেন কল্যাণকম্মং কত্ৰা ততো চুতো দেৰলোকে নিব্বত্তিত্ৰা দেৰেসু চেৰ মনুস্সেসু চ সংসরন্তো একনৰুতিকপ্পে সম্পত্তিং অনুভৰিত্ৰা অম্হাকং সত্থু লোকে উপ্পন্নকালে কপিলৰত্থুনগরস্স অৰিদূরে দোণৰত্থুব্রাহ্মণগামে ব্রাহ্মণমহাসালকুলে নিব্বত্তি. তস্স নামগ্গহণদিৰসে কোণ্ডঞ্ঞমাণৰোতি নামং অকংসু. সো ৰুড্ঢিমন্ৰায তযো ৰেদে উগ্গহেত্ৰা লক্খণমন্তানং পারং অগমাসি. তেন সমযেন অম্হাকং বোধিসত্তো তুসিতপুরা চৰিত্ৰা কপিলৰত্থুপুরে নিব্বত্তি. তস্স নামগ্গহণদিৰসে অট্ঠুত্তরং ব্রাহ্মণসতং অহতৰত্থেহি অচ্ছাদেত্ৰা অপ্পোদকং মধুপাযাসং পাযেত্ৰা তেসং অন্তরে অট্ঠ জনে উচ্চিনিত্ৰা মহাতলে নিসীদাপেত্ৰা অলঙ্কতপটিযত্তং বোধিসত্তং দুকূলচুম্বটকে নিপজ্জাপেত্ৰা লক্খণপরিগ্গহণত্থং তেসং সন্তিকং আনযিংসু. ধুরাসনে নিসিন্নব্রাহ্মণো মহাপুরিসস্স সরীরসম্পত্তিং ওলোকেত্ৰা দ্ৰে অঙ্গুলিযো উক্খিপি. এৰং পটিপাটিযা সত্ত জনা উক্খিপিংসু. তেসং পন সব্বনৰকো কোণ্ডঞ্ঞমাণৰো, সো বোধিসত্তস্স লক্খণৰরনিপ্ফত্তিং ওলোকেত্ৰা ‘‘অগারমজ্ঝে ঠানকারণং নত্থি, একন্তেনেস ৰিৰট্টচ্ছদো বুদ্ধো ভৰিস্সতী’’তি একমেৰ অঙ্গুলিং উক্খিপি. ইতরে পন সত্ত জনা ‘‘সচে অগারং অজ্ঝাৰসিস্সতি, রাজা ভৰিস্সতি চক্কৰত্তী. সচে পব্বজিস্সতি, বুদ্ধো ভৰিস্সতী’’তি দ্ৰে গতিযো দিস্ৰা দ্ৰে অঙ্গুলিযো উক্খিপিংসু. অযং পন কোণ্ডঞ্ঞো কতাধিকারো পচ্ছিমভৰিকসত্তো পঞ্ঞায ইতরে সত্ত জনে অভিভৰিত্ৰা ‘‘ইমেহি লক্খণেহি সমন্নাগতস্স অগারমজ্ঝে ঠানকরণং নাম নত্থি, নিস্সংসযং বুদ্ধো ভৰিস্সতী’’তি একমেৰ গতিং অদ্দস, তস্মা একং অঙ্গুলিং উক্খিপি. ততো ব্রাহ্মণা অত্তনো ঘরানি গন্ত্ৰা পুত্তে আমন্তযিংসু – ‘‘তাতা, অম্হে মহল্লকা, সুদ্ধোদনমহারাজস্স পুত্তং সব্বঞ্ঞুতপ্পত্তং মযং সম্ভাৰেয্যাম ৰা নো ৰা. তুম্হে তস্মিং কুমারে সব্বঞ্ঞুতং পত্তে তস্স সাসনে পব্বজেয্যাথা’’তি.

সুদ্ধোদনমহারাজাপি বোধিসত্তস্স ধাতিযো আদিং কত্ৰা পরিহারং উপট্ঠপেন্তো বোধিসত্তং ৰুদ্ধিং আপাদেসি. মহাসত্তোপি ৰুদ্ধিপ্পত্তো দেৰো ৰিয সম্পত্তিং অনুভৰিত্ৰা পরিপক্কে ঞাণে কামেসু আদীনৰং নেক্খম্মে চ আনিসংসং দিস্ৰা রাহুলকুমারস্স জাতদিৰসে ছন্নসহাযো কণ্ডকং আরুয্হ দেৰতাহি ৰিৰটেন দ্ৰারেন মহাভিনিক্খমনং নিক্খমিত্ৰা তেনেৰ রত্তিভাগেন তীণি রজ্জানি অতিক্কমিত্ৰা অনোমানদীতীরে পব্বজিত্ৰা ঘটিকারমহাব্রহ্মুনা আভতে অরহদ্ধজে গহিতমত্তেযেৰ ৰস্সসট্ঠিকত্থেরো ৰিয পাসাদিকেন ইরিযাপথেন রাজগহং পত্ৰা তত্থ পিণ্ডায চরিত্ৰা পণ্ডৰপব্বতচ্ছাযায পিণ্ডপাতং পরিভুঞ্জিত্ৰা রঞ্ঞা মাগধেন রজ্জসিরিযা নিমন্তিযমানোপি তং পটিক্খিপিত্ৰা অনুক্কমেন উরুৰেলং গন্ত্ৰা ‘‘রমণীযো ৰত অযং ভূমিভাগো, অলং ৰতিদং কুলপুত্তস্স পধানত্থিকস্স পধানাযা’’তি পধানাভিমুখং চিত্তং উপ্পাদেত্ৰা তত্থ ৰাসং উপগতো.

তেন সমযেন ইতরে সত্ত ব্রাহ্মণা যথাকম্মং গতা, সব্বদহরো পন লক্খণপরিগ্গাহকো কোণ্ডঞ্ঞমাণৰো অরোগো. সো ‘‘মহাপুরিসো পব্বজিতো’’তি সুত্ৰা তেসং ব্রাহ্মণানং পুত্তে উপসঙ্কমিত্ৰা এৰমাহ – ‘‘সিদ্ধত্থকুমারো কির পব্বজিতো. সো হি নিস্সংসযং বুদ্ধো ভৰিস্সতি. সচে তুম্হাকং পিতরো অরোগা অস্সু, অজ্জ নিক্খমিত্ৰা পব্বজেয্যুং. সচে তুম্হেপি ইচ্ছথ, এথ মযং তং মহাপুরিসমনুপব্বজিস্সামা’’তি. তে সব্বে একচ্ছন্দা ভৰিতুং নাসক্খিংসু. তযো জনা ন পব্বজিংসু, কোণ্ডঞ্ঞব্রাহ্মণং জেট্ঠকং কত্ৰা ইতরে চত্তারো পব্বজিংসু. ইমে পঞ্চ পব্বজিত্ৰা গামনিগমরাজধানীসু ভিক্খায চরন্তা বোধিসত্তস্স সন্তিকং অগমিংসু. তে ছব্বস্সানি বোধিসত্তে মহাপধানং পদহন্তে ‘‘ইদানি বুদ্ধো ভৰিস্সতি ইদানি বুদ্ধো ভৰিস্সতী’’তি মহাসত্তং উপট্ঠহমানা সন্তিকাৰচরাৰস্স অহেসুং. যদা পন বোধিসত্তো একতিলতণ্ডুলাদীহি ৰীতিনামেন্তোপি দুক্করকারিকায অরিযধম্মপটিৰেধস্স অভাৰং ঞত্ৰা ওল়ারিকং আহারং আহরি, তদা তে পক্কমিত্ৰা ইসিপতনং অগমংসু.

