সুত্তন্তিকদুকনিক্খেপং

১৩০৩. কতমে ধম্মা ৰিজ্জাভাগিনো? ৰিজ্জায সম্পযুত্তকা ধম্মা – ইমে ধম্মা ৰিজ্জাভাগিনো.

১৩০৪. কতমে ধম্মা অৰিজ্জাভাগিনো? অৰিজ্জায সম্পযুত্তকা ধম্মা – ইমে ধম্মা অৰিজ্জাভাগিনো.

১৩০৫. কতমে ধম্মা ৰিজ্জূপমা? হেট্ঠিমেসু তীসু অরিযমগ্গেসু পঞ্ঞা – ইমে ধম্মা ৰিজ্জূপমা.

১৩০৬. কতমে ধম্মা ৰজিরূপমা? উপরিট্ঠিমে অরহত্তমগ্গে পঞ্ঞা – ইমে ধম্মা ৰজিরূপমা.

১৩০৭. কতমে ধম্মা বালা? অহিরীকঞ্চ অনোত্তপ্পঞ্চ – ইমে ধম্মা বালা. সব্বেপি অকুসলা ধম্মা বালা.

১৩০৮. কতমে ধম্মা পণ্ডিতা? হিরী চ ওত্তপ্পঞ্চ – ইমে ধম্মা পণ্ডিতা. সব্বেপি কুসলা ধম্মা পণ্ডিতা.

১৩০৯. কতমে ধম্মা কণ্হা? অহিরীকঞ্চ অনোত্তপ্পঞ্চ – ইমে ধম্মা কণ্হা. সব্বেপি অকুসলা ধম্মা কণ্হা.

১৩১০. কতমে ধম্মা সুক্কা? হিরী চ ওত্তপ্পঞ্চ – ইমে ধম্মা সুক্কা? সব্বেপি কুসলা ধম্মা সুক্কা.

১৩১১. কতমে ধম্মা তপনীযা? কাযদুচ্চরিতং, ৰচীদুচ্চরিতং, মনোদুচ্চরিতং – ইমে ধম্মা তপনীযা. সব্বেপি অকুসলা ধম্মা তপনীযা.

১৩১২. কতমে ধম্মা অতপনীযা? কাযসুচরিতং, ৰচীসুচরিতং, মনোসুচরিতং – ইমে ধম্মা অতপনীযা. সব্বেপি কুসলা ধম্মা অতপনীযা.

১৩১৩. কতমে ধম্মা অধিৰচনা? যা তেসং তেসং ধম্মানং সঙ্খা সমঞ্ঞা পঞ্ঞত্তি ৰোহারো নামং নামকম্মং নামধেয্যং নিরুত্তি ব্যঞ্জনং অভিলাপো – ইমে ধম্মা অধিৰচনা. সব্বেৰ ধম্মা অধিৰচনপথা.

১৩১৪. কতমে ধম্মা নিরুত্তি? যা তেসং তেসং ধম্মানং সঙ্খা সমঞ্ঞা পঞ্ঞত্তি ৰোহারো নামং নামকম্মং নামধেয্যং নিরুত্তি ব্যঞ্জনং অভিলাপো – ইমে ধম্মা নিরুত্তি. সব্বেৰ ধম্মা নিরুত্তিপথা.

১৩১৫. কতমে ধম্মা পঞ্ঞত্তি? যা তেসং তেসং ধম্মানং সঙ্খা সমঞ্ঞা পঞ্ঞত্তি ৰোহারো নামং নামকম্মং নামধেয্যং নিরুত্তি ব্যঞ্জনং অভিলাপো – ইমে ধম্মা পঞ্ঞত্তি. সব্বেৰ ধম্মা পঞ্ঞত্তিপথা.

১৩১৬. তত্থ কতমং নামং? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো, অসঙ্খতা চ ধাতু – ইদং ৰুচ্চতি নামং.

১৩১৭. তত্থ কতমং রূপং? চত্তারো চ মহাভূতা, চতুন্নঞ্চ মহাভূতানং উপাদায রূপং – ইদং ৰুচ্চতি রূপং.

১৩১৮. তত্থ কতমা অৰিজ্জা? যং অঞ্ঞাণং অদস্সনং…পে… অৰিজ্জালঙ্গী মোহো অকুসলমূলং – অযং ৰুচ্চতি অৰিজ্জা.

১৩১৯. তত্থ কতমা ভৰতণ্হা? যো ভৰেসু ভৰছন্দো…পে… ভৰজ্ঝোসানং – অযং ৰুচ্চতি ভৰতণ্হা.

১৩২০. তত্থ কতমা ভৰদিট্ঠি? ভৰিস্সতি অত্তা চ লোকো চাতি, যা এৰরূপা দিট্ঠি দিট্ঠিগতং…পে… ৰিপরিযাসগ্গাহো – অযং ৰুচ্চতি ভৰদিট্ঠি.

১৩২১. তত্থ কতমা ৰিভৰদিট্ঠি? ন ভৰিস্সতি অত্তা চ লোকো চাতি, যা এৰরূপা দিট্ঠি দিট্ঠিগতং…পে… ৰিপরিযাসগ্গাহো – অযং ৰুচ্চতি ৰিভৰদিট্ঠি.

১৩২২. তত্থ কতমা সস্সতদিট্ঠি? সস্সতো অত্তা চ লোকো চাতি, যা এৰরূপা দিট্ঠি দিট্ঠিগতং…পে… ৰিপরিযাসগ্গাহো – অযং ৰুচ্চতি সস্সতদিট্ঠি.

১৩২৩. তত্থ কতমা উচ্ছেদদিট্ঠি? উচ্ছিজ্জিস্সতি অত্তা চ লোকো চাতি, যা এৰরূপা দিট্ঠি দিট্ঠিগতং…পে… ৰিপরিযাসগ্গাহো – অযং ৰুচ্চতি উচ্ছেদদিট্ঠি.

১৩২৪. তত্থ কতমা অন্তৰা দিট্ঠি? অন্তৰা অত্তা চ লোকো চাতি, যা এৰরূপা দিট্ঠি দিট্ঠিগতং…পে… ৰিপরিযাসগ্গাহো – অযং ৰুচ্চতি অন্তৰা দিট্ঠি.

১৩২৫. তত্থ কতমা অনন্তৰা দিট্ঠি? অনন্তৰা অত্তা চ লোকো চাতি, যা এৰরূপা দিট্ঠি দিট্ঠিগতং…পে… ৰিপরিযাসগ্গাহো – অযং ৰুচ্চতি অনন্তৰা দিট্ঠি.

১৩২৬. তত্থ কতমা পুব্বন্তানুদিট্ঠি? পুব্বন্তং আরব্ভ যা উপ্পজ্জতি দিট্ঠি দিট্ঠিগতং…পে… ৰিপরিযাসগ্গাহো – অযং ৰুচ্চতি পুব্বন্তানুদিট্ঠি.

১৩২৭. তত্থ কতমা অপরন্তানুদিট্ঠি? অপরন্তং আরব্ভ যা উপ্পজ্জতি দিট্ঠি দিট্ঠিগতং…পে… ৰিপরিযাসগ্গাহো – অযং ৰুচ্চতি অপরন্তানুদিট্ঠি.

১৩২৮. তত্থ কতমং অহিরিকং? যং ন হিরীযতি হিরিযিতব্বেন, ন হিরীযতি পাপকানং অকুসলানং ধম্মানং সমাপত্তিযা – ইদং ৰুচ্চতি অহিরিকং.

১৩২৯. তত্থ কতমং অনোত্তপ্পং? যং ন ওত্তপ্পতি ওত্তপ্পিতব্বেন, ন ওত্তপ্পতি পাপকানং অকুসলানং ধম্মানং সমাপত্তিযা – ইদং ৰুচ্চতি অনোত্তপ্পং.

১৩৩০. তত্থ কতমা হিরী? যং হিরীযতি হিরিযিতব্বেন, হিরীযতি পাপকানং অকুসলানং ধম্মানং সমাপত্তিযা – অযং ৰুচ্চতি হিরী.

