৭. সত্তকপুগ্গলপঞ্ঞত্তি

২০৩. কথঞ্চ পুগ্গলো সকিং নিমুগ্গো নিমুগ্গোৰ হোতি? ইধেকচ্চো পুগ্গলো সমন্নাগতো হোতি একন্তকাল়কেহি অকুসলেহি ধম্মেহি. এৰং পুগ্গলো সকিং নিমুগ্গো নিমুগ্গোৰ হোতি.

কথঞ্চ পুগ্গলো উম্মুজ্জিত্ৰা নিমুজ্জতি? ইধেকচ্চো পুগ্গলো উম্মুজ্জতি ‘‘সাহু সদ্ধা কুসলেসু ধম্মেসু, সাধু [সাহু (সী. স্যা.) এৰং তীসু ঠানেসুপি] হিরী কুসলেসু ধম্মেসু, সাধু ওত্তপ্পং কুসলেসু ধম্মেসু, সাধু ৰীরিযং [ৰিরিযং (সী. স্যা.)] কুসলেসু ধম্মেসু, সাধু পঞ্ঞা কুসলেসু ধম্মেসূ’’তি. তস্স সা সদ্ধা নেৰ তিট্ঠতি নো ৰড্ঢতি হাযতিযেৰ, তস্স সা হিরী নেৰ তিট্ঠতি নো ৰড্ঢতি হাযতিযেৰ, তস্স তং ওত্তপ্পং নেৰ তিট্ঠতি নো ৰড্ঢতি হাযতিযেৰ, তস্স তং ৰীরিযং নেৰ তিট্ঠতি নো ৰড্ঢতি হাযতিযেৰ, তস্স সা পঞ্ঞা নেৰ তিট্ঠতি নো ৰড্ঢতি হাযতিযেৰ. এৰং পুগ্গলো উম্মুজ্জিত্ৰা নিমুজ্জতি.

কথঞ্চ পুগ্গলো উম্মুজ্জিত্ৰা ঠিতো হোতি? ইধেকচ্চো পুগ্গলো উম্মুজ্জতি ‘‘সাহু সদ্ধা কুসলেসু ধম্মেসু, সাধু হিরী কুসলেসু ধম্মেসু, সাধু ওত্তপ্পং কুসলেসু ধম্মেসু, সাধু ৰীরিযং কুসলেসু ধম্মেসু, সাধু পঞ্ঞা কুসলেসু ধম্মেসূ’’তি. তস্স সা সদ্ধা নেৰ হাযতি নো ৰড্ঢতি ঠিতা হোতি, তস্স সা হিরী নেৰ হাযতি নো ৰড্ঢতি ঠিতা হোতি, তস্স তং ওত্তপ্পং নেৰ হাযতি নো ৰড্ঢতি ঠিতং হোতি, তস্স তং ৰীরিযং নেৰ হাযতি নো ৰড্ঢতি ঠিতং হোতি, তস্স সা পঞ্ঞা নেৰ হাযতি নো ৰড্ঢতি ঠিতা হোতি. এৰং পুগ্গলো উম্মুজ্জিত্ৰা ঠিতো হোতি.

কথঞ্চ পুগ্গলো উম্মুজ্জিত্ৰা ৰিপস্সতি ৰিলোকেতি? ইধেকচ্চো পুগ্গলো উম্মুজ্জতি ‘‘সাহু সদ্ধা কুসলেসু ধম্মেসু, সাধু হিরী কুসলেসু ধম্মেসু, সাধু ওত্তপ্পং কুসলেসু ধম্মেসু, সাধু ৰীরিযং কুসলেসু ধম্মেসু, সাধু পঞ্ঞা কুসলেসু ধম্মেসূ’’তি. সো তিণ্ণং সংযোজনানং পরিক্খযা সোতাপন্নো হোতি অৰিনিপাতধম্মো নিযতো সম্বোধিপরাযনো. এৰং পুগ্গলো উম্মুজ্জিত্ৰা ৰিপস্সতি ৰিলোকেতি.