অথ বোধিসত্তো ওল়ারিকাহারপরিভোগেন ছৰিমংসলোহিতপারিপূরিং কত্ৰা ৰিসাখপুণ্ণমদিৰসে সুজাতায দিন্নং ৰরভোজনং ভুঞ্জিত্ৰা সুৰণ্ণপাতিং নদিযা পটিসোতং খিপিত্ৰা ‘‘অজ্জ বুদ্ধো ভৰিস্সামী’’তি কতসন্নিট্ঠানো সাযন্হসমযে কালেন নাগরাজেন অনেকেহি থুতিসতেহি অভিত্থৰিযমানো মহাবোধিমণ্ডং আরুয্হ অচলট্ঠানে পাচীনলোকধাতুঅভিমুখো পল্লঙ্কেন নিসীদিত্ৰা চতুরঙ্গসমন্নাগতং ৰীরিযং অধিট্ঠায সূরিযে ধরমানেযেৰ মারবলং ৰিধমিত্ৰা পঠমযামে পুব্বেনিৰাসং অনুস্সরিত্ৰা মজ্ঝিমযামে দিব্বচক্খুং ৰিসোধেত্ৰা পচ্চূসকালসমনন্তরে পটিচ্চসমুপ্পাদে ঞাণং ওতারেত্ৰা অনুলোমপটিলোমং পচ্চযাকারৰট্টং সম্মসন্তো সব্ববুদ্ধেহি পটিৰিদ্ধং অসাধারণং সব্বঞ্ঞুতঞ্ঞাণং পটিৰিজ্ঝিত্ৰা নিব্বানারম্মণায ফলসমাপত্তিযা তত্থেৰ সত্তাহং ৰীতিনামেসি.

এতেনেৰ উপাযেন সত্তসত্তাহং বোধিমণ্ডে ৰিহরিত্ৰা রাজাযতনমূলে মধুপিণ্ডিকভোজনং পরিভুঞ্জিত্ৰা পুন অজপালনিগ্রোধমূলং আগন্ত্ৰা তত্থ নিসিন্নো ধম্মগম্ভীরতং পচ্চৰেক্খিত্ৰা অপ্পোস্সুক্কতায চিত্তে নমন্তে মহাব্রহ্মুনা যাচিতো বুদ্ধচক্খুনা লোকং ৰোলোকেন্তো তিক্খিন্দ্রিযাদিভেদে সত্তে দিস্ৰা মহাব্রহ্মুনো ধম্মদেসনায পটিঞ্ঞং দত্ৰা ‘‘কস্স নু খো অহং পঠমং ধম্মং দেসেস্সামী’’তি আল়ারুদকানং কালকতভাৰং ঞত্ৰা পুন চিন্তেন্তো ‘‘বহূপকারা খো পন মে পঞ্চৰগ্গিযা ভিক্খূ, যে মং পধানপহিতত্তং উপট্ঠহিংসু. যংনূনাহং পঞ্চৰগ্গিযানং ভিক্খূনং পঠমং ধম্মং দেসেয্য’’ন্তি চিত্তং উপ্পাদেসি. ইদং পন সব্বমেৰ বুদ্ধানং পরিৰিতক্কমত্তমেৰ, ঠপেত্ৰা পন কোণ্ডঞ্ঞব্রাহ্মণং অঞ্ঞো কোচি পঠমং ধম্মং পটিৰিজ্ঝিতুং সমত্থো নাম নত্থি. সোপি এতদত্থমেৰ কপ্পসতসহস্সং অধিকারকম্মং অকাসি, বুদ্ধপ্পমুখস্স ভিক্খুসঙ্ঘস্স নৰ ৰারে অগ্গসস্সদানং অদাসি.

অথ সত্থা পত্তচীৰরমাদায অনুপুব্বেন ইসিপতনং গন্ত্ৰা যেন পঞ্চৰগ্গিযা ভিক্খূ, তেনুপসঙ্কমি. তে তথাগতং আগচ্ছন্তং দিস্ৰাৰ অত্তনো কতিকায সণ্ঠাতুং নাসক্খিংসু. একো পত্তচীৰরং পটিগ্গহেসি, একো আসনং পঞ্ঞাপেসি, একো পাদোদকং পচ্চুপট্ঠাপেসি, একো পাদে ধোৰি, একো তালৰণ্টং গহেত্ৰা বীজমানো ঠিতো. এৰং তেসু ৰত্তং দস্সেত্ৰা সন্তিকে নিসিন্নেসু কোণ্ডঞ্ঞত্থেরং কাযসক্খিং কত্ৰা সত্থা অনুত্তরং তেপরিৰট্টং ধম্মচক্কপ্পৰত্তনসুত্তন্তং আরভি. মনুস্সপরিসা পঞ্চ জনাৰ অহেসুং, দেৰপরিসা অপরিচ্ছিন্না. দেসনাপরিযোসানে কোণ্ডঞ্ঞত্থেরো অট্ঠারসহি মহাব্রহ্মকোটীহি সদ্ধিং সোতাপত্তিফলে পতিট্ঠিতো. অথ সত্থা ‘‘মযা দুক্করসতাভতং ধম্মং পঠমমেৰ অঞ্ঞাসীতি অঞ্ঞাসিকোণ্ডঞ্ঞো নাম অয’’ন্তি থেরং আলপন্তো ‘‘অঞ্ঞাসি ৰত, ভো, কোণ্ডঞ্ঞো, অঞ্ঞাসি ৰত, ভো, কোণ্ডঞ্ঞো’’তি আহ. তস্স তদেৰ নামং জাতং. তেন ৰুত্তং – ‘‘ইতি হিদং আযস্মতো কোণ্ডঞ্ঞস্স অঞ্ঞাসিকোণ্ডঞ্ঞোত্ৰেৰ নামং অহোসী’’তি.

ইতি থেরো আসাল়্হিপুণ্ণমাযং সোতাপত্তিফলে পতিট্ঠিতো, পাটিপদদিৰসে ভদ্দিযত্থেরো, দুতিযপক্খদিৰসে ৰপ্পত্থেরো, ততিযপক্খদিৰসে মহানামত্থেরো, পক্খস্স চতুত্থিযং অস্সজিত্থেরো সোতাপত্তিফলে পতিট্ঠিতো. পঞ্চমিযা পন পক্খস্স অনত্তলক্খণসুত্তন্তদেসনাপরিযোসানে সব্বেপি অরহত্তে পতিট্ঠিতা.

তেন খো পন সমযেন ছ লোকে অরহন্তো হোন্তি. ততো পট্ঠায সত্থা যসদারকপ্পমুখে পঞ্চপঞ্ঞাস পুরিসে, কপ্পাসিযৰনসণ্ডে তিংসমত্তে ভদ্দৰগ্গিযে, গযাসীসে পিট্ঠিপাসাণে সহস্সমত্তে পুরাণজটিলেতি এৰং মহাজনং অরিযভূমিং ওতারেত্ৰা বিম্বিসারপ্পমুখানি একাদসনহুতানি সোতাপত্তিফলে, একং নহুতং সরণত্তযে পতিট্ঠাপেত্ৰা জম্বুদীপতলে সাসনং পুপ্ফিতফলিতং কত্ৰা সকলজম্বুদীপমণ্ডলং কাসাৰপজ্জোতং ইসিৰাতপটিৰাতং করোন্তো একস্মিং সমযে জেতৰনমহাৰিহারং পত্ৰা তত্থ ৰসন্তো ভিক্খুসঙ্ঘমজ্ঝে পঞ্ঞত্তৰরবুদ্ধাসনগতো ধম্মং দেসেন্তো ‘‘পঠমং ধম্মং পটিৰিদ্ধভিক্খূনং অন্তরে মম পুত্তো কোণ্ডঞ্ঞো অগ্গো’’তি দস্সেতুং এতদগ্গট্ঠানে ঠপেসি.

