(১০৩) ৯. সমাদানহেতুকথা

৫৯৮. সমাদানহেতুকং সীলং ৰড্ঢতীতি? আমন্তা. সমাদানহেতুকো ফস্সো ৰড্ঢতি, ৰেদনা ৰড্ঢতি, সঞ্ঞা ৰড্ঢতি, চেতনা ৰড্ঢতি, চিত্তং ৰড্ঢতি, সদ্ধা ৰড্ঢতি, ৰীরিযং ৰড্ঢতি, সতি ৰড্ঢতি, সমাধি ৰড্ঢতি, পঞ্ঞা ৰড্ঢতীতি? ন হেৰং ৰত্তব্বে…পে….

সমাদানহেতুকং সীলং ৰড্ঢতীতি? আমন্তা. লতা ৰিয ৰড্ঢতি, মালুৰা ৰিয ৰড্ঢতি, রুক্খো ৰিয ৰড্ঢতি, তিণং ৰিয ৰড্ঢতি, মুঞ্জপুঞ্জো ৰিয ৰড্ঢতীতি? ন হেৰং ৰত্তব্বে…পে….

৫৯৯. সমাদানহেতুকং সীলং ৰড্ঢতীতি? আমন্তা. সীলং সমাদিযিত্ৰা কামৰিতক্কং ৰিতক্কেন্তস্স ব্যাপাদৰিতক্কং ৰিতক্কেন্তস্স ৰিহিংসাৰিতক্কং ৰিতক্কেন্তস্স সীলং ৰড্ঢতীতি? আমন্তা. দ্ৰিন্নং ফস্সানং…পে… দ্ৰিন্নং চিত্তানং সমোধানং হোতীতি? ন হেৰং ৰত্তব্বে…পে… দ্ৰিন্নং ফস্সানং…পে… দ্ৰিন্নং চিত্তানং সমোধানং হোতীতি? আমন্তা. কুসলাকুসলা সাৰজ্জানৰজ্জা হীনপণীতা কণ্হসুক্কসপ্পটিভাগা ধম্মা সম্মুখীভাৰং আগচ্ছন্তীতি? ন হেৰং ৰত্তব্বে…পে….

কুসলাকুসলা সাৰজ্জানৰজ্জা হীনপণীতা কণ্হসুক্কসপ্পটিভাগা ধম্মা সম্মুখীভাৰং আগচ্ছন্তীতি? আমন্তা. ননু ৰুত্তং ভগৰতা – ‘‘চত্তারিমানি, ভিক্খৰে, সুৰিদূরৰিদূরানি! কতমানি চত্তারি? নভঞ্চ, ভিক্খৰে, পথৰী চ – ইদং পঠমং সুৰিদূরৰিদূরং…পে… তস্মা সতং ধম্মো অসব্ভি আরকা’’তি. অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘কুসলাকুসলা সাৰজ্জানৰজ্জা হীনপণীতা কণ্হসুক্কসপ্পটিভাগা ধম্মা সম্মুখীভাৰং আগচ্ছন্তী’’তি.

৬০০. ন ৰত্তব্বং – ‘‘সমাদানহেতুকং সীলং ৰড্ঢতী’’তি? আমন্তা. ননু ৰুত্তং ভগৰতা – ‘‘আরামরোপা ৰনরোপা…পে… ধম্মট্ঠা সীলসম্পন্না তে জনা সগ্গগামিনো’’তি. অত্থেৰ সুত্তন্তোতি? আমন্তা. তেন হি সমাদানহেতুকং সীলং ৰড্ঢতীতি.

সমাদানহেতুকথা নিট্ঠিতা.