(৩৬) ৪. সমন্নাগতকথা

৩৯৩. অরহা চতূহি ফলেহি সমন্নাগতোতি? আমন্তা. অরহা চতূহি ফস্সেহি চতূহি ৰেদনাহি চতূহি সঞ্ঞাহি চতূহি চেতনাহি চতূহি চিত্তেহি চতূহি সদ্ধাহি চতূহি ৰীরিযেহি চতূহি সতীহি চতূহি সমাধীহি চতূহি পঞ্ঞাহি সমন্নাগতোতি? ন হেৰং ৰত্তব্বে…পে….

অনাগামী তীহি ফলেহি সমন্নাগতোতি? আমন্তা. অনাগামী তীহি ফস্সেহি…পে… তীহি পঞ্ঞাহি সমন্নাগতোতি? ন হেৰং ৰত্তব্বে…পে….

সকদাগামী দ্ৰীহি ফলেহি সমন্নাগতোতি? আমন্তা. সকদাগামী দ্ৰীহি ফস্সেহি…পে… দ্ৰীহি পঞ্ঞাহি সমন্নাগতোতি? ন হেৰং ৰত্তব্বে…পে….

অরহা সোতাপত্তিফলেন সমন্নাগতোতি? আমন্তা. অরহা সোতাপন্নো সত্তক্খত্তুপরমো, কোলঙ্কোলো, একবীজীতি? ন হেৰং ৰত্তব্বে…পে… অরহা সকদাগামিফলেন সমন্নাগতোতি? আমন্তা. অরহা সকদাগামীতি? ন হেৰং ৰত্তব্বে …পে… অরহা অনাগামিফলেন সমন্নাগতোতি? আমন্তা. অরহা অনাগামী, অন্তরাপরিনিব্বাযী, উপহচ্চপরিনিব্বাযী, অসঙ্খারপরিনিব্বাযী, সসঙ্খারপরিনিব্বাযী, উদ্ধংসোতো অকনিট্ঠগামীতি? ন হেৰং ৰত্তব্বে…পে….

অনাগামী সোতাপত্তিফলেন সমন্নাগতোতি? আমন্তা. অনাগামী সোতাপন্নো সত্তক্খত্তুপরমো, কোলঙ্কোলো, একবীজীতি? ন হেৰং ৰত্তব্বে …পে… অনাগামী সকদাগামিফলেন সমন্নাগতোতি? আমন্তা. অনাগামী সকদাগামীতি? ন হেৰং ৰত্তব্বে…পে….

সকদাগামী সোতাপত্তিফলেন সমন্নাগতোতি? আমন্তা. সকদাগামী সোতাপন্নো সত্তক্খত্তুপরমো, কোলঙ্কোলো, একবীজীতি? ন হেৰং ৰত্তব্বে…পে….

৩৯৪. সোতাপত্তিফলেন সমন্নাগতো ‘‘সোতাপন্নো’’তি ৰত্তব্বোতি? আমন্তা. অরহা সোতাপত্তিফলেন সমন্নাগতোতি? আমন্তা. স্ৰেৰ অরহা, সো সোতাপন্নোতি? ন হেৰং ৰত্তব্বে…পে….

সকদাগামিফলেন সমন্নাগতো ‘‘সকদাগামী’’তি ৰত্তব্বোতি? আমন্তা. অরহা সকদাগামিফলেন সমন্নাগতোতি? আমন্তা. স্ৰেৰ অরহা, সো সকদাগামীতি? ন হেৰং ৰত্তব্বে…পে….

অনাগামিফলেন সমন্নাগতো ‘‘অনাগামী’’তি ৰত্তব্বোতি? আমন্তা. অরহা অনাগামিফলেন সমন্নাগতোতি? আমন্তা. স্ৰেৰ অরহা, সো অনাগামীতি? ন হেৰং ৰত্তব্বে…পে….

সোতাপত্তিফলেন সমন্নাগতো ‘‘সোতাপন্নো’’তি ৰত্তব্বোতি? আমন্তা. অনাগামী সোতাপত্তিফলেন সমন্নাগতোতি? আমন্তা. স্ৰেৰ অনাগামী, সো সোতাপন্নোতি? ন হেৰং ৰত্তব্বে…পে….

সকদাগামিফলেন সমন্নাগতো ‘‘সকদাগামী’’তি ৰত্তব্বোতি? আমন্তা. অনাগামী সকদাগামিফলেন সমন্নাগতোতি? আমন্তা. স্ৰেৰ অনাগামী, সো সকদাগামীতি? ন হেৰং ৰত্তব্বে…পে….

