ৰুট্ঠানগামিনীৰিপস্সনাকথাৰণ্ণনা

৮০৫. কিঞ্চি অসঙ্খতারম্মণম্পি ঞাণং ৰুট্ঠানগামিনিযা একসঙ্গহন্তি কত্ৰা ‘‘সঙ্খারারম্মণাযা’’তি ৰিসেসনং কতং. তঞ্হি ৰিসেসতো ৰুট্ঠানং অরিযমগ্গং গচ্ছতি উপেতীতি ৰুট্ঠানগামিনীতি ৰত্তব্বতং লভতি. তেনাহ ‘‘সব্বেন সব্ব’’ন্তিআদি. অসম্মোহত্থন্তি তত্থ তত্থ সুত্তে পরিযাযন্তরেহি আগতায সম্মোহাভাৰত্থং. সুত্তসংসন্দনাতি সুত্তানং তেসং তেসং সুত্তপদানং অনুসন্দানং.

যে লোকিযে সঙ্খারে আরব্ভ অনুলোমপরিযোসানা ৰুট্ঠানগামিনিৰিপস্সনা পৰত্ততি, তংসন্নিস্সিতা তপ্পটিবদ্ধা তণ্হা তেহি ৰিনা অপ্পৰত্তনতো তম্মযা নাম, তম্মযাৰ তম্মযতা, তম্মযা ৰা তণ্হাসম্পযুত্তা খন্ধা, তেসং ভাৰো তম্মযতা, সা এৰ তণ্হা. তপ্পটিপক্খা ৰুট্ঠানগামিনিৰিপস্সনা অতম্মযতা. তেন ৰুত্তং অট্ঠকথাযং ‘‘তম্মযতা নাম তণ্হা, তস্সা পরিযাদিযনতো ৰুট্ঠানগামিনিৰিপস্সনা অতম্মযতাতি ৰুচ্চতী’’তি (ম. নি. অট্ঠ. ৩.৩১০). নিস্সাযাতি তং অতম্মযতং নিস্সযং কত্ৰা, ভাৰেত্ৰাতি অত্থো. একত্তাতি এত্থ অযং পাল়ি ‘‘অত্থি, ভিক্খৰে, উপেক্খা রূপেসু…পে… ফোট্ঠব্বেসু, অযং, ভিক্খৰে, উপেক্খা নানত্তা নানত্তসিতা’’তি (ম. নি. ৩.৩১০), সযম্পি নানাসভাৰা, নানারম্মণনিস্সিতা চাতি অত্থো. সা পন সমাধিসম্পযুত্তা ৰিপস্সনুপেক্খা ৰেদিতব্বা. ‘‘অত্থি, ভিক্খৰে, উপেক্খা আকাসানঞ্চাযতননিস্সিতা…পে… নেৰসঞ্ঞানাসঞ্ঞাযতননিস্সিতা, অযং, ভিক্খৰে, উপেক্খা একত্তা একত্তসিতা’’তি (ম. নি. ৩.৩১০). যা হি তংতংঅরূপচিত্তুপ্পাদপরিযাপন্না উপেক্খা, সা একসভাৰত্তা, একারম্মণত্তা চ একত্তা, একত্তসিতা চাতি ৰুচ্চতি, সা পন তংতংঝানসহগতৰেদনুপেক্খা চ তদারম্মণৰিপস্সনুপেক্খা চাতি ৰদন্তি. তং পজহথাতি তদারম্মণকিলেসপহানেন পজহথ. তেনাহ ‘‘তং সমতিক্কমথা’’তি.

নিব্বিদাতি ৰুট্ঠানগামিনী. তত্থ হি সুত্তে ৰিরজ্জতীতি মগ্গকিচ্চমাহ, ৰিমুচ্চতীতি ফলকিচ্চং.

সুসিমসুত্তং নিদানৰগ্গে. তত্থ ধম্মট্ঠিতিঞাণং ৰুট্ঠানগামিনীতি ৰুত্তা ধম্মট্ঠিতিযং পটিচ্চসমুপ্পাদে অসম্মুয্হনৰসেন পৰত্তনতো. নিব্বানে ঞাণন্তি মগ্গঞাণমাহ.

সঞ্ঞা খো, পোট্ঠপাদাতি এত্থ কামং ‘‘সঞ্ঞা’’ইচ্চেৰ ৰুচ্চতি, পুব্বে পন ‘‘সঞ্ঞগ্গং ফুসতী’’তি ৰুত্তত্তা আহ ‘‘সঞ্ঞগ্গন্তি ৰুত্তা’’তি.

পটিপদাঞাণদস্সনৰিসুদ্ধীতি তদেকদেসভূতা ৰুট্ঠানগামিনী ৰুত্তা. সমুদাযেসু হি পৰত্তা ৰোহারা অৰযৰেসুপি পৰত্তন্তীতি. পারিসুদ্ধিপধানিযঙ্গন্তি পারিসুদ্ধিযা পধানকারণং.

তীহি নামেহীতি অনুলোমগোত্রভুৰোদানসঙ্খাতেহি তীহি নামেহি.

কিত্তিতাতি থোমিতা অরিযমগ্গাধিট্ঠানতায. মহন্তানং সীলক্খন্ধাদীনং এসনট্ঠেন মহেসিনা সম্মাসম্বুদ্ধেন. সন্তকিলেসতায সন্তা. যোগন্তি ভাৰনং, ভাৰনাভিযোগং ৰা.

পটিপদাঞাণদস্সনৰিসুদ্ধিনিদ্দেসৰণ্ণনা নিট্ঠিতা.

ইতি একৰীসতিমপরিচ্ছেদৰণ্ণনা.