৪. চতুত্থৰগ্গো

(৩৯) ৭. লক্খণকথা

৪০০. লক্খণসমন্নাগতো বোধিসত্তোতি? আমন্তা. পদেসলক্খণেহি সমন্নাগতো পদেসবোধিসত্তোতি? ন হেৰং ৰত্তব্বে…পে….

লক্খণসমন্নাগতো বোধিসত্তোতি? আমন্তা. তিভাগলক্খণেহি সমন্নাগতো তিভাগবোধিসত্তোতি? ন হেৰং ৰত্তব্বে…পে….

লক্খণসমন্নাগতো বোধিসত্তোতি? আমন্তা. উপড্ঢলক্খণেহি সমন্নাগতো উপড্ঢবোধিসত্তোতি? ন হেৰং ৰত্তব্বে…পে….

লক্খণসমন্নাগতো বোধিসত্তোতি? আমন্তা. চক্কৰত্তিসত্তো লক্খণসমন্নাগতো, চক্কৰত্তিসত্তো বোধিসত্তোতি? ন হেৰং ৰত্তব্বে…পে….

চক্কৰত্তিসত্তো লক্খণসমন্নাগতো, চক্কৰত্তিসত্তো বোধিসত্তোতি? আমন্তা. যাদিসো বোধিসত্তস্স পুব্বযোগো পুব্বচরিযা ধম্মক্খানং ধম্মদেসনা, তাদিসো চক্কৰত্তিসত্তস্স পুব্বযোগো পুব্বচরিযা ধম্মক্খানং ধম্মদেসনাতি? ন হেৰং ৰত্তব্বে…পে….

৪০১. যথা বোধিসত্তস্স জাযমানস্স দেৰা পঠমং পটিগ্গণ্হন্তি পচ্ছা মনুস্সা [দী. নি. ২.২৭; ম. নি. ৩.২০৫ ৰুত্তং দিস্সায পুচ্ছতি], এৰমেৰং চক্কৰত্তিসত্তস্স জাযমানস্স দেৰা পঠমং পটিগ্গণ্হন্তি পচ্ছা মনুস্সাতি? ন হেৰং ৰত্তব্বে…পে….

যথা বোধিসত্তস্স জাযমানস্স চত্তারো নং দেৰপুত্তা পটিগ্গহেত্ৰা মাতু পুরতো ঠপেন্তি – ‘‘অত্তমনা, দেৰি, হোহি! মহেসক্খো তে পুত্তো উপ্পন্নো’’তি, এৰমেৰং চক্কৰত্তিসত্তস্স জাযমানস্স চত্তারো নং দেৰপুত্তা পটিগ্গহেত্ৰা মাতু পুরতো ঠপেন্তি – ‘‘অত্তমনা, দেৰি, হোহি! মহেসক্খো তে পুত্তো উপ্পন্নো’’তি? ন হেৰং ৰত্তব্বে…পে….

যথা বোধিসত্তস্স জাযমানস্স দ্ৰে উদকস্স ধারা অন্তলিক্খা পাতুভৰন্তি – একা সীতস্স, একা উণ্হস্স – যেন বোধিসত্তস্স উদককিচ্চং করোন্তি মাতু চ, এৰমেৰং চক্কৰত্তিসত্তস্স জাযমানস্স দ্ৰে উদকস্স ধারা অন্তলিক্খা পাতুভৰন্তি – একা সীতস্স, একা উণ্হস্স – যেন চক্কৰত্তিসত্তস্স উদককিচ্চং করোন্তি মাতু চাতি? ন হেৰং ৰত্তব্বে…পে….

যথা সম্পতিজাতো বোধিসত্তো সমেহি পাদেহি পতিট্ঠহিত্ৰা উত্তরেন অভিমুখো সত্তপদৰীতিহারেন গচ্ছতি সেতম্হি ছত্তে অনুধারিযমানে, সব্বা চ দিসা ৰিলোকেতি, আসভিঞ্চ ৰাচং ভাসতি – ‘‘অগ্গোহমস্মি লোকস্স, জেট্ঠোহমস্মি লোকস্স, সেট্ঠোহমস্মি লোকস্স, অযমন্তিমা জাতি, নত্থি দানি পুনব্ভৰো’’তি, এৰমেৰং সম্পতিজাতো চক্কৰত্তিসত্তো সমেহি পাদেহি পতিট্ঠহিত্ৰা উত্তরেন অভিমুখো সত্তপদৰীতিহারেন গচ্ছতি সেতম্হি ছত্তে অনুধারিযমানে, সব্বা চ দিসা ৰিলোকেতি, আসভিঞ্চ ৰাচং ভাসতি – ‘‘অগ্গোহমস্মি লোকস্স, জেট্ঠোহমস্মি লোকস্স, সেট্ঠোহমস্মি লোকস্স, অযমন্তিমা জাতি, নত্থি দানি পুনব্ভৰো’’তি? ন হেৰং ৰত্তব্বে…পে….

যথা বোধিসত্তস্স জাযমানস্স মহতো আলোকস্স মহতো ওভাসস্স মহতো ভূমিচালস্স পাতুভাৰো হোতি, এৰমেৰং চক্কৰত্তিসত্তস্স জাযমানস্স মহতো আলোকস্স মহতো ওভাসস্স মহতো ভূমিচালস্স পাতুভাৰো হোতীতি? ন হেৰং ৰত্তব্বে…পে….

যথা বোধিসত্তস্স পকতিকাযো সমন্তা ব্যামং ওভাসতি, এৰমেৰং চক্কৰত্তিসত্তস্স পকতিকাযো সমন্তা ব্যামং ওভাসতীতি? ন হেৰং ৰত্তব্বে…পে….

যথা বোধিসত্তো মহাসুপিনং পস্সতি, এৰমেৰং চক্কৰত্তিসত্তো মহাসুপিনং পস্সতীতি? ন হেৰং ৰত্তব্বে…পে….

৪০২. ন ৰত্তব্বং – ‘‘লক্খণসমন্নাগতো বোধিসত্তো’’তি? আমন্তা. ননু ৰুত্তং ভগৰতা – ‘‘দ্ৰত্তিংসিমানি, ভিক্খৰে, মহাপুরিসস্স মহাপুরিসলক্খণানি, যেহি সমন্নাগতস্স মহাপুরিসস্স দ্ৰেৰ গতিযো ভৰন্তি অনঞ্ঞা [ন অঞ্ঞা (ক.)]! সচে অগারং অজ্ঝাৰসতি, রাজা হোতি চক্কৰত্তী ধম্মিকো ধম্মরাজা চাতুরন্তো ৰিজিতাৰী জনপদত্থাৰরিযপ্পত্তো সত্তরতনসমন্নাগতো. তস্সিমানি সত্ত রতনানি ভৰন্তি, সেয্যথিদং – চক্করতনং, হত্থিরতনং, অস্সরতনং, মণিরতনং, ইত্থিরতনং, গহপতিরতনং, পরিণাযকরতনমেৰ সত্তমং. পরোসহস্সং খো পনস্স পুত্তা ভৰন্তি সূরা ৰীরঙ্গরূপা পরসেনপ্পমদ্দনা. সো ইমং পথৰিং সাগরপরিযন্তং অদণ্ডেন অসত্থেন ধম্মেন অভিৰিজিয অজ্ঝাৰসতি. সচে খো পন অগারস্মা অনগারিযং পব্বজতি, অরহং হোতি সম্মাসম্বুদ্ধো লোকে ৰিৰট্টচ্ছদো’’তি [দী. নি. ৩.২০০]. অত্থেৰ সুত্তন্তোতি? আমন্তা. তেন হি লক্খণসমন্নাগতো বোধিসত্তোতি.

লক্খণকথা নিট্ঠিতা.