(৭৬) ৪. কামকথা

৫১৩. পঞ্চেৰাযতনা কামাতি? আমন্তা. ননু অত্থি তপ্পটিসংযুত্তো ছন্দোতি? আমন্তা. হঞ্চি অত্থি তপ্পটিসংযুত্তো ছন্দো, নো চ ৰত রে ৰত্তব্বে – ‘‘পঞ্চেৰাযতনা কামা’’তি. ননু অত্থি তপ্পটিসংযুত্তো রাগো তপ্পটিসংযুত্তো ছন্দো তপ্পটিসংযুত্তো ছন্দরাগো তপ্পটিসংযুত্তো সঙ্কপ্পো তপ্পটিসংযুত্তো রাগো তপ্পটিসংযুত্তো সঙ্কপ্পরাগো তপ্পটিসংযুত্তা পীতি তপ্পটিসংযুত্তং সোমনস্সং তপ্পটিসংযুত্তং পীতিসোমনস্সন্তি? আমন্তা. হঞ্চি অত্থি তপ্পটিসংযুত্তং পীতিসোমনস্সং, নো চ ৰত রে ৰত্তব্বে – ‘‘পঞ্চেৰাযতনা কামা’’তি.

৫১৪. ন ৰত্তব্বং – ‘‘পঞ্চেৰাযতনা কামা’’তি? আমন্তা. ননু ৰুত্তং ভগৰতা – ‘‘পঞ্চিমে, ভিক্খৰে, কামগুণা! কতমে পঞ্চ? চক্খুৰিঞ্ঞেয্যা রূপা…পে… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা – ইমে খো, ভিক্খৰে, পঞ্চ কামগুণা’’তি. অত্থেৰ সুত্তন্তোতি? আমন্তা. তেন হি পঞ্চেৰাযতনা কামাতি.

পঞ্চেৰাযতনা কামাতি? আমন্তা. ননু ৰুত্তং ভগৰতা – ‘‘পঞ্চিমে, ভিক্খৰে, কামগুণা! কতমে পঞ্চ? চক্খুৰিঞ্ঞেয্যা রূপা…পে… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা – ইমে খো, ভিক্খৰে, পঞ্চ কামগুণা. অপি চ, ভিক্খৰে, নেতে কামা কামগুণা নামেতে অরিযস্স ৰিনযে ৰুচ্চ’’ন্তি –

‘‘সঙ্কপ্পরাগো পুরিসস্স কামো,

ন তে কামা যানি চিত্রানি লোকে;

সঙ্কপ্পরাগো পুরিসস্স কামো,

তিট্ঠন্তি চিত্রানি তথেৰ লোকে;

অথেত্থ ধীরা ৰিনযন্তি ছন্দ’’ন্তি [অ. নি. ৬.৬৩ নিব্বেধিকসুত্তে].

অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘পঞ্চেৰাযতনা কামা’’তি.

কামকথা নিট্ঠিতা.