৮. অট্ঠমৰগ্গো

(৭৪) ২. অন্তরাভৰকথা

৫০৫. অত্থি অন্তরাভৰোতি? আমন্তা. কামভৰোতি? ন হেৰং ৰত্তব্বে…পে… অত্থি অন্তরাভৰোতি? আমন্তা. রূপভৰোতি? ন হেৰং ৰত্তব্বে…পে… অত্থি অন্তরাভৰোতি? আমন্তা. অরূপভৰোতি? ন হেৰং ৰত্তব্বে…পে… অত্থি অন্তরাভৰোতি? আমন্তা. কামভৰস্স চ রূপভৰস্স চ অন্তরে অত্থি অন্তরাভৰোতি? ন হেৰং ৰত্তব্বে…পে… অত্থি অন্তরাভৰোতি? আমন্তা. রূপভৰস্স চ অরূপভৰস্স চ অন্তরে অত্থি অন্তরাভৰোতি? ন হেৰং ৰত্তব্বে…পে….

কামভৰস্স চ রূপভৰস্স চ অন্তরে নত্থি অন্তরাভৰোতি? আমন্তা. হঞ্চি কামভৰস্স চ রূপভৰস্স চ অন্তরে নত্থি অন্তরাভৰো, নো চ ৰত রে ৰত্তব্বে – ‘‘অত্থি অন্তরাভৰো’’তি. রূপভৰস্স চ অরূপভৰস্স চ অন্তরে নত্থি অন্তরাভৰোতি? আমন্তা. হঞ্চি রূপভৰস্স চ অরূপভৰস্স চ অন্তরে নত্থি অন্তরাভৰো, নো চ ৰত রে ৰত্তব্বে – ‘‘অত্থি অন্তরাভৰো’’তি.

৫০৬. অত্থি অন্তরাভৰোতি? আমন্তা. পঞ্চমী সা যোনি, ছট্ঠমী সা গতি, অট্ঠমী সা ৰিঞ্ঞাণট্ঠিতি, দসমো সো সত্তাৰাসোতি? ন হেৰং ৰত্তব্বে…পে… অত্থি অন্তরাভৰোতি? আমন্তা. অন্তরাভৰো ভৰো গতি সত্তাৰাসো সংসারো যোনি ৰিঞ্ঞাণট্ঠিতি অত্তভাৰপটিলাভোতি? ন হেৰং ৰত্তব্বে…পে… অত্থি অন্তরাভৰূপগং কম্মন্তি? ন হেৰং ৰত্তব্বে…পে… অত্থি অন্তরাভৰূপগা সত্তাতি? ন হেৰং ৰত্তব্বে…পে… অন্তরাভৰে সত্তা জাযন্তি জীযন্তি মীযন্তি চৰন্তি উপপজ্জন্তীতি? ন হেৰং ৰত্তব্বে…পে… অন্তরাভৰে অত্থি রূপং ৰেদনা সঞ্ঞা সঙ্খারা ৰিঞ্ঞাণন্তি? ন হেৰং ৰত্তব্বে…পে… অন্তরাভৰো পঞ্চৰোকারভৰোতি? ন হেৰং ৰত্তব্বে…পে….

৫০৭. অত্থি কামভৰো, কামভৰো ভৰো গতি সত্তাৰাসো সংসারো যোনি ৰিঞ্ঞাণট্ঠিতি অত্তভাৰপটিলাভোতি? আমন্তা. অত্থি অন্তরাভৰো, অন্তরাভৰো ভৰো গতি সত্তাৰাসো সংসারো যোনি ৰিঞ্ঞাণট্ঠিতি অত্তভাৰপটিলাভোতি? ন হেৰং ৰত্তব্বে…পে… অত্থি কামভৰূপগং কম্মন্তি? আমন্তা. অত্থি অন্তরাভৰূপগং কম্মন্তি? ন হেৰং ৰত্তব্বে…পে… অত্থি কামভৰূপগা সত্তাতি? আমন্তা. অত্থি অন্তরাভৰূপগা সত্তাতি? ন হেৰং ৰত্তব্বে…পে… কামভৰে সত্তা জাযন্তি জীযন্তি মীযন্তি চৰন্তি উপপজ্জন্তীতি? আমন্তা. অন্তরাভৰে সত্তা জাযন্তি জীযন্তি মীযন্তি চৰন্তি উপপজ্জন্তীতি? ন হেৰং ৰত্তব্বে…পে… কামভৰে অত্থি রূপং ৰেদনা সঞ্ঞা সঙ্খারা ৰিঞ্ঞাণন্তি? আমন্তা. অন্তরাভৰে অত্থি রূপং ৰেদনা সঞ্ঞা সঙ্খারা ৰিঞ্ঞাণন্তি? ন হেৰং ৰত্তব্বে…পে… কামভৰো পঞ্চৰোকারভৰোতি? আমন্তা. অন্তরাভৰো পঞ্চৰোকারভৰোতি? ন হেৰং ৰত্তব্বে…পে….

