৪. অপরিযাপন্নং

৯৯৭. অপরিযাপন্নে কতি খন্ধা…পে… কতি চিত্তানি?

অপরিযাপন্নে চত্তারো খন্ধা, দ্ৰে আযতনানি, দ্ৰে ধাতুযো, দ্ৰে সচ্চানি, দ্ৰাদসিন্দ্রিযানি, ছ হেতূ, তযো আহারা, একো ফস্সো, একা ৰেদনা, একা সঞ্ঞা, একা চেতনা, একং চিত্তং.

৯৯৮. তত্থ কতমে অপরিযাপন্নে চত্তারো খন্ধা? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ৰুচ্চন্তি ‘‘অপরিযাপন্নে চত্তারো খন্ধা’’.

তত্থ কতমানি অপরিযাপন্নে দ্ৰে আযতনানি? মনাযতনং, ধম্মাযতনং – ইমানি ৰুচ্চন্তি ‘‘অপরিযাপন্নে দ্ৰে আযতনানি’’.

তত্থ কতমা অপরিযাপন্নে দ্ৰে ধাতুযো? মনোৰিঞ্ঞাণধাতু, ধম্মধাতু – ইমা ৰুচ্চন্তি ‘‘অপরিযাপন্নে দ্ৰে ধাতুযো’’.

তত্থ কতমানি অপরিযাপন্নে দ্ৰে সচ্চানি? মগ্গসচ্চং, নিরোধসচ্চং – ইমানি ৰুচ্চন্তি ‘‘অপরিযাপন্নে দ্ৰে সচ্চানি’’.

তত্থ কতমানি অপরিযাপন্নে দ্ৰাদসিন্দ্রিযানি? মনিন্দ্রিযং, জীৰিতিন্দ্রিযং, সোমনস্সিন্দ্রিযং, উপেক্খিন্দ্রিযং, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং, অনঞ্ঞাতঞ্ঞস্সামীতিন্দ্রিযং, অঞ্ঞিন্দ্রিযং, অঞ্ঞাতাৰিন্দ্রিযং – ইমানি ৰুচ্চন্তি ‘‘অপরিযাপন্নে দ্ৰাদসিন্দ্রিযানি’’.

তত্থ কতমে অপরিযাপন্নে ছ হেতূ? তযো কুসলহেতূ, তযো অব্যাকতহেতূ.

তত্থ কতমে তযো কুসলহেতূ? অলোভো কুসলহেতু, অদোসো কুসলহেতু, অমোহো কুসলহেতু – ইমে তযো কুসলহেতূ.

তত্থ কতমে তযো অব্যাকতহেতূ? কুসলানং ধম্মানং ৰিপাকতো অলোভো, অদোসো, অমোহো – ইমে তযো অব্যাকতহেতূ. ইমে ৰুচ্চন্তি ‘‘অপরিযাপন্নে ছ হেতূ’’.

তত্থ কতমে অপরিযাপন্নে তযো আহারা? ফস্সাহারো, মনোসঞ্চেতনাহারো, ৰিঞ্ঞাণাহারো – ইমে ৰুচ্চন্তি ‘‘অপরিযাপন্নে তযো আহারা’’.

তত্থ কতমো অপরিযাপন্নে একো ফস্সো? মনোৰিঞ্ঞাণধাতুসম্ফস্সো – অযং ৰুচ্চতি ‘‘অপরিযাপন্নে একো ফস্সো’’.

তত্থ কতমা অপরিযাপন্নে একা ৰেদনা…পে… একা সঞ্ঞা…পে… একা চেতনা…পে… একং চিত্তং? মনোৰিঞ্ঞাণধাতু – ইদং ৰুচ্চতি ‘‘অপরিযাপন্নে একং চিত্তং’’.