থেরোপি দ্ৰে অগ্গসাৰকে অত্তনো নিপচ্চকারং করোন্তে দিস্ৰা বুদ্ধানং সন্তিকা অপক্কমিতুকামো হুত্ৰা ‘‘পুণ্ণমাণৰো পব্বজিত্ৰা সাসনে অগ্গধম্মকথিকো ভৰিস্সতী’’তি দিস্ৰা দোণৰত্থুব্রাহ্মণগামং গন্ত্ৰা অত্তনো ভাগিনেয্যং পুণ্ণমাণৰং পব্বাজেত্ৰা ‘‘অযং বুদ্ধানং সন্তিকে ৰসিস্সতী’’তি তস্স বুদ্ধানং অন্তেৰাসিকভাৰং কত্ৰা সযং দসবলং উপসঙ্কমিত্ৰা ‘‘ভগৰা ময্হং গামন্তসেনাসনং অসপ্পাযং, আকিণ্ণো ৰিহরিতুং ন সক্কোমি, ছদ্দন্তদহং গন্ত্ৰা ৰসিস্সামী’’তি ভগৰন্তং অনুজানাপেত্ৰা উট্ঠাযাসনা সত্থারং ৰন্দিত্ৰা ছদ্দন্তদহং গন্ত্ৰা ছদ্দন্তহত্থিকুলং নিস্সায দ্ৰাদস ৰস্সানি ৰীতিনামেত্ৰা তত্থেৰ অনুপাদিসেসায নিব্বানধাতুযা পরিনিব্বাযি.

সারিপুত্ত-মোগ্গল্লানত্থেরৰত্থু

১৮৯-১৯০. দুতিযততিযেসু মহাপঞ্ঞানন্তি মহতিযা পঞ্ঞায সমন্নাগতানং. ইদ্ধিমন্তানন্তি ইদ্ধিযা সম্পন্নানং. সারিপুত্তো মোগ্গল্লানোতি তেসং থেরানং নামং.

ইমেসম্পি পঞ্হকম্মে অযমনুপুব্বিকথা – ইতো সতসহস্সকপ্পাধিকে অসঙ্খ্যেয্যকপ্পমত্থকে সারিপুত্তো ব্রাহ্মণমহাসালকুলে নিব্বত্তি, নামেন সরদমাণৰো নাম অহোসি. মোগ্গল্লানো গহপতিমহাসালকুলে নিব্বত্তি, নামেন সিরিৰড্ঢনকুটুম্বিযো নাম অহোসি. তে উভোপি সহপংসুকীল়িতাৰ সহাযকা অহেসুং. সরদমাণৰো পিতু অচ্চযেন কুলসন্তকং মহাধনং পটিপজ্জিত্ৰা একদিৰসং রহোগতো চিন্তেসি – ‘‘অহং ইধলোকত্তভাৰমেৰ জানামি, নো পরলোকত্তভাৰং, জাতসত্তানঞ্চ মরণং নাম ধুৰং, মযা একং পব্বজ্জং পব্বজিত্ৰা মোক্খধম্মগৰেসনং কাতুং ৰট্টতী’’তি. সো সহাযকং উপসঙ্কমিত্ৰা আহ – ‘‘সম্ম সিরিৰড্ঢন, অহং পব্বজিত্ৰা মোক্খধম্মং গৰেসিস্সামি, ত্ৰং মযা সদ্ধিং পব্বজিতুং সক্খিস্সসী’’তি. ন সক্খিস্সামি, সম্ম, ত্ৰংযেৰ পব্বজাহীতি. সো চিন্তেসি – ‘‘পরলোকং গচ্ছন্তা সহাযে ৰা ঞাতিমিত্তে ৰা গহেত্ৰা গতা নাম নত্থি, অত্তনা কতং অত্তনোৰ হোতী’’তি. ততো রতনকোট্ঠাগারং ৰিৰরাপেত্ৰা কপণদ্ধিকৰণিব্বকযাচকানং মহাদানং দত্ৰা পব্বতপাদং পৰিসিত্ৰা ইসিপব্বজ্জং পব্বজি. তস্স একো দ্ৰে তযোতি এৰং অনুপব্বজ্জং পব্বজিতা চতুসত্ততিসহস্সমত্তা জটিলা অহেসুং. সো পঞ্চাভিঞ্ঞা অট্ঠ চ সমাপত্তিযো নিব্বত্তেত্ৰা তেসম্পি জটিলানং কসিণপরিকম্মং আচিক্খি. তেপি সব্বে পঞ্চ অভিঞ্ঞা অট্ঠ চ সমাপত্তিযো নিব্বত্তেসুং.

তেন সমযেন অনোমদস্সী নাম বুদ্ধো লোকে উদপাদি. নগরং চন্দৰতী নাম অহোসি, পিতা যসৰন্তো নাম খত্তিযো, মাতা যসোধরা নাম দেৰী, বোধি অজ্জুনরুক্খো, নিসভত্থেরো চ অনোমত্থেরো চাতি দ্ৰে অগ্গসাৰকা, ৰরুণত্থেরো নাম উপট্ঠাকো, সুন্দরা চ সুমনা চাতি দ্ৰে অগ্গসাৰিকা, আযু ৰস্সসতসহস্সং অহোসি, সরীরং অট্ঠপঞ্ঞাসহত্থুব্বেধং, সরীরপ্পভা দ্ৰাদসযোজনং ফরি, ভিক্খুসতসহস্সপরিৰারো অহোসি.

অথেকদিৰসং পচ্চূসকালে মহাকরুণাসমাপত্তিতো ৰুট্ঠায লোকং ৰোলোকেন্তো সরদতাপসং দিস্ৰা ‘‘অজ্জ ময্হং সরদতাপসস্স সন্তিকং গতপচ্চযেন ধম্মদেসনা চ মহতী ভৰিস্সতি, সো চ অগ্গসাৰকট্ঠানং পত্থেস্সতি, তস্স সহাযকো সিরিৰড্ঢনকুটুম্বিযো দুতিযসাৰকট্ঠানং, দেসনাপরিযোসানে চস্স পরিৰারা চতুসত্ততিসহস্সজটিলা অরহত্তং পাপুণিস্সন্তি, মযা তত্থ গন্তুং ৰট্টতী’’তি অত্তনো পত্তচীৰরমাদায অঞ্ঞং কঞ্চি অনামন্তেত্ৰা সীহো ৰিয একচরো হুত্ৰা সরদতাপসস্স অন্তেৰাসিকেসু ফলাফলত্থায গতেসু ‘‘বুদ্ধভাৰং মে জানাতূ’’তি তস্স পস্সন্তস্সেৰ সরদতাপসস্স আকাসতো ওতরিত্ৰা পথৰিযং পতিট্ঠাসি. সরদতাপসো বুদ্ধানুভাৰং চেৰ সরীরসম্পত্তিং চস্স দিস্ৰা লক্খণমন্তে সম্মসিত্ৰা ‘‘ইমেহি লক্খণেহি সমন্নাগতো নাম অগারমজ্ঝে ৰসন্তো রাজা হোতি চক্কৰত্তী, পব্বজ্জন্তো লোকে ৰিৰট্টচ্ছদো সব্বঞ্ঞু বুদ্ধো হোতি, অযং পুরিসো নিস্সংসযং বুদ্ধো’’তি জানিত্ৰা পচ্চুগ্গমনং কত্ৰা পঞ্চপতিট্ঠিতেন ৰন্দিত্ৰা আসনং পঞ্ঞাপেত্ৰা অদাসি. নিসীদি ভগৰা পঞ্ঞত্তাসনে. সরদতাপসোপি অত্তনো অনুচ্ছৰিকং আসনং গহেত্ৰা একমন্তং নিসীদি.

তস্মিং সমযে চতুসত্ততিসহস্সজটিলা পণীতপণীতানি ওজৰন্তানি ফলাফলানি গহেত্ৰা আচরিযস্স সন্তিকং সম্পত্তা বুদ্ধানঞ্চেৰ আচরিযস্স চ নিসিন্নাসনং ওলোকেত্ৰা আহংসু – ‘‘আচরিয, মযং ‘ইমস্মিং লোকে তুম্হেহি মহন্ততরো নত্থী’তি ৰিচরাম, অযং পন পুরিসো তুম্হেহি মহন্ততরো মঞ্ঞে’’তি. তাতা, কিং ৰদথ? সাসপেন সদ্ধিং অট্ঠসট্ঠিযোজনসতসহস্সুব্বেধং সিনেরুং সমং কাতুং ইচ্ছথ, সব্বঞ্ঞুবুদ্ধেন সদ্ধিং ময্হং উপমং মা করিত্থ পুত্তকাতি. অথ তে তাপসা ‘‘সচে অযং ইত্তরসত্তো অভৰিস্স, ন অম্হাকং আচরিযো এৰরূপং উপমং আহরেয্য, যাৰ মহা ৰতাযং পুরিসো’’তি সব্বেৰ পাদেসু নিপতিত্ৰা সিরসা ৰন্দিংসু.

