২. অভিধম্মভাজনীযং

৪৭২. সত্ত বোজ্ঝঙ্গা – সতিসম্বোজ্ঝঙ্গো, ধম্মৰিচযসম্বোজ্ঝঙ্গো, ৰীরিযসম্বোজ্ঝঙ্গো, পীতিসম্বোজ্ঝঙ্গো, পস্সদ্ধিসম্বোজ্ঝঙ্গো, সমাধিসম্বোজ্ঝঙ্গো, উপেক্খাসম্বোজ্ঝঙ্গো.

৪৭৩. তত্থ কতমে সত্ত বোজ্ঝঙ্গা? ইধ ভিক্খু যস্মিং সমযে লোকুত্তরং ঝানং ভাৰেতি নিয্যানিকং অপচযগামিং দিট্ঠিগতানং পহানায পঠমায ভূমিযা পত্তিযা ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি দুক্খপটিপদং দন্ধাভিঞ্ঞং, তস্মিং সমযে সত্ত বোজ্ঝঙ্গা হোন্তি – সতিসম্বোজ্ঝঙ্গো…পে… উপেক্খাসম্বোজ্ঝঙ্গো.

৪৭৪. তত্থ কতমো সতিসম্বোজ্ঝঙ্গো? যা সতি অনুস্সতি…পে… সম্মাসতি সতিসম্বোজ্ঝঙ্গো মগ্গঙ্গং মগ্গপরিযাপন্নং – অযং ৰুচ্চতি ‘‘সতিসম্বোজ্ঝঙ্গো’’.

তত্থ কতমো ধম্মৰিচযসম্বোজ্ঝঙ্গো? যা পঞ্ঞা পজাননা…পে… অমোহো ধম্মৰিচযো সম্মাদিট্ঠি ধম্মৰিচযসম্বোজ্ঝঙ্গো মগ্গঙ্গং মগ্গপরিযাপন্নং – অযং ৰুচ্চতি ‘‘ধম্মৰিচযসম্বোজ্ঝঙ্গো’’.

তত্থ কতমো ৰীরিযসম্বোজ্ঝঙ্গো? যো চেতসিকো ৰীরিযারম্ভো…পে… সম্মাৰাযামো ৰীরিযসম্বোজ্ঝঙ্গো মগ্গঙ্গং মগ্গপরিযাপন্নং – অযং ৰুচ্চতি ‘‘ৰীরিযসম্বোজ্ঝঙ্গো’’.

তত্থ কতমো পীতিসম্বোজ্ঝঙ্গো? যা পীতি পামোজ্জং আমোদনা পমোদনা হাসো পহাসো ৰিত্তি ওদগ্যং [ওদগ্গং (সী.) ধ. স. ৯] অত্তমনতা চিত্তস্স পীতিসম্বোজ্ঝঙ্গো – অযং ৰুচ্চতি ‘‘পীতিসম্বোজ্ঝঙ্গো’’.

তত্থ কতমো পস্সদ্ধিসম্বোজ্ঝঙ্গো? যা ৰেদনাক্খন্ধস্স সঞ্ঞাক্খন্ধস্স সঙ্খারক্খন্ধস্স ৰিঞ্ঞাণক্খন্ধস্স পস্সদ্ধি পটিপ্পস্সদ্ধি পস্সম্ভনা পটিপ্পস্সম্ভনা পটিপ্পস্সম্ভিতত্তং পস্সদ্ধিসম্বোজ্ঝঙ্গো – অযং ৰুচ্চতি ‘‘পস্সদ্ধিসম্বোজ্ঝঙ্গো’’.

তত্থ কতমো সমাধিসম্বোজ্ঝঙ্গো? যা চিত্তস্স ঠিতি…পে… সম্মাসমাধি সমাধিসম্বোজ্ঝঙ্গো মগ্গঙ্গং মগ্গপরিযাপন্নং – অযং ৰুচ্চতি ‘‘সমাধিসম্বোজ্ঝঙ্গো’’.

