৮. অট্ঠকনিদ্দেসো

(১) অট্ঠ কিলেসৰত্থূনি

৯৫২. তত্থ কতমানি অট্ঠ কিলেসৰত্থূনি? লোভো, দোসো, মোহো, মানো, দিট্ঠি, ৰিচিকিচ্ছা, থিনং, উদ্ধচ্চং – ইমানি অট্ঠ কিলেসৰত্থূনি.

(২) অট্ঠ কুসীতৰত্থূনি

৯৫৩. তত্থ কতমানি অট্ঠ কুসীতৰত্থূনি?

(ক) ইধ ভিক্খুনা কম্মং কাতব্বং হোতি. তস্স এৰং হোতি – ‘‘কম্মং খো মে কাতব্বং ভৰিস্সতি. কম্মং খো পন মে করোন্তস্স কাযো কিলমিস্সতি. হন্দাহং নিপজ্জামী’’তি. সো নিপজ্জতি; ন ৰীরিযং আরভতি অপ্পত্তস্স পত্তিযা, অনধিগতস্স অধিগমায, অসচ্ছিকতস্স সচ্ছিকিরিযায. ইদং পঠমং কুসীতৰত্থু.

(খ) পুন চপরং ভিক্খুনা কম্মং কতং হোতি. তস্স এৰং হোতি – ‘‘অহং খো কম্মং অকাসিং. কম্মং খো পন মে করোন্তস্স কাযো কিলন্তো. হন্দাহং নিপজ্জামী’’তি. সো নিপজ্জতি; ন ৰীরিযং আরভতি অপ্পত্তস্স পত্তিযা, অনধিগতস্স অধিগমায, অসচ্ছিকতস্স সচ্ছিকিরিযায. ইদং দুতিযং কুসীতৰত্থু.

(গ) পুন চপরং ভিক্খুনা মগ্গো গন্তব্বো হোতি. তস্স এৰং হোতি – ‘‘মগ্গো খো মে গন্তব্বো ভৰিস্সতি. মগ্গং খো পন মে গচ্ছন্তস্স কাযো কিলমিস্সতি. হন্দাহং নিপজ্জামী’’তি. সো নিপজ্জতি; ন ৰীরিযং আরভতি অপ্পত্তস্স পত্তিযা, অনধিগতস্স অধিগমায, অসচ্ছিকতস্স সচ্ছিকিরিযায. ইদং ততিযং কুসীতৰত্থু.

(ঘ) পুন চপরং ভিক্খুনা মগ্গো গতো হোতি. তস্স এৰং হোতি – ‘‘অহং খো মগ্গং অগমাসিং. মগ্গং খো পন মে গচ্ছন্তস্স কাযো কিলন্তো. হন্দাহং নিপজ্জামী’’তি. সো নিপজ্জতি; ন ৰীরিযং আরভতি অপ্পত্তস্স পত্তিযা, অনধিগতস্স অধিগমায, অসচ্ছিকতস্স সচ্ছিকিরিযায. ইদং চতুত্থং কুসীতৰত্থু.

(ঙ) পুন চপরং ভিক্খু গামং ৰা নিগমং ৰা পিণ্ডায চরন্তো ন লভতি লূখস্স ৰা পণীতস্স ৰা ভোজনস্স যাৰদত্থং পারিপূরিং. তস্স এৰং হোতি – ‘‘অহং খো গামং ৰা নিগমং ৰা পিণ্ডায চরন্তো নালত্থং লূখস্স ৰা পণীতস্স ৰা ভোজনস্স যাৰদত্থং পারিপূরিং. তস্স মে কাযো কিলন্তো অকম্মঞ্ঞো. হন্দাহং নিপজ্জামী’’তি. সো নিপজ্জতি; ন ৰীরিযং আরভতি অপ্পত্তস্স পত্তিযা, অনধিগতস্স অধিগমায, অসচ্ছিকতস্স সচ্ছিকিরিযায. ইদং পঞ্চমং কুসীতৰত্থু.

