অনুলোমঞাণকথাৰণ্ণনা

৮০৪. অধিমোক্খসদ্ধাতি পসাদভূতো ৰত্থুগতো নিচ্ছযো অধিমোক্খো. তস্মা তথাভূতা ভাৰনাৰিসেসেন কিচ্চতো অধিমত্ততায বলৰতরা নিব্বত্ততি. সুপগ্গহিতন্তি সুট্ঠু পগ্গহিতং. অসল্লীনং পটুতরভাৰেন পটিপক্খৰিধমনসমত্থং ৰীরিযং হোতি. সূপট্ঠিতাতি তিক্খতরতায আরম্মণাভিমুখভাৰেন সুট্ঠু উপট্ঠিতা সতি হোতি. সুসমাহিতন্তি পস্সদ্ধিসুখানং সাতিসযতায সুট্ঠু সমাহিতং আরম্মণে সম্মদেৰ ঠপিতং অপ্পিতং ৰিয হোতি. তিক্খতরাতি অনুলোমঞাণুপ্পত্তিযা পচ্চযো ভৰিতুং সমত্থভাৰেন সাতিসযং তিক্খা সূরা. সঙ্খারানং ৰিচিননেপি মজ্ঝত্তভূতসঙ্খারুপেক্খা পঞ্ঞা উপ্পজ্জতি. অনিচ্চাতি ৰা…পে… সম্মসিত্ৰা ভৰঙ্গং ওতরতীতি অনিচ্চাদীসু একেনাকারেন সম্মসন্তী সত্তক্খত্তুং পৰত্তিত্ৰা ভিজ্জন্তী ভৰঙ্গং ওতিণ্ণা নাম হোতি ততো পরং ভৰঙ্গস্স ৰারোতি কত্ৰা. সঙ্খারুপেক্খায কতনযেনেৰাতি অনিচ্চাদিনা আলম্বনকরণনযেনেৰ, ন সম্মসিতনযেন. তেনাহ ‘‘আরম্মণং কুরুমান’’ন্তি. আৰট্টেত্ৰাতি নিৰত্তেত্ৰা চিত্তস্স ভৰঙ্গৰসেন ৰত্তিতুং অদত্ৰা. ৰিসদিসচিত্তপৰত্তিসঙ্খাতায ৰীচিযা অভাৰেন অৰীচিকা, চিত্তসন্ততি. কিরিযমনোধাতুযা হি ভৰঙ্গে আৰট্টিতে কিরিযমযচিত্তপৰত্তিৰিপাকচিত্তুপ্পত্তিযা সৰীচিকা সন্তরা, ন এৰং মনোদ্ৰারাৰজ্জনেনাতি ৰুত্তং ‘‘অৰীচিকং চিত্তসন্ততিং অনুপ্পবন্ধমান’’ন্তি. তথেৰাতি যথা অতীতাসু দ্ৰত্তিংসজৰনৰীথীসু সঙ্খারুপেক্খা ‘‘অনিচ্চা’’তি ৰা ‘‘দুক্খা’’তি ৰা ‘‘অনত্তা’’তি ৰা সঙ্খারে আরম্মণমকাসি, তথেৰ. পরিকম্মন্তি ৰুচ্চতি মগ্গস্স পরিকম্মত্তা পটিসঙ্খারকত্তা. উপচারন্তি ৰুচ্চতি মগ্গস্স আসন্নত্তা, সমীপচারিকত্তা ৰা. অনুলোমত্তং সযমেৰ ৰদতি.