অথ নে আচরিযো আহ – ‘‘তাতা, অম্হাকং বুদ্ধানং অনুচ্ছৰিকো দেয্যধম্মো নত্থি, সত্থা চ ভিক্খাচারৰেলায ইধাগতো, মযং যথাবলং দেয্যধম্মং দস্সাম. তুম্হে যং যং পণীতং ফলাফলং, তং তং আহরথা’’তি. আহরাপেত্ৰা হত্থে ধোৰিত্ৰা সযং তথাগতস্স পত্তে পতিট্ঠাপেসি. সত্থারা চ ফলাফলে পটিগ্গহিতমত্তে দেৰতা দিব্বোজং পক্খিপিংসু. তাপসো উদকম্পি সযমেৰ পরিস্সাৰেত্ৰা অদাসি. ততো ভত্তকিচ্চং নিট্ঠাপেত্ৰা হত্থং ধোৰিত্ৰা নিসিন্নে সত্থরি সব্বে অন্তেৰাসিকে পক্কোসিত্ৰা সত্থু সন্তিকে সারণীযং কথং কথেন্তো নিসীদি. সত্থা ‘‘দ্ৰে অগ্গসাৰকা ভিক্খুসঙ্ঘেন সদ্ধিং আগচ্ছন্তূ’’তি চিন্তেসি. তে সত্থু চিত্তং ঞত্ৰা সতসহস্সখীণাসৰপরিৰারা আগন্ত্ৰা সত্থারং ৰন্দিত্ৰা একমন্তং অট্ঠংসু.

ততো সরদতাপসো অন্তেৰাসিকে আমন্তেসি – ‘‘তাতা, বুদ্ধানং নিসিন্নাসনম্পি নীচং, সমণসতসহস্সানম্পি আসনং নত্থি, তুম্হেহি অজ্জ উল়ারং বুদ্ধসক্কারং কাতুং ৰট্টতি, পব্বতপাদতো ৰণ্ণগন্ধসম্পন্নানি পুপ্ফানি আহরথা’’তি. কথনকালো পপঞ্চো ৰিয হোতি, ইদ্ধিমন্তানং পন ৰিসযো অচিন্তেয্যোতি মুহুত্তমত্তেনেৰ তে তাপসা ৰণ্ণগন্ধসম্পন্নানি পুপ্ফানি আহরিত্ৰা বুদ্ধানং যোজনপ্পমাণং পুপ্ফাসনং পঞ্ঞাপেসুং, উভিন্নং অগ্গসাৰকানং তিগাৰুতং, সেসভিক্খূনং অড্ঢযোজনিকাদিভেদং, সঙ্ঘনৰকস্স উসভমত্তং অহোসি. এৰং পঞ্ঞত্তেসু আসনেসু সরদতাপসো তথাগতস্স পুরতো অঞ্জলিং পগ্গহেত্ৰা ঠিতো, ‘‘ভন্তে, ময্হং দীঘরত্তং হিতসুখত্থায ইমং পুপ্ফাসনং অভিরুহথা’’তি আহ.

‘‘নানাপুপ্ফঞ্চ গন্ধঞ্চ, সম্পাদেত্ৰান একতো;

পুপ্ফাসনং পঞ্ঞাপেত্ৰা, ইদং ৰচনমব্রৰিং.

‘‘ইদং তে আসনং ৰীর, পঞ্ঞত্তং তৰনুচ্ছৰিং;

মম চিত্তং পসাদেন্তো, নিসীদ পুপ্ফমাসনে.

‘‘সত্তরত্তিদিৰং বুদ্ধো, নিসীদি পুপ্ফমাসনে;

মম চিত্তং পসাদেত্ৰা, হাসযিত্ৰা সদেৰকে’’তি.

এৰং নিসিন্নে সত্থরি দ্ৰে অগ্গসাৰকা চ সেসভিক্খূ চ অত্তনো অত্তনো পত্তাসনেসু নিসীদিংসু. সরদতাপসো মহন্তং পুপ্ফচ্ছত্তং গহেত্ৰা তথাগতস্স মত্থকে ধারযন্তো অট্ঠাসি. সত্থা ‘‘জটিলানং অযং সক্কারো মহপ্ফলো হোতূ’’তি নিরোধসমাপত্তিং সমাপজ্জি. সত্থু সমাপন্নভাৰং ঞত্ৰা দ্ৰে অগ্গসাৰকাপি সেসভিক্খূপি সমাপত্তিং সমাপজ্জিংসু. তথাগতে সত্তাহং নিরোধসমাপত্তিং সমাপজ্জিত্ৰা নিসিন্নে অন্তেৰাসিকা ভিক্খাচারকালে সম্পত্তে ৰনমূলফলাফলং পরিভুঞ্জিত্ৰা সেসকালে বুদ্ধানং অঞ্জলিং পগ্গয্হ তিট্ঠন্তি. সরদতাপসো পন ভিক্খাচারম্পি অগন্ত্ৰা পুপ্ফচ্ছত্তং গহিতনিযামেনেৰ সত্তাহং পীতিসুখেন ৰীতিনামেসি.

সত্থা নিরোধতো ৰুট্ঠায দক্খিণপস্সে নিসিন্নং অগ্গসাৰকং নিসভত্থেরং আমন্তেসি – ‘‘নিসভ সক্কারকারকানং তাপসানং পুপ্ফাসনানুমোদনং করোহী’’তি. থেরো চক্কৰত্তিরঞ্ঞো সন্তিকা পটিলদ্ধমহালাভো মহাযোধো ৰিয তুট্ঠমানসো সাৰকপারমিঞাণে ঠত্ৰা পুপ্ফাসনানুমোদনং আরভি. তস্স দেসনাৰসানে দুতিযসাৰকং আমন্তেসি – ‘‘ত্ৰম্পি ধম্মং দেসেহী’’তি. অনোমত্থেরো তেপিটকং বুদ্ধৰচনং সম্মসিত্ৰা ধম্মং কথেসি. দ্ৰিন্নং সাৰকানং দেসনায একস্সপি অভিসমযো নাহোসি. অথ সত্থা অপরিমাণে বুদ্ধৰিসযে ঠত্ৰা ধম্মদেসনং আরভি. দেসনাপরিযোসানে ঠপেত্ৰা সরদতাপসং সব্বেপি চতুসত্ততিসহস্সজটিলা অরহত্তং পাপুণিংসু. সত্থা ‘‘এথ ভিক্খৰো’’তি হত্থং পসারেসি. তেসং তাৰদেৰ কেসমস্সু অন্তরধাযি, অট্ঠ পরিক্খারা কাযে পটিমুক্কাৰ অহেসুং.

সরদতাপসো কস্মা অরহত্তং ন পত্তোতি? ৰিক্খিত্তচিত্তত্তা. তস্স কির বুদ্ধানং দুতিযাসনে নিসীদিত্ৰা সাৰকপারমিঞাণে ঠত্ৰা ধম্মং দেসযতো অগ্গসাৰকস্স দেসনং সোতুং আরদ্ধকালতো পট্ঠায ‘‘অহো ৰতাহম্পি অনাগতে উপ্পজ্জনকস্স বুদ্ধস্স সাসনে ইমিনাৰ সাৰকেন লদ্ধধুরং লভেয্য’’ন্তি চিত্তং উদপাদি. সো তেন পরিৰিতক্কেন মগ্গফলপটিৰেধং কাতুং নাসক্খি. তথাগতং পন ৰন্দিত্ৰা সম্মুখে ঠত্ৰা আহ – ‘‘ভন্তে, তুম্হাকং অনন্তরাসনে নিসিন্নো ভিক্খু তুম্হাকং সাসনে কো নাম হোতী’’তি? মযা পৰত্তিতং ধম্মচক্কং অনুপ্পৰত্তেতা সাৰকপারমিঞাণস্স কোটিপ্পত্তো সোল়স পঞ্ঞা পটিৰিজ্ঝিত্ৰা ঠিতো ময্হং সাসনে অগ্গসাৰকো নিসভত্থেরো নাম এসোতি. ‘‘ভন্তে, য্ৰাযং মযা সত্তাহং পুপ্ফচ্ছত্তং ধারেন্তেন সক্কারো কতো, অহং ইমস্স ফলেন অঞ্ঞং সক্কত্তং ৰা ব্রহ্মত্তং ৰা ন পত্থেমি, অনাগতে পন অযং নিসভত্থেরো ৰিয একস্স বুদ্ধস্স অগ্গসাৰকো ভৰেয্য’’ন্তি পত্থনং অকাসি.

