৩. ততিযৰগ্গো

(৩১) ১১. অসঞ্ঞকথা

৩৮১. অসঞ্ঞসত্তেসু সঞ্ঞা অত্থীতি? আমন্তা. সঞ্ঞাভৰো সঞ্ঞাগতি সঞ্ঞাসত্তাৰাসো সঞ্ঞাসংসারো সঞ্ঞাযোনি সঞ্ঞত্তভাৰপটিলাভোতি? ন হেৰং ৰত্তব্বে…পে….

ননু অসঞ্ঞভৰো অসঞ্ঞগতি অসঞ্ঞসত্তাৰাসো অসঞ্ঞসংসারো অসঞ্ঞযোনি অসঞ্ঞত্তভাৰপটিলাভোতি? আমন্তা. হঞ্চি অসঞ্ঞভৰো অসঞ্ঞগতি অসঞ্ঞসত্তাৰাসো অসঞ্ঞসংসারো অসঞ্ঞযোনি অসঞ্ঞত্তভাৰপটিলাভো, নো চ ৰত রে ৰত্তব্বে – ‘‘অসঞ্ঞসত্তেসু সঞ্ঞা অত্থী’’তি.

অসঞ্ঞসত্তেসু সঞ্ঞা অত্থীতি? আমন্তা. পঞ্চৰোকারভৰো গতি সত্তাৰাসো সংসারো যোনি অত্তভাৰপটিলাভোতি? ন হেৰং ৰত্তব্বে…পে….

ননু একৰোকারভৰো গতি সত্তাৰাসো সংসারো যোনি অত্তভাৰপটিলাভোতি? আমন্তা. হঞ্চি একৰোকারভৰো গতি সত্তাৰাসো সংসারো যোনি অত্তভাৰপটিলাভো, নো চ ৰত রে ৰত্তব্বে – ‘‘অসঞ্ঞসত্তেসু সঞ্ঞা অত্থী’’তি.

অসঞ্ঞসত্তেসু সঞ্ঞা অত্থীতি? আমন্তা. তায সঞ্ঞায সঞ্ঞাকরণীযং করোতীতি? ন হেৰং ৰত্তব্বে…পে….

৩৮২. মনুস্সেসু সঞ্ঞা অত্থি, সো চ সঞ্ঞাভৰো সঞ্ঞাগতি সঞ্ঞাসত্তাৰাসো সঞ্ঞাসংসারো সঞ্ঞাযোনি সঞ্ঞত্তভাৰপটিলাভোতি? আমন্তা. অসঞ্ঞসত্তেসু সঞ্ঞা অত্থি, সো চ সঞ্ঞাভৰো সঞ্ঞাগতি সত্তাৰাসো সংসারো যোনি অত্তভাৰপটিলাভোতি? ন হেৰং ৰত্তব্বে…পে….

মনুস্সেসু সঞ্ঞা অত্থি, সো চ পঞ্চৰোকারভৰো গতি সত্তাৰাসো সংসারো যোনি অত্তভাৰপটিলাভোতি? আমন্তা. অসঞ্ঞসত্তেসু সঞ্ঞা অত্থি, সো চ পঞ্চৰোকারভৰো গতি সত্তাৰাসো সংসারো যোনি অত্তভাৰপটিলাভোতি? ন হেৰং ৰত্তব্বে…পে….

মনুস্সেসু সঞ্ঞা অত্থি, তায সঞ্ঞায সঞ্ঞাকরণীযং করোতীতি? আমন্তা. অসঞ্ঞসত্তেসু সঞ্ঞা অত্থি, তায সঞ্ঞায সঞ্ঞাকরণীযং করোতীতি? ন হেৰং ৰত্তব্বে…পে….

অসঞ্ঞসত্তেসু সঞ্ঞা অত্থি, সো চ অসঞ্ঞভৰো অসঞ্ঞগতি অসঞ্ঞসত্তাৰাসো অসঞ্ঞসংসারো অসঞ্ঞযোনি অসঞ্ঞত্তভাৰপটিলাভোতি? আমন্তা. মনুস্সেসু সঞ্ঞা অত্থি, সো চ অসঞ্ঞভৰো অসঞ্ঞগতি…পে… অসঞ্ঞত্তভাৰপটিলাভোতি? ন হেৰং ৰত্তব্বে…পে….

অসঞ্ঞসত্তেসু সঞ্ঞা অত্থি, সো চ একৰোকারভৰো গতি সত্তাৰাসো সংসারো যোনি অত্তভাৰপটিলাভোতি? আমন্তা. মনুস্সেসু সঞ্ঞা অত্থি, সো চ একৰোকারভৰো গতি…পে… অত্তভাৰপটিলাভোতি? ন হেৰং ৰত্তব্বে…পে….

অসঞ্ঞসত্তেসু সঞ্ঞা অত্থি, ন চ তায সঞ্ঞায সঞ্ঞাকরণীযং করোতীতি? আমন্তা. মনুস্সেসু সঞ্ঞা অত্থি, ন চ তায সঞ্ঞায সঞ্ঞাকরণীযং করোতীতি? ন হেৰং ৰত্তব্বে…পে….

৩৮৩. ন ৰত্তব্বং – ‘‘অসঞ্ঞসত্তেসু সঞ্ঞা অত্থী’’তি? আমন্তা. ননু ৰুত্তং ভগৰতা – ‘‘সন্তি, ভিক্খৰে, অসঞ্ঞসত্তা নাম দেৰা; সঞ্ঞুপ্পাদা চ পন তে দেৰা তম্হা কাযা চৰন্তী’’তি [দী. নি. ১.৬৮]! অত্থেৰ সুত্তন্তোতি? আমন্তা. তেন হি অসঞ্ঞসত্তেসু সঞ্ঞা অত্থীতি.

অসঞ্ঞসত্তেসু সঞ্ঞা অত্থীতি? কিঞ্চি [কঞ্চি (স্যা.)] কালে অত্থি, কিঞ্চি কালে নত্থীতি. কিঞ্চি কালে সঞ্ঞসত্তা কিঞ্চি কালে অসঞ্ঞসত্তা, কিঞ্চি কালে সঞ্ঞভৰো কিঞ্চি কালে অসঞ্ঞভৰো, কিঞ্চি কালে পঞ্চৰোকারভৰো কিঞ্চি কালে একৰোকারভৰোতি? ন হেৰং ৰত্তব্বে…পে….

অসঞ্ঞসত্তেসু সঞ্ঞা কিঞ্চি কালে অত্থি, কিঞ্চি কালে নত্থীতি? আমন্তা. কং কালং অত্থি, কং কালং নত্থীতি? চুতিকালে উপপত্তিকালে অত্থি, ঠিতিকালে নত্থীতি. চুতিকালে উপপত্তিকালে সঞ্ঞসত্তা, ঠিতিকালে অসঞ্ঞসত্তা; চুতিকালে উপপত্তিকালে সঞ্ঞভৰো, ঠিতিকালে অসঞ্ঞভৰো; চুতিকালে উপপত্তিকালে পঞ্চৰোকারভৰো, ঠিতিকালে একৰোকারভৰোতি? ন হেৰং ৰত্তব্বে…পে….

অসঞ্ঞকথা নিট্ঠিতা.