৫৩-১. পরামাসপরামট্ঠদুক-কুসলত্তিকং

১-৭. পটিচ্চৰারাদি

পচ্চযচতুক্কং

২৩. পরামট্ঠঞ্চেৰ নো চ পরামাসং কুসলং ধম্মং পটিচ্চ পরামট্ঠো চেৰ নো চ পরামাসো কুসলো ধম্মো উপ্পজ্জতি হেতুপচ্চযা (সংখিত্তং).

২৪. হেতুযা একং, আরম্মণে একং…পে… অৰিগতে একং (সংখিত্তং).

(সহজাতৰারেপি…পে… পঞ্হাৰারেপি সব্বত্থ একং.)

২৫. পরামাসঞ্চেৰ পরামট্ঠঞ্চ অকুসলং ধম্মং পটিচ্চ পরামট্ঠো চেৰ নো চ পরামাসো অকুসলো ধম্মো উপ্পজ্জতি হেতুপচ্চযা… একং.

পরামট্ঠঞ্চেৰ নো চ পরামাসং অকুসলং ধম্মং পটিচ্চ পরামট্ঠো চেৰ নো চ পরামাসো অকুসলো ধম্মো উপ্পজ্জতি হেতুপচ্চযা… তীণি.

পরামাসঞ্চেৰ পরামট্ঠং অকুসলঞ্চ পরামট্ঠঞ্চেৰ নো চ পরামাসং অকুসলঞ্চ ধম্মং পটিচ্চ পরামট্ঠো চেৰ নো চ পরামাসো অকুসলো ধম্মো উপ্পজ্জতি হেতুপচ্চযা… একং (সংখিত্তং).

২৬. হেতুযা পঞ্চ, আরম্মণে পঞ্চ…পে… অৰিগতে পঞ্চ (সংখিত্তং).

(সহজাতৰারম্পি…পে… সম্পযুত্তৰারম্পি ৰিত্থারেতব্বং.)

২৭. পরামট্ঠো চেৰ নো চ পরামাসো অকুসলো ধম্মো পরামট্ঠস্স চেৰ নো চ পরামাসস্স অকুসলস্স ধম্মস্স হেতুপচ্চযেন পচ্চযো (সংখিত্তং).

২৮. হেতুযা তীণি, আরম্মণে নৰ, অধিপতিযা নৰ…পে… অৰিগতে পঞ্চ (সংখিত্তং).

(যথা কুসলত্তিকে পঞ্হাৰারস্স অনুলোমম্পি পচ্চনীযম্পি অনুলোমপচ্চনীযম্পি পচ্চনীযানুলোমম্পি গণিতং, এৰং গণেতব্বং.)

২৯. পরামট্ঠঞ্চেৰ নো চ পরামাসং অব্যাকতং ধম্মং পটিচ্চ পরামট্ঠো চেৰ নো চ পরামাসো অব্যাকতো ধম্মো উপ্পজ্জতি হেতুপচ্চযা (সংখিত্তং).

৩০. হেতুযা একং, আরম্মণে একং…পে… অৰিগতে একং (সংখিত্তং). (সহজাতৰারেপি…পে… পঞ্হাৰারেপি সব্বত্থ একং.)