সোতাপত্তিফলেন সমন্নাগতো ‘‘সোতাপন্নো’’তি ৰত্তব্বোতি? আমন্তা. সকদাগামী সোতাপত্তিফলেন সমন্নাগতোতি? আমন্তা. স্ৰেৰ সকদাগামী, সো সোতাপন্নোতি? ন হেৰং ৰত্তব্বে…পে….

৩৯৫. অরহা সোতাপত্তিফলেন সমন্নাগতোতি? আমন্তা. ননু অরহা সোতাপত্তিফলং ৰীতিৰত্তোতি? আমন্তা. হঞ্চি অরহা সোতাপত্তিফলং ৰীতিৰত্তো, নো চ ৰত রে ৰত্তব্বে – ‘‘অরহা সোতাপত্তিফলেন সমন্নাগতো’’তি.

অরহা সোতাপত্তিফলং ৰীতিৰত্তো তেন সমন্নাগতোতি? আমন্তা. অরহা সোতাপত্তিমগ্গং ৰীতিৰত্তো, সক্কাযদিট্ঠিং ৰিচিকিচ্ছং সীলব্বতপরামাসং, অপাযগমনীযং রাগং, অপাযগমনীযং দোসং, অপাযগমনীযং মোহং ৰীতিৰত্তো তেন সমন্নাগতোতি? ন হেৰং ৰত্তব্বে…পে….

অরহা সকদাগামিফলেন সমন্নাগতোতি? আমন্তা. ননু অরহা সকদাগামিফলং ৰীতিৰত্তোতি? আমন্তা. হঞ্চি অরহা সকদাগামিফলং ৰীতিৰত্তো, নো চ ৰত রে ৰত্তব্বে – ‘‘অরহা সকদাগামিফলেন সমন্নাগতো’’তি.

অরহা সকদাগামিফলং ৰীতিৰত্তো তেন সমন্নাগতোতি? আমন্তা. অরহা সকদাগামিমগ্গং ৰীতিৰত্তো, ওল়ারিকং কামরাগং, ওল়ারিকং ব্যাপাদং ৰীতিৰত্তো তেন সমন্নাগতোতি? ন হেৰং ৰত্তব্বে…পে….

অরহা অনাগামিফলেন সমন্নাগতোতি? আমন্তা. ননু অরহা অনাগামিফলং ৰীতিৰত্তোতি? আমন্তা. হঞ্চি অরহা অনাগামিফলং ৰীতিৰত্তো, নো চ ৰত রে ৰত্তব্বে – ‘‘অরহা অনাগামিফলেন সমন্নাগতো’’তি.

অরহা অনাগামিফলং ৰীতিৰত্তো তেন সমন্নাগতোতি? আমন্তা. অরহা অনাগামিমগ্গং ৰীতিৰত্তো, অণুসহগতং কামরাগং, অণুসহগতং ব্যাপাদং ৰীতিৰত্তো তেন সমন্নাগতোতি? ন হেৰং ৰত্তব্বে…পে….

অনাগামী সোতাপত্তিফলেন সমন্নাগতোতি? আমন্তা. ননু অনাগামী সোতাপত্তিফলং ৰীতিৰত্তোতি? আমন্তা. হঞ্চি অনাগামী সোতাপত্তিফলং ৰীতিৰত্তো, নো চ ৰত রে ৰত্তব্বে – ‘‘অনাগামী সোতাপত্তিফলেন সমন্নাগতো’’তি.

অনাগামী সোতাপত্তিফলং ৰীতিৰত্তো তেন সমন্নাগতোতি? আমন্তা. অনাগামী সোতাপত্তিমগ্গং ৰীতিৰত্তো, সক্কাযদিট্ঠিং…পে… অপাযগমনীযং মোহং ৰীতিৰত্তো তেন সমন্নাগতোতি? ন হেৰং ৰত্তব্বে…পে….

অনাগামী সকদাগামিফলেন সমন্নাগতোতি? আমন্তা. ননু অনাগামী সকদাগামিফলং ৰীতিৰত্তোতি? আমন্তা. হঞ্চি অনাগামী সকদাগামিফলং ৰীতিৰত্তো, নো চ ৰত রে ৰত্তব্বে – ‘‘অনাগামী সকদাগামিফলেন সমন্নাগতো’’তি.

অনাগামী সকদাগামিফলং ৰীতিৰত্তো তেন সমন্নাগতোতি? আমন্তা. অনাগামী সকদাগামিমগ্গং ৰীতিৰত্তো, ওল়ারিকং কামরাগং, ওল়ারিকং ব্যাপাদং ৰীতিৰত্তো তেন সমন্নাগতোতি? ন হেৰং ৰত্তব্বে…পে….

সকদাগামী সোতাপত্তিফলেন সমন্নাগতোতি? আমন্তা. ননু সকদাগামী সোতাপত্তিফলং ৰীতিৰত্তোতি? আমন্তা. হঞ্চি সকদাগামী সোতাপত্তিফলং ৰীতিৰত্তো, নো চ ৰত রে ৰত্তব্বে – ‘‘সকদাগামী সোতাপত্তিফলেন সমন্নাগতো’’তি.

সকদাগামী সোতাপত্তিফলং ৰীতিৰত্তো তেন সমন্নাগতোতি? আমন্তা. সকদাগামী সোতাপত্তিমগ্গং ৰীতিৰত্তো, সক্কাযদিট্ঠিং…পে… অপাযগমনীযং মোহং ৰীতিৰত্তো তেন সমন্নাগতোতি? ন হেৰং ৰত্তব্বে…পে….

৩৯৬. ন ৰত্তব্বং – ‘‘অরহা চতূহি ফলেহি সমন্নাগতো’’তি? আমন্তা. ননু অরহতা চত্তারি ফলানি পটিলদ্ধানি, তেহি চ অপরিহীনোতি? আমন্তা. হঞ্চি অরহতা চত্তারি ফলানি পটিলদ্ধানি তেহি চ অপরিহীনো, তেন ৰত রে ৰত্তব্বে – ‘‘অরহা চতূহি ফলেহি সমন্নাগতো’’তি.

ন ৰত্তব্বং – ‘‘অনাগামী তীহি ফলেহি সমন্নাগতো’’তি? আমন্তা. ননু অনাগামিনা তীণি ফলানি পটিলদ্ধানি, তেহি চ অপরিহীনোতি? আমন্তা. হঞ্চি অনাগামিনা তীণি ফলানি পটিলদ্ধানি তেহি চ অপরিহীনো, তেন ৰত রে ৰত্তব্বে – ‘‘অনাগামী তীহি ফলেহি সমন্নাগতো’’তি.

ন ৰত্তব্বং – ‘‘সকদাগামী দ্ৰীহি ফলেহি সমন্নাগতো’’তি? আমন্তা. ননু সকদাগামিনা দ্ৰে ফলানি পটিলদ্ধানি, তেহি চ অপরিহীনোতি? আমন্তা. হঞ্চি সকদাগামিনা দ্ৰে ফলানি পটিলদ্ধানি তেহি চ অপরিহীনো, তেন ৰত রে ৰত্তব্বে – ‘‘সকদাগামী দ্ৰীহি ফলেহি সমন্নাগতো’’তি.

অরহতা চত্তারি ফলানি পটিলদ্ধানি তেহি চ অপরিহীনোতি, অরহা চতূহি ফলেহি সমন্নাগতোতি? আমন্তা. অরহতা চত্তারো মগ্গা পটিলদ্ধা তেহি চ অপরিহীনোতি, অরহা চতূহি মগ্গেহি সমন্নাগতোতি? ন হেৰং ৰত্তব্বে…পে….

অনাগামিনা তীণি ফলানি পটিলদ্ধানি তেহি চ অপরিহীনোতি, অনাগামী তীহি ফলেহি সমন্নাগতোতি? আমন্তা. অনাগামিনা তযো মগ্গা পটিলদ্ধা তেহি চ অপরিহীনোতি, অনাগামী তীহি মগ্গেহি সমন্নাগতোতি? ন হেৰং ৰত্তব্বে…পে….

সকদাগামিনা দ্ৰে ফলানি পটিলদ্ধানি তেহি চ অপরিহীনোতি, সকদাগামী দ্ৰীহি ফলেহি সমন্নাগতোতি? আমন্তা. সকদাগামিনা দ্ৰে মগ্গা পটিলদ্ধা, তেহি চ অপরিহীনোতি, সকদাগামী দ্ৰীহি মগ্গেহি সমন্নাগতোতি? ন হেৰং ৰত্তব্বে…পে….

সমন্নাগতকথা নিট্ঠিতা.