তত্থ কতমো উপেক্খাসম্বোজ্ঝঙ্গো? যা উপেক্খা উপেক্খনা অজ্ঝুপেক্খনা মজ্ঝত্ততা চিত্তস্স উপেক্খাসম্বোজ্ঝঙ্গো – অযং ৰুচ্চতি ‘‘উপেক্খাসম্বোজ্ঝঙ্গো’’. ইমে ৰুচ্চন্তি সত্ত বোজ্ঝঙ্গা. অৰসেসা ধম্মা সত্তহি বোজ্ঝঙ্গেহি সম্পযুত্তা.

৪৭৫. সত্ত বোজ্ঝঙ্গা – সতিসম্বোজ্ঝঙ্গো…পে… উপেক্খাসম্বোজ্ঝঙ্গো.

৪৭৬. তত্থ কতমো সতিসম্বোজ্ঝঙ্গো? ইধ ভিক্খু যস্মিং সমযে লোকুত্তরং ঝানং ভাৰেতি নিয্যানিকং অপচযগামিং দিট্ঠিগতানং পহানায পঠমায ভূমিযা পত্তিযা ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি দুক্খপটিপদং দন্ধাভিঞ্ঞং, যা তস্মিং সমযে সতি অনুস্সতি সম্মাসতি সতিসম্বোজ্ঝঙ্গো মগ্গঙ্গং মগ্গপরিযাপন্নং – অযং ৰুচ্চতি ‘‘সতিসম্বোজ্ঝঙ্গো’’. অৰসেসা ধম্মা সতিসম্বোজ্ঝঙ্গসম্পযুত্তা…পে… অৰসেসা ধম্মা ধম্মৰিচযসম্বোজ্ঝঙ্গসম্পযুত্তা…পে… অৰসেসা ধম্মা ৰীরিযসম্বোজ্ঝঙ্গসম্পযুত্তা…পে… অৰসেসা ধম্মা পীতিসম্বোজ্ঝঙ্গসম্পযুত্তা…পে… অৰসেসা ধম্মা পস্সদ্ধিসম্বোজ্ঝঙ্গসম্পযুত্তা…পে… অৰসেসা ধম্মা সমাধিসম্বোজ্ঝঙ্গসম্পযুত্তা.

তত্থ কতমো উপেক্খাসম্বোজ্ঝঙ্গো? ইধ ভিক্খু যস্মিং সমযে লোকুত্তরং ঝানং ভাৰেতি নিয্যানিকং অপচযগামিং দিট্ঠিগতানং পহানায পঠমায ভূমিযা পত্তিযা ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি দুক্খপটিপদং দন্ধাভিঞ্ঞং, যা তস্মিং সমযে উপেক্খা উপেক্খনা অজ্ঝুপেক্খনা মজ্ঝত্ততা চিত্তস্স উপেক্খাসম্বোজ্ঝঙ্গো – অযং ৰুচ্চতি ‘‘উপেক্খাসম্বোজ্ঝঙ্গো’’. অৰসেসা ধম্মা উপেক্খাসম্বোজ্ঝঙ্গসম্পযুত্তা.

৪৭৭. সত্ত বোজ্ঝঙ্গা – সতিসম্বোজ্ঝঙ্গো…পে… উপেক্খাসম্বোজ্ঝঙ্গো.

৪৭৮. তত্থ কতমে সত্ত বোজ্ঝঙ্গা? ইধ ভিক্খু যস্মিং সমযে লোকুত্তরং ঝানং ভাৰেতি নিয্যানিকং অপচযগামিং দিট্ঠিগতানং পহানায পঠমায ভূমিযা পত্তিযা ৰিৰিচ্চেৰ কামেহি …পে… পঠমং ঝানং উপসম্পজ্জ ৰিহরতি দুক্খপটিপদং দন্ধাভিঞ্ঞং, যো তস্মিং সমযে ফস্সো হোতি…পে… অৰিক্খেপো হোতি – ইমে ধম্মা কুসলা. তস্সেৰ লোকুত্তরস্স কুসলস্স ঝানস্স কতত্তা ভাৰিতত্তা ৰিপাকং ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি দুক্খপটিপদং দন্ধাভিঞ্ঞং সুঞ্ঞতং, তস্মিং সমযে সত্ত বোজ্ঝঙ্গা হোন্তি – সতিসম্বোজ্ঝঙ্গো…পে… উপেক্খাসম্বোজ্ঝঙ্গো.

