(৯৬) ২. রূপং মগ্গোতিকথা

৫৭৩. মগ্গসমঙ্গিস্স রূপং মগ্গোতি? আমন্তা. সারম্মণং, অত্থি তস্স আৰট্টনা আভোগো সমন্নাহারো মনসিকারো চেতনা পত্থনা পণিধীতি? ন হেৰং ৰত্তব্বে…পে… ননু অনারম্মণং, নত্থি তস্স আৰট্টনা…পে… পণিধীতি? আমন্তা. হঞ্চি অনারম্মণং, নত্থি তস্স আৰট্টনা…পে… পণিধি; নো চ ৰত রে ৰত্তব্বে – ‘‘মগ্গসমঙ্গিস্স রূপং মগ্গো’’তি.

সম্মাৰাচা মগ্গোতি? আমন্তা. সারম্মণা, অত্থি তায আৰট্টনা…পে… পণিধীতি? ন হেৰং ৰত্তব্বে…পে… ননু অনারম্মণা, নত্থি তায আৰট্টনা…পে… পণিধীতি? আমন্তা. হঞ্চি অনারম্মণা, নত্থি তায আৰট্টনা…পে… পণিধি; নো চ ৰত রে ৰত্তব্বে – ‘‘সম্মাৰাচা মগ্গো’’তি.

সম্মাকম্মন্তো …পে… সম্মাআজীৰো মগ্গোতি? আমন্তা. সারম্মণো, অত্থি তস্স আৰট্টনা…পে… পণিধীতি? ন হেৰং ৰত্তব্বে…পে… ননু অনারম্মণো, নত্থি তস্স আৰট্টনা…পে… পণিধীতি? আমন্তা. হঞ্চি অনারম্মণো, নত্থি তস্স আৰট্টনা…পে… পণিধি; নো চ ৰত রে ৰত্তব্বে – ‘‘সম্মাআজীৰো মগ্গো’’তি.

৫৭৪. সম্মাদিট্ঠি মগ্গো, সা চ সারম্মণা, অত্থি তায আৰট্টনা…পে… পণিধীতি? আমন্তা. সম্মাৰাচা মগ্গো, সা চ সারম্মণা, অত্থি তায আৰট্টনা…পে… পণিধীতি? ন হেৰং ৰত্তব্বে …পে… সম্মাদিট্ঠি মগ্গো, সা চ সারম্মণা, অত্থি তায আৰট্টনা…পে… পণিধীতি? আমন্তা. সম্মাকম্মন্তো…পে… সম্মাআজীৰো মগ্গো, সো চ সারম্মণো, অত্থি তস্স আৰট্টনা…পে… পণিধীতি? ন হেৰং ৰত্তব্বে…পে… সম্মাসঙ্কপ্পো…পে… সম্মাৰাযামো…পে… সম্মাসতি…পে….

সম্মাসমাধি মগ্গো, সো চ সারম্মণো, অত্থি তস্স আৰট্টনা…পে… পণিধীতি? আমন্তা. সম্মাৰাচা মগ্গো, সা চ সারম্মণা, অত্থি তায আৰট্টনা…পে… পণিধীতি? ন হেৰং ৰত্তব্বে…পে… সম্মাসমাধি মগ্গো, সো চ সারম্মণো, অত্থি তস্স আৰট্টনা…পে… পণিধীতি? আমন্তা. সম্মাকম্মন্তো…পে… সম্মাআজীৰো মগ্গো, সো চ সারম্মণো, অত্থি তস্স আৰট্টনা…পে… পণিধীতি? ন হেৰং ৰত্তব্বে…পে….

সম্মাৰাচা মগ্গো, সা চ অনারম্মণা, নত্থি তায আৰট্টনা…পে… পণিধীতি? আমন্তা. সম্মাদিট্ঠি মগ্গো, সা চ অনারম্মণা, নত্থি তায আৰট্টনা…পে… পণিধীতি? ন হেৰং ৰত্তব্বে…পে… সম্মাৰাচা মগ্গো, সা চ অনারম্মণা, নত্থি তায আৰট্টনা…পে… পণিধীতি? আমন্তা. সম্মাসঙ্কপ্পো…পে… সম্মাৰাযামো… সম্মাসতি … সম্মাসমাধি মগ্গো, সো চ অনারম্মণো, নত্থি তস্স আৰট্টনা…পে… পণিধীতি? ন হেৰং ৰত্তব্বে…পে….

সম্মাকম্মন্তো …পে… সম্মাআজীৰো মগ্গো, সো চ অনারম্মণো, নত্থি তস্স আৰট্টনা…পে… পণিধীতি? আমন্তা. সম্মাদিট্ঠি… সম্মাসঙ্কপ্পো… সম্মাৰাযামো… সম্মাসতি…পে… সম্মাসমাধি মগ্গো, সো চ অনারম্মণো, নত্থি তস্স আৰট্টনা…পে… পণিধীতি? ন হেৰং ৰত্তব্বে…পে….

৫৭৫. ন ৰত্তব্বং – ‘‘মগ্গসমঙ্গিস্স রূপং মগ্গো’’তি? আমন্তা. ননু সম্মাৰাচা সম্মাকম্মন্তো সম্মাআজীৰো মগ্গোতি? আমন্তা. হঞ্চি সম্মাৰাচা সম্মাকম্মন্তো সম্মাআজীৰো মগ্গো, তেন ৰত রে ৰত্তব্বে – ‘‘মগ্গসমঙ্গিস্স রূপং মগ্গো’’তি.

রূপং মগ্গোতিকথা নিট্ঠিতা.