(৫৪) সেয্যস্স হীনোহমস্মীতি মানো

৮৭১. তত্থ কতমো সেয্যস্স হীনোহমস্মীতি মানো? ইধেকচ্চো সেয্যো হোতি জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰত্থুনা পরেহি হীনং অত্তানং দহতি; সো তং নিস্সায ওমানং জপ্পেতি. যো এৰরূপো ওমানো ওমঞ্ঞনা ওমঞ্ঞিতত্তং হীল়না ওহীল়না ওহীল়িতত্তং অত্তুঞ্ঞা অত্তৰঞ্ঞা অত্তপরিভৰো – অযং ৰুচ্চতি ‘‘সেয্যস্স হীনোহমস্মীতি মানো’’.