অত্থি রূপভৰো, রূপভৰো ভৰো গতি সত্তাৰাসো সংসারো যোনি ৰিঞ্ঞাণট্ঠিতি অত্তভাৰপটিলাভোতি? আমন্তা. অত্থি অন্তরাভৰো, অন্তরাভৰো ভৰো গতি সত্তাৰাসো সংসারো যোনি ৰিঞ্ঞাণট্ঠিতি অত্তভাৰপটিলাভোতি? ন হেৰং ৰত্তব্বে…পে… অত্থি রূপভৰূপগং কম্মন্তি? আমন্তা. অত্থি অন্তরাভৰূপগং কম্মন্তি? ন হেৰং ৰত্তব্বে…পে… অত্থি রূপভৰূপগা সত্তাতি? আমন্তা. অত্থি অন্তরাভৰূপগা সত্তাতি? ন হেৰং ৰত্তব্বে…পে… রূপভৰে সত্তা জাযন্তি জীযন্তি মীযন্তি চৰন্তি উপপজ্জন্তীতি? আমন্তা. অন্তরাভৰে সত্তা জাযন্তি জীযন্তি মীযন্তি চৰন্তি উপপজ্জন্তীতি? ন হেৰং ৰত্তব্বে…পে… রূপভৰে অত্থি রূপং ৰেদনা সঞ্ঞা সঙ্খারা ৰিঞ্ঞাণন্তি? আমন্তা. অন্তরাভৰে অত্থি রূপং ৰেদনা সঞ্ঞা সঙ্খারা ৰিঞ্ঞাণন্তি? ন হেৰং ৰত্তব্বে…পে… রূপভৰো পঞ্চৰোকারভৰোতি? আমন্তা. অন্তরাভৰো পঞ্চৰোকারভৰোতি? ন হেৰং ৰত্তব্বে…পে….

অত্থি অরূপভৰো, অরূপভৰো ভৰো গতি সত্তাৰাসো সংসারো যোনি ৰিঞ্ঞাণট্ঠিতি অত্তভাৰপটিলাভোতি? আমন্তা. অত্থি অন্তরাভৰো, অন্তরাভৰো ভৰো গতি সত্তাৰাসো সংসারো যোনি ৰিঞ্ঞাণট্ঠিতি অত্তভাৰপটিলাভোতি? ন হেৰং ৰত্তব্বে…পে… অত্থি অরূপভৰূপগং কম্মন্তি? আমন্তা. অত্থি অন্তরাভৰূপগং কম্মন্তি? ন হেৰং ৰত্তব্বে…পে… অত্থি অরূপভৰূপগা সত্তাতি? আমন্তা. অত্থি অন্তরাভৰূপগা সত্তাতি? ন হেৰং ৰত্তব্বে…পে… অরূপভৰে সত্তা জাযন্তি জীযন্তি মীযন্তি চৰন্তি উপপজ্জন্তীতি? আমন্তা. অন্তরাভৰে সত্তা জাযন্তি জীযন্তি মীযন্তি চৰন্তি উপপজ্জন্তীতি? ন হেৰং ৰত্তব্বে…পে… অরূপভৰে অত্থি ৰেদনা সঞ্ঞা সঙ্খারা ৰিঞ্ঞাণন্তি? আমন্তা. অন্তরাভৰে অত্থি ৰেদনা সঞ্ঞা সঙ্খারা ৰিঞ্ঞাণন্তি? ন হেৰং ৰত্তব্বে…পে… অরূপভৰো চতুৰোকারভৰোতি? আমন্তা. অন্তরাভৰো চতুৰোকারভৰোতি? ন হেৰং ৰত্তব্বে…পে….

৫০৮. অত্থি অন্তরাভৰোতি? আমন্তা. সব্বেসঞ্ঞেৰ সত্তানং অত্থি অন্তরাভৰোতি? ন হেৰং ৰত্তব্বে …পে… সব্বেসঞ্ঞেৰ সত্তানং নত্থি অন্তরাভৰোতি? আমন্তা. হঞ্চি সব্বেসঞ্ঞেৰ সত্তানং নত্থি অন্তরাভৰো, নো চ ৰত রে ৰত্তব্বে – ‘‘অত্থি অন্তরাভৰো’’তি.

অত্থি অন্তরাভৰোতি? আমন্তা. আনন্তরিযস্স পুগ্গলস্স অত্থি অন্তরাভৰোতি? ন হেৰং ৰত্তব্বে…পে… আনন্তরিযস্স পুগ্গলস্স নত্থি অন্তরাভৰোতি? আমন্তা. হঞ্চি আনন্তরিযস্স পুগ্গলস্স নত্থি অন্তরাভৰো, নো চ ৰত রে ৰত্তব্বে – ‘‘অত্থি অন্তরাভৰো’’তি.

ন আনন্তরিযস্স পুগ্গলস্স অত্থি অন্তরাভৰোতি? আমন্তা. আনন্তরিযস্স পুগ্গলস্স অত্থি অন্তরাভৰোতি? ন হেৰং ৰত্তব্বে…পে… আনন্তরিযস্স পুগ্গলস্স নত্থি অন্তরাভৰোতি? আমন্তা. ন আনন্তরিযস্স পুগ্গলস্স নত্থি অন্তরাভৰোতি? ন হেৰং ৰত্তব্বে…পে… নিরযূপগস্স পুগ্গলস্স…পে… অসঞ্ঞসত্তূপগস্স পুগ্গলস্স …পে… অরূপূপগস্স পুগ্গলস্স অত্থি অন্তরাভৰোতি? ন হেৰং ৰত্তব্বে…পে… অরূপূপগস্স পুগ্গলস্স নত্থি অন্তরাভৰোতি? আমন্তা. হঞ্চি অরূপূপগস্স পুগ্গলস্স নত্থি অন্তরাভৰো, নো চ ৰত রে ৰত্তব্বে – ‘‘অত্থি অন্তরাভৰো’’তি.

ন অরূপূপগস্স পুগ্গলস্স অত্থি অন্তরাভৰোতি? আমন্তা. অরূপূপগস্স পুগ্গলস্স অত্থি অন্তরাভৰোতি? ন হেৰং ৰত্তব্বে…পে… অরূপূপগস্স পুগ্গলস্স নত্থি অন্তরাভৰোতি? আমন্তা. ন অরূপূপগস্স পুগ্গলস্স নত্থি অন্তরাভৰোতি? ন হেৰং ৰত্তব্বে…পে….

৫০৯. ন ৰত্তব্বং অত্থি অন্তরাভৰোতি? আমন্তা. ননু অন্তরাপরিনিব্বাযী পুগ্গলো অত্থীতি? আমন্তা. হঞ্চি অন্তরাপরিনিব্বাযী পুগ্গলো অত্থি, তেন ৰত রে [নো চ ৰত রে (সী. ক.), নো ৰত রে (স্যা.)] ৰত্তব্বে – ‘‘অত্থি অন্তরাভৰো’’তি.

অন্তরাপরিনিব্বাযী পুগ্গলো অত্থীতি কত্ৰা অত্থি অন্তরাভৰোতি? আমন্তা. উপহচ্চপরিনিব্বাযী পুগ্গলো অত্থীতি কত্ৰা অত্থি উপহচ্চভৰোতি? ন হেৰং ৰত্তব্বে…পে… অন্তরাপরিনিব্বাযী পুগ্গলো অত্থীতি কত্ৰা অত্থি অন্তরাভৰোতি? আমন্তা. অসঙ্খারপরিনিব্বাযী পুগ্গলো…পে… সসঙ্খারপরিনিব্বাযী পুগ্গলো অত্থীতি কত্ৰা অত্থি সসঙ্খারভৰোতি? ন হেৰং ৰত্তব্বে…পে….

অন্তরাভৰকথা নিট্ঠিতা.