১০. পঞ্ঞত্তানুযোগো

৬১. রূপধাতুযা রূপী পুগ্গলোতি? আমন্তা. কামধাতুযা কামী পুগ্গলোতি? ন হেৰং ৰত্তব্বে…পে….

৬২. রূপধাতুযা রূপিনো সত্তাতি? আমন্তা. কামধাতুযা কামিনো সত্তাতি? ন হেৰং ৰত্তব্বে…পে….

৬৩. অরূপধাতুযা অরূপী পুগ্গলোতি? আমন্তা. কামধাতুযা কামী পুগ্গলোতি? ন হেৰং ৰত্তব্বে…পে….

৬৪. অরূপধাতুযা অরূপিনো সত্তাতি? আমন্তা. কামধাতুযা কামিনো সত্তাতি? ন হেৰং ৰত্তব্বে…পে….

৬৫. রূপধাতুযা রূপী পুগ্গলো অরূপধাতুযা অরূপী পুগ্গলো, অত্থি চ কোচি রূপধাতুযা চুতো অরূপধাতুং উপপজ্জতীতি? আমন্তা. রূপী পুগ্গলো উপচ্ছিন্নো, অরূপী পুগ্গলো জাতোতি? ন হেৰং ৰত্তব্বে…পে….

৬৬. রূপধাতুযা রূপিনো সত্তা অরূপধাতুযা অরূপিনো সত্তা, অত্থি চ কোচি রূপধাতুযা চুতো অরূপধাতুং উপপজ্জতীতি? আমন্তা. রূপী সত্তো উপচ্ছিন্নো, অরূপী সত্তো জাতোতি? ন হেৰং ৰত্তব্বে…পে….

৬৭. কাযোতি ৰা সরীরন্তি ৰা, সরীরন্তি ৰা কাযোতি ৰা, কাযং অপ্পিযং করিত্ৰা এসেসে একট্ঠে সমে সমভাগে তজ্জাতেতি? আমন্তা. পুগ্গলোতি ৰা জীৰোতি ৰা, জীৰোতি ৰা পুগ্গলোতি ৰা, পুগ্গলং অপ্পিযং করিত্ৰা এসেসে একট্ঠে সমে সমভাগে তজ্জাতেতি? আমন্তা. অঞ্ঞো কাযো, অঞ্ঞো পুগ্গলোতি? আমন্তা. অঞ্ঞং জীৰং, অঞ্ঞং সরীরন্তি? ন হেৰং ৰত্তব্বে.

আজানাহি নিগ্গহং. হঞ্চি কাযোতি ৰা সরীরন্তি ৰা, সরীরন্তি ৰা কাযোতি ৰা, কাযং অপ্পিযং করিত্ৰা এসেসে একট্ঠে সমে সমভাগে তজ্জাতে, পুগ্গলোতি ৰা জীৰোতি ৰা, জীৰোতি ৰা পুগ্গলোতি ৰা, পুগ্গলং অপ্পিযং করিত্ৰা এসেসে একট্ঠে সমে সমভাগে তজ্জাতে, অঞ্ঞো কাযো অঞ্ঞো পুগ্গলো; তেন ৰত রে ৰত্তব্বে – ‘‘অঞ্ঞং জীৰং অঞ্ঞং সরীর’’ন্তি. যং তত্থ ৰদেসি – ‘‘ৰত্তব্বে খো – ‘কাযোতি ৰা সরীরন্তি ৰা, সরীরন্তি ৰা কাযোতি ৰা, কাযং অপ্পিযং করিত্ৰা এসেসে একট্ঠে সমে সমভাগে তজ্জাতে, পুগ্গলোতি ৰা জীৰোতি ৰা, জীৰোতি ৰা পুগ্গলোতি ৰা, পুগ্গলং অপ্পিযং করিত্ৰা এসেসে একট্ঠে সমে সমভাগে তজ্জাতে, অঞ্ঞো কাযো অঞ্ঞো পুগ্গলো,’ নো চ ৰত্তব্বে – ‘অঞ্ঞং জীৰং অঞ্ঞং সরীর’’’ন্তি মিচ্ছা.

নো চে পন ৰত্তব্বে – ‘‘অঞ্ঞং জীৰং অঞ্ঞং সরীর’’ন্তি, নো চ ৰত রে ৰত্তব্বে – ‘‘কাযোতি ৰা সরীরন্তি ৰা, সরীরন্তি ৰা কাযোতি ৰা, কাযং অপ্পিযং করিত্ৰা এসেসে একট্ঠে সমে সমভাগে তজ্জাতে, পুগ্গলোতি ৰা জীৰোতি ৰা, জীৰোতি ৰা পুগ্গলোতি ৰা, পুগ্গলং অপ্পিযং করিত্ৰা এসেসে একট্ঠে সমে সমভাগে তজ্জাতে, অঞ্ঞো কাযো অঞ্ঞো পুগ্গলো’’তি. যং তত্থ ৰদেসি – ‘‘ৰত্তব্বে খো – ‘কাযোতি ৰা সরীরন্তি ৰা, সরীরন্তি ৰা কাযোতি ৰা, কাযং অপ্পিযং করিত্ৰা এসেসে একট্ঠে সমে সমভাগে তজ্জাতে, পুগ্গলোতি ৰা জীৰোতি ৰা, জীৰোতি ৰা পুগ্গলোতি ৰা, পুগ্গলং অপ্পিযং করিত্ৰা এসেসে একট্ঠে সমে সমভাগে তজ্জাতে, অঞ্ঞো কাযো অঞ্ঞো পুগ্গলো’, নো চ ৰত্তব্বে – ‘অঞ্ঞং জীৰং অঞ্ঞং সরীর’’’ন্তি মিচ্ছা…পে….

৬৮. কাযোতি ৰা সরীরন্তি ৰা, সরীরন্তি ৰা কাযোতি ৰা, কাযং অপ্পিযং করিত্ৰা এসেসে একট্ঠে সমে সমভাগে তজ্জাতেতি? আমন্তা. ৰুত্তং ভগৰতা – ‘‘অত্থি পুগ্গলো অত্তহিতায পটিপন্নো’’তি? আমন্তা. অঞ্ঞো কাযো অঞ্ঞো পুগ্গলোতি? ন হেৰং ৰত্তব্বে.

আজানাহি পটিকম্মং. হঞ্চি কাযোতি ৰা সরীরন্তি ৰা, সরীরন্তি ৰা কাযোতি ৰা, কাযং অপ্পিযং করিত্ৰা এসেসে একট্ঠে সমে সমভাগে তজ্জাতে, ৰুত্তং ভগৰতা – ‘‘অত্থি পুগ্গলো অত্তহিতায পটিপন্নো,’’ তেন ৰত রে ৰত্তব্বে – ‘‘অঞ্ঞো কাযো অঞ্ঞো পুগ্গলো’’তি. যং তত্থ ৰদেসি – ‘‘ৰত্তব্বে খো – ‘কাযোতি ৰা সরীরন্তি ৰা, সরীরন্তি ৰা কাযোতি ৰা, কাযং অপ্পিযং করিত্ৰা এসেসে একট্ঠে সমে সমভাগে তজ্জাতে, ৰুত্তং ভগৰতা – অত্থি পুগ্গলো অত্তহিতায পটিপন্নো,’ নো চ ৰত্তব্বে – ‘অঞ্ঞো কাযো অঞ্ঞো পুগ্গলো’’’তি মিচ্ছা.

নো চে পন ৰত্তব্বে – ‘‘অঞ্ঞো কাযো অঞ্ঞো পুগ্গলো’’তি, নো চ ৰত রে ৰত্তব্বে – ‘‘কাযোতি ৰা সরীরন্তি ৰা, সরীরন্তি ৰা কাযোতি ৰা, কাযং অপ্পিযং করিত্ৰা এসেসে একট্ঠে সমে সমভাগে তজ্জাতে, ৰুত্তং ভগৰতা – ‘অত্থি পুগ্গলো অত্তহিতায পটিপন্নো’’’তি. যং তত্থ ৰদেসি – ‘‘ৰত্তব্বে খো – ‘কাযোতি ৰা সরীরন্তি ৰা, সরীরন্তি ৰা কাযোতি ৰা, কাযং অপ্পিযং করিত্ৰা এসেসে একট্ঠে সমে সমভাগে তজ্জাতে, ৰুত্তং ভগৰতা – অত্থি পুগ্গলো অত্তহিতায পটিপন্নো,’ নো চ ৰত্তব্বে – ‘অঞ্ঞো কাযো অঞ্ঞো পুগ্গলো’’’তি মিচ্ছা. (সংখিত্তং)

পঞ্ঞত্তানুযোগো.