১৫-১৮. ঞাতকানুযোগাদি

১৯৭. ন ৰত্তব্বং – ‘‘পুগ্গলো উপলব্ভতি সচ্চিকট্ঠপরমত্থেনা’’তি? আমন্তা. ননু মাতা অত্থীতি? আমন্তা. হঞ্চি মাতা অত্থি, তেন ৰত রে ৰত্তব্বে – ‘‘পুগ্গলো উপলব্ভতি সচ্চিকট্ঠপরমত্থেনা’’তি.

১৯৮. ন ৰত্তব্বং – ‘‘পুগ্গলো উপলব্ভতি সচ্চিকট্ঠপরমত্থেনা’’তি? আমন্তা. ননু পিতা অত্থি…পে… ভাতা অত্থি… ভগিনী অত্থি… খত্তিযো অত্থি … ব্রাহ্মণো অত্থি… ৰেস্সো অত্থি… সুদ্দো অত্থি… গহট্ঠো অত্থি… পব্বজিতো অত্থি… দেৰো অত্থি… মনুস্সো অত্থীতি? আমন্তা. হঞ্চি মনুস্সো অত্থি, তেন ৰত রে ৰত্তব্বে – ‘‘পুগ্গলো উপলব্ভতি সচ্চিকট্ঠপরমত্থেনা’’তি.

১৯৯. মাতা অত্থীতি কত্ৰা তেন চ কারণেন পুগ্গলো উপলব্ভতি সচ্চিকট্ঠপরমত্থেনাতি? আমন্তা. অত্থি কোচি ন মাতা হুত্ৰা মাতা হোতীতি? আমন্তা. অত্থি কোচি ন পুগ্গলো হুত্ৰা পুগ্গলো হোতীতি? ন হেৰং ৰত্তব্বে…পে… অত্থি কোচি ন পিতা হুত্ৰা…পে… ন ভাতা হুত্ৰা… ন ভগিনী হুত্ৰা… ন খত্তিযো হুত্ৰা… ন ব্রাহ্মণো হুত্ৰা… ন ৰেস্সো হুত্ৰা… ন সুদ্দো হুত্ৰা… ন গহট্ঠো হুত্ৰা… ন পব্বজিতো হুত্ৰা… ন দেৰো হুত্ৰা… ন মনুস্সো হুত্ৰা মনুস্সো হোতীতি? আমন্তা. অত্থি কোচি ন পুগ্গলো হুত্ৰা পুগ্গলো হোতীতি? ন হেৰং ৰত্তব্বে…পে….

২০০. মাতা অত্থীতি কত্ৰা তেন চ কারণেন পুগ্গলো উপলব্ভতি সচ্চিকট্ঠপরমত্থেনাতি? আমন্তা. অত্থি কোচি মাতা হুত্ৰা ন মাতা হোতীতি? আমন্তা. অত্থি কোচি পুগ্গলো হুত্ৰা ন পুগ্গলো হোতীতি? ন হেৰং ৰত্তব্বে…পে….

অত্থি কোচি পিতা হুত্ৰা… ভাতা হুত্ৰা… ভগিনী হুত্ৰা… খত্তিযো হুত্ৰা… ব্রাহ্মণো হুত্ৰা… ৰেস্সো হুত্ৰা… সুদ্দো হুত্ৰা… গহট্ঠো হুত্ৰা… পব্বজিতো হুত্ৰা… দেৰো হুত্ৰা… মনুস্সো হুত্ৰা ন মনুস্সো হোতীতি? আমন্তা. অত্থি কোচি পুগ্গলো হুত্ৰা ন পুগ্গলো হোতীতি? ন হেৰং ৰত্তব্বে…পে….