১৩৩১. তত্থ কতমং ওত্তপ্পং? যং ওত্তপ্পতি ওত্তপ্পিতব্বেন, ওত্তপ্পতি পাপকানং অকুসলানং ধম্মানং সমাপত্তিযা – ইদং ৰুচ্চতি ওত্তপ্পং.

১৩৩২. তত্থ কতমা দোৰচস্সতা? সহধম্মিকে ৰুচ্চমানে দোৰচস্সাযং দোৰচস্সিযং দোৰচস্সতা ৰিপ্পটিকূলগ্গাহিতা ৰিপচ্চনীকসাততা অনাদরিযং অনাদরতা অগারৰতা অপ্পটিস্সৰতা – অযং ৰুচ্চতি দোৰচস্সতা.

১৩৩৩. তত্থ কতমা পাপমিত্ততা? যে তে পুগ্গলা অস্সদ্ধা দুস্সীলা অপ্পস্সুতা মচ্ছরিনো দুপ্পঞ্ঞা, যা তেসং সেৰনা নিসেৰনা সংসেৰনা ভজনা সম্ভজনা ভত্তি সম্ভত্তি তংসম্পৰঙ্কতা – অযং ৰুচ্চতি পাপমিত্ততা.

১৩৩৪. তত্থ কতমা সোৰচস্সতা? সহধম্মিকে ৰুচ্চমানে সোৰচস্সাযং সোৰচস্সিযং সোৰচস্সতা অপ্পটিকূলগ্গাহিতা অৰিপচ্চনীকসাততা সগারৰতা সাদরিযং সাদরতা সপ্পটিস্সৰতা – অযং ৰুচ্চতি সোৰচস্সতা.

১৩৩৫. তত্থ কতমা কল্যাণমিত্ততা? যে তে পুগ্গলা সদ্ধা সীলৰন্তো বহুস্সুতা চাগৰন্তো পঞ্ঞৰন্তো, যা তেসং সেৰনা নিসেৰনা সংসেৰনা ভজনা সম্ভজনা ভত্তি সম্ভত্তি তংসম্পৰঙ্কতা – অযং ৰুচ্চতি কল্যাণমিত্ততা.

১৩৩৬. তত্থ কতমা আপত্তিকুসলতা? পঞ্চপি আপত্তিক্খন্ধা আপত্তিযো, সত্তপি আপত্তিক্খন্ধা আপত্তিযো. যা তাসং আপত্তীনং আপত্তিকুসলতা পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি আপত্তিকুসলতা.

১৩৩৭. তত্থ কতমা আপত্তিৰুট্ঠানকুসলতা? যা তাহি আপত্তীহি ৰুট্ঠানকুসলতা পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি আপত্তিৰুট্ঠানকুসলতা.

১৩৩৮. তত্থ কতমা সমাপত্তিকুসলতা? অত্থি সৰিতক্কসৰিচারা সমাপত্তি, অত্থি অৰিতক্কৰিচারমত্তা সমাপত্তি, অত্থি অৰিতক্কঅৰিচারা সমাপত্তি. যা তাসং সমাপত্তীনং সমাপত্তিকুসলতা পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি সমাপত্তিকুসলতা.

১৩৩৯. তত্থ কতমা সমাপত্তিৰুট্ঠানকুসলতা? যা তাহি সমাপত্তীহি ৰুট্ঠানকুসলতা পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি সমাপত্তিৰুট্ঠানকুসলতা.

১৩৪০. তত্থ কতমা ধাতুকুসলতা? অট্ঠারস ধাতুযো চক্খুধাতু রূপধাতু চক্খুৰিঞ্ঞাণধাতু, সোতধাতু সদ্দধাতু সোতৰিঞ্ঞাণধাতু, ঘানধাতু গন্ধধাতু ঘানৰিঞ্ঞাণধাতু, জিৰ্হাধাতু রসধাতু জিৰ্হাৰিঞ্ঞাণধাতু, কাযধাতু ফোট্ঠব্বধাতু কাযৰিঞ্ঞাণধাতু, মনোধাতু ধম্মধাতু মনোৰিঞ্ঞাণধাতু. যা তাসং ধাতূনং ধাতুকুসলতা পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ধাতুকুসলতা.

