৬. ছট্ঠৰগ্গো

(৬১) ৯. চক্খুন্দ্রিযং সনিদস্সনন্তিআদিকথা

৪৬৭. চক্খুন্দ্রিযং সনিদস্সনন্তি? আমন্তা. রূপং রূপাযতনং রূপধাতু…পে… চক্খুস্স আপাথং আগচ্ছতীতি? ন হেৰং ৰত্তব্বে…পে….

চক্খুন্দ্রিযং সনিদস্সনন্তি? আমন্তা. চক্খুঞ্চ পটিচ্চ চক্খুন্দ্রিযঞ্চ উপ্পজ্জতি চক্খুৰিঞ্ঞাণন্তি? ন হেৰং ৰত্তব্বে…পে….

চক্খুঞ্চ পটিচ্চ চক্খুন্দ্রিযঞ্চ উপ্পজ্জতি চক্খুৰিঞ্ঞাণন্তি? আমন্তা. ‘‘চক্খুঞ্চ পটিচ্চ চক্খুন্দ্রিযঞ্চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তোতি? নত্থি. ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তোতি? আমন্তা. হঞ্চি ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি – অত্থেৰ সুত্তন্তো, নো চ ৰত রে ৰত্তব্বে – ‘‘চক্খুঞ্চ পটিচ্চ চক্খুন্দ্রিযঞ্চ উপ্পজ্জতি চক্খুৰিঞ্ঞাণ’’ন্তি.

৪৬৮. ন ৰত্তব্বং – ‘‘পঞ্চিন্দ্রিযানি সনিদস্সনানী’’তি? আমন্তা. ননু পস্সতি চক্খুং সোতং ঘানং জিৰ্হং কাযন্তি? আমন্তা. হঞ্চি পস্সতি চক্খুং সোতং ঘানং জিৰ্হং কাযং, তেন ৰত রে ৰত্তব্বে – ‘‘পঞ্চিন্দ্রিযানি সনিদস্সনানী’’তি…পে….

চক্খুন্দ্রিযং সনিদস্সনন্তিআদিকথা নিট্ঠিতা.