৩. ততিযৰগ্গো

(৩০) ১০. সংৰরকথা

৩৭৯. অত্থি দেৰেসু সংৰরোতি? আমন্তা. অত্থি দেৰেসু অসংৰরোতি? ন হেৰং ৰত্তব্বে…পে….

নত্থি দেৰেসু অসংৰরোতি? আমন্তা. নত্থি দেৰেসু সংৰরোতি? ন হেৰং ৰত্তব্বে…পে….

ননু অসংৰরা সংৰরো সীলং, অত্থি দেৰেসু সংৰরোতি? আমন্তা. অত্থি দেৰেসু অসংৰরো, যম্হা অসংৰরা সংৰরো সীলন্তি? ন হেৰং ৰত্তব্বে…পে….

আজানাহি নিগ্গহং. হঞ্চি অসংৰরা সংৰরো সীলং, অত্থি দেৰেসু সংৰরো, তেন ৰত রে ৰত্তব্বে – ‘‘অত্থি দেৰেসু অসংৰরো, যম্হা অসংৰরা সংৰরো সীল’’ন্তি. যং তত্থ ৰদেসি – ‘‘ৰত্তব্বে খো – ‘অসংৰরা সংৰরো সীলং, অত্থি দেৰেসু সংৰরো,’ নো চ ৰত্তব্বে – ‘অত্থি দেৰেসু অসংৰরো, যম্হা অসংৰরা সংৰরো সীল’’’ন্তি মিচ্ছা.

নো চে পন ৰত্তব্বে – ‘‘অত্থি দেৰেসু অসংৰরো, যম্হা অসংৰরা সংৰরো সীল’’ন্তি, নো চ ৰত রে ৰত্তব্বে – ‘‘অসংৰরা সংৰরো সীলং, অত্থি দেৰেসু সংৰরো’’তি. যং তত্থ ৰদেসি – ‘‘ৰত্তব্বে খো ‘অসংৰরা সংৰরো সীলং, অত্থি দেৰেসু সংৰরো,’ নো চ ৰত্তব্বে – ‘অত্থি দেৰেসু অসংৰরো, যম্হা অসংৰরা সংৰরো সীল’’’ন্তি মিচ্ছা.

অত্থি মনুস্সেসু সংৰরো, অত্থি তত্থ অসংৰরোতি? আমন্তা. অত্থি দেৰেসু সংৰরো, অত্থি তত্থ অসংৰরোতি? ন হেৰং ৰত্তব্বে…পে….

অত্থি দেৰেসু সংৰরো, নত্থি তত্থ অসংৰরোতি? আমন্তা. অত্থি মনুস্সেসু সংৰরো, নত্থি তত্থ অসংৰরোতি? ন হেৰং ৰত্তব্বে…পে….

৩৮০. অত্থি দেৰেসু পাণাতিপাতা ৰেরমণীতি? আমন্তা. অত্থি দেৰেসু পাণাতিপাতোতি? ন হেৰং ৰত্তব্বে…পে….

অত্থি দেৰেসু সুরামেরযমজ্জপমাদট্ঠানা ৰেরমণীতি? আমন্তা. অত্থি দেৰেসু সুরামেরযমজ্জপমাদট্ঠানন্তি? ন হেৰং ৰত্তব্বে…পে….

নত্থি দেৰেসু পাণাতিপাতোতি? আমন্তা. নত্থি দেৰেসু পাণাতিপাতা ৰেরমণীতি? ন হেৰং ৰত্তব্বে…পে….

নত্থি দেৰেসু সুরামেরযমজ্জপমাদট্ঠানন্তি? আমন্তা. নত্থি দেৰেসু সুরামেরযমজ্জপমাদট্ঠানা ৰেরমণীতি? ন হেৰং ৰত্তব্বে…পে….

অত্থি মনুস্সেসু পাণাতিপাতা ৰেরমণি, অত্থি তত্থ পাণাতিপাতোতি? আমন্তা. অত্থি দেৰেসু পাণাতিপাতা ৰেরমণি, অত্থি তত্থ পাণাতিপাতোতি? ন হেৰং ৰত্তব্বে…পে….

অত্থি মনুস্সেসু সুরামেরযমজ্জপমাদট্ঠানা ৰেরমণি, অত্থি তত্থ সুরামেরযমজ্জপমাদট্ঠানন্তি? আমন্তা. অত্থি দেৰেসু সুরামেরযমজ্জপমাদট্ঠানা ৰেরমণি, অত্থি তত্থ সুরামেরযমজ্জপমাদট্ঠানন্তি? ন হেৰং ৰত্তব্বে…পে….

অত্থি দেৰেসু পাণাতিপাতা ৰেরমণি, নত্থি তত্থ পাণাতিপাতোতি? আমন্তা. অত্থি মনুস্সেসু পাণাতিপাতা ৰেরমণি, নত্থি তত্থ পাণাতিপাতোতি? ন হেৰং ৰত্তব্বে…পে….

অত্থি দেৰেসু সুরামেরযমজ্জপমাদট্ঠানা ৰেরমণি, নত্থি তত্থ সুরামেরযমজ্জপমাদট্ঠানন্তি? আমন্তা. অত্থি মনুস্সেসু সুরামেরযমজ্জপমাদট্ঠানা ৰেরমণি, নত্থি তত্থ সুরামেরযমজ্জপমাদট্ঠানন্তি? ন হেৰং ৰত্তব্বে…পে….

নত্থি দেৰেসু সংৰরোতি? আমন্তা. সব্বে দেৰা পাণাতিপাতিনো অদিন্নাদাযিনো কামেসুমিচ্ছাচারিনো মুসাৰাদিনো সুরামেরযমজ্জপমাদট্ঠাযিনোতি? ন হেৰং ৰত্তব্বে…পে… তেন হি অত্থি দেৰেসু সংৰরোতি.

সংৰরকথা নিট্ঠিতা.