৩. ততিযৰগ্গো

(৩২) ১২. নেৰসঞ্ঞানাসঞ্ঞাযতনকথা

৩৮৪. নেৰসঞ্ঞানাসঞ্ঞাযতনে ন ৰত্তব্বং – ‘‘সঞ্ঞা অত্থী’’তি? আমন্তা. অসঞ্ঞভৰো অসঞ্ঞগতি অসঞ্ঞসত্তাৰাসো অসঞ্ঞসংসারো অসঞ্ঞযোনি অসঞ্ঞত্তভাৰপটিলাভোতি? ন হেৰং ৰত্তব্বে…পে….

ননু সঞ্ঞাভৰো সঞ্ঞাগতি সঞ্ঞাসত্তাৰাসো সঞ্ঞাসংসারো সঞ্ঞাযোনি সঞ্ঞত্তভাৰপটিলাভোতি? আমন্তা. হঞ্চি সঞ্ঞাভৰো সঞ্ঞাগতি…পে… সঞ্ঞত্তভাৰপটিলাভো, নো চ ৰত রে ৰত্তব্বে – ‘‘নেৰসঞ্ঞানাসঞ্ঞাযতনে ন ৰত্তব্বং – ‘সঞ্ঞা অত্থী’’’তি.

নেৰসঞ্ঞানাসঞ্ঞাযতনে ন ৰত্তব্বং – ‘‘সঞ্ঞা অত্থী’’তি? আমন্তা. একৰোকারভৰো গতি…পে… অত্তভাৰপটিলাভোতি? ন হেৰং ৰত্তব্বে…পে….

ননু চতুৰোকারভৰো গতি…পে… অত্তভাৰপটিলাভোতি? আমন্তা. হঞ্চি চতুৰোকারভৰো গতি…পে… অত্তভাৰপটিলাভো, নো চ ৰত রে ৰত্তব্বে – ‘‘নেৰসঞ্ঞানাসঞ্ঞাযতনে ন ৰত্তব্বং – ‘সঞ্ঞা অত্থী’’’তি.

৩৮৫. অসঞ্ঞসত্তেসু ন ৰত্তব্বং – ‘‘সঞ্ঞা অত্থি’’, সো চ অসঞ্ঞভৰো অসঞ্ঞগতি অসঞ্ঞসত্তাৰাসো অসঞ্ঞসংসারো অসঞ্ঞযোনি অসঞ্ঞত্তভাৰপটিলাভোতি? আমন্তা. নেৰসঞ্ঞানাসঞ্ঞাযতনে ন ৰত্তব্বং – ‘‘সঞ্ঞা অত্থি,’’ সো চ অসঞ্ঞভৰো অসঞ্ঞগতি অসঞ্ঞসত্তাৰাসো অসঞ্ঞসংসারো অসঞ্ঞযোনি অসঞ্ঞত্তভাৰপটিলাভোতি? ন হেৰং ৰত্তব্বে…পে….

অসঞ্ঞসত্তেসু ন ৰত্তব্বং – ‘‘সঞ্ঞা অত্থি,’’ সো চ একৰোকারভৰো গতি…পে… অত্তভাৰপটিলাভোতি? আমন্তা. নেৰসঞ্ঞানাসঞ্ঞাযতনে ন ৰত্তব্বং – ‘‘সঞ্ঞা অত্থি,’’ সো চ একৰোকারভৰো গতি সত্তাৰাসো সংসারো যোনি অত্তভাৰপটিলাভোতি? ন হেৰং ৰত্তব্বে…পে….

নেৰসঞ্ঞানাসঞ্ঞাযতনে ন ৰত্তব্বং – ‘‘সঞ্ঞা অত্থি,’’ সো চ সঞ্ঞাভৰো সঞ্ঞাগতি…পে… সঞ্ঞত্তভাৰপটিলাভোতি? আমন্তা. অসঞ্ঞসত্তেসু ন ৰত্তব্বং – ‘‘সঞ্ঞা অত্থি,’’ সো চ সঞ্ঞাভৰো সঞ্ঞাগতি…পে… সঞ্ঞত্তভাৰপটিলাভোতি? ন হেৰং ৰত্তব্বে…পে….

নেৰসঞ্ঞানাসঞ্ঞাযতনে ন ৰত্তব্বং – ‘‘সঞ্ঞা অত্থি,’’ সো চ চতুৰোকারভৰো গতি…পে… অত্তভাৰপটিলাভোতি? আমন্তা. অসঞ্ঞসত্তেসু ন ৰত্তব্বং – ‘‘সঞ্ঞা অত্থি,’’ সো চ চতুৰোকারভৰো গতি…পে… অত্তভাৰপটিলাভোতি? ন হেৰং ৰত্তব্বে…পে….

নেৰসঞ্ঞানাসঞ্ঞাযতনে ন ৰত্তব্বং – ‘‘সঞ্ঞা অত্থী’’তি? আমন্তা. ননু নেৰসঞ্ঞানাসঞ্ঞাযতনং চতুৰোকারভৰোতি? আমন্তা. হঞ্চি নেৰসঞ্ঞানাসঞ্ঞাযতনং চতুৰোকারভৰো, নো চ ৰত রে ৰত্তব্বে – ‘‘নেৰসঞ্ঞানাসঞ্ঞাযতনে ন ৰত্তব্বং – ‘সঞ্ঞা অত্থী’’’তি.

৩৮৬. নেৰসঞ্ঞানাসঞ্ঞাযতনং চতুৰোকারভৰো নেৰসঞ্ঞানাসঞ্ঞাযতনে ন ৰত্তব্বং – ‘‘সঞ্ঞা অত্থী’’তি? আমন্তা. আকাসানঞ্চাযতনং চতুৰোকারভৰো আকাসানঞ্চাযতনে ন ৰত্তব্বং – ‘‘সঞ্ঞা অত্থী’’তি? ন হেৰং ৰত্তব্বে…পে….

নেৰসঞ্ঞানাসঞ্ঞাযতনং চতুৰোকারভৰো, নেৰসঞ্ঞানাসঞ্ঞাযতনে ন ৰত্তব্বং – ‘‘সঞ্ঞা অত্থী’’তি? আমন্তা. ৰিঞ্ঞাণঞ্চাযতনং…পে… আকিঞ্চঞ্ঞাযতনং চতুৰোকারভৰো, আকিঞ্চঞ্ঞাযতনে ন ৰত্তব্বং – ‘‘সঞ্ঞা অত্থী’’তি? ন হেৰং ৰত্তব্বে…পে….

আকাসানঞ্চাযতনং চতুৰোকারভৰো, অত্থি তত্থ সঞ্ঞাতি? আমন্তা. নেৰসঞ্ঞানাসঞ্ঞাযতনং চতুৰোকারভৰো, অত্থি তত্থ সঞ্ঞাতি? ন হেৰং ৰত্তব্বে…পে….

ৰিঞ্ঞাণঞ্চাযতনং…পে… আকিঞ্চঞ্ঞাযতনং চতুৰোকারভৰো, অত্থি তত্থ সঞ্ঞাতি? আমন্তা. নেৰসঞ্ঞানাসঞ্ঞাযতনং চতুৰোকারভৰো, অত্থি তত্থ সঞ্ঞাতি? ন হেৰং ৰত্তব্বে…পে….

নেৰসঞ্ঞানাসঞ্ঞাযতনে ন ৰত্তব্বং – ‘‘সঞ্ঞা অত্থী’’তি ৰা ‘‘নত্থী’’তি ৰাতি? আমন্তা. ননু নেৰসঞ্ঞানাসঞ্ঞাযতনং চতুৰোকারভৰোতি? আমন্তা. হঞ্চি নেৰসঞ্ঞানাসঞ্ঞাযতনং চতুৰোকারভৰো, নো চ ৰত রে ৰত্তব্বে – ‘‘নেৰসঞ্ঞানাসঞ্ঞাযতনে ন ৰত্তব্বং – ‘সঞ্ঞা অত্থী’তি ৰা ‘নত্থী’তি ৰা’’তি.

নেৰসঞ্ঞানাসঞ্ঞাযতনং চতুৰোকারভৰো, নেৰসঞ্ঞানাসঞ্ঞাযতনে ন ৰত্তব্বং – ‘‘সঞ্ঞা অত্থী’’তি ৰা ‘‘নত্থী’’তি ৰাতি? আমন্তা. আকাসানঞ্চাযতনং…পে… ৰিঞ্ঞাণঞ্চাযতনং…পে… আকিঞ্চঞ্ঞাযতনং চতুৰোকারভৰো, আকিঞ্চঞ্ঞাযতনে ন ৰত্তব্বং – ‘‘সঞ্ঞা অত্থী’’তি ৰা ‘‘নত্থী’’তি ৰাতি? ন হেৰং ৰত্তব্বে…পে….

নেৰসঞ্ঞানাসঞ্ঞাযতনে ন ৰত্তব্বং [নেৰসঞ্ঞানাসঞ্ঞাযতনে ৰত্তব্বং (?)] – ‘‘সঞ্ঞা অত্থী’’তি ৰা ‘‘নত্থী’’তি ৰাতি? আমন্তা. ননু নেৰসঞ্ঞানাসঞ্ঞাযতনন্তি? আমন্তা. হঞ্চি নেৰসঞ্ঞানাসঞ্ঞাযতনং, তেন ৰত রে ৰত্তব্বে – ‘‘নেৰসঞ্ঞানাসঞ্ঞাযতনে ন ৰত্তব্বং – ‘সঞ্ঞা অত্থী’তি ৰা ‘নত্থী’তি ৰা’’তি.

নেৰসঞ্ঞানাসঞ্ঞাযতনন্তি কত্ৰা নেৰসঞ্ঞানাসঞ্ঞাযতনে ন ৰত্তব্বং – ‘‘সঞ্ঞা অত্থী’’তি ৰা ‘‘নত্থী’’তি ৰাতি? আমন্তা. অদুক্খমসুখা ৰেদনাতি কত্ৰা অদুক্খমসুখায ৰেদনায [অদুক্খমসুখা ৰেদনা (সী. ক.)] ন ৰত্তব্বং – ‘‘ৰেদনা’’তি ৰা ‘‘অৰেদনা’’তি ৰাতি? ন হেৰং ৰত্তব্বে…পে….

নেৰসঞ্ঞানাসঞ্ঞাযতনকথা নিট্ঠিতা.

ততিযৰগ্গো.

তস্সুদ্দানং –

বলং সাধারণং অরিযং, সরাগং চিত্তং ৰিমুচ্চতি;

ৰিমুত্তং ৰিমুচ্চমানং, অত্থি চিত্তং ৰিমুচ্চমানং.

অট্ঠমকস্স পুগ্গলস্স, দিট্ঠিপরিযুট্ঠানং পহীনং;

অট্ঠমকস্স পুগ্গলস্স, নত্থি পঞ্চিন্দ্রিযানি চক্খুং.

সোতং ধম্মুপত্থদ্ধং, যথাকম্মূপগতং ঞাণং;

দেৰেসু সংৰরো অসঞ্ঞ-সত্তেসু সঞ্ঞা এৰমেৰ ভৰগ্গন্তি.