৮. অট্ঠমৰগ্গো

(৮৩) ১১. কম্মহেতুকথা

৫৪৬. কম্মহেতু অরহা অরহত্তা পরিহাযতীতি? আমন্তা. কম্মহেতু সোতাপন্নো সোতাপত্তিফলা পরিহাযতীতি? ন হেৰং ৰত্তব্বে…পে… কম্মহেতু অরহা অরহত্তা পরিহাযতীতি? আমন্তা. কম্মহেতু সকদাগামী…পে… অনাগামী অনাগামিফলা পরিহাযতীতি? ন হেৰং ৰত্তব্বে…পে….

কম্মহেতু সোতাপন্নো সোতাপত্তিফলা ন পরিহাযতীতি? আমন্তা. কম্মহেতু অরহা অরহত্তা ন পরিহাযতীতি? ন হেৰং ৰত্তব্বে …পে… কম্মহেতু সকদাগামী…পে… অনাগামী অনাগামিফলা ন পরিহাযতীতি? আমন্তা. কম্মহেতু অরহা অরহত্তা ন পরিহাযতীতি? ন হেৰং ৰত্তব্বে…পে….

কম্মহেতু অরহা অরহত্তা পরিহাযতীতি? আমন্তা. পাণাতিপাতকম্মস্স হেতূতি? ন হেৰং ৰত্তব্বে…পে… অদিন্নাদানকম্মস্স হেতু…পে… কামেসুমিচ্ছাচারকম্মস্স হেতু… মুসাৰাদকম্মস্স হেতু… পিসুণৰাচাকম্মস্স হেতু… ফরুসৰাচাকম্মস্স হেতু… সম্ফপ্পলাপকম্মস্স হেতু… মাতুঘাতকম্মস্স [মাতুঘাতককম্মস্স (স্যা.), মাতুঘাতিকম্মস্স (ক.) তথা পিতুঘাতঅরহন্তঘাতকম্মস্সাতিপদেসু] হেতু… পিতুঘাতকম্মস্স হেতু… অরহন্তঘাতকম্মস্স হেতু… রুহিরুপ্পাদকম্মস্স হেতু…পে… সঙ্ঘভেদকম্মস্স হেতূতি? ন হেৰং ৰত্তব্বে…পে….

কতমস্স কম্মস্স হেতূতি? হন্দ হি অরহন্তানং অব্ভাচিক্খতীতি. অরহন্তানং অব্ভাচিক্খনকম্মস্স হেতু অরহা অরহত্তা পরিহাযতীতি? আমন্তা. যে কেচি অরহন্তানং অব্ভাচিক্খন্তি, সব্বে তে অরহত্তং সচ্ছিকরোন্তীতি? ন হেৰং ৰত্তব্বে…পে….

কম্মহেতুকথা নিট্ঠিতা.

অট্ঠমৰগ্গো.

তস্সুদ্দানং –

ছ গতিযো, অন্তরাভৰো, পঞ্চেৰ কামগুণা কামধাতু, পঞ্চেৰ আযতনা কামা, রূপিনো ধম্মা রূপধাতু, অরূপিনো ধম্মা অরূপধাতু, সল়াযতনিকো অত্তভাৰো রূপধাতুযা, অত্থি রূপং অরূপেসু, রূপং কম্মং, রূপং জীৰিতং, কম্মহেতুকা পরিহাযতীতি.