(চ) পুন চপরং ভিক্খু গামং ৰা নিগমং ৰা পিণ্ডায চরন্তো লভতি লূখস্স ৰা পণীতস্স ৰা ভোজনস্স যাৰদত্থং পারিপূরিং. তস্স এৰং হোতি – ‘‘অহং খো গামং ৰা নিগমং ৰা পিণ্ডায চরন্তো অলত্থং লূখস্স ৰা পণীতস্স ৰা ভোজনস্স যাৰদত্থং পারিপূরিং. তস্স মে কাযো কিলন্তো অকম্মঞ্ঞো মাসাচিতং মঞ্ঞে. হন্দাহং নিপজ্জামী’’তি. সো নিপজ্জতি; ন ৰীরিযং আরভতি অপ্পত্তস্স পত্তিযা, অনধিগতস্স অধিগমায, অসচ্ছিকতস্স সচ্ছিকিরিযায. ইদং ছট্ঠং কুসীতৰত্থু.

(ছ) পুন চপরং ভিক্খুনো উপ্পন্নো হোতি অপ্পমত্তকো আবাধো. তস্স এৰং হোতি – ‘‘উপ্পন্নো খো মে অযং অপ্পমত্তকো আবাধো. অত্থি কপ্পো নিপজ্জিতুং. হন্দাহং নিপজ্জামী’’তি. সো নিপজ্জতি; ন ৰীরিযং আরভতি অপ্পত্তস্স পত্তিযা, অনধিগতস্স অধিগমায, অসচ্ছিকতস্স সচ্ছিকিরিযায. ইদং সত্তমং কুসীতৰত্থু.

(জ) পুন চপরং ভিক্খু গিলানা ৰুট্ঠিতো [গিলানৰুট্ঠিতো (সদ্দনীভি) অ. নি. ৬.১৬ পাল়িযা টীকা পস্সিতব্বা] হোতি অচিরৰুট্ঠিতো গেলঞ্ঞা. তস্স এৰং হোতি – ‘‘অহং খো গিলানা ৰুট্ঠিতো অচিরৰুট্ঠিতো গেলঞ্ঞা. তস্স মে কাযো দুব্বলো অকম্মঞ্ঞো. হন্দাহং নিপজ্জামী’’তি. সো নিপজ্জতি; ন ৰীরিযং আরভতি অপ্পত্তস্স পত্তিযা, অনধিগতস্স অধিগমায, অসচ্ছিকতস্স সচ্ছিকিরিযায. ইদং অট্ঠমং কুসীতৰত্থু. ইমানি অট্ঠ কুসীতৰত্থূনি.

(৩) অট্ঠসু লোকধম্মেসু চিত্তস্স পটিঘাতো

৯৫৪. তত্থ কতমেসু অট্ঠসু লোকধম্মেসু চিত্তস্স পটিঘাতো? লাভে সারাগো, অলাভে পটিৰিরোধো, যসে সারাগো, অযসে পটিৰিরোধো, পসংসায সারাগো, নিন্দায পটিৰিরোধো, সুখে সারাগো, দুক্খে পটিৰিরোধো – ইমেসু অট্ঠসু লোকধম্মেসু চিত্তস্স পটিঘাতো.

(৪) অট্ঠঅনরিযৰোহারা

৯৫৫. তত্থ কতমে অট্ঠ অনরিযৰোহারা? অদিট্ঠে দিট্ঠৰাদিতা, অস্সুতে সুতৰাদিতা, অমুতে মুতৰাদিতা, অৰিঞ্ঞাতে ৰিঞ্ঞাতৰাদিতা, দিট্ঠে অদিট্ঠৰাদিতা, সুতে অস্সুতৰাদিতা, মুতে অমুতৰাদিতা, ৰিঞ্ঞাতে অৰিঞ্ঞাতৰাদিতা – ইমে অট্ঠ অনরিযৰোহারা.

(৫) অট্ঠ মিচ্ছত্তা

৯৫৬. তত্থ কতমে অট্ঠ মিচ্ছত্তা? মিচ্ছাদিট্ঠি, মিচ্ছাসঙ্কপ্পো, মিচ্ছাৰাচা, মিচ্ছাকম্মন্তো, মিচ্ছাআজীৰো, মিচ্ছাৰাযামো, মিচ্ছাসতি, মিচ্ছাসমাধি – ইমে অট্ঠ মিচ্ছত্তা.

(৬) অট্ঠ পুরিসদোসা

৯৫৭. তত্থ কতমে অট্ঠ পুরিসদোসা? (ক) ইধ ভিক্খূ ভিক্খুং আপত্তিযা চোদেন্তি. সো ভিক্খু ভিক্খূহি আপত্তিযা চোদিযমানো [চোদিযমানো (সী. স্যা.) অ. নি. ৮.১৪] ‘‘ন সরামি ন সরামী’’তি অস্সতিযাৰ নিব্বেঠেতি. অযং পঠমো পুরিসদোসো.

(খ) পুন চপরং ভিক্খূ ভিক্খুং আপত্তিযা চোদেন্তি. সো ভিক্খু ভিক্খূহি আপত্তিযা চোদিযমানো চোদকংযেৰ পটিপ্ফরতি – ‘‘কিং নু খো তুয্হং বালস্স অব্যত্তস্স ভণিতেন! ত্ৰম্পি নাম মং ভণিতব্বং মঞ্ঞসী’’তি! অযং দুতিযো পুরিসদোসো.

(গ) পুন চপরং ভিক্খূ ভিক্খুং আপত্তিযা চোদেন্তি. সো ভিক্খু ভিক্খূহি আপত্তিযা চোদিযমানো চোদকংযেৰ [চোদকস্সেৰ (স্যা.) অ. নি. ৮.১৪] পচ্চারোপেতি – ‘‘ত্ৰম্পি খোসি ইত্থন্নামং আপত্তিং আপন্নো. ত্ৰং তাৰ পঠমং পটিকরোহী’’তি. অযং ততিযো পুরিসদোসো.

(ঘ) পুন চপরং ভিক্খূ ভিক্খুং আপত্তিযা চোদেন্তি. সো ভিক্খু ভিক্খূহি আপত্তিযা চোদিযমানো অঞ্ঞেনাঞ্ঞং পটিচরতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকরোতি. অযং চতুত্থো পুরিসদোসো.

(ঙ) পুন চপরং ভিক্খূ ভিক্খুং আপত্তিযা চোদেন্তি. সো ভিক্খু ভিক্খূহি আপত্তিযা চোদিযমানো সঙ্ঘমজ্ঝে বাহাৰিক্খেপকং ভণতি. অযং পঞ্চমো পুরিসদোসো.

(চ) পুন চপরং ভিক্খূ ভিক্খুং আপত্তিযা চোদেন্তি. সো ভিক্খু ভিক্খূহি আপত্তিযা চোদিযমানো অনাদিযিত্ৰা সঙ্ঘং, অনাদিযিত্ৰা চোদকং, সাপত্তিকোৰ [আপত্তিকোৰ (ক.) অ. নি. ৮.১৪] যেনকামং পক্কমতি. অযং ছট্ঠো পুরিসদোসো.

(ছ) পুন চপরং ভিক্খূ ভিক্খুং আপত্তিযা চোদেন্তি. সো ভিক্খু ভিক্খূহি আপত্তিযা চোদিযমানো ‘‘নেৰাহং আপন্নোম্হি, ন পনাহং অনাপন্নোম্হী’’তি তুণ্হীভূতো সঙ্ঘং ৰিহেসেতি. অযং সত্তমো পুরিসদোসো.

