৬. ছট্ঠৰগ্গো

(৬০) ৮. পথৰীধাতু সনিদস্সনাতিআদিকথা

৪৬৫. পথৰীধাতু সনিদস্সনাতি? আমন্তা. রূপং রূপাযতনং রূপধাতু নীলং পীতকং লোহিতকং ওদাতং চক্খুৰিঞ্ঞেয্যং চক্খুস্মিং পটিহঞ্ঞতি চক্খুস্স আপাথং আগচ্ছতীতি? ন হেৰং ৰত্তব্বে…পে….

পথৰীধাতু সনিদস্সনাতি? আমন্তা. চক্খুঞ্চ পটিচ্চ পথৰীধাতুঞ্চ উপ্পজ্জতি চক্খুৰিঞ্ঞাণন্তি? ন হেৰং ৰত্তব্বে…পে….

চক্খুঞ্চ পটিচ্চ পথৰীধাতুঞ্চ উপ্পজ্জতি চক্খুৰিঞ্ঞাণন্তি? আমন্তা. ‘‘চক্খুঞ্চ পটিচ্চ পথৰীধাতুঞ্চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তোতি? নত্থি. ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তোতি? আমন্তা. হঞ্চি ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তো, নো চ ৰত রে ৰত্তব্বে – ‘‘চক্খুঞ্চ পটিচ্চ পথৰীধাতুঞ্চ উপ্পজ্জতি চক্খুৰিঞ্ঞাণ’’ন্তি.

৪৬৬. ন ৰত্তব্বং – ‘‘পথৰীধাতু সনিদস্সনা’’তি? আমন্তা. ননু পস্সতি ভূমিং পাসাণং পব্বতন্তি? আমন্তা. হঞ্চি পস্সতি [পস্সসি (সী. স্যা. ক.) এৰমুপরিপি] ভূমিং পাসাণং পব্বতং, তেন ৰত রে ৰত্তব্বে – ‘‘পথৰীধাতু সনিদস্সনা’’তি…পে….

ন ৰত্তব্বং – ‘‘আপোধাতু সনিদস্সনা’’তি? আমন্তা. ননু পস্সতি উদকন্তি? আমন্তা. হঞ্চি পস্সতি উদকং, তেন ৰত রে ৰত্তব্বে – ‘‘আপোধাতু সনিদস্সনাতি…পে….

ন ৰত্তব্বং – তেজোধাতু সনিদস্সনাতি? আমন্তা. ননু পস্সতি অগ্গিং জলন্তন্তি? আমন্তা. হঞ্চি পস্সতি অগ্গিং জলন্তং, তেন ৰত রে ৰত্তব্বে – ‘‘তেজোধাতু সনিদস্সনা’’তি…পে….

ন ৰত্তব্বং – ‘‘ৰাযোধাতু সনিদস্সনা’’তি? আমন্তা. ননু পস্সতি ৰাতেন রুক্খে সঞ্চালিযমানেতি? আমন্তা. হঞ্চি পস্সতি ৰাতেন রুক্খে সঞ্চালিযমানে, তেন ৰত রে ৰত্তব্বে – ‘‘ৰাযোধাতু সনিদস্সনা’’তি…পে….

পথৰীধাতু সনিদস্সনাতিআদিকথা নিট্ঠিতা.