৪. অরূপধাতু

১০১৮. অরূপধাতুযা উপপত্তিক্খণে কতি খন্ধা পাতুভৰন্তি…পে… কতি চিত্তানি পাতুভৰন্তি?

অরূপধাতুযা উপপত্তিক্খণে চত্তারো খন্ধা পাতুভৰন্তি, দ্ৰে আযতনানি পাতুভৰন্তি, দ্ৰে ধাতুযো পাতুভৰন্তি, একং সচ্চং পাতুভৰতি, অট্ঠিন্দ্রিযানি পাতুভৰন্তি, তযো হেতূ পাতুভৰন্তি, তযো আহারা পাতুভৰন্তি, একো ফস্সো পাতুভৰতি, একা ৰেদনা… একা সঞ্ঞা… একা চেতনা… একং চিত্তং পাতুভৰতি.

১০১৯. অরূপধাতুযা উপপত্তিক্খণে কতমে চত্তারো খন্ধা পাতুভৰন্তি? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – অরূপধাতুযা উপপত্তিক্খণে ইমে চত্তারো খন্ধা পাতুভৰন্তি.

অরূপধাতুযা উপপত্তিক্খণে কতমানি দ্ৰে আযতনানি পাতুভৰন্তি? মনাযতনং, ধম্মাযতনং – অরূপধাতুযা উপপত্তিক্খণে ইমানি দ্ৰে আযতনানি পাতুভৰন্তি.

অরূপধাতুযা উপপত্তিক্খণে কতমা দ্ৰে ধাতুযো পাতুভৰন্তি? মনোৰিঞ্ঞাণধাতু, ধম্মধাতু – অরূপধাতুযা উপপত্তিক্খণে ইমা দ্ৰে ধাতুযো পাতুভৰন্তি.

অরূপধাতুযা উপপত্তিক্খণে কতমং একং সচ্চং পাতুভৰতি? দুক্খসচ্চং – অরূপধাতুযা উপপত্তিক্খণে ইদং একং সচ্চং পাতুভৰতি.

অরূপধাতুযা উপপত্তিক্খণে কতমানি অট্ঠিন্দ্রিযানি পাতুভৰন্তি? মনিন্দ্রিযং, জীৰিতিন্দ্রিযং, উপেক্খিন্দ্রিযং, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং – অরূপধাতুযা উপপত্তিক্খণে ইমানি অট্ঠিন্দ্রিযানি পাতুভৰন্তি.

অরূপধাতুযা উপপত্তিক্খণে কতমে তযো হেতূ পাতুভৰন্তি? অলোভো ৰিপাকহেতু, অদোসো ৰিপাকহেতু, অমোহো ৰিপাকহেতু – অরূপধাতুযা উপপত্তিক্খণে ইমে তযো হেতূ পাতুভৰন্তি.

অরূপধাতুযা উপপত্তিক্খণে কতমে তযো আহারা পাতুভৰন্তি? ফস্সাহারো, মনোসঞ্চেতনাহারো, ৰিঞ্ঞাণাহারো – অরূপধাতুযা উপপত্তিক্খণে ইমে তযো আহারা পাতুভৰন্তি.

অরূপধাতুযা উপপত্তিক্খণে কতমো একো ফস্সো পাতুভৰতি? মনোৰিঞ্ঞাণধাতুসম্ফস্সো – অরূপধাতুযা উপপত্তিক্খণে অযং একো ফস্সো পাতুভৰতি.

অরূপধাতুযা উপপত্তিক্খণে কতমা একা ৰেদনা…পে… একা সঞ্ঞা… একা চেতনা… একং চিত্তং পাতুভৰতি? মনোৰিঞ্ঞাণধাতু – অরূপধাতুযা উপপত্তিক্খণে ইদং একং চিত্তং পাতুভৰতি.