সত্থা ‘‘সমিজ্ঝিস্সতি নু খো ইমস্স পুরিসস্স পত্থনা’’তি অনাগতংসঞাণং পেসেত্ৰা ওলোকেন্তো কপ্পসতসহস্সাধিকং অসঙ্খ্যেয্যং অতিক্কমিত্ৰা সমিজ্ঝনভাৰং অদ্দস. দিস্ৰা সরদতাপসং আহ – ‘‘ন তে অযং পত্থনা মোঘা ভৰিস্সতি, অনাগতে পন কপ্পসতসহস্সাধিকং অসঙ্খ্যেয্যং অতিক্কমিত্ৰা গোতমো নাম বুদ্ধো লোকে উপ্পজ্জিস্সতি. তস্স মাতা মহামাযা নাম দেৰী ভৰিস্সতি, পিতা সুদ্ধোদনো নাম রাজা, পুত্তো রাহুলো নাম, উপট্ঠাকো আনন্দো নাম, দুতিযসাৰকো মোগ্গল্লানো নাম, ত্ৰং পন তস্স অগ্গসাৰকো ধম্মসেনাপতি সারিপুত্তো নাম ভৰিস্সসী’’তি. এৰং তাপসং ব্যাকরিত্ৰা ধম্মকথং কথেত্ৰা ভিক্খুসঙ্ঘপরিৰারো আকাসং পক্খন্দি.

সরদতাপসোপি অন্তেৰাসিকত্থেরানং সন্তিকং গন্ত্ৰা সহাযকস্স সিরিৰড্ঢনকুটুম্বিকস্স সাসনং পেসেসি – ‘‘ভন্তে, মম সহাযকস্স ৰদেথ ‘সহাযকেন তে সরদতাপসেন অনোমদস্সিবুদ্ধস্স পাদমূলে অনাগতে উপ্পজ্জনকস্স গোতমবুদ্ধস্স সাসনে অগ্গসাৰকট্ঠানং পত্থিতং, ত্ৰং দুতিযসাৰকট্ঠানং পত্থেহী’’’তি. এৰঞ্চ পন ৰত্ৰা থেরেহি পুরেতরমেৰ একপস্সেন গন্ত্ৰা সিরিৰড্ঢস্স নিৰেসনদ্ৰারে অট্ঠাসি.

সিরিৰড্ঢনো ‘‘চিরস্সং ৰত মে অয্যো আগতো’’তি আসনে নিসীদাপেত্ৰা অত্তনা নীচাসনে নিসিন্নো ‘‘অন্তেৰাসিকপরিসা পন ৰো, ভন্তে, ন পঞ্ঞাযতী’’তি পুচ্ছি. আম সম্ম, অম্হাকং অস্সমং অনোমদস্সী নাম বুদ্ধো আগতো, মযং তস্স অত্তনো বলেন সক্কারং অকরিম্হ. সত্থা সব্বেসং ধম্মং দেসেসি, দেসনাপরিযোসানে ঠপেত্ৰা মং সেসা অরহত্তং পত্ৰা পব্বজিংসূতি. তুম্হে কস্মা ন পব্বজিতাতি? অহং সত্থু অগ্গসাৰকং নিসভত্থেরং দিস্ৰা অনাগতে উপ্পজ্জনকস্স গোতমস্স নাম বুদ্ধস্স সাসনে অগ্গসাৰকট্ঠানং পত্থেসিং, ত্ৰম্পি তস্স সাসনে দুতিযসাৰকট্ঠানং পত্থেহীতি. ময্হং বুদ্ধেহি সদ্ধিং পরিচযো নত্থি, ভন্তেতি. বুদ্ধেহি সদ্ধিং কথনং ময্হং ভারো হোতু, ত্ৰং মহন্তং অধিকারং সজ্জেহীতি.

সিরিৰড্ঢনো সরদতাপসস্স ৰচনং সুত্ৰা অত্তনো নিৰেসনদ্ৰারে রাজমানেন অট্ঠকরীসমত্তং ঠানং সমতলং কারেত্ৰা ৰালুকং ওকিরাপেত্ৰা লাজপঞ্চমানি পুপ্ফানি ৰিকিরিত্ৰা নীলুপ্পলচ্ছদনং মণ্ডপং কারেত্ৰা বুদ্ধাসনং পঞ্ঞাপেত্ৰা সেসভিক্খূনম্পি আসনানি পটিযাদাপেত্ৰা মহন্তং সক্কারসম্মানং সজ্জেত্ৰা বুদ্ধানং নিমন্তনত্থায সরদতাপসস্স সঞ্ঞং অদাসি. তাপসো তস্স ৰচনং সুত্ৰা বুদ্ধপ্পমুখং ভিক্খুসঙ্ঘং গহেত্ৰা তস্স নিৰেসনং অগমাসি. সিরিৰড্ঢনো পচ্চুগ্গমনং কত্ৰা তথাগতস্স হত্থতো পত্তং গহেত্ৰা মণ্ডপং পৰেসেত্ৰা পঞ্ঞত্তাসনেসু নিসিন্নস্স বুদ্ধপ্পমুখস্স ভিক্খুসঙ্ঘস্স দক্খিণোদকং দত্ৰা পণীতেন ভোজনেন পরিৰিসিত্ৰা ভত্তকিচ্চপরিযোসানে বুদ্ধপ্পমুখং ভিক্খুসঙ্ঘং মহারহেহি ৰত্থেহি অচ্ছাদেত্ৰা, ‘‘ভন্তে, নাযং আরম্ভো অপ্পমত্তকট্ঠানত্থায, ইমিনাৰ নিযামেন সত্তাহং অনুকম্পং করোথা’’তি আহ. সত্থা অধিৰাসেসি. সো তেনেৰ নিযামেন সত্তাহং মহাদানং পৰত্তেত্ৰা ভগৰন্তং ৰন্দিত্ৰা অঞ্জলিং পগ্গহেত্ৰা ঠিতো আহ – ‘‘ভন্তে, মম সহাযো সরদতাপসো যস্স সত্থু অগ্গসাৰকো হোমীতি পত্থেসি, অহম্পি তস্সেৰ দুতিযসাৰকো ভৰামী’’তি.

সত্থা অনাগতং ওলোকেত্ৰা তস্স পত্থনায সমিজ্ঝনভাৰং দিস্ৰা ব্যাকাসি – ‘‘ত্ৰং ইতো কপ্পসতসহস্সাধিকং অসঙ্খ্যেয্যং অতিক্কমিত্ৰা গোতমবুদ্ধস্স দুতিযসাৰকো ভৰিস্সসী’’তি. বুদ্ধানং ব্যাকরণং সুত্ৰা সিরিৰড্ঢনো হট্ঠপহট্ঠো অহোসি. সত্থাপি ভত্তানুমোদনং কত্ৰা সপরিৰারো ৰিহারমেৰ গতো. সিরিৰড্ঢনো ততো পট্ঠায যাৰজীৰং কল্যাণকম্মং কত্ৰা দুতিযত্তৰারে কামাৰচরদেৰলোকে নিব্বত্তো. সরদতাপসো চত্তারো ব্রহ্মৰিহারে ভাৰেত্ৰা ব্রহ্মলোকে নিব্বত্তো.

