ৰেদনাপচ্চযাতণ্হাপদৰিত্থারকথাৰণ্ণনা
৬৪৪. ইধাতি ইমস্মিং লোকে, ইমস্মিং ৰা সাসনে ছ তণ্হা দীপিতা. ইধাতি ৰা ইমস্মিং ৰেদনাপচ্চযা তণ্হাপদে. তত্থাতি তাসু ছসু তণ্হাসু.
একেকায সস্সতদিট্ঠিসহগতায, উচ্ছেদদিট্ঠিসহগতায চ তণ্হায তদভিনন্দনানুগুণো রূপাদীসু পৰত্তিআকারো, কেৰলং কামস্সাদৰসেন পৰত্তিযা ৰিসিট্ঠাকারত্তা ৰুত্তপ্পৰত্তিআকারতো তণ্হায তিৰিধতা.
মমত্তেনাতি সম্পিযাযনেন, অস্সাদনতণ্হায ইচ্চেৰ ৰুত্তং হোতি. তত্থ পুত্তো ৰিয ৰেদনা দট্ঠব্বা, খীরাদযো ৰিয ৰেদনায পচ্চযভূতা রূপাদযো, খীরাদিদাযিকা ধাতি ৰিয রূপাদিছল়ারম্মণদাযকা চিত্তকারাদযো ছ. তত্থ সুখসম্ফস্সৰত্থদাযকো তন্তৰাযো, ৰেজ্জো রসাযতনোজাৰসেন, তদুপত্থম্ভিতজীৰিতৰসেন চ ধম্মারম্মণস্স দাযকোতি দট্ঠব্বো. সব্বাপেসা অট্ঠসতপ্পভেদাপি.
আরম্মণপচ্চযো উপ্পজ্জমানায আরম্মণমত্তমেৰ হোতি, ন উপনিস্সযো ৰিয উপ্পাদকোতি উপ্পাদকস্স উপনিস্সযস্সেৰ ৰসেন ‘‘একধাৰা’’তি ৰুত্তং. উপনিস্সযেন ৰা আরম্মণূপনিস্সযো সঙ্গহিতো. তেন চ আরম্মণভাৰেন তংসভাগো অঞ্ঞোপি আরম্মণপচ্চযভাৰো দীপিতো হোতীতি উপনিস্সযৰসেনেৰ পচ্চযভাৰো ৰুত্তোতি ৰেদিতব্বো.
‘‘যস্মা ৰা’’তিআদিনা ন কেৰলং ৰিপাকসুখৰেদনা এৰ, তিস্সোপি পন ৰেদনা ৰিপাকা ৰিসেসেন তণ্হায উপনিস্সযপচ্চযো, অৰিসেসেন ইতরা চাতি দস্সেতি. উপেক্খা পন সন্তত্তা, সুখমিচ্চেৰ ভাসিতাতি তস্মা সাপি ভিয্যো ইচ্ছনৰসেন তণ্হায উপনিস্সযোতি অধিপ্পাযো. উপেক্খা পন অকুসলৰিপাকভূতা অনিট্ঠত্তা দুক্খে অৰরোধেতব্বা, ইতরা ইট্ঠত্তা সুখেতি সা দুক্খং ৰিয, সুখং ৰিয চ উপনিস্সযপচ্চযো হোতীতি সক্কা ৰত্তুং. ‘‘ৰেদনাপচ্চযা তণ্হা’’তি ৰচনেন সব্বস্স ৰেদনাৰতো পচ্চযস্স অত্থিতায তণ্হুপ্পত্তিপ্পসঙ্গে তন্নিৰারণত্থমাহ ‘‘ৰেদনাপচ্চযা চাপী’’তিআদি.
ননু ‘‘অনুসযসহাযা ৰেদনা তণ্হায পচ্চযো’’তি ৰচনস্স অভাৰা অতিপ্পসঙ্গনিৰত্তিং ন সক্কা কাতুন্তি? ন, ৰট্টকথায পৰত্তত্তা. ৰট্টস্স চ অনুসযৰিরহে অভাৰতো অনুসযসহিতাৰ পচ্চযোতি অত্থতো ৰুত্তমেৰেতং হোতীতি. অথ ৰা ‘‘অৰিজ্জাপচ্চযা’’তি অনুৰত্তমানত্তা অনুসযসহিতাৰ পচ্চযোতি ৰিঞ্ঞাযতি. ৰেদনাপচ্চযা তণ্হাতি চেত্থ ৰেদনাপচ্চযা এৰ তণ্হা, ন ৰেদনায ৰিনাতি অযং নিযমো ইচ্ছিতো, ন ৰেদনাপচ্চযা তণ্হা হোতিযেৰাতি, তস্মা অতিপ্পসঙ্গো এত্থ নত্থি এৰাতি.
ৰুসীমতোতি ৰুসিতৰতো, ৰুসিতব্রহ্মচরিযৰাসস্সাতি অত্থো. ৰুস্সতীতি ৰা ৰুসীতি মগ্গো ৰুচ্চতি, সো এতস্স ৰুