ভদ্দিযত্থেরৰত্থু

১৯৩. ছট্ঠে উচ্চাকুলিকানন্তি উচ্চে কুলে জাতানং. ভদ্দিযোতি অনুরুদ্ধত্থেরেন সদ্ধিং নিক্খমন্তো সক্যরাজা. কাল়িগোধায পুত্তোতি কাল়ৰণ্ণা সা দেৰী, গোধাতি পনস্সা নামং. তস্মা কাল়িগোধাতি ৰুচ্চতি, তস্সা পুত্তোতি অত্থো. কস্মা পনাযং উচ্চাকুলিকানং অগ্গোতি ৰুত্তো, কিং ততো উচ্চাকুলিকতরা নত্থীতি? আম নত্থি. তস্স হি মাতা সাকিযানীনং অন্তরে ৰযেন সব্বজেট্ঠিকা, সোযেৰ চ সাকিযকুলে সম্পত্তং রজ্জং পহায পব্বজিতো. তস্মা উচ্চাকুলিকানং অগ্গোতি ৰুত্তো. অপিচ পুব্বপত্থনানুভাৰেন চেস অনুপটিপাটিযা পঞ্চ জাতিসতানি রাজকুলে নিব্বত্তিত্ৰা রজ্জং কারেসিযেৰ. ইমিনাপি কারণেন উচ্চাকুলিকানং অগ্গোতি ৰুত্তো.

পঞ্হকম্মে পনস্স অযমনুপুব্বিকথা – অযম্পি হি অতীতে পদুমুত্তরবুদ্ধকালে মহাভোগকুলে নিব্বত্তো ৰুত্তনযেনেৰ ধম্মস্সৰনত্থায গতো. তংদিৰসং সত্থারং একং ভিক্খুং উচ্চাকুলিকানং ভিক্খূনং অগ্গট্ঠানে ঠপেন্তং দিস্ৰা ‘‘মযাপি অনাগতে একস্স বুদ্ধস্স সাসনে উচ্চাকুলিকানং ভিক্খূনং অগ্গেন ভৰিতুং ৰট্টতী’’তি তথাগতং নিমন্তেত্ৰা সত্ত দিৰসানি বুদ্ধপ্পমুখস্স ভিক্খুসঙ্ঘস্স মহাদানং দত্ৰা, ‘‘ভন্তে, অহং ইমস্স দানস্স ফলেন নাঞ্ঞং সম্পত্তিং আকঙ্খামি, অনাগতে পন একস্স বুদ্ধস্স সাসনে উচ্চাকুলিকানং ভিক্খূনং অগ্গো ভৰেয্য’’ন্তি পত্থযিত্ৰা পাদমূলে নিপজ্জি.

সত্থা অনাগতং ওলোকেন্তো সমিজ্ঝনভাৰং দিস্ৰা ‘‘সমিজ্ঝিস্সতি তে ইদং কম্মং, ইতো কপ্পসতসহস্সাৰসানে গোতমো নাম বুদ্ধো উপ্পজ্জিস্সতি, ত্ৰং তস্স সাসনে উচ্চাকুলিকানং ভিক্খূনং অগ্গো ভৰিস্সসী’’তি ব্যাকরিত্ৰা ভত্তানুমোদনং কত্ৰা ৰিহারং অগমাসি. সোপি তং ব্যাকরণং লভিত্ৰা উচ্চাকুলিকসংৰত্তনিককম্মং পুচ্ছিত্ৰা ধম্মাসনানি কারেত্ৰা তেসু পচ্চত্থরণানি সন্থরাপেত্ৰা ধম্মবীজনিযো ধম্মকথিকৰট্টং উপোসথাগারে পদীপতেলদানন্তি এৰং যাৰজীৰং বহুৰিধং কল্যাণকম্মং কত্ৰা তত্থ কালকতো দেৰেসু চ মনুস্সেসু চ সংসরন্তো কস্সপদসবলস্স চ অম্হাকঞ্চ ভগৰতো অন্তরে বারাণসিযং কুটুম্বিযঘরে নিব্বত্তো.

তেন চ সমযেন সম্বহুলা পচ্চেকবুদ্ধা গন্ধমাদনপব্বতা আগম্ম বারাণসিযং গঙ্গায তীরে ফাসুকট্ঠানে নিসীদিত্ৰা পিণ্ডপাতং পরিভুঞ্জন্তি. সো কুটুম্বিযো তেসং নিবদ্ধমেৰ তস্মিং ঠানে ভত্তৰিস্সগ্গকরণং ঞত্ৰা অট্ঠ পাসাণফলকানি অত্থরিত্ৰা যাৰজীৰং পচ্চেকবুদ্ধে উপট্ঠহি. অথেকং বুদ্ধন্তরং দেৰমনুস্সেসু সংসরিত্ৰা ইমস্মিং বুদ্ধুপ্পাদে কপিলৰত্থুনগরে খত্তিযকুলে নিব্বত্তি. নামগ্গহণদিৰসে চস্স ভদ্দিযকুমারোতি নামং অকংসু. সো ৰযং আগম্ম হেট্ঠা অনুরুদ্ধসুত্তে ৰুত্তনযেনেৰ ছন্নং খত্তিযানং অব্ভন্তরো হুত্ৰা সত্থরি অনুপিযঅম্বৰনে ৰিহরন্তে সত্থু সন্তিকে পব্বজিত্ৰা অরহত্তং পাপুণি. অথ সত্থা অপরভাগে জেতৰনমহাৰিহারে ৰিহরন্তো ‘‘মম সাসনে উচ্চাকুলিকানং কাল়িগোধায পুত্তো ভদ্দিযত্থেরো অগ্গো’’তি অগ্গট্ঠানে ঠপেসি.