অযঞ্চ নযো কামং মগ্গৰীথিযং পঠমজৰনস্স পটিসঙ্খরণট্ঠো, দুতিযস্স ততো আসন্নট্ঠো, ততিযস্স হেট্ঠিমুপরিমানং অনুলোমট্ঠো চ যুত্তোতি ৰুত্তো, তথাপি সব্বেসম্পি ইমা সমঞ্ঞা সম্ভৰন্তীতি দস্সেতুং ‘‘অৰিসেসেন পনা’’তিআদি ৰুত্তং. তত্থ আসেৰনন্তি আদরেন সেৰনং. পুরিমভাগপচ্ছিমভাগানন্তি হেট্ঠিমানং, উপরিমানঞ্চ ধম্মকোট্ঠাসানং. অট্ঠন্নন্তি উদযব্বযঞাণাদীনং অট্ঠন্নং. সব্বাপি ৰিপস্সনা লক্খণত্তযসম্মসনকিচ্চাৰ, ইদম্পি তথেৰাতি ৰুত্তং ‘‘তথকিচ্চতাযা’’তি. উপরীতি মগ্গে. বোধিপক্খিযধম্মানং তথকিচ্চতায অনুলোমেতি সম্মোসাদিপটিপক্খৰিধমনতো. ইদানি অনুলোমঞাণস্স তদুভযকিচ্চানুলোমং ৰিত্থারতো দস্সেতুং ‘‘তঞ্হী’’তিআদি ৰুত্তং. তত্থ অনুলোমঞাণং সচ্চপটিচ্ছাদকমোহক্খন্ধাদীনং সাতিসযং ৰিধমনেন লোকিযঞাণেসু উক্কংসপরিযন্তগতং, ততো এৰ হেট্ঠা নিব্বত্তিতউদযব্বযঞাণাদীনম্পি কিচ্চং পটিপক্খদূরীভাৰেন অত্থতো সাধেন্তমেৰ হুত্ৰা পৰত্ততি, তথাপৰত্তমানঞ্চ তেসং কিচ্চং অনুলোমেন্তং ৰিয হোতীতি আহ ‘‘উদযব্বযৰন্তানং…পে… তথকিচ্চতায অনুলোমেতী’’তি. তত্থ ‘‘ভযতো উপট্ঠিত’’ন্তি ইমিনাপি আরম্মণসীসেন ঞাণব্যাপারমেৰ ৰদতি সপ্পটিভযানং সঙ্খারানং যথাসভাৰদস্সনদীপনতো. সেসেসু পন সত্তসুপি ঠানেসু ঞাণব্যাপারোৰ দস্সিতো. যস্মা এতং অনুলোমঞাণং অনিচ্চাদীসু অঞ্ঞতরলক্খণৰসেনেৰ সঙ্খারে আরব্ভ পৰত্ততি, তস্মা ৰুত্তং ‘‘অনিচ্চলক্খণাদিৰসেন সঙ্খারে আরব্ভ পৰত্তত্তা’’তি. তায পটিপত্তিযাতি যা সা অনুলোমঞাণস্স থূলথূলসচ্চপটিচ্ছাদকসংকিলেসৰিক্খম্ভনপটিপত্তি, তায. ন হি অনুলোমঞাণে তথা অনুপ্পন্নে গোত্রভুঞাণং নিব্বানং আলম্বিতুং সক্কোতি, গোত্রভুঞাণে ৰা অনুপ্পন্নে মগ্গঞাণং উপ্পজ্জতীতি.

ৰুত্তমত্থং ওপম্মেন পাকটতরং কাতুং ‘‘যথা হী’’তিআদি ৰুত্তং. তত্থ অট্ঠন্নং ৰোহারিকমহামত্তানং অগতিগমনং পহায তংতংৰিনিচ্ছযকরণং ৰিয অট্ঠন্নং ঞাণানং যথাসকং পটিপক্খং পহায সঙ্খারেসু উদযব্বযাদিপটিপত্তি, রঞ্ঞো মজ্ঝত্তভাৰো ৰিয অনুলোমঞাণস্স পুরিমপচ্ছিমধম্মকোট্ঠাসস্স অনুকূলতা. তেনেৰাতি হেট্ঠিমঞাণানং অনুলোমনমুখেন উপরিবোধিপক্খিযানং অনুলোমনতোযেৰ. সচ্চানুলোমিকন্তি ৰুচ্চতি মগ্গসচ্চস্স অনুলোমিকত্তা.

অনুলোমঞাণং নিট্ঠিতং.