৭. সত্তমৰগ্গো

(৭২) ১০. ৰিপাকো ৰিপাকধম্মধম্মোতিকথা

৫০১. ৰিপাকো ৰিপাকধম্মধম্মোতি? আমন্তা. তস্স ৰিপাকো ৰিপাকধম্মধম্মোতি? ন হেৰং ৰত্তব্বে…পে… তস্স ৰিপাকো ৰিপাকধম্মধম্মোতি? আমন্তা. তস্স তস্সেৰ নত্থি দুক্খস্স অন্তকিরিযা নত্থি ৰট্টুপচ্ছেদো নত্থি অনুপাদাপরিনিব্বানন্তি? ন হেৰং ৰত্তব্বে…পে….

ৰিপাকো ৰিপাকধম্মধম্মোতি? আমন্তা. ৰিপাকোতি ৰা ৰিপাকধম্মধম্মোতি ৰা ৰিপাকধম্মধম্মোতি ৰা ৰিপাকোতি ৰা এসেসে একট্ঠে সমে সমভাগে তজ্জাতেতি? ন হেৰং ৰত্তব্বে…পে….

ৰিপাকো ৰিপাকধম্মধম্মোতি? আমন্তা. ৰিপাকো চ ৰিপাকধম্মধম্মো চ ৰিপাকধম্মধম্মো চ ৰিপাকো চ সহগতা সহজাতা সংসট্ঠা সম্পযুত্তা একুপ্পাদা একনিরোধা একৰত্থুকা একারম্মণাতি? ন হেৰং ৰত্তব্বে…পে….

ৰিপাকো ৰিপাকধম্মধম্মোতি? আমন্তা. তঞ্ঞেৰ অকুসলং সো অকুসলস্স ৰিপাকো, তঞ্ঞেৰ কুসলং সো কুসলস্স ৰিপাকোতি? ন হেৰং ৰত্তব্বে…পে….

ৰিপাকো ৰিপাকধম্মধম্মোতি? আমন্তা. যেনেৰ চিত্তেন পাণং হনতি তেনেৰ চিত্তেন নিরযে পচ্চতি, যেনেৰ চিত্তেন দানং দেতি তেনেৰ চিত্তেন সগ্গে মোদতীতি? ন হেৰং ৰত্তব্বে…পে….

৫০২. ন ৰত্তব্বং – ‘‘ৰিপাকো ৰিপাকধম্মধম্মো’’তি? আমন্তা. ননু ৰিপাকা চত্তারো খন্ধা অরূপিনো অঞ্ঞমঞ্ঞপচ্চযাতি? আমন্তা. হঞ্চি ৰিপাকা চত্তারো খন্ধা অরূপিনো অঞ্ঞমঞ্ঞপচ্চযা, তেন ৰত রে ৰত্তব্বে – ‘‘ৰিপাকো ৰিপাকধম্মধম্মো’’তি.

ৰিপাকো ৰিপাকধম্মধম্মোতিকথা নিট্ঠিতা.

সত্তমৰগ্গো.

তস্সুদ্দানং –

সঙ্গহো, সম্পযুত্তো, চেতসিকো ধম্মো, চেতসিকং দানং, পরিভোগমযং পুঞ্ঞং ৰড্ঢতি, ইতো দিন্নেন তত্থ যাপেন্তি, পথৰী কম্মৰিপাকো, জরামরণং ৰিপাকো, নত্থি অরিযধম্মৰিপাকো, ৰিপাকো ৰিপাকধম্মধম্মোতি.