(জ) পুন চপরং ভিক্খূ ভিক্খুং আপত্তিযা চোদেন্তি. সো ভিক্খু ভিক্খূহি আপত্তিযা চোদিযমানো এৰমাহ – ‘‘কিং নু খো তুম্হে আযস্মন্তো অতিবাল়্হং মযি ব্যাৰটা. ইদানাহং সিক্খং পচ্চক্খায হীনাযাৰত্তিস্সামী’’তি. সো সিক্খং পচ্চক্খায হীনাযাৰত্তিত্ৰা এৰমাহ – ‘‘ইদানি খো তুম্হে আযস্মন্তো অত্তমনা হোথা’’তি. অযং অট্ঠমো পুরিসদোসো. ইমে অট্ঠ পুরিসদোসা.

(৭) অট্ঠ অসঞ্ঞীৰাদা

৯৫৮. তত্থ কতমে অট্ঠ অসঞ্ঞীৰাদা? ‘‘রূপী অত্তা হোতি অরোগো পরং মরণা’’তি – অসঞ্ঞীতি নং পঞ্ঞপেন্তি; অরূপী অত্তা…পে… রূপী চ অরূপী চ…পে… নেৰরূপীনারূপী…পে… ‘‘অন্তৰা অত্তা হোতি অরোগো পরং মরণা’’তি – অসঞ্ঞীতি নং পঞ্ঞপেন্তি; ‘‘অনন্তৰা অত্তা হোতি অরোগো পরং মরণা’’তি – অসঞ্ঞীতি নং পঞ্ঞপেন্তি; ‘‘অন্তৰা চ অনন্তৰা চ অত্তা হোতি অরোগো পরং মরণা’’তি – অসঞ্ঞীতি নং পঞ্ঞপেন্তি; ‘‘নেৰন্তৰা নানন্তৰা অত্তা হোতি অরোগো পরং মরণা’’তি – অসঞ্ঞীতি নং পঞ্ঞপেন্তি. ইমে অট্ঠ অসঞ্ঞীৰাদা.

(৮) অট্ঠ নেৰসঞ্ঞীনাসঞ্ঞীৰাদা

৯৫৯. তত্থ কতমে অট্ঠ নেৰসঞ্ঞীনাসঞ্ঞীৰাদা? ‘‘রূপী অত্তা হোতি অরোগো পরং মরণা’’তি – নেৰসঞ্ঞীনাসঞ্ঞীতি নং পঞ্ঞপেন্তি; ‘‘অরূপী অত্তা হোতি অরোগো পরং মরণা’’তি – নেৰসঞ্ঞীনাসঞ্ঞীতি নং পঞ্ঞপেন্তি; ‘‘রূপী চ অরূপী চ অত্তা হোতি অরোগো পরং মরণা’’তি – নেৰসঞ্ঞীনাসঞ্ঞীতি নং পঞ্ঞপেন্তি; ‘‘নেৰরূপীনারূপী অত্তা হোতি অরোগো পরং মরণা’’তি – নেৰসঞ্ঞীনাসঞ্ঞীতি নং পঞ্ঞপেন্তি; ‘‘অন্তৰা অত্তা হোতি অরোগো পরং মরণা’’তি – নেৰসঞ্ঞীনাসঞ্ঞীতি নং পঞ্ঞপেন্তি; ‘‘অনন্তৰা অত্তা হোতি অরোগো পরং মরণা’’তি – নেৰসঞ্ঞীনাসঞ্ঞীতি নং পঞ্ঞপেন্তি; ‘‘অন্তৰা চ অনন্তৰা চ অত্তা হোতি অরোগো পরং মরণা’’তি – নেৰসঞ্ঞীনাসঞ্ঞীতি নং পঞ্ঞপেন্তি; ‘‘নেৰন্তৰা নানন্তৰা অত্তা হোতি অরোগো পরং মরণা’’তি – নেৰসঞ্ঞীনাসঞ্ঞীতি নং পঞ্ঞপেন্তি. ইমে অট্ঠ নেৰসঞ্ঞীনাসঞ্ঞীৰাদা.

অট্ঠকং.