(৯৯) ৫. সাভোগাতিকথা

৫৮৪. পঞ্চৰিঞ্ঞাণা সাভোগাতি? আমন্তা. ননু পঞ্চৰিঞ্ঞাণা উপ্পন্নৰত্থুকা উপ্পন্নারম্মণাতি? আমন্তা. হঞ্চি পঞ্চৰিঞ্ঞাণা উপ্পন্নৰত্থুকা উপ্পন্নারম্মণা, নো চ ৰত রে ৰত্তব্বে – ‘‘পঞ্চৰিঞ্ঞাণা সাভোগা’’তি. ননু পঞ্চৰিঞ্ঞাণা পুরেজাতৰত্থুকা পুরেজাতারম্মণা অজ্ঝত্তিকৰত্থুকা বাহিরারম্মণা অসম্ভিন্নৰত্থুকা অসম্ভিন্নারম্মণা নানাৰত্থুকা নানারম্মণা ন অঞ্ঞমঞ্ঞস্স গোচরৰিসযং পচ্চনুভোন্তি, ন অসমন্নাহারা উপ্পজ্জন্তি, ন অমনসিকারা উপ্পজ্জন্তি, ন অব্বোকিণ্ণা উপ্পজ্জন্তি, ন অপুব্বং অচরিমং উপ্পজ্জন্তি, ননু পঞ্চৰিঞ্ঞাণা ন অঞ্ঞমঞ্ঞস্স সমনন্তরা উপ্পজ্জন্তীতি? আমন্তা. হঞ্চি পঞ্চৰিঞ্ঞাণা ন অঞ্ঞমঞ্ঞস্স সমনন্তরা উপ্পজ্জন্তি, নো চ ৰত রে ৰত্তব্বে – ‘‘পঞ্চৰিঞ্ঞাণা সাভোগা’’তি.

৫৮৫. চক্খুৰিঞ্ঞাণং সাভোগন্তি? আমন্তা. চক্খুৰিঞ্ঞাণং সুঞ্ঞতং আরব্ভ উপ্পজ্জতীতি? ন হেৰং ৰত্তব্বে…পে… চক্খুৰিঞ্ঞাণং সুঞ্ঞতং আরব্ভ উপ্পজ্জতীতি? আমন্তা. চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৰিঞ্ঞাণন্তি? ন হেৰং ৰত্তব্বে…পে… চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৰিঞ্ঞাণন্তি? আমন্তা. ‘‘চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তোতি? নত্থি…পে… ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তোতি? আমন্তা. হঞ্চি ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তো, নো চ ৰত রে ৰত্তব্বে – ‘‘চক্খুঞ্চ পটিচ্চ সুঞ্ঞতঞ্চ উপ্পজ্জতি চক্খুৰিঞ্ঞাণ’’ন্তি.

চক্খুৰিঞ্ঞাণং সাভোগন্তি? আমন্তা. চক্খুৰিঞ্ঞাণং অতীতানাগতং আরব্ভ উপ্পজ্জতীতি? ন হেৰং ৰত্তব্বে…পে… চক্খুৰিঞ্ঞাণং সাভোগন্তি? আমন্তা. চক্খুৰিঞ্ঞাণং ফস্সং আরব্ভ…পে… ফোট্ঠব্বং আরব্ভ উপ্পজ্জতীতি? ন হেৰং ৰত্তব্বে…পে… মনোৰিঞ্ঞাণং সাভোগং, মনোৰিঞ্ঞাণং সুঞ্ঞতং আরব্ভ উপ্পজ্জতীতি? আমন্তা. চক্খুৰিঞ্ঞাণং সাভোগং, চক্খুৰিঞ্ঞাণং সুঞ্ঞতং আরব্ভ উপ্পজ্জতীতি? ন হেৰং ৰত্তব্বে…পে… মনোৰিঞ্ঞাণং সাভোগং, মনোৰিঞ্ঞাণং অতীতানাগতং আরব্ভ উপ্পজ্জতীতি? আমন্তা. চক্খুৰিঞ্ঞাণং সাভোগং, চক্খুৰিঞ্ঞাণং অতীতানাগতং আরব্ভ উপ্পজ্জতীতি? ন হেৰং ৰত্তব্বে…পে… মনোৰিঞ্ঞাণং সাভোগং, মনোৰিঞ্ঞাণং ফস্সং আরব্ভ…পে… ফোট্ঠব্বং আরব্ভ উপ্পজ্জতীতি? আমন্তা. চক্খুৰিঞ্ঞাণং সাভোগং, চক্খুৰিঞ্ঞাণং ফস্সং আরব্ভ…পে… ফোট্ঠব্বং আরব্ভ উপ্পজ্জতীতি? ন হেৰং ৰত্তব্বে…পে….

৫৮৬. ন ৰত্তব্বং – ‘‘পঞ্চৰিঞ্ঞাণা সাভোগা’’তি? আমন্তা. ননু ৰুত্তং ভগৰতা – ‘‘ইধ, ভিক্খৰে, ভিক্খু চক্খুনা রূপং দিস্ৰা নিমিত্তগ্গাহী হোতি…পে… ন নিমিত্তগ্গাহী হোতি…পে… কাযেন ফোট্ঠব্বং ফুসিত্ৰা নিমিত্তগ্গাহী হোতি…পে… ন নিমিত্তগ্গাহী হোতী’’তি! অত্থেৰ সুত্তন্তোতি? আমন্তা. তেন হি পঞ্চৰিঞ্ঞাণা সাভোগাতি…পে….

সাভোগাতিকথা নিট্ঠিতা.