৪. চতুত্থৰগ্গো

(৪০) ৮. নিযামোক্কন্তিকথা

৪০৩. বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযোতি [ম. নি. ২.২৮২ ঘটিকারসুত্তং নিস্সায পুচ্ছতি]? আমন্তা. বোধিসত্তো কস্সপস্স ভগৰতো সাৰকোতি? ন হেৰং ৰত্তব্বে…পে….

বোধিসত্তো কস্সপস্স ভগৰতো সাৰকোতি? আমন্তা. সাৰকো হুত্ৰা বুদ্ধো হোতীতি? ন হেৰং ৰত্তব্বে…পে….

সাৰকো হুত্ৰা বুদ্ধো হোতীতি? আমন্তা. অনুস্সৰিযোতি? ন হেৰং ৰত্তব্বে…পে….

অনুস্সৰিযোতি? আমন্তা. ননু ভগৰা সযম্ভূতি? আমন্তা. হঞ্চি ভগৰা সযম্ভূ, নো চ ৰত রে ৰত্তব্বে – ‘‘অনুস্সৰিযো’’তি.

বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযোতি? আমন্তা. ভগৰতা বোধিযা মূলে তীণেৰ সামঞ্ঞফলানি অভিসম্বুদ্ধানীতি? ন হেৰং ৰত্তব্বে…পে….

ননু ভগৰতা বোধিযা মূলে চত্তারি সামঞ্ঞফলানি অভিসম্বুদ্ধানীতি? আমন্তা. হঞ্চি ভগৰতা বোধিযা মূলে চত্তারি সামঞ্ঞফলানি অভিসম্বুদ্ধানি, নো চ ৰত রে ৰত্তব্বে – ‘‘বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযো’’তি.

৪০৪. বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযোতি? আমন্তা. বোধিসত্তো দুক্করকারিযং অকাসীতি? আমন্তা. দস্সনসম্পন্নো পুগ্গলো দুক্করকারিযং করেয্যাতি? ন হেৰং ৰত্তব্বে…পে….

বোধিসত্তো অপরন্তপং [অমরং তপং (সং. নি. ১.১৩৭)] অকাসি, অঞ্ঞং সত্থারং উদ্দিসীতি? আমন্তা. দস্সনসম্পন্নো পুগ্গলো অঞ্ঞং সত্থারং উদ্দিসেয্যাতি? ন হেৰং ৰত্তব্বে…পে….

আযস্মা আনন্দো ভগৰতো পাৰচনে ওক্কন্তনিযামো চরিতব্রহ্মচরিযো, আযস্মা আনন্দো ভগৰতো সাৰকোতি? আমন্তা. বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযো, বোধিসত্তো কস্সপস্স ভগৰতো সাৰকোতি? ন হেৰং ৰত্তব্বে…পে….

চিত্তো গহপতি হত্থকো আল়ৰকো ভগৰতো পাৰচনে ওক্কন্তনিযামো চরিতব্রহ্মচরিযো, চিত্তো গহপতি হত্থকো আল়ৰকো ভগৰতো সাৰকোতি? আমন্তা. বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযো, বোধিসত্তো কস্সপস্স ভগৰতো সাৰকোতি? ন হেৰং ৰত্তব্বে…পে….

বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযো, ন চ কস্সপস্স ভগৰতো সাৰকোতি? আমন্তা. আযস্মা আনন্দো ভগৰতো পাৰচনে ওক্কন্তনিযামো চরিতব্রহ্মচরিযো, ন চ ভগৰতো সাৰকোতি? ন হেৰং ৰত্তব্বে…পে….

বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযো, ন চ কস্সপস্স ভগৰতো সাৰকোতি? আমন্তা. চিত্তো গহপতি হত্থকো আল়ৰকো ভগৰতো পাৰচনে ওক্কন্তনিযামো চরিতব্রহ্মচরিযো, ন চ ভগৰতো সাৰকোতি? ন হেৰং ৰত্তব্বে…পে….

বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযো, ন চ কস্সপস্স ভগৰতো সাৰকোতি? আমন্তা. সাৰকো জাতিং ৰীতিৰত্তো অসাৰকো হোতীতি? ন হেৰং ৰত্তব্বে…পে….

৪০৫. ন ৰত্তব্বং – ‘‘বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযো’’তি? আমন্তা. ননু ৰুত্তং ভগৰতা – ‘‘কস্সপে অহং, আনন্দ, ভগৰতি ব্রহ্মচরিযং অচরিং আযতিং সম্বোধাযা’’তি! অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযো’’তি.

বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযোতি? আমন্তা. ননু ৰুত্তং ভগৰতা –

‘‘সব্বাভিভূ সব্বৰিদূহমস্মি,

সব্বেসু ধম্মেসু অনুপলিত্তো;

সব্বঞ্জহো তণ্হক্খযে ৰিমুত্তো,

সযং অভিঞ্ঞায কমুদ্দিসেয্যং.

‘‘ন মে আচরিযো অত্থি, সদিসো মে ন ৰিজ্জতি;

সদেৰকস্মিং লোকস্মিং, নত্থি মে পটিপুগ্গলো.

‘‘অহঞ্হি অরহা লোকে, অহং সত্থা অনুত্তরো;

একোম্হি সম্মাসম্বুদ্ধো, সীতিভূতোস্মি নিব্বুতো.

‘‘ধম্মচক্কং পৰত্তেতুং, গচ্ছামি কাসিনং পুরং;

অন্ধীভূতস্মিং [অন্ধভূতস্মিং (সী. স্যা. কং. পী.)] লোকস্মিং, আহঞ্ছং [আহঞ্ঞিং (ক.)] অমতদুন্দুভি’’ন্তি [দুদ্রভিন্তি (ক.)].

‘‘যথা খো ত্ৰং, আৰুসো, পটিজানাসি, অরহসি অনন্তজিনো’’তি?

‘‘মাদিসা ৰে জিনা হোন্তি, যে পত্তা আসৰক্খযং;

জিতা মে পাপকা ধম্মা, তস্মাহং উপক জিনো’’তি [মহাৰ. ১১; ম. নি. ১.২৮৫; ২.৩৪১].

অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযো’’তি.

বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযোতি? আমন্তা. ননু ৰুত্তং ভগৰতা – ‘‘‘ইদং দুক্খং অরিযসচ্চ’ন্তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৰিজ্জা উদপাদি, আলোকো উদপাদি. ‘তং খো পনিদং দুক্খং অরিযসচ্চং পরিঞ্ঞেয্য’ন্তি মে, ভিক্খৰে…পে… পরিঞ্ঞাতন্তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি. ‘ইদং দুক্খসমুদযং অরিযসচ্চ’ন্তি মে, ভিক্খৰে…পে… ‘তং খো পনিদং দুক্খসমুদযং [দুক্খসমুদযো (স্যা. কং.)] অরিযসচ্চং পহাতব্ব’ন্তি মে, ভিক্খৰে…পে… পহীনন্তি মে, ভিক্খৰে…পে… ‘ইদং দুক্খনিরোধং [দুক্খনিরোধো (স্যা. কং.)] অরিযসচ্চ’ন্তি মে, ভিক্খৰে…পে… ‘তং খো পনিদং দুক্খনিরোধং অরিযসচ্চং সচ্ছিকাতব্ব’ন্তি মে, ভিক্খৰে…পে… সচ্ছিকতন্তি মে, ভিক্খৰে…পে… ‘ইদং দুক্খনিরোধগামিনী পটিপদা অরিযসচ্চ’ন্তি মে, ভিক্খৰে…পে… ‘তং খো পনিদং দুক্খনিরোধগামিনী পটিপদা অরিযসচ্চং ভাৰেতব্ব’ন্তি মে, ভিক্খৰে…পে… ভাৰিতন্তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৰিজ্জা উদপাদি, আলোকো উদপাদী’’তি [মহাৰ. ১৫; সং. নি. ৫.১০৮১; পটি. ম. ২.৩০]. অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘বোধিসত্তো কস্সপস্স ভগৰতো পাৰচনে ওক্কন্তনিযামো চরিতব্রহ্মচরিযো’’তি.

নিযামোক্কন্তিকথা নিট্ঠিতা.