১০. দসমৰগ্গো

(১০০) ৬. দ্ৰীহিসীলেহিকথা

৫৮৭. মগ্গসমঙ্গী দ্ৰীহি সীলেহি সমন্নাগতোতি? আমন্তা. মগ্গসমঙ্গী দ্ৰীহি ফস্সেহি দ্ৰীহি ৰেদনাহি দ্ৰীহি সঞ্ঞাহি দ্ৰীহি চেতনাহি দ্ৰীহি চিত্তেহি দ্ৰীহি সদ্ধাহি দ্ৰীহি ৰীরিযেহি দ্ৰীহি সতীহি দ্ৰীহি সমাধীহি দ্ৰীহি পঞ্ঞাহি সমন্নাগতোতি? ন হেৰং ৰত্তব্বে…পে….

মগ্গসমঙ্গী লোকিযেন সীলেন সমন্নাগতোতি? আমন্তা. মগ্গসমঙ্গী লোকিযেন ফস্সেন লোকিযায ৰেদনায লোকিযায পঞ্ঞায লোকিযায চেতনায লোকিযেন চিত্তেন লোকিযায সদ্ধায লোকিযেন ৰীরিযেন লোকিযায সতিযা লোকিযেন সমাধিনা লোকিযায পঞ্ঞায সমন্নাগতোতি? ন হেৰং ৰত্তব্বে…পে….

মগ্গসমঙ্গী লোকিযেন চ লোকুত্তরেন চ সীলেন সমন্নাগতোতি? আমন্তা. মগ্গসমঙ্গী লোকিযেন চ লোকুত্তরেন চ ফস্সেন সমন্নাগতো…পে… লোকিযায চ লোকুত্তরায চ পঞ্ঞায সমন্নাগতোতি? ন হেৰং ৰত্তব্বে…পে… মগ্গসমঙ্গী লোকিযেন সীলেন সমন্নাগতোতি? আমন্তা. মগ্গসমঙ্গী পুথুজ্জনোতি? ন হেৰং ৰত্তব্বে…পে….

৫৮৮. মগ্গসমঙ্গী লোকিযায সম্মাৰাচায সমন্নাগতোতি? আমন্তা. মগ্গসমঙ্গী লোকিযায সম্মাদিট্ঠিযা সমন্নাগতোতি? ন হেৰং ৰত্তব্বে…পে… মগ্গসমঙ্গী লোকিযায সম্মাৰাচায সমন্নাগতোতি? আমন্তা. মগ্গসমঙ্গী লোকিযেন সম্মাসঙ্কপ্পেন…পে… লোকিযেন সম্মাৰাযামেন…পে… লোকিযায সম্মাসতিযা…পে… লোকিযেন সম্মাসমাধিনা সমন্নাগতোতি? ন হেৰং ৰত্তব্বে…পে… মগ্গসমঙ্গী লোকিযেন সম্মাকম্মন্তেন…পে… লোকিযেন সম্মাআজীৰেন সমন্নাগতোতি? আমন্তা. মগ্গসমঙ্গী লোকিযায সম্মাদিট্ঠিযা…পে… লোকিযেন সম্মাসমাধিনা সমন্নাগতোতি? ন হেৰং ৰত্তব্বে…পে….

মগ্গসমঙ্গী লোকিযায চ লোকুত্তরায চ সম্মাৰাচায সমন্নাগতোতি? আমন্তা. মগ্গসমঙ্গী লোকিযায চ লোকুত্তরায চ সম্মাদিট্ঠিযা সমন্নাগতোতি? ন হেৰং ৰত্তব্বে…পে… মগ্গসমঙ্গী লোকিযায চ লোকুত্তরায চ সম্মাৰাচায সমন্নাগতোতি? আমন্তা. মগ্গসমঙ্গী লোকিযেন চ লোকুত্তরেন চ সম্মাসঙ্কপ্পেন…পে… লোকিযেন চ লোকুত্তরেন চ সম্মাৰাযামেন …পে… লোকিযায চ লোকুত্তরায চ সম্মাসতিযা…পে… লোকিযেন চ লোকুত্তরেন চ সম্মাসমাধিনা সমন্নাগতোতি? ন হেৰং ৰত্তব্বে…পে….

মগ্গসমঙ্গী লোকিযেন চ লোকুত্তরেন চ সম্মাকম্মন্তেন…পে… সম্মাআজীৰেন সমন্নাগতোতি? আমন্তা. মগ্গসমঙ্গী লোকিযায চ লোকুত্তরায চ সম্মাদিট্ঠিযা সমন্নাগতোতি? ন হেৰং ৰত্তব্বে…পে… মগ্গসমঙ্গী লোকিযেন চ লোকুত্তরেন চ সম্মাআজীৰেন সমন্নাগতোতি? আমন্তা. মগ্গসমঙ্গী লোকিযেন চ লোকুত্তরেন চ সম্মাসঙ্কপ্পেন…পে… লোকিযেন চ লোকুত্তরেন চ সম্মাসমাধিনা সমন্নাগতোতি? ন হেৰং ৰত্তব্বে…পে….

৫৮৯. ন ৰত্তব্বং – ‘‘মগ্গসমঙ্গী দ্ৰীহি সীলেহি সমন্নাগতো’’তি? আমন্তা. লোকিযে সীলে নিরুদ্ধে মগ্গো উপ্পজ্জতীতি? আমন্তা. দুস্সীলো খণ্ডসীলো ছিন্নসীলো মগ্গং ভাৰেতীতি? ন হেৰং ৰত্তব্বে …পে… তেন হি মগ্গসমঙ্গী দ্ৰীহি সীলেহি সমন্নাগতোতি.

দ্ৰীহিসীলেহিকথা নিট্ঠিতা.