ততো পট্ঠায ইমেসং উভিন্নম্পি অন্তরাকম্মং ন কথিতং. অম্হাকং পন বুদ্ধস্স নিব্বত্তিতো পুরেতরমেৰ সরদতাপসো রাজগহনগরস্স অৰিদূরে উপতিস্সগামে সারিব্রাহ্মণিযা কুচ্ছিস্মিং পটিসন্ধিং গণ্হি. তংদিৰসমেৰ চস্স সহাযোপি রাজগহস্সেৰ অৰিদূরে কোলিতগামে মোগ্গল্লিব্রাহ্মণিযা কুচ্ছিযং পটিসন্ধিং গণ্হি. তানি কির দ্ৰেপি কুলানি যাৰ সত্তমা কুলপরিৰট্টা আবদ্ধপটিবদ্ধসহাযকানেৰ. তেসং দ্ৰিন্নম্পি একদিৰসমেৰ গব্ভপরিহারং অদংসু. দসমাসচ্চযেন জাতানম্পি তেসং ছসট্ঠি ধাতিযো উপট্ঠহিংসু. নামগ্গহণদিৰসে সারিব্রাহ্মণিযা পুত্তস্স উপতিস্সগামে জেট্ঠকুলস্স পুত্তত্তা উপতিস্সোতি নামং অকংসু, ইতরস্স কোলিতগামে জেট্ঠকুলস্স পুত্তত্তা কোলিতোতি নামং অকংসু. তে উভোপি ৰুদ্ধিমন্ৰায সব্বসিপ্পানং পারং অগমংসু.

উপতিস্সমাণৰস্স কীল়নত্থায নদিং ৰা উয্যানং ৰা পব্বতং ৰা গমনকালে পঞ্চ সুৰণ্ণসিৰিকাসতানি পরিৰারা হোন্তি, কোলিতমাণৰস্স পঞ্চ আজঞ্ঞরথসতানি. দ্ৰেপি জনা পঞ্চপঞ্চমাণৰকসতপরিৰারা হোন্তি. রাজগহে চ অনুসংৰচ্ছরং গিরগ্গসমজ্জং নাম হোতি, তেসং দ্ৰিন্নম্পি একট্ঠানেযেৰ মঞ্চং বন্ধন্তি. দ্ৰেপি জনা একতোৰ নিসীদিত্ৰা সমজ্জং পস্সন্তা হসিতব্বট্ঠানে হসন্তি, সংৰেগট্ঠানে সংৰিজ্জন্তি, দাযং দাতুং যুত্তট্ঠানে দাযং দেন্তি. তেসং ইমিনাৰ নিযামেন একদিৰসং সমজ্জং পস্সন্তানং পরিপাকগতত্তা ঞাণস্স পুরিমদিৰসেসু ৰিয হসিতব্বট্ঠানে হাসো ৰা সংৰেগট্ঠানে সংৰেজনং ৰা দাযং দাতুং যুত্তট্ঠানে দাযদানং ৰা নাহোসি. দ্ৰেপি পন জনা এৰং চিন্তযিংসু – ‘‘কিং এত্থ ওলোকেতব্বং অত্থি, সব্বেপিমে অপ্পত্তে ৰস্সসতে অপণ্ণত্তিকভাৰং গমিস্সন্তি. অম্হেহি পন একং মোক্খধম্মং গৰেসিতুং ৰট্টতী’’তি আরম্মণং গহেত্ৰা নিসীদিংসু.

ততো কোলিতো উপতিস্সং আহ – ‘‘সম্ম উপতিস্স, ন ত্ৰং অঞ্ঞসু দিৰসেসু ৰিয হট্ঠপহট্ঠো, অনত্তমনধাতুকোসি, কিং তে সল্লক্খিত’’ন্তি? সম্ম কোলিত, ‘‘এতেসং ওলোকনে সারো নত্থি, নিরত্থকমেতং, অত্তনো মোক্খধম্মং গৰেসিতুং ৰট্টতী’’তি ইদং চিন্তযন্তো নিসিন্নোম্হীতি, ত্ৰং পন কস্মা অনত্তমনোসীতি? সোপি তথেৰ আহ. অথস্স অত্তনা সদ্ধিং একজ্ঝাসযতং ঞত্ৰা উপতিস্সো তং এৰমাহ – ‘‘অম্হাকং উভিন্নম্পি সুচিন্তিতং, মোক্খধম্মং গৰেসন্তেহি পন একা পব্বজ্জা লদ্ধুং ৰট্টতি, কস্স সন্তিকে পব্বজামা’’তি.

তেন খো পন সমযেন সঞ্চযো পরিব্বাজকো রাজগহে পটিৰসতি মহতিযা পরিব্বাজকপরিসায সদ্ধিং. তে ‘‘তস্স সন্তিকে পব্বজিস্সামা’’তি পঞ্চহি মাণৰকসতেহি সদ্ধিং সঞ্চযস্স সন্তিকে পব্বজিংসু. তেসং পব্বজিতকালতো পট্ঠায সঞ্চযো অতিরেকলাভগ্গযসগ্গপ্পত্তো অহোসি. তে কতিপাহেনেৰ সব্বং সঞ্চযস্স সমযং পরিগ্গণ্হিত্ৰা, ‘‘আচরিয, তুম্হাকং জাননসমযো এত্তকোৰ, উদাহু উত্তরিপি অত্থী’’তি পুচ্ছিংসু. সঞ্চযো ‘‘এত্তকোৰ, সব্বং তুম্হেহি ঞাত’’ন্তি আহ. তে তস্স কথং সুত্ৰা চিন্তযিংসু – ‘‘এৰং সতি ইমস্স সন্তিকে ব্রহ্মচরিযৰাসো নিরত্থকো, মযং মোক্খধম্মং গৰেসিতুং নিক্খন্তা, সো ইমস্স সন্তিকে উপ্পাদেতুং ন সক্কা. মহা খো পন জম্বুদীপো, গামনিগমরাজধানিযো চরন্তা মযং অৰস্সং মোক্খধম্মদেসকং একং আচরিযং লভিস্সামা’’তি. তে ততো পট্ঠায যত্থ যত্থ পণ্ডিতা সমণব্রাহ্মণা অত্থীতি সুণন্তি, তত্থ তত্থ গন্ত্ৰা পঞ্হসাকচ্ছং করোন্তি. তেহি পুট্ঠং পঞ্হং অঞ্ঞে কথেতুং সমত্থা নত্থি, তে পন তেসং পঞ্হং ৰিস্সজ্জেন্তি. এৰং সকলজম্বুদীপং পরিগ্গণ্হিত্ৰা নিৰত্তিত্ৰা সকট্ঠানমেৰ আগন্ত্ৰা, ‘‘সম্ম কোলিত, যো পঠমং অমতং অধিগচ্ছতি, সো আরোচেতূ’’তি কতিকং অকংসু.

তেন সমযেন অম্হাকং সত্থা পঠমাভিসম্বোধিং পত্ৰা পৰত্তিতৰরধম্মচক্কো অনুপুব্বেন রাজগহং সম্পত্তো হোতি. অথ ‘‘একসট্ঠি অরহন্তো লোকে উপ্পন্না হোন্তী’’তি ৰুত্তকালে ‘‘চরথ, ভিক্খৰে, চারিকং বহুজনহিতাযা’’তি রতনত্তযগুণপ্পকাসনত্থং উয্যোজিতানং ভিক্খূনং অন্তরে পঞ্চৰগ্গিযব্ভন্তরো অস্সজিত্থেরো পটিনিৰত্তিত্ৰা রাজগহমেৰ আগতো. পুনদিৰসে পাতোৰ পত্তচীৰরং আদায রাজগহং পিণ্ডায পাৰিসি.

