১০. দসকনিদ্দেসো

(১) দস কিলেসৰত্থূনি

৯৬৬. তত্থ কতমানি দস কিলেসৰত্থূনি? লোভো, দোসো, মোহো, মানো, দিট্ঠি, ৰিচিকিচ্ছা, থিনং, উদ্ধচ্চং, অহিরিকং, অনোত্তপ্পং – ইমানি দস কিলেসৰত্থূনি.

(২) দস আঘাতৰত্থূনি

৯৬৭. তত্থ কতমানি দস আঘাতৰত্থূনি? ‘‘অনত্থং মে অচরী’’তি আঘাতো জাযতি, ‘‘অনত্থং মে চরতী’’তি আঘাতো জাযতি, ‘‘অনত্থং মে চরিস্সতী’’তি আঘাতো জাযতি, ‘‘পিযস্স মে মনাপস্স অনত্থং অচরি’’…পে… অনত্থং চরতি…পে… অনত্থং চরিস্সতীতি আঘাতো জাযতি, অপ্পিযস্স মে অমনাপস্স অত্থং অচরি…পে… অত্থং চরতি…পে… অত্থং চরিস্সতীতি আঘাতো জাযতি, অট্ঠানে ৰা পন আঘাতো জাযতি – ইমানি দস আঘাতৰত্থূনি.

(৩) দস অকুসলকম্মপথা

৯৬৮. তত্থ কতমে দস অকুসলকম্মপথা? পাণাতিপাতো, অদিন্নাদানং, কামেসুমিচ্ছাচারো, মুসাৰাদো, পিসুণা ৰাচা, ফরুসা ৰাচা, সম্ফপ্পলাপো, অভিজ্ঝা, ব্যাপাদো, মিচ্ছাদিট্ঠি – ইমে দস অকুসলকম্মপথা.

(৪) দস সংযোজনানি

৯৬৯. তত্থ কতমানি দস সংযোজনানি? কামরাগসংযোজনং, পটিঘসংযোজনং, মানসংযোজনং, দিট্ঠিসংযোজনং, ৰিচিকিচ্ছাসংযোজনং, সীলব্বতপরামাসসংযোজনং, ভৰরাগসংযোজনং, ইস্সাসংযোজনং, মচ্ছরিযসংযোজনং, অৰিজ্জাসংযোজনং – ইমানি দস সংযোজনানি.

(৫) দস মিচ্ছত্তা

৯৭০. তত্থ কতমে দস মিচ্ছত্তা? মিচ্ছাদিট্ঠি, মিচ্ছাসঙ্কপ্পো, মিচ্ছাৰাচা, মিচ্ছাকম্মন্তো, মিচ্ছাআজীৰো, মিচ্ছাৰাযামো, মিচ্ছাসতি, মিচ্ছাসমাধি, মিচ্ছাঞাণং, মিচ্ছাৰিমুত্তি – ইমে দস মিচ্ছত্তা.

(৬) দসৰত্থুকা মিচ্ছাদিট্ঠি

৯৭১. তত্থ কতমা দসৰত্থুকা মিচ্ছাদিট্ঠি? নত্থি দিন্নং, নত্থি যিট্ঠং, নত্থি হুতং, নত্থি সুকতদুক্কটানং কম্মানং ফলং ৰিপাকো, নত্থি অযং লোকো, নত্থি পরো লোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্রাহ্মণা সম্মগ্গতা [সমগ্গতা (ক.)] সম্মা পটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তীতি – অযং দসৰত্থুকা মিচ্ছাদিট্ঠি.

(৭) দসৰত্থুকা অন্তগ্গাহিকা দিট্ঠি

৯৭২. তত্থ কতমা দসৰত্থুকা অন্তগ্গাহিকা দিট্ঠি? সস্সতো লোকোতি ৰা, অসস্সতো লোকোতি ৰা, অন্তৰা লোকোতি ৰা, অনন্তৰা লোকোতি ৰা, তং জীৰং তং সরীরন্তি ৰা, অঞ্ঞং জীৰং অঞ্ঞং সরীরন্তি ৰা, হোতি তথাগতো পরং মরণাতি ৰা, ন হোতি তথাগতো পরং মরণাতি ৰা, হোতি চ ন চ হোতি তথাগতো পরং মরণাতি ৰা, নেৰ হোতি ন ন হোতি তথাগতো পরং মরণাতি ৰা – অযং দসৰত্থুকা অন্তগ্গাহিকা দিট্ঠি.

দসকং.