২. দুতিযৰগ্গো

(২০) ১১. নিরোধকথা

৩৫৩. দ্ৰে নিরোধাতি? আমন্তা. দ্ৰে দুক্খনিরোধাতি? ন হেৰং ৰত্তব্বে…পে… দ্ৰে দুক্খনিরোধাতি? আমন্তা. দ্ৰে নিরোধসচ্চানীতি? ন হেৰং ৰত্তব্বে…পে… দ্ৰে নিরোধসচ্চানীতি? আমন্তা. দ্ৰে দুক্খসচ্চানীতি? ন হেৰং ৰত্তব্বে…পে… দ্ৰে নিরোধসচ্চানীতি? আমন্তা. দ্ৰে সমুদযসচ্চানীতি? ন হেৰং ৰত্তব্বে…পে… দ্ৰে নিরোধসচ্চানীতি? আমন্তা. দ্ৰে মগ্গসচ্চানীতি? ন হেৰং ৰত্তব্বে…পে….

দ্ৰে নিরোধসচ্চানীতি? আমন্তা. দ্ৰে তাণানি…পে… দ্ৰে লেণানি… দ্ৰে সরণানি… দ্ৰে পরাযণানি… দ্ৰে অচ্চুতানি… দ্ৰে অমতানি… দ্ৰে নিব্বানানীতি? ন হেৰং ৰত্তব্বে…পে….

দ্ৰে নিব্বানানীতি? আমন্তা. অত্থি দ্ৰিন্নং নিব্বানানং উচ্চনীচতা হীনপণীততা উক্কংসাৰকংসো সীমা ৰা ভেদো ৰা রাজি ৰা অন্তরিকা ৰাতি? ন হেৰং ৰত্তব্বে…পে….

দ্ৰে নিরোধাতি? আমন্তা. ননু অপ্পটিসঙ্খানিরুদ্ধে সঙ্খারে পটিসঙ্খা নিরোধেন্তীতি? আমন্তা. হঞ্চি অপ্পটিসঙ্খানিরুদ্ধে সঙ্খারে পটিসঙ্খা নিরোধেন্তি, নো চ ৰত রে ৰত্তব্বে – ‘‘দ্ৰে নিরোধা’’তি.

ন ৰত্তব্বং – ‘‘দ্ৰে নিরোধা’’তি? আমন্তা. ননু অপ্পটিসঙ্খানিরুদ্ধাপি সঙ্খারা অচ্চন্তভগ্গা, পটিসঙ্খানিরুদ্ধাপি সঙ্খারা অচ্চন্তভগ্গাতি? আমন্তা. হঞ্চি অপ্পটিসঙ্খানিরুদ্ধাপি সঙ্খারা অচ্চন্তভগ্গা, পটিসঙ্খানিরুদ্ধাপি সঙ্খারা অচ্চন্তভগ্গা, তেন ৰত রে ৰত্তব্বে – ‘‘দ্ৰে নিরোধা’’তি.

দ্ৰে নিরোধাতি? আমন্তা. পটিসঙ্খানিরুদ্ধাপি [পটিসঙ্খানিরুদ্ধা (?)] সঙ্খারা অরিযমগ্গং আগম্ম নিরুদ্ধাতি? আমন্তা. অপ্পটিসঙ্খানিরুদ্ধা সঙ্খারা অরিযমগ্গং আগম্ম নিরুদ্ধাতি? ন হেৰং ৰত্তব্বে…পে….

দ্ৰে নিরোধাতি? আমন্তা. পটিসঙ্খানিরুদ্ধা সঙ্খারা ন পুন উপ্পজ্জন্তীতি? আমন্তা. অপ্পটিসঙ্খানিরুদ্ধা সঙ্খারা ন পুন উপ্পজ্জন্তীতি? ন হেৰং ৰত্তব্বে…পে… তেন হি ন ৰত্তব্বং – ‘‘দ্ৰে নিরোধা’’তি.

নিরোধকথা নিট্ঠিতা.

দুতিযৰগ্গো.

তস্সুদ্দানং –

পরূপহারো অঞ্ঞাণং, কঙ্খা পরৰিতারণা;

ৰচীভেদো দুক্খাহারো, চিত্তট্ঠিতি চ কুক্কুল়া;

অনুপুব্বাভিসমযো, ৰোহারো চ নিরোধকোতি.