৮. অট্ঠমৰগ্গো

(৭৭) ৫. রূপধাতুকথা

৫১৫. রূপিনো ধম্মা রূপধাতূতি? আমন্তা. রূপং ভৰো গতি সত্তাৰাসো সংসারো যোনি ৰিঞ্ঞাণট্ঠিতি অত্তভাৰপটিলাভোতি? ন হেৰং ৰত্তব্বে…পে… অত্থি রূপূপগং কম্মন্তি? ন হেৰং ৰত্তব্বে…পে… অত্থি রূপূপগা সত্তাতি? ন হেৰং ৰত্তব্বে…পে… রূপে সত্তা জাযন্তি জীযন্তি মীযন্তি চৰন্তি উপপজ্জন্তীতি? ন হেৰং ৰত্তব্বে…পে… রূপে অত্থি রূপং ৰেদনা সঞ্ঞা সঙ্খারা ৰিঞ্ঞাণন্তি? ন হেৰং ৰত্তব্বে…পে… রূপং পঞ্চৰোকারভৰোতি? ন হেৰং ৰত্তব্বে…পে….

রূপধাতু ভৰো গতি…পে… অত্তভাৰপটিলাভোতি? আমন্তা. রূপং ভৰো গতি…পে… অত্তভাৰপটিলাভোতি? ন হেৰং ৰত্তব্বে…পে… অত্থি রূপধাতূপগং কম্মন্তি? আমন্তা. অত্থি রূপূপগং কম্মন্তি? ন হেৰং ৰত্তব্বে…পে… অত্থি রূপধাতূপগা সত্তাতি? আমন্তা. অত্থি রূপূপগা সত্তাতি? ন হেৰং ৰত্তব্বে…পে….

রূপধাতুযা সত্তা জাযন্তি জীযন্তি মীযন্তি চৰন্তি উপপজ্জন্তীতি? আমন্তা. রূপে সত্তা জাযন্তি জীযন্তি মীযন্তি চৰন্তি উপপজ্জন্তীতি? ন হেৰং ৰত্তব্বে…পে… রূপধাতুযা অত্থি রূপং ৰেদনা সঞ্ঞা সঙ্খারা ৰিঞ্ঞাণন্তি? আমন্তা. রূপে অত্থি রূপং ৰেদনা সঞ্ঞা সঙ্খারা ৰিঞ্ঞাণন্তি? ন হেৰং ৰত্তব্বে…পে… রূপধাতু পঞ্চৰোকারভৰোতি? আমন্তা. রূপং পঞ্চৰোকারভৰোতি? ন হেৰং ৰত্তব্বে…পে….

৫১৬. রূপিনো ধম্মা রূপধাতু, কামধাতুযা অত্থি রূপন্তি? আমন্তা. সাৰ কামধাতু, সা রূপধাতূতি? ন হেৰং ৰত্তব্বে…পে… সাৰ কামধাতু, সা রূপধাতূতি? আমন্তা. কামভৰেন সমন্নাগতো পুগ্গলো দ্ৰীহি ভৰেহি সমন্নাগতো হোতি – কামভৰেন চ রূপভৰেন চাতি? ন হেৰং ৰত্তব্বে.

রূপধাতুকথা নিট্ঠিতা.