কথঞ্চ পুগ্গলো উম্মুজ্জিত্ৰা পতরতি? ইধেকচ্চো পুগ্গলো উম্মুজ্জতি ‘‘সাহু সদ্ধা কুসলেসু ধম্মেসু, সাধু হিরী কুসলেসু ধম্মেসু, সাধু ওত্তপ্পং কুসলেসু ধম্মেসু, সাধু ৰীরিযং কুসলেসু ধম্মেসু, সাধু পঞ্ঞা কুসলেসু ধম্মেসূ’’তি. সো তিণ্ণং সংযোজনানং পরিক্খযা রাগদোসমোহানং তনুত্তা সকদাগামী হোতি সকিদেৰ ইমং লোকং আগন্ত্ৰা দুক্খস্সন্তকরো হোতি. এৰং পুগ্গলো উম্মুজ্জিত্ৰা পতরতি.

কথঞ্চ পুগ্গলো উম্মুজ্জিত্ৰা পতিগাধপ্পত্তো হোতি? ইধেকচ্চো পুগ্গলো উম্মুজ্জতি ‘‘সাহু সদ্ধা কুসলেসু ধম্মেসু, সাধু হিরী কুসলেসু ধম্মেসু, সাধু ওত্তপ্পং কুসলেসু ধম্মেসু, সাধু ৰীরিযং কুসলেসু ধম্মেসু, সাধু পঞ্ঞা কুসলেসু ধম্মেসূ’’তি. সো পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি তত্থ পরিনিব্বাযী অনাৰত্তিধম্মো তস্মা লোকা. এৰং পুগ্গলো উম্মুজ্জিত্ৰা পতিগাধপ্পত্তো হোতি.

কথঞ্চ পুগ্গলো উম্মুজ্জিত্ৰা তিণ্ণো হোতি পারঙ্গতো থলে তিট্ঠতি ব্রাহ্মণো? ইধেকচ্চো পুগ্গলো উম্মুজ্জতি ‘‘সাহু সদ্ধা কুসলেসু ধম্মেসু, সাধু হিরী কুসলেসু ধম্মেসু, সাধু ওত্তপ্পং কুসলেসু ধম্মেসু, সাধু ৰীরিযং কুসলেসু ধম্মেসু, সাধু পঞ্ঞা কুসলেসু ধম্মেসূ’’তি. সো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. এৰং পুগ্গলো উম্মুজ্জিত্ৰা তিণ্ণো হোতি পারঙ্গতো থলে তিট্ঠতি ব্রাহ্মণো.

২০৪. কতমো চ পুগ্গলো উভতোভাগৰিমুত্তো? ইধেকচ্চো পুগ্গলো অট্ঠ ৰিমোক্খে কাযেন ফুসিত্ৰা ৰিহরতি পঞ্ঞায চস্স দিস্ৰা আসৰা পরিক্খীণা হোন্তি. অযং ৰুচ্চতি পুগ্গলো উভতোভাগৰিমুত্তো.

২০৫. কতমো চ পুগ্গলো পঞ্ঞাৰিমুত্তো…পে… কাযসক্খী… দিট্ঠিপ্পত্তো… সদ্ধাৰিমুত্তো… ধম্মানুসারী ….

২০৬. কতমো চ পুগ্গলো সদ্ধানুসারী? যস্স পুগ্গলস্স সোতাপত্তিফলসচ্ছিকিরিযায পটিপন্নস্স সদ্ধিন্দ্রিযং অধিমত্তং হোতি, সদ্ধাৰাহিং সদ্ধাপুব্বঙ্গমং অরিযমগ্গং ভাৰেতি. অযং ৰুচ্চতি পুগ্গলো সদ্ধানুসারী. সোতাপত্তিফলসচ্ছিকিরিযায পটিপন্নো পুগ্গলো সদ্ধানুসারী, ফলে ঠিতো সদ্ধাৰিমুত্তোতি.

সত্তকনিদ্দেসো.