৪৭৯. তত্থ কতমো সতিসম্বোজ্ঝঙ্গো? যা সতি অনুস্সতি…পে… সম্মাসতি সতিসম্বোজ্ঝঙ্গো মগ্গঙ্গং মগ্গপরিযাপন্নং – অযং ৰুচ্চতি ‘‘সতিসম্বোজ্ঝঙ্গো’’…পে….

তত্থ কতমো উপেক্খাসম্বোজ্ঝঙ্গো? যা উপেক্খা উপেক্খনা অজ্ঝুপেক্খনা মজ্ঝত্ততা চিত্তস্স উপেক্খাসম্বোজ্ঝঙ্গো – অযং ৰুচ্চতি ‘‘উপেক্খাসম্বোজ্ঝঙ্গো’’. ইমে ৰুচ্চন্তি ‘‘সত্ত বোজ্ঝঙ্গা’’. অৰসেসা ধম্মা সত্তহি বোজ্ঝঙ্গেহি সম্পযুত্তা.

৪৮০. সত্ত বোজ্ঝঙ্গা – সতিসম্বোজ্ঝঙ্গো…পে… উপেক্খাসম্বোজ্ঝঙ্গো.

৪৮১. তত্থ কতমো সতিসম্বোজ্ঝঙ্গো? ইধ ভিক্খু যস্মিং সমযে লোকুত্তরং ঝানং ভাৰেতি নিয্যানিকং অপচযগামিং দিট্ঠিগতানং পহানায পঠমায ভূমিযা পত্তিযা ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি দুক্খপটিপদং দন্ধাভিঞ্ঞং, তস্মিং সমযে ফস্সো হোতি…পে… অৰিক্খেপো হোতি. ইমে ধম্মা কুসলা. তস্সেৰ লোকুত্তরস্স কুসলস্স ঝানস্স কতত্তা ভাৰিতত্তা ৰিপাকং ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি দুক্খপটিপদং দন্ধাভিঞ্ঞং, যা তস্মিং সমযে সতি অনুস্সতি সম্মাসতি সতিসম্বোজ্ঝঙ্গো মগ্গঙ্গং মগ্গপরিযাপন্নং – অযং ৰুচ্চতি ‘‘সতিসম্বোজ্ঝঙ্গো’’. অৰসেসা ধম্মা সতিসম্বোজ্ঝঙ্গসম্পযুত্তা…পে… অৰসেসা ধম্মা ধম্মৰিচযসম্বোজ্ঝঙ্গসম্পযুত্তা …পে… অৰসেসা ধম্মা ৰীরিযসম্বোজ্ঝঙ্গসম্পযুত্তা…পে… অৰসেসা ধম্মা পীতিসম্বোজ্ঝঙ্গসম্পযুত্তা…পে… অৰসেসা ধম্মা পস্সদ্ধিসম্বোজ্ঝঙ্গসম্পযুত্তা…পে… অৰসেসা ধম্মা সমাধিসম্বোজ্ঝঙ্গসম্পযুত্তা.

তত্থ কতমো উপেক্খাসম্বোজ্ঝঙ্গো? ইধ ভিক্খু যস্মিং সমযে লোকুত্তরং ঝানং ভাৰেতি নিয্যানিকং অপচযগামিং দিট্ঠিগতানং পহানায পঠমায ভূমিযা পত্তিযা ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি দুক্খপটিপদং দন্ধাভিঞ্ঞং, তস্মিং সমযে ফস্সো হোতি…পে… অৰিক্খেপো হোতি. ইমে ধম্মা কুসলা. তস্সেৰ লোকুত্তরস্স কুসলস্স ঝানস্স কতত্তা ভাৰিতত্তা ৰিপাকং ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি দুক্খপটিপদং দন্ধাভিঞ্ঞং সুঞ্ঞতং, যা তস্মিং সমযে উপেক্খা উপেক্খনা অজ্ঝুপেক্খনা মজ্ঝত্ততা চিত্তস্স উপেক্খাসম্বোজ্ঝঙ্গো – অযং ৰুচ্চতি ‘‘উপেক্খাসম্বোজ্ঝঙ্গো’’. অৰসেসা ধম্মা উপেক্খাসম্বোজ্ঝঙ্গসম্পযুত্তা.

অভিধম্মভাজনীযং.