১৪. সিক্খাপদৰিভঙ্গো

১. অভিধম্মভাজনীযং

৭০৩. পঞ্চ সিক্খাপদানি – পাণাতিপাতা ৰেরমণী সিক্খাপদং, অদিন্নাদানা ৰেরমণী সিক্খাপদং, কামেসুমিচ্ছাচারা ৰেরমণী সিক্খাপদং, মুসাৰাদা ৰেরমণী সিক্খাপদং, সুরামেরযমজ্জপমাদট্ঠানা ৰেরমণী সিক্খাপদং.

৭০৪. তত্থ কতমং পাণাতিপাতা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং পাণাতিপাতা ৰিরমন্তস্স, যা তস্মিং সমযে পাণাতিপাতা আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইদং ৰুচ্চতি ‘‘পাণাতিপাতা ৰেরমণী সিক্খাপদং’’. অৰসেসা ধম্মা ৰেরমণিযা সম্পযুত্তা.

তত্থ কতমং পাণাতিপাতা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং পাণাতিপাতা ৰিরমন্তস্স, যা তস্মিং সমযে চেতনা সঞ্চেতনা সঞ্চেতযিতত্তং – ইদং ৰুচ্চতি ‘‘পাণাতিপাতা ৰেরমণী সিক্খাপদং’’. অৰসেসা ধম্মা চেতনায সম্পযুত্তা.

তত্থ কতমং পাণাতিপাতা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং পাণাতিপাতা ৰিরমন্তস্স, যো তস্মিং সমযে ফস্সো…পে… পগ্গাহো অৰিক্খেপো – ইদং ৰুচ্চতি ‘‘পাণাতিপাতা ৰেরমণী সিক্খাপদং’’.

৭০৫. তত্থ কতমং পাণাতিপাতা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি উপেক্খাসহগতং ঞাণৰিপ্পযুত্তং সসঙ্খারেন পাণাতিপাতা ৰিরমন্তস্স, যা তস্মিং সমযে চেতনা সঞ্চেতনা সঞ্চেতযিতত্তং – ইদং ৰুচ্চতি ‘‘পাণাতিপাতা ৰেরমণী সিক্খাপদং’’. অৰসেসা ধম্মা চেতনায সম্পযুত্তা.

তত্থ কতমং পাণাতিপাতা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি উপেক্খাসহগতং ঞাণৰিপ্পযুত্তং সসঙ্খারেন পাণাতিপাতা ৰিরমন্তস্স ফস্সো…পে… পগ্গাহো অৰিক্খেপো – ইদং ৰুচ্চতি ‘‘পাণাতিপাতা ৰেরমণী সিক্খাপদং’’.

৭০৬. তত্থ কতমং অদিন্নাদানা ৰেরমণী সিক্খাপদং…পে… কামেসুমিচ্ছাচারা ৰেরমণী সিক্খাপদং…পে… মুসাৰাদা ৰেরমণী সিক্খাপদং…পে… সুরামেরযমজ্জপমাদট্ঠানা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং সুরামেরযমজ্জপমাদট্ঠানা ৰিরমন্তস্স, যা তস্মিং সমযে সুরামেরযমজ্জপমাদট্ঠানা আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইদং ৰুচ্চতি ‘‘সুরামেরযমজ্জপমাদট্ঠানা ৰেরমণী সিক্খাপদং’’. অৰসেসা ধম্মা ৰেরমণিযা সম্পযুত্তা.

তত্থ কতমং সুরামেরযমজ্জপমাদট্ঠানা ৰেরমণী সিক্খাপদং, যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং সুরামেরযমজ্জপমাদট্ঠানা ৰিরমন্তস্স, যা তস্মিং সমযে চেতনা সঞ্চেতনা সঞ্চেতযিতত্তং – ইদং ৰুচ্চতি ‘‘সুরামেরযমজ্জপমাদট্ঠানা ৰেরমণী সিক্খাপদং’’. অৰসেসা ধম্মা চেতনায সম্পযুত্তা.

তত্থ কতমং সুরামেরযমজ্জপমাদট্ঠানা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং সুরামেরযমজ্জপমাদট্ঠানা ৰিরমন্তস্স, যো তস্মিং সমযে ফস্সো…পে… পগ্গাহো অৰিক্খেপো – ইদং ৰুচ্চতি ‘‘সুরামেরযমজ্জপমাদট্ঠানা ৰেরমণী সিক্খাপদং’’.

তত্থ কতমং সুরামেরযমজ্জপমাদট্ঠানা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং সসঙ্খারেন…পে… সোমনস্সসহগতং ঞাণৰিপ্পযুত্তং…পে… সোমনস্সসহগতং ঞাণৰিপ্পযুত্তং সসঙ্খারেন…পে… উপেক্খাসহগতং ঞাণসম্পযুত্তং…পে… উপেক্খাসহগতং ঞাণসম্পযুত্তং সসঙ্খারেন…পে… উপেক্খাসহগতং ঞাণৰিপ্পযুত্তং…পে… উপেক্খাসহগতং ঞাণৰিপ্পযুত্তং সসঙ্খারেন সুরামেরযমজ্জপমাদট্ঠানা ৰিরমন্তস্স, যা তস্মিং সমযে সুরামেরযমজ্জপমাদট্ঠানা আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইদং ৰুচ্চতি ‘‘সুরামেরযমজ্জপমাদট্ঠানা ৰেরমণী সিক্খাপদং’’. অৰসেসা ধম্মা ৰেরমণিযা সম্পযুত্তা.

৭০৭. তত্থ কতমং সুরামেরযমজ্জপমাদট্ঠানা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি উপেক্খাসহগতং ঞাণৰিপ্পযুত্তং সসঙ্খারেন সুরামেরযমজ্জপমাদট্ঠানা ৰিরমন্তস্স, যা তস্মিং সমযে চেতনা সঞ্চেতনা সঞ্চেতযিতত্তং – ইদং ৰুচ্চতি ‘‘সুরামেরযমজ্জপমাদট্ঠানা ৰেরমণী সিক্খাপদং’’. অৰসেসা ধম্মা চেতনায সম্পযুত্তা.

তত্থ কতমং সুরামেরযমজ্জপমাদট্ঠানা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি উপেক্খাসহগতং ঞাণৰিপ্পযুত্তং সসঙ্খারেন সুরামেরযমজ্জপমাদট্ঠানা ৰিরমন্তস্স, যো তস্মিং সমযে ফস্সো…পে… পগ্গাহো অৰিক্খেপো – ইদং ৰুচ্চতি ‘‘সুরামেরযমজ্জপমাদট্ঠানা ৰেরমণী সিক্খাপদং’’.

৭০৮. পঞ্চ সিক্খাপদানি – পাণাতিপাতা ৰেরমণী সিক্খাপদং, অদিন্নাদানা ৰেরমণী সিক্খাপদং, কামেসুমিচ্ছাচারা ৰেরমণী সিক্খাপদং, মুসাৰাদা ৰেরমণী সিক্খাপদং, সুরামেরযমজ্জপমাদট্ঠানা ৰেরমণী সিক্খাপদং.

৭০৯. তত্থ কতমং পাণাতিপাতা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং হীনং… মজ্ঝিমং… পণীতং… ছন্দাধিপতেয্যং… ৰীরিযাধিপতেয্যং… চিত্তাধিপতেয্যং… ৰীমংসাধিপতেয্যং… ছন্দাধিপতেয্যং হীনং… মজ্ঝিমং… পণীতং… ৰীরিযাধিপতেয্যং হীনং… মজ্ঝিমং… পণীতং… চিত্তাধিপতেয্যং হীনং… মজ্ঝিমং… পণীতং… ৰীমংসাধিপতেয্যং হীনং… মজ্ঝিমং… পণীতং পাণাতিপাতা ৰিরমন্তস্স, যা তস্মিং সমযে পাণাতিপাতা আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইদং ৰুচ্চতি ‘‘পাণাতিপাতা ৰেরমণী সিক্খাপদং’’. অৰসেসা ধম্মা ৰেরমণিযা সম্পযুত্তা.

তত্থ কতমং পাণাতিপাতা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং হীনং… মজ্ঝিমং… পণীতং… ছন্দাধিপতেয্যং… ৰীরিযাধিপতেয্যং… চিত্তাধিপতেয্যং… ৰীমংসাধিপতেয্যং… ছন্দাধিপতেয্যং হীনং… মজ্ঝিমং… পণীতং… ৰীরিযাধিপতেয্যং হীনং… মজ্ঝিমং… পণীতং… চিত্তাধিপতেয্যং হীনং… মজ্ঝিমং… পণীতং… ৰীমংসাধিপতেয্যং হীনং… মজ্ঝিমং… পণীতং পাণাতিপাতা ৰিরমন্তস্স, যা তস্মিং সমযে চেতনা সঞ্চেতনা সঞ্চেতযিতত্তং – ইদং ৰুচ্চতি ‘‘পাণাতিপাতা ৰেরমণী সিক্খাপদং’’. অৰসেসা ধম্মা চেতনায সম্পযুত্তা.

তত্থ কতমং পাণাতিপাতা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং হীনং… মজ্ঝিমং… পণীতং… ছন্দাধিপতেয্যং… ৰীরিযাধিপতেয্যং… চিত্তাধিপতেয্যং… ৰীমংসাধিপতেয্যং… ছন্দাধিপতেয্যং হীনং… মজ্ঝিমং… পণীতং… ৰীরিযাধিপতেয্যং হীনং… মজ্ঝিমং… পণীতং… চিত্তাধিপতেয্যং হীনং… মজ্ঝিমং… পণীতং… ৰীমংসাধিপতেয্যং হীনং… মজ্ঝিমং … পণীতং পাণাতিপাতা ৰিরমন্তস্স, যো তস্মিং সমযে ফস্সো…পে… পগ্গাহো অৰিক্খেপো – ইদং ৰুচ্চতি ‘‘পাণাতিপাতা ৰেরমণী সিক্খাপদং’’.

তত্থ কতমং পাণাতিপাতা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং সসঙ্খারেন…পে… সোমনস্সসহগতং ঞাণৰিপ্পযুত্তং…পে… সোমনস্সসহগতং ঞাণৰিপ্পযুত্তং সসঙ্খারেন…পে… উপেক্খাসহগতং ঞাণসম্পযুত্তং…পে… উপেক্খাসহগতং ঞাণসম্পযুত্তং সসঙ্খারেন…পে… উপেক্খাসহগতং ঞাণৰিপ্পযুত্তং…পে… উপেক্খাসহগতং ঞাণৰিপ্পযুত্তং সসঙ্খারেন হীনং… মজ্ঝিমং… পণীতং… ছন্দাধিপতেয্যং… ৰীরিযাধিপতেয্যং… চিত্তাধিপতেয্যং… ছন্দাধিপতেয্যং হীনং… মজ্ঝিমং… পণীতং… ৰীরিযাধিপতেয্যং হীনং… মজ্ঝিমং… পণীতং… চিত্তাধিপতেয্যং হীনং… মজ্ঝিমং… পণীতং পাণাতিপাতা ৰিরমন্তস্স, যা তস্মিং সমযে পাণাতিপাতা আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইদং ৰুচ্চতি ‘‘পাণাতিপাতা ৰেরমণী সিক্খাপদং’’. অৰসেসা ধম্মা ৰেরমণিযা সম্পযুত্তা…পে… অৰসেসা ধম্মা চেতনায সম্পযুত্তা…পে… ফস্সো…পে… পগ্গাহো অৰিক্খেপো – ইদং ৰুচ্চতি ‘‘পাণাতিপাতা ৰেরমণী সিক্খাপদং’’.

৭১০. তত্থ কতমং অদিন্নাদানা ৰেরমণী সিক্খাপদং…পে… কামেসুমিচ্ছাচারা ৰেরমণী সিক্খাপদং…পে… মুসাৰাদা ৰেরমণী সিক্খাপদং…পে… সুরামেরযমজ্জপমাদট্ঠানা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং হীনং… মজ্ঝিমং… পণীতং… ছন্দাধিপতেয্যং… ৰীরিযাধিপতেয্যং … চিত্তাধিপতেয্যং… ৰীমংসাধিপতেয্যং… ছন্দাধিপতেয্যং হীনং… মজ্ঝিমং… পণীতং… ৰীরিযাধিপতেয্যং হীনং… মজ্ঝিমং… পণীতং… চিত্তাধিপতেয্যং হীনং… মজ্ঝিমং… পণীতং… ৰীমংসাধিপতেয্যং হীনং… মজ্ঝিমং… পণীতং সুরামেরযমজ্জপমাদট্ঠানা ৰিরমন্তস্স, যা তস্মিং সমযে সুরামেরযমজ্জপমাদট্ঠানা আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইদং ৰুচ্চতি ‘‘সুরামেরযমজ্জপমাদট্ঠানা ৰেরমণী সিক্খাপদং’’. অৰসেসা ধম্মা ৰেরমণিযা সম্পযুত্তা …পে… অৰসেসা ধম্মা চেতনায সম্পযুত্তা…পে… ফস্সো…পে… পগ্গাহো অৰিক্খেপো – ইদং ৰুচ্চতি ‘‘সুরামেরযমজ্জপমাদট্ঠানা ৰেরমণী সিক্খাপদং’’.

৭১১. তত্থ কতমং সুরামেরযমজ্জপমাদট্ঠানা ৰেরমণী সিক্খাপদং? যস্মিং সমযে কামাৰচরে কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং সসঙ্খারেন…পে… সোমনস্সসহগতং ঞাণৰিপ্পযুত্তং…পে… সোমনস্সসহগতং ঞাণৰিপ্পযুত্তং সসঙ্খারেন…পে… উপেক্খাসহগতং ঞাণসম্পযুত্তং…পে… উপেক্খাসহগতং ঞাণসম্পযুত্তং সসঙ্খারেন…পে… উপেক্খাসহগতং ঞাণৰিপ্পযুত্তং…পে… উপেক্খাসহগতং ঞাণৰিপ্পযুত্তং সসঙ্খারেন হীনং… মজ্ঝিমং… পণীতং… ছন্দাধিপতেয্যং… ৰীরিযাধিপতেয্যং… চিত্তাধিপতেয্যং… ছন্দাধিপতেয্যং হীনং… মজ্ঝিমং… পণীতং… ৰীরিযাধিপতেয্যং হীনং… মজ্ঝিমং… পণীতং… চিত্তাধিপতেয্যং হীনং… মজ্ঝিমং পণীতং সুরামেরযমজ্জপমাদট্ঠানা ৰিরমন্তস্স, যা তস্মিং সমযে সুরামেরযমজ্জপমাদট্ঠানা আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইদং ৰুচ্চতি ‘‘সুরামেরযমজ্জপমাদট্ঠানা ৰেরমণী সিক্খাপদং’’. অৰসেসা ধম্মা ৰেরমণিযা সম্পযুত্তা…পে… অৰসেসা ধম্মা চেতনায সম্পযুত্তা…পে… ফস্সো…পে… পগ্গাহো অৰিক্খেপো – ইদং ৰুচ্চতি ‘‘সুরামেরযমজ্জপমাদট্ঠানা ৰেরমণী সিক্খাপদং’’.

৭১২. কতমে ধম্মা সিক্খা? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং রূপারম্মণং ৰা…পে… ধম্মারম্মণং ৰা যং যং ৰা পনারব্ভ, তস্মিং সমযে ফস্সো হোতি…পে… অৰিক্খেপো হোতি. ইমে ধম্মা সিক্খা.

কতমে ধম্মা সিক্খা? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং সসঙ্খারেন…পে… সোমনস্সসহগতং ঞাণৰিপ্পযুত্তং…পে… সোমনস্সসহগতং ঞাণৰিপ্পযুত্তং সসঙ্খারেন…পে… উপেক্খাসহগতং ঞাণসম্পযুত্তং…পে… উপেক্খাসহগতং ঞাণসম্পযুত্তং সসঙ্খারেন…পে… উপেক্খাসহগতং ঞাণৰিপ্পযুত্তং…পে… উপেক্খাসহগতং ঞাণৰিপ্পযুত্তং সসঙ্খারেন রূপারম্মণং ৰা…পে… ধম্মারম্মণং ৰা যং যং ৰা পনারব্ভ, তস্মিং সমযে ফস্সো হোতি…পে… অৰিক্খেপো হোতি. ইমে ধম্মা সিক্খা.

৭১৩. কতমে ধম্মা সিক্খা? যস্মিং সমযে রূপূপপত্তিযা মগ্গং ভাৰেতি…পে… অরূপূপপত্তিযা মগ্গং ভাৰেতি…পে… লোকুত্তরং ঝানং ভাৰেতি নিয্যানিকং অপচযগামিং দিট্ঠিগতানং পহানায পঠমায ভূমিযা পত্তিযা ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি দুক্খপটিপদং দন্ধাভিঞ্ঞং, তস্মিং সমযে ফস্সো হোতি…পে… অৰিক্খেপো হোতি. ইমে ধম্মা সিক্খা.

অভিধম্মভাজনীযং.

২. পঞ্হাপুচ্ছকং

৭১৪. পঞ্চ সিক্খাপদানি – পাণাতিপাতা ৰেরমণী সিক্খাপদং, অদিন্নাদানা ৰেরমণী সিক্খাপদং, কামেসুমিচ্ছাচারা ৰেরমণী সিক্খাপদং, মুসাৰাদা ৰেরমণী সিক্খাপদং, সুরামেরযমজ্জপমাদট্ঠানা ৰেরমণী সিক্খাপদং.

৭১৫. পঞ্চন্নং সিক্খাপদানং কতি কুসলা, কতি অকুসলা, কতি অব্যাকতা…পে… কতি সরণা, কতি অরণা?

১. তিকং

৭১৬. কুসলাযেৰ. সিযা সুখায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা, ৰিপাকধম্মধম্মা, অনুপাদিন্নুপাদানিযা, অসংকিলিট্ঠসংকিলেসিকা, সৰিতক্কসৰিচারা, সিযা পীতিসহগতা, সিযা সুখসহগতা, সিযা উপেক্খাসহগতা.

নেৰ দস্সনেন ন ভাৰনায পহাতব্বা, নেৰ দস্সনেন ন ভাৰনায পহাতব্বহেতুকা, আচযগামিনো, নেৰসেক্খনাসেক্খা, পরিত্তা, পরিত্তারম্মণা, মজ্ঝিমা, অনিযতা, ন ৰত্তব্বা মগ্গারম্মণাতিপি, মগ্গহেতুকাতিপি, মগ্গাধিপতিনোতিপি. সিযা উপ্পন্না, সিযা অনুপ্পন্না, ন ৰত্তব্বা উপ্পাদিনোতি, সিযা অতীতা, সিযা অনাগতা, সিযা পচ্চুপ্পন্না, পচ্চুপ্পন্নারম্মণা, সিযা অজ্ঝত্তা, সিযা বহিদ্ধা, সিযা অজ্ঝত্তবহিদ্ধা, বহিদ্ধারম্মণা, অনিদস্সনঅপ্পটিঘা.

২. দুকং

৭১৭. ন হেতূ সহেতুকা, হেতুসম্পযুত্তা. ন ৰত্তব্বা ‘‘হেতূ চেৰ সহেতুকা চা’’তি, সহেতুকা চেৰ ন চ হেতূ, ন ৰত্তব্বা ‘‘হেতূ চেৰ হেতুসম্পযুত্তা চা’’তি, হেতুসম্পযুত্তা চেৰ ন চ হেতূ, ন হেতু সহেতূকা, সপ্পচ্চযা, সঙ্খতা, অনিদস্সনা, অপ্পটিঘা, অরূপা, লোকিযা, কেনচি ৰিঞ্ঞেয্যা, কেনচি ন ৰিঞ্ঞেয্যা.

নো আসৰা, সাসৰা, আসৰৰিপ্পযুত্তা, ন ৰত্তব্বা ‘‘আসৰা চেৰ সাসৰা চা’’তি, সাসৰা চেৰ নো চ আসৰা, ন ৰত্তব্বা ‘‘আসৰা চেৰ আসৰসম্পযুত্তা চা’’তিপি, ‘‘আসৰসম্পযুত্তা চেৰ নো চ আসৰা’’তিপি. আসৰৰিপ্পযুত্তা সাসৰা, নো সংযোজনা…পে… নো গন্থা…পে… নো ওঘা…পে… নো যোগা…পে… নো নীৰরণা…পে… নো পরামাসা…পে… সারম্মণা, নো চিত্তা, চেতসিকা, চিত্তসম্পযুত্তা, চিত্তসংসট্ঠা, চিত্তসমুট্ঠানা, চিত্তসহভুনো, চিত্তানুপরিৰত্তিনো, চিত্তসংসট্ঠসমুট্ঠানা, চিত্তসংসট্ঠসমুট্ঠানসহভুনো, চিত্তসংসট্ঠসমুট্ঠানানুপরিৰত্তিনো, বাহিরা, নো উপাদা, অনুপাদিন্না, নো উপাদানা…পে… নো কিলেসা.

ন দস্সনেন পহাতব্বা, ন ভাৰনাযপহাতব্বা, ন দস্সনেন পহাতব্বহেতুকা, ন ভাৰনায পহাতব্বহেতুকা, সৰিতক্কা, সৰিচারা, সিযা সপ্পীতিকা, সিযা অপ্পীতিকা, সিযা পীতিসহগতা, সিযা ন পীতিসহগতা, সিযা সুখসহগতা, সিযা ন সুখসহগতা, সিযা উপেক্খাসহগতা, সিযা ন উপেক্খাসহগতা, কামাৰচরা, ন রূপাৰচরা, ন অরূপাৰচরা, পরিযাপন্না, অনিয্যানিকা, অনিযতা, সউত্তরা, অরণাতি.

পঞ্হাপুচ্ছকং.

সিক্খাপদৰিভঙ্গো নিট্ঠিতো.