৩. পঞ্হাপুচ্ছকং

৬৯৯. চতস্সো অপ্পমঞ্ঞাযো – ইধ ভিক্খু মেত্তাসহগতেন চেতসা একং দিসং ফরিত্ৰা ৰিহরতি তথা দুতিযং তথা ততিযং তথা চতুত্থং, ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি; করুণাসহগতেন চেতসা একং দিসং ফরিত্ৰা ৰিহরতি তথা দুতিযং তথা ততিযং তথা চতুত্থং, ইতি উদ্ধমধো তিরিযং সব্বধি সব্বত্ততায সব্বাৰন্তং লোকং করুণাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি; মুদিতাসহগতেন চেতসা একং দিসং ফরিত্ৰা ৰিহরতি তথা দুতিযং তথা ততিযং তথা চতুত্থং, ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মুদিতাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি; উপেক্খাসহগতেন চেতসা একং দিসং ফরিত্ৰা ৰিহরতি তথা দুতিযং তথা ততিযং তথা চতুত্থং, ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি.

৭০০. চতুন্নং অপ্পমঞ্ঞানং কতি কুসলা, কতি অকুসলা, কতি অব্যাকতা…পে… কতি সরণা, কতি অরণা?

১. তিকং

৭০১. সিযা কুসলা, সিযা অব্যাকতা. তিস্সো অপ্পমঞ্ঞাযো সুখায ৰেদনায সম্পযুত্তা, উপেক্খা অদুক্খমসুখায ৰেদনায সম্পযুত্তা. সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা. সিযা উপাদিন্নুপাদানিযা, সিযা অনুপাদিন্নুপাদানিযা. অসংকিলিট্ঠসংকিলেসিকা. তিস্সো অপ্পমঞ্ঞাযো সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা; উপেক্খা অৰিতক্কঅৰিচারা. তিস্সো অপ্পমঞ্ঞাযো সিযা পীতিসহগতা, সিযা সুখসহগতা, ন উপেক্খাসহগতা, সিযা ন ৰত্তব্বা পীতিসহগতাতি; উপেক্খা উপেক্খাসহগতা. নেৰ দস্সনেন ন ভাৰনায পহাতব্বা. নেৰ দস্সনেন ন ভাৰনায পহাতব্বহেতুকা. সিযা আচযগামিনো, সিযা নেৰাচযগামিনাপচযগামিনো, নেৰসেক্খনাসেক্খা, মহগ্গতা, ন ৰত্তব্বা পরিত্তারম্মণাতিপি, মহগ্গতারম্মণাতিপি, অপ্পমাণারম্মণাতিপি. মজ্ঝিমা, অনিযতা, ন ৰত্তব্বা মগ্গারম্মণাতিপি, মগ্গহেতুকাতিপি, মগ্গাধিপতিনোতিপি. সিযা উপ্পন্না, সিযা অনুপ্পন্না, সিযা উপ্পাদিনো. সিযা অতীতা, সিযা অনাগতা, সিযা পচ্চুপ্পন্না. ন ৰত্তব্বা অতীতারম্মণাতিপি, অনাগতারম্মণাতিপি, পচ্চুপ্পন্নারম্মণাতিপি. সিযা অজ্ঝত্তা, সিযা বহিদ্ধা, সিযা অজ্ঝত্তবহিদ্ধা, বহিদ্ধারম্মণা, অনিদস্সনঅপ্পটিঘা.

২. দুকং

৭০২. মেত্তা হেতু, তিস্সো অপ্পমঞ্ঞাযো ন হেতূ, সহেতুকা, হেতুসম্পযুত্তা. মেত্তা হেতু চেৰ সহেতুকা চ; তিস্সো অপ্পমঞ্ঞাযো ন ৰত্তব্বা হেতূ চেৰ সহেতুকা চাতি, সহেতুকা চেৰ ন চ হেতূ. মেত্তা হেতু চেৰ হেতুসম্পযুত্তা চ; তিস্সো অপ্পমঞ্ঞাযো ন ৰত্তব্বা হেতূ চেৰ হেতুসম্পযুত্তা চাতি, হেতুসম্পযুত্তা চেৰ ন চ হেতূ. তিস্সো অপ্পমঞ্ঞাযো ন হেতূ সহেতুকা; মেত্তা ন ৰত্তব্বা ন হেতু সহেতুকাতিপি, ন হেতু অহেতুকাতিপি.

সপ্পচ্চযা, সঙ্খতা, অনিদস্সনা, অপ্পটিঘা, অরূপা, লোকিযা, কেনচি ৰিঞ্ঞেয্যা, কেনচি ন ৰিঞ্ঞেয্যা, নো আসৰা, সাসৰা, আসৰৰিপ্পযুত্তা, ন ৰত্তব্বা আসৰা চেৰ সাসৰা চাতি, সাসৰা চেৰ নো চ আসৰা, ন ৰত্তব্বা আসৰা চেৰ আসৰসম্পযুত্তা চাতিপি, আসৰসম্পযুত্তা চেৰ নো চ আসৰাতিপি. আসৰৰিপ্পযুত্তা সাসৰা.

নো সংযোজনা…পে… নো গন্থা…পে… নো ওঘা…পে… নো যোগা…পে… নো নীৰরণা…পে… নো পরামাসা …পে… সারম্মণা, নো চিত্তা, চেতসিকা, চিত্তসম্পযুত্তা, চিত্তসংসট্ঠা, চিত্তসমুট্ঠানা, চিত্তসহভুনো, চিত্তানুপরিৰত্তিনো, চিত্তসংসট্ঠসমুট্ঠানা, চিত্তসংসট্ঠসমুট্ঠানসহভুনো, চিত্তসংসট্ঠসমুট্ঠানানুপরিৰত্তিনো, বাহিরা, নো উপাদা, সিযা উপাদিন্না, সিযা অনুপাদিন্না.

নো উপাদানা…পে… নো কিলেসা…পে… ন দস্সনেন পহাতব্বা, ন ভাৰনায পহাতব্বা, ন দস্সনেন পহাতব্বহেতুকা, ন ভাৰনায পহাতব্বহেতুকা. তিস্সো অপ্পমঞ্ঞাযো সিযা সৰিতক্কা, সিযা অৰিতক্কা; উপেক্খা অৰিতক্কা. তিস্সো অপ্পমঞ্ঞাযো সিযা সৰিচারা, সিযা অৰিচারা; উপেক্খা অৰিচারা. তিস্সো অপ্পমঞ্ঞাযো সিযা সপ্পীতিকা, সিযা অপ্পীতিকা; উপেক্খা অপ্পীতিকা. তিস্সো অপ্পমঞ্ঞাযো সিযা পীতিসহগতা, সিযা ন পীতিসহগতা; উপেক্খা ন পীতিসহগতা. তিস্সো অপ্পমঞ্ঞাযো সুখসহগতা, উপেক্খা ন সুখসহগতা. উপেক্খা উপেক্খাসহগতা, তিস্সো অপ্পমঞ্ঞাযো ন উপেক্খাসহগতা, ন কামাৰচরা, রূপাৰচরা, ন অরূপাৰচরা, পরিযাপন্না, অনিয্যানিকা, অনিযতা, সউত্তরা, অরণাতি.

পঞ্হাপুচ্ছকং.

অপ্পমঞ্ঞাৰিভঙ্গো নিট্ঠিতো.