তস্মিং সমযে উপতিস্সপরিব্বাজকো পাতোৰ ভত্তকিচ্চং কত্ৰা পরিব্বাজকারামং গচ্ছন্তো থেরং দিস্ৰা চিন্তেসি – ‘‘মযা এৰরূপো পব্বজিতো নাম ন দিট্ঠপুব্বো. যে ৰত লোকে অরহন্তো ৰা অরহত্তমগ্গং ৰা সমাপন্না, অযং তেসং ভিক্খূনং অঞ্ঞতরো, যংনূনাহং ইমং ভিক্খুং উপসঙ্কমিত্ৰা পঞ্হং পুচ্ছেয্যং – ‘কংসি ত্ৰং, আৰুসো উদ্দিস্স, পব্বজিতো, কো ৰা তে সত্থা, কস্স ৰা ত্ৰং ধম্মং রোচেসী’’’তি. অথস্স এতদহোসি – ‘‘অকালো খো ইমং ভিক্খুং পঞ্হং পুচ্ছিতুং, অন্তরঘরং পৰিট্ঠো পিণ্ডায চরতি, যংনূনাহং ইমং ভিক্খুং পিট্ঠিতো পিট্ঠিতো অনুবন্ধেয্যং অত্থিকেহি উপঞ্ঞাতং মগ্গ’’ন্তি. সো থেরং লদ্ধপিণ্ডপাতং অঞ্ঞতরং ওকাসং গচ্ছন্তং দিস্ৰা নিসীদিতুকামতঞ্চস্স ঞত্ৰা অত্তনো পরিব্বাজকপীঠকং পঞ্ঞাপেত্ৰা অদাসি. ভত্তকিচ্চপরিযোসানেপিস্স অত্তনো কুণ্ডিকায উদকং অদাসি.

এৰং আচরিযৰত্তং কত্ৰা কতভত্তকিচ্চেন থেরেন সদ্ধিং মধুরপটিসন্থারং কত্ৰা ‘‘ৰিপ্পসন্নানি খো তে, আৰুসো, ইন্দ্রিযানি, পরিসুদ্ধো ছৰিৰণ্ণো পরিযোদাতো, কংসি ত্ৰং, আৰুসো উদ্দিস্স, পব্বজিতো, কো ৰা তে সত্থা, কস্স ৰা ত্ৰং ধম্মং রোচেসী’’তি পুচ্ছি. থেরো ‘‘অত্থাৰুসো, মহাসমণো সক্যপুত্তো সক্যকুলা পব্বজিতো, তাহং ভগৰন্তং উদ্দিস্স পব্বজিতো, সো চ মে ভগৰা সত্থা, তস্সেৰাহং ভগৰতো ধম্মং রোচেমী’’তি আহ. অথ নং ‘‘কিংৰাদী পনাযস্মতো সত্থা, কিমক্খাযী’’তি পুচ্ছি. থেরো চিন্তেসি – ‘‘ইমে পরিব্বাজকা নাম সাসনস্স পটিপক্খভূতা, ইমস্স সাসনস্স গম্ভীরতং দস্সেস্সামী’’তি. অত্তনো নৰকভাৰং দস্সেন্তো আহ – ‘‘অহং খো, আৰুসো, নৰো অচিরপব্বজিতো, অধুনাগতো ইমং ধম্মৰিনযং, ন তাৰাহং সক্কোমি ৰিত্থারেন ধম্মং দেসেতু’’ন্তি. পরিব্বাজকো ‘‘অহং উপতিস্সো নাম, ত্ৰং যথাসত্তিযা অপ্পং ৰা বহুং ৰা ৰদ, এতং নযসতেন নযসহস্সেন পটিৰিজ্ঝিতুং ময্হং ভারো’’তি চিন্তেত্ৰা আহ –

‘‘অপ্পং ৰা বহুং ৰা ভাসস্সু, অত্থংযেৰ মে ব্রূহি;

অত্থেনেৰ মে অত্থো, কিং কাহসি ব্যঞ্জনং বহু’’ন্তি. (মহাৰ. ৬০);

এৰং ৰুত্তে থেরো ‘‘যে ধম্মা হেতুপ্পভৰা’’তি (মহাৰ. ৬০; অপ. থের. ১.১.২৮৬) গাথং আহ. পরিব্বাজকো পঠমপদদ্ৰযমেৰ সুত্ৰা সহস্সনযসম্পন্নে সোতাপত্তিমগ্গে পতিট্ঠহি. ইতরং পদদ্ৰযং সোতাপন্নকালে নিট্ঠাসি.

সো সোতাপন্নো হুত্ৰা উপরিৰিসেসে অপ্পৰত্তন্তে ‘‘ভৰিস্সতি এত্থ কারণ’’ন্তি সল্লক্খেত্ৰা থেরং আহ – ‘‘ভন্তে, মা উপরি ধম্মদেসনং ৰড্ঢযিত্থ, এত্তকমেৰ হোতু, কহং অম্হাকং সত্থা ৰসতী’’তি? ৰেল়ুৰনে পরিব্বাজকাতি. ভন্তে, তুম্হে পুরতো যাথ, ময্হং একো সহাযকো অত্থি. অম্হেহি চ অঞ্ঞমঞ্ঞং কতিকা কতা ‘‘যো পঠমং অমতং অধিগচ্ছতি, সো আরোচেতূ’’তি. অহং তং পটিঞ্ঞং মোচেত্ৰা সহাযকং গহেত্ৰা তুম্হাকং গতমগ্গেনেৰ সত্থু সন্তিকং আগমিস্সামীতি পঞ্চপতিট্ঠিতেন থেরস্স পাদেসু নিপতিত্ৰা তিক্খত্তুং পদক্খিণং কত্ৰা থেরং উয্যোজেত্ৰা পরিব্বাজকারামাভিমুখো অগমাসি.

কোলিতপরিব্বাজকো তং দূরতোৰ আগচ্ছন্তং দিস্ৰা ‘‘অজ্জ ময্হং সহাযকস্স মুখৰণ্ণো ন অঞ্ঞেসু দিৰসেসু ৰিয, অদ্ধা তেন অমতং অধিগতং ভৰিস্সতী’’তি অমতাধিগমং পুচ্ছি. সোপিস্স ‘‘আম আৰুসো, অমতং অধিগত’’ন্তি পটিজানিত্ৰা তমেৰ গাথং অভাসি. গাথাপরিযোসানে কোলিতো সোতাপত্তিফলে পতিট্ঠহিত্ৰা আহ – ‘‘কহং কির, সম্ম, সত্থা ৰসতী’’তি? ‘‘ৰেল়ুৰনে কির, সম্ম, ৰসতী’’তি এৰং নো আচরিযেন অস্সজিত্থেরেন কথিতন্তি. তেন হি সম্ম আযাম, সত্থারং পস্সিস্সামাতি. সারিপুত্তত্থেরো চ নামেস সদাপি আচরিযপূজকোৰ, তস্মা সহাযং কোলিতমাণৰং এৰমাহ – ‘‘সম্ম, অম্হেহি অধিগতং অমতং অম্হাকং আচরিযস্স সঞ্চযপরিব্বাজকস্সাপি কথেস্সাম. বুজ্ঝমানো পটিৰিজ্ঝিস্সতি, অপ্পটিৰিজ্ঝন্তো অম্হাকং সদ্দহিত্ৰা সত্থু সন্তিকং গমিস্সতি, বুদ্ধানং দেসনং সুত্ৰা মগ্গফলপটিৰেধং করিস্সতী’’তি.

ততো দ্ৰেপি জনা সঞ্চযস্স সন্তিকং গন্ত্ৰা, ‘‘আচরিয, ত্ৰং কিং করোসি, বুদ্ধো লোকে উপ্পন্নো, স্ৰাক্খাতো ধম্মো, সুপ্পটিপন্নো সঙ্ঘো. আযাম, দসবলং পস্সিস্সামা’’তি. সো ‘‘কিং ৰদেথ, তাতা’’তি তেপি ৰারেত্ৰা লাভগ্গযসগ্গপ্পত্তিমেৰ তেসং দীপেসি. তে ‘‘অম্হাকং এৰরূপো অন্তেৰাসিকৰাসো নিচ্চমেৰ হোতু, তুম্হাকং পন গমনং ৰা অগমনং ৰা জানাথা’’তি আহংসু. সঞ্চযো ‘‘ইমে এত্তকং জানন্তা মম ৰচনং ন করিস্সন্তী’’তি ঞত্ৰা ‘‘গচ্ছথ তুম্হে, তাতা, অহং মহল্লককালে অন্তেৰাসিকৰাসং ৰসিতুং ন সক্কোমী’’তি আহ. তে অনেকেহিপি কারণেহি তং বোধেতুং অসক্কোন্তা অত্তনো ওৰাদে ৰত্তমানং জনং আদায ৰেল়ুৰনং অগমংসু. অথ তেসং পঞ্চসু অন্তেৰাসিকসতেসু অড্ঢতেয্যসতা নিৰত্তিংসু, অড্ঢতেয্যসতা তেহি সদ্ধিং অগমংসু.

সত্থা চতুপরিসমজ্ঝে ধম্মং দেসেন্তো তে দূরতোৰ দিস্ৰা ভিক্খূ আমন্তেসি – ‘‘এতে, ভিক্খৰে, দ্ৰে সহাযা আগচ্ছন্তি কোলিতো চ উপতিস্সো চ, এতং মে সাৰকযুগং ভৰিস্সতি অগ্গং ভদ্দযুগ’’ন্তি. অথ তেসং পরিসায চরিযৰসেন ধম্মদেসনং ৰড্ঢেসি. ঠপেত্ৰা দ্ৰে অগ্গসাৰকে সব্বেপি তে অড্ঢতেয্যসতা পরিব্বাজকা অরহত্তং পাপুণিংসু. সত্থা ‘‘এথ ভিক্খৰো’’তি হত্থং পসারেসি. সব্বেসং কেসমস্সু অন্তরধাযি, ইদ্ধিমযং পত্তচীৰরং কাযপ্পটিবদ্ধং অহোসি. দ্ৰিন্নং অগ্গসাৰকানম্পি ইদ্ধিমযপত্তচীৰরং আগতং, উপরিমগ্গত্তযকিচ্চং পন ন নিট্ঠাসি. কস্মা? সাৰকপারমিঞাণস্স মহন্ততায.

অথাযস্মা মহামোগ্গল্লানো পব্বজিতদিৰসতো সত্তমে দিৰসে মগধরট্ঠে কল্লৰালগামকং উপনিস্সায সমণধম্মং করোন্তো থিনমিদ্ধে ওক্কন্তে সত্থারা সংৰেজিতো থিনমিদ্ধং ৰিনোদেত্ৰা তথাগতেন দিন্নং ধাতুকম্মট্ঠানং সুণন্তোৰ উপরিমগ্গত্তযকিচ্চং নিট্ঠাপেত্ৰা সাৰকপারমিঞাণস্স মত্থকং পত্তো. সারিপুত্তত্থেরোপি পব্বজিতদিৰসতো অদ্ধমাসং অতিক্কমিত্ৰা সত্থারা সদ্ধিং তমেৰ রাজগহং উপনিস্সায সূকরখতলেণে ৰিহরন্তো অত্তনো ভাগিনেয্যস্স দীঘনখপরিব্বাজকস্স ৰেদনাপরিগ্গহসুত্তন্তে (ম. নি. ২.২০৫-২০৬) দেসিযমানে সুত্তানুসারেন ঞাণং পেসেত্ৰা পরস্স ৰড্ঢিতভত্তং ভুঞ্জন্তো ৰিয সাৰকপারমিঞাণস্স মত্থকং পত্তো. ভাগিনেয্যো পনস্স দেসনাপরিযোসানে সোতাপত্তিফলে পতিট্ঠিতো. ইতি দ্ৰিন্নম্পি মহাসাৰকানং তথাগতে রাজগহে ৰিহরন্তেযেৰ সাৰকপারমিঞাণকিচ্চং মত্থকং পত্তং. অপরভাগে পন সত্থা জেতৰনে ৰিহরন্তো ‘‘মহাপঞ্ঞানং যদিদং সারিপুত্তো, ইদ্ধিমন্তানং যদিদং মহামোগ্গল্লানো’’তি দ্ৰেপি মহাসাৰকে ঠানন্তরে ঠপেসীতি.

মহাকস্সপত্থেরৰত্থু

১৯১. চতুত্থে ধুতৰাদানন্তি এত্থ ধুতো ৰেদিতব্বো, ধুতৰাদো ৰেদিতব্বো, ধুতধম্মা ৰেদিতব্বা, ধুতঙ্গানি ৰেদিতব্বানি. তত্থ ধুতোতি ধুতকিলেসো ৰা পুগ্গলো কিলেসধুননো ৰা ধম্মো.

ধুতৰাদোতি এত্থ পন অত্থি ধুতো ন ধুতৰাদো, অত্থি ন ধুতো ধুতৰাদো, অত্থি নেৰ ধুতো ন ধুতৰাদো, অত্থি ধুতো চেৰ ধুতৰাদো চ. তত্থ যো ধুতঙ্গেন অত্তনো কিলেসে ধুনি, পরং পন ধুতঙ্গেন ন ওৰদতি নানুসাসতি বাকুলত্থেরো ৰিয, অযং ধুতো ন ধুতৰাদো. যথাহ – ‘‘তযিদং আযস্মা বাকুলো ধুতো ন ধুতৰাদো’’তি. যো পন ধুতঙ্গেন অত্তনো কিলেসে ন ধুনি, কেৰলং অঞ্ঞে ধুতঙ্গেন ওৰদতি অনুসাসতি উপনন্দত্থেরো ৰিয, অযং ন ধুতো ধুতৰাদো. যথাহ – ‘‘তযিদং আযস্মা উপনন্দো ন ধুতো ধুতৰাদো’’তি. যো পন উভযৰিপন্নো লাল়ুদাযী ৰিয, অযং নেৰ ধুতো ন ধুতৰাদো. যথাহ – ‘‘তযিদং আযস্মা লাল়ুদাযী নেৰ ধুতো ন ধুতৰাদো’’তি. যো পন উভযসম্পন্নো আযস্মা মহাকস্সপত্থেরো ৰিয, অযং ধুতো চেৰ ধুতৰাদো চ. যথাহ – ‘‘তযিদং আযস্মা মহাকস্সপো ধুতো চেৰ ধুতৰাদো চা’’তি.

ধুতধম্মা ৰেদিতব্বাতি অপ্পিচ্ছতা সন্তুট্ঠিতা সল্লেখতা পৰিৰেকতা ইদমট্ঠিকতাতি ইমে ধুতঙ্গচেতনায পরিৰারা পঞ্চ ধম্মা ‘‘অপ্পিচ্ছংযেৰ নিস্সাযা’’তিআদিৰচনতো (অ. নি. ৫.১৮১; পরি. ৩২৫) ধুতধম্মা নাম. তত্থ অপ্পিচ্ছতা চ সন্তুট্ঠিতা চ অলোভো, সল্লেখতা চ পৰিৰেকতা চ দ্ৰীসু ধম্মেসু অনুপতন্তি অলোভে চেৰ অমোহে চ, ইদমট্ঠিতা ঞাণমেৰ. তত্থ অলোভেন পটিক্খেপৰত্থূসু লোভং, অমোহেন তেস্ৰেৰ আদীনৰপ্পটিচ্ছাদকং মোহং ধুনাতি. অলোভেন চ অনুঞ্ঞাতানং পটিসেৰনমুখেন পৰত্তং কামসুখল্লিকানুযোগং, অমোহেন ধুতঙ্গেসু অতিসল্লেখমুখেন পৰত্তং অত্তকিলমথানুযোগং ধুনাতি. তস্মা ইমে ধম্মা ধুতধম্মাতি ৰেদিতব্বা.

ধুতঙ্গানি ৰেদিতব্বানীতি তেরস ধুতঙ্গানি ৰেদিতব্বানি পংসুকূলিকঙ্গং…পে… নেসজ্জিকঙ্গন্তি.

ধুতৰাদানং যদিদং মহাকস্সপোতি যত্তকা ধুতৰাদং ৰদন্তি, তেসং সব্বেসম্পি অন্তরে অযং মহাকস্সপত্থেরো অগ্গোতি অগ্গট্ঠানে ঠপেসি. মহাকস্সপোতি উরুৰেল়কস্সপো নদীকস্সপো গযাকস্সপো কুমারকস্সপোতি ইমে খুদ্দানুখুদ্দকে থেরে উপাদায অযং মহা, তস্মা মহাকস্সপোতি ৰুত্তো.