১৩৪১. তত্থ কতমা মনসিকারকুসলতা? যা তাসং ধাতূনং মনসিকারকুসলতা পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি মনসিকারকুসলতা.

১৩৪২. তত্থ কতমা আযতনকুসলতা? দ্ৰাদসাযতনানি – চক্খাযতনং, রূপাযতনং, সোতাযতনং, সদ্দাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং. যা তেসং আযতনানং আযতনকুসলতা পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি আযতনকুসলতা.

১৩৪৩. তত্থ কতমা পটিচ্চসমুপ্পাদকুসলতা? অৰিজ্জাপচ্চযা সঙ্খারা, সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামরূপং, নামরূপপচ্চযা সল়াযতনং, সল়াযতনপচ্চযা ফস্সো, ফস্সপচ্চযা ৰেদনা, ৰেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা ভৰো, ভৰপচ্চযা জাতি, জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি; এৰমেতস্স কেৰলস্স দুক্খক্খন্ধস্স সমুদযো হোতীতি. যা তত্থ পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি পটিচ্চসমুপ্পাদকুসলতা.

১৩৪৪. তত্থ কতমা ঠানকুসলতা? যে যে ধম্মা যেসং যেসং ধম্মানং হেতূ পচ্চযা উপ্পাদায [উপাদায (সী. ক.)] তং তং ঠানন্তি, যা তত্থ পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ঠানকুসলতা.

১৩৪৫. তত্থ কতমা অট্ঠানকুসলতা? যে যে ধম্মা যেসং যেসং ধম্মানং ন হেতূ ন পচ্চযা উপ্পাদায তং তং অট্ঠানন্তি, যা তত্থ পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি অট্ঠানকুসলতা.

১৩৪৬. তত্থ কতমো অজ্জৰো? যা অজ্জৰতা অজিম্হতা অৰঙ্কতা অকুটিলতা – অযং ৰুচ্চতি অজ্জৰো.

১৩৪৭. তত্থ কতমো মদ্দৰো? যা মুদুতা মদ্দৰতা অকক্খল়তা অকথিনতা নীচচিত্ততা – অযং ৰুচ্চতি মদ্দৰো.

১৩৪৮. তত্থ কতমা খন্তি? যা খন্তি খমনতা অধিৰাসনতা অচণ্ডিক্কং অনসুরোপো অত্তমনতা চিত্তস্স – অযং ৰুচ্চতি খন্তি.

১৩৪৯. তত্থ কতমং সোরচ্চং? যো কাযিকো অৰীতিক্কমো, ৰাচসিকো অৰীতিক্কমো, কাযিকৰাচসিকো অৰীতিক্কমো – ইদং ৰুচ্চতি সোরচ্চং. সব্বোপি সীলসংৰরো সোরচ্চং.

১৩৫০. তত্থ কতমং সাখল্যং? যা সা ৰাচা অণ্ডকা কক্কসা পরকটুকা পরাভিসজ্জনী কোধসামন্তা অসমাধিসংৰত্তনিকা, তথারূপিং ৰাচং পহায যা সা ৰাচা নেল়া কণ্ণসুখা পেমনীযা হদযঙ্গমা পোরী বহুজনকন্তা বহুজনমনাপা তথারূপিং ৰাচং ভাসিতা হোতি; যা তত্থ সণ্হৰাচতা সখিলৰাচতা অফরুসৰাচতা – ইদং ৰুচ্চতি সাখল্যং.

১৩৫১. তত্থ কতমো পটিসন্থারো? দ্ৰে পটিসন্থারা – আমিসপটিসন্থারো চ ধম্মপটিসন্থারো চ. ইধেকচ্চো পটিসন্থারকো হোতি আমিসপটিসন্থারেন ৰা ধম্মপটিসন্থারেন ৰা – অযং ৰুচ্চতি পটিসন্থারো.

১৩৫২. তত্থ কতমা ইন্দ্রিযেসু অগুত্তদ্ৰারতা? ইধেকচ্চো চক্খুনা রূপং দিস্ৰা নিমিত্তগ্গাহী হোতি অনুব্যঞ্জনগ্গাহী. যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায ন পটিপজ্জতি, ন রক্খতি চক্খুন্দ্রিযং, চক্খুন্দ্রিযে ন সংৰরং আপজ্জতি. সোতেন সদ্দং সুত্ৰা…পে… ঘানেন গন্ধং ঘাযিত্ৰা…পে… জিৰ্হায রসং সাযিত্ৰা…পে… কাযেন ফোট্ঠব্বং ফুসিত্ৰা…পে… মনসা ধম্মং ৰিঞ্ঞায নিমিত্তগ্গাহী হোতি অনুব্যঞ্জনগ্গাহী. যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায ন পটিপজ্জতি, ন রক্খতি মনিন্দ্রিযং, মনিন্দ্রিযে ন সংৰরং আপজ্জতি. যা ইমেসং ছন্নং ইন্দ্রিযানং অগুত্তি অগোপনা অনারক্খো অসংৰরো – অযং ৰুচ্চতি ইন্দ্রিযেসু অগুত্তদ্ৰারতা.

১৩৫৩. তত্থ কতমা ভোজনে অমত্তঞ্ঞুতা? ইধেকচ্চো অপ্পটিসঙ্খা অযোনিসো আহারং আহারেতি দৰায মদায মণ্ডনায ৰিভূসনায. যা তত্থ অসন্তুট্ঠিতা অমত্তঞ্ঞুতা অপ্পটিসঙ্খা ভোজনে – অযং ৰুচ্চতি ভোজনে অমত্তঞ্ঞুতা.

১৩৫৪. তত্থ কতমা ইন্দ্রিযেসু গুত্তদ্ৰারতা? ইধেকচ্চো চক্খুনা রূপং দিস্ৰা ন নিমিত্তগ্গাহী হোতি ন অনুব্যঞ্জনগ্গাহী. যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি, রক্খতি চক্খুন্দ্রিযং, চক্খুন্দ্রিযে সংৰরং আপজ্জতি. সোতেন সদ্দং সুত্ৰা…পে… ঘানেন গন্ধং ঘাযিত্ৰা…পে… জিৰ্হায রসং সাযিত্ৰা…পে… কাযেন ফোট্ঠব্বং ফুসিত্ৰা…পে… মনসা ধম্মং ৰিঞ্ঞায ন নিমিত্তগ্গাহী হোতি নানুব্যঞ্জনগ্গাহী. যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি, রক্খতি মনিন্দ্রিযং, মনিন্দ্রিযে সংৰরং আপজ্জতি. যা ইমেসং ছন্নং ইন্দ্রিযানং গুত্তি গোপনা আরক্খো সংৰরো – অযং ৰুচ্চতি ইন্দ্রিযেসু গুত্তদ্ৰারতা.

১৩৫৫. তত্থ কতমা ভোজনে মত্তঞ্ঞুতা? ইধেকচ্চো পটিসঙ্খা যোনিসো আহারং আহারেতি – নেৰ দৰায ন মদায ন মণ্ডনায ন ৰিভূসনায যাৰদেৰ ইমস্স কাযস্স ঠিতিযা যাপনায ৰিহিংসূপরতিযা ব্রহ্মচরিযানুগ্গহায, ইতি পুরাণঞ্চ ৰেদনং পটিহঙ্খামি, নৰঞ্চ ৰেদনং ন উপ্পাদেস্সামি, যাত্রা চ মে ভৰিস্সতি অনৰজ্জতা চ ফাসুৰিহারো চাতি. যা তত্থ সন্তুট্ঠিতা মত্তঞ্ঞুতা পটিসঙ্খা ভোজনে – অযং ৰুচ্চতি ভোজনে মত্তঞ্ঞুতা.

১৩৫৬. তত্থ কতমং মুট্ঠসচ্চং? যা অসতি অননুস্সতি অপ্পটিস্সতি অসতি অসরণতা অধারণতা পিলাপনতা সম্মুসনতা – ইদং ৰুচ্চতি মুট্ঠসচ্চং.

১৩৫৭. তত্থ কতমং অসম্পজঞ্ঞং? যং অঞ্ঞাণং অদস্সনং…পে… অৰিজ্জালঙ্গী মোহো অকুসলমূলং – ইদং ৰুচ্চতি অসম্পজঞ্ঞং.

১৩৫৮. তত্থ কতমা সতি? যা সতি অনুস্সতি পটিস্সতি সতি সরণতা ধারণতা অপিলাপনতা অসম্মুসনতা সতি সতিন্দ্রিযং সতিবলং সম্মাসতি – অযং ৰুচ্চতি সতি.

১৩৫৯. তত্থ কতমং সম্পজঞ্ঞং? যা পঞ্ঞা পজাননা…পে… অমোহো ধম্মৰিচযো সম্মাদিট্ঠি – ইদং ৰুচ্চতি সম্পজঞ্ঞং.

১৩৬০. তত্থ কতমং পটিসঙ্খানবলং? যা পঞ্ঞা পজাননা…পে… অমোহো ধম্মৰিচযো সম্মাদিট্ঠি – ইদং ৰুচ্চতি পটিসঙ্খানবলং.

১৩৬১. তত্থ কতমং ভাৰনাবলং? যা কুসলানং ধম্মানং আসেৰনা ভাৰনা বহুলীকম্মং – ইদং ৰুচ্চতি ভাৰনাবলং. সত্তপি বোজ্ঝঙ্গা ভাৰনাবলং.

১৩৬২. তত্থ কতমো সমথো? যা চিত্তস্স ঠিতি…পে… সম্মাসমাধি – অযং ৰুচ্চতি সমথো.

১৩৬৩. তত্থ কতমা ৰিপস্সনা? যা পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি ৰিপস্সনা.

১৩৬৪. তত্থ কতমং সমথনিমিত্তং? যা চিত্তস্স ঠিতি…পে… সম্মাসমাধি – ইদং ৰুচ্চতি সমথনিমিত্তং.

১৩৬৫. তত্থ কতমং পগ্গাহনিমিত্তং? যো চেতসিকো ৰীরিযারম্ভো…পে… সম্মাৰাযামো – ইদং ৰুচ্চতি পগ্গাহনিমিত্তং.

১৩৬৬. তত্থ কতমো পগ্গাহো? যো চেতসিকো ৰীরিযারম্ভো…পে… সম্মাৰাযামো – অযং ৰুচ্চতি পগ্গাহো.

১৩৬৭. তত্থ কতমো অৰিক্খেপো? যা চিত্তস্স ঠিতি…পে… সম্মাসমাধি – অযং ৰুচ্চতি অৰিক্খেপো.

১৩৬৮. তত্থ কতমা সীলৰিপত্তি? যো কাযিকো ৰীতিক্কমো, ৰাচসিকো ৰীতিক্কমো, কাযিকৰাচসিকো ৰীতিক্কমো – অযং ৰুচ্চতি সীলৰিপত্তি. সব্বম্পি দুস্সিল্যং সীলৰিপত্তি.

১৩৬৯. তত্থ কতমা দিট্ঠিৰিপত্তি? নত্থি দিন্নং, নত্থি যিট্ঠং, নত্থি হুতং, নত্থি সুকতদুক্কটানং কম্মানং ফলং ৰিপাকো, নত্থি অযং লোকো, নত্থি পরো লোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্রাহ্মণা সম্মগ্গতা সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তীতিः যা এৰরূপা দিট্ঠি দিট্ঠিগতং…পে… ৰিপরিযাসগ্গাহো – অযং ৰুচ্চতি দিট্ঠিৰিপত্তি. সব্বাপি মিচ্ছাদিট্ঠি দিট্ঠিৰিপত্তি.

১৩৭০. তত্থ কতমা সীলসম্পদা? যো কাযিকো অৰীতিক্কমো, ৰাচসিকো অৰীতিক্কমো, কাযিকৰাচসিকো অৰীতিক্কমো – অযং ৰুচ্চতি সীলসম্পদা. সব্বোপি সীলসংৰরো সীলসম্পদা.

১৩৭১. তত্থ কতমা দিট্ঠিসম্পদা? অত্থি দিন্নং, অত্থি যিট্ঠং, অত্থি হুতং, অত্থি সুকতদুক্কটানং কম্মানং ফলং ৰিপাকো, অত্থি অযং লোকো, অত্থি পরো লোকো, অত্থি মাতা, অত্থি পিতা, অত্থি সত্তা ওপপাতিকা, অত্থি লোকে সমণব্রাহ্মণা সম্মগ্গতা সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তীতিः যা এৰরূপা পঞ্ঞা পজাননা…পে… অমোহো ধম্মৰিচযো সম্মাদিট্ঠি – অযং ৰুচ্চতি দিট্ঠিসম্পদা. সব্বাপি সম্মাদিট্ঠি দিট্ঠিসম্পদা.

১৩৭২. তত্থ কতমা সীলৰিসুদ্ধি? যো কাযিকো অৰীতিক্কমো, ৰাচসিকো অৰীতিক্কমো, কাযিকৰাচসিকো অৰীতিক্কমো – অযং ৰুচ্চতি সীলৰিসুদ্ধি. সব্বোপি সীলসংৰরো সীলৰিসুদ্ধি.

১৩৭৩. তত্থ কতমা দিট্ঠিৰিসুদ্ধি? কম্মস্সকতঞাণং সচ্চানুলোমিকঞাণং মগ্গসমঙ্গিস্স ঞাণং ফলসমঙ্গিস্স ঞাণং.

১৩৭৪. দিট্ঠিৰিসুদ্ধি খো পনাতি – যা পঞ্ঞা পজাননা…পে… অমোহো ধম্মৰিচযো সম্মাদিট্ঠি.

১৩৭৫. যথাদিট্ঠিস্স চ পধানন্তি – যো চেতসিকো ৰীরিযারম্ভো…পে… সম্মাৰাযামো.

১৩৭৬. সংৰেগোতি – জাতিভযং জরাভযং ব্যাধিভযং মরণভযং. সংৰেজনিযং [সংৰেজনীযং (সী.)] ঠানন্তি – জাতি জরা ব্যাধি মরণং.

১৩৭৭. সংৰিগ্গস্স চ যোনিসো পধানন্তি – ইধ ভিক্খু অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি, উপ্পন্নানং পাপকানং অকুসলানং ধম্মানং পহানায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি, অনুপ্পন্নানং কুসলানং ধম্মানং উপ্পাদায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি, উপ্পন্নানং কুসলানং ধম্মানং ঠিতিযা অসম্মোসায ভিয্যোভাৰায ৰেপুল্লায ভাৰনায পারিপূরিযা ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি.

১৩৭৮. অসন্তুট্ঠিতা চ কুসলেসু ধম্মেসূতি – যা কুসলানং ধম্মানং ভাৰনায অসন্তুট্ঠস্স ভিয্যোকম্যতা.

১৩৭৯. অপ্পটিৰানিতা চ পধানস্মিন্তি – যা কুসলানং ধম্মানং ভাৰনায সক্কচ্চকিরিযতা সাতচ্চকিরিযতা অট্ঠিতকিরিযতা অনোলীনৰুত্তিতা অনিক্খিত্তছন্দতা অনিক্খিত্তধুরতা আসেৰনা ভাৰনা বহুলীকম্মং.

১৩৮০. ৰিজ্জাতি – তিস্সো ৰিজ্জা – পুব্বেনিৰাসানুস্সতি ঞাণং ৰিজ্জা, সত্তানং চুতূপপাতে ঞাণং ৰিজ্জা, আসৰানং খযে ঞাণং ৰিজ্জা.

১৩৮১. ৰিমুত্তীতি – দ্ৰে ৰিমুত্তিযো – চিত্তস্স [চিত্তস্স চ (সী. স্যা.)] অধিমুত্তি, নিব্বানঞ্চ.

১৩৮২. খযে ঞাণন্তি – মগ্গসমঙ্গিস্স ঞাণং.

১৩৮৩. অনুপ্পাদে ঞাণন্তি – ফলসমঙ্গিস্স ঞাণং.

নিক্খেপকণ্ডং নিট্ঠিতং.