৪. চতুত্থৰগ্গো

(৩৭) ৫. উপেক্খাসমন্নাগতকথা

৩৯৭. অরহা ছহি উপেক্খাহি সমন্নাগতোতি? আমন্তা. অরহা ছহি ফস্সেহি, ছহি ৰেদনাহি, ছহি সঞ্ঞাহি…পে… ছহি পঞ্ঞাহি সমন্নাগতোতি? ন হেৰং ৰত্তব্বে…পে….

অরহা ছহি উপেক্খাহি সমন্নাগতোতি? আমন্তা. অরহা চক্খুনা রূপং পস্সন্তো সোতেন সদ্দং সুণাতি, ঘানেন গন্ধং ঘাযতি, জিৰ্হায রসং সাযতি, কাযেন ফোট্ঠব্বং ফুসতি, মনসা ধম্মং ৰিজানাতি…পে… মনসা ধম্মং ৰিজানন্তো চক্খুনা রূপং পস্সতি, সোতেন সদ্দং সুণাতি, ঘানেন গন্ধং ঘাযতি, জিৰ্হায রসং সাযতি, কাযেন ফোট্ঠব্বং ফুসতীতি? ন হেৰং ৰত্তব্বে…পে….

অরহা ছহি উপেক্খাহি সমন্নাগতোতি? আমন্তা. সততং সমিতং অব্বোকিণ্ণং ছহি উপেক্খাহি সমন্নাগতো সমোহিতো [সমাহিতো (স্যা.)], ছ উপেক্খাযো পচ্চুপট্ঠিতাতি? ন হেৰং ৰত্তব্বে…পে….

ন ৰত্তব্বং – ‘‘অরহা ছহি উপেক্খাহি সমন্নাগতো’’তি? আমন্তা. ননু অরহা ছল়ঙ্গুপেক্খোতি? আমন্তা. হঞ্চি অরহা ছল়ঙ্গুপেক্খো, তেন ৰত রে ৰত্তব্বে – ‘‘অরহা ছহি উপেক্খাহি সমন্নাগতো’’তি…পে….

উপেক্খাসমন্নাগতকথা নিট্ঠিতা.