১৯. পটিৰেধানুযোগো

২০১. ন ৰত্তব্বং – ‘‘পুগ্গলো উপলব্ভতি সচ্চিকট্ঠপরমত্থেনা’’তি? আমন্তা. ননু সোতাপন্নো অত্থীতি? আমন্তা. হঞ্চি সোতাপন্নো অত্থি, তেন ৰত রে ৰত্তব্বে – ‘‘পুগ্গলো উপলব্ভতি সচ্চিকট্ঠপরমত্থেনা’’তি.

২০২. ন ৰত্তব্বং – ‘‘পুগ্গলো উপলব্ভতি সচ্চিকট্ঠপরমত্থেনা’’তি? আমন্তা. ননু সকদাগামী অত্থি…পে… অনাগামী অত্থি… অরহা অত্থি… উভতোভাগৰিমুত্তো অত্থি… পঞ্ঞাৰিমুত্তো অত্থি… কাযসক্খি [কাযসক্খী (স্যা.)] অত্থি… দিট্ঠিপ্পত্তো অত্থি… সদ্ধাৰিমুত্তো অত্থি… ধম্মানুসারী অত্থি… সদ্ধানুসারী অত্থীতি? আমন্তা.

হঞ্চি সদ্ধানুসারী অত্থি, তেন ৰত রে ৰত্তব্বে – ‘‘পুগ্গলো উপলব্ভতি সচ্চিকট্ঠপরমত্থেনা’’তি.

২০৩. সোতাপন্নো অত্থীতি কত্ৰা তেন চ কারণেন পুগ্গলো উপলব্ভতি সচ্চিকট্ঠপরমত্থেনাতি? আমন্তা. অত্থি কোচি ন সোতাপন্নো হুত্ৰা সোতাপন্নো হোতীতি? আমন্তা. অত্থি কোচি ন পুগ্গলো হুত্ৰা পুগ্গলো হোতীতি? ন হেৰং ৰত্তব্বে…পে….

২০৪. অত্থি কোচি ন সকদাগামী হুত্ৰা… ন অনাগামী হুত্ৰা… ন অরহা হুত্ৰা… ন উভতোভাগৰিমুত্তো হুত্ৰা… ন পঞ্ঞাৰিমুত্তো হুত্ৰা… ন কাযসক্খি হুত্ৰা… ন দিট্ঠিপ্পত্তো হুত্ৰা… ন সদ্ধাৰিমুত্তো হুত্ৰা… ন ধম্মানুসারী হুত্ৰা… ন সদ্ধানুসারী হুত্ৰা সদ্ধানুসারী হোতীতি? আমন্তা. অত্থি কোচি ন পুগ্গলো হুত্ৰা পুগ্গলো হোতীতি? ন হেৰং ৰত্তব্বে…পে….

২০৫. সোতাপন্নো অত্থীতি কত্ৰা তেন চ কারণেন পুগ্গলো উপলব্ভতি সচ্চিকট্ঠপরমত্থেনাতি? আমন্তা. অত্থি কোচি সোতাপন্নো হুত্ৰা ন সোতাপন্নো হোতীতি? আমন্তা. অত্থি কোচি পুগ্গলো হুত্ৰা ন পুগ্গলো হোতীতি? ন হেৰং ৰত্তব্বে…পে….

অত্থি কোচি সকদাগামী হুত্ৰা… অনাগামী হুত্ৰা ন অনাগামী হোতীতি? আমন্তা. অত্থি কোচি পুগ্গলো হুত্ৰা ন পুগ্গলো হোতীতি? ন হেৰং ৰত্তব্বে…পে….

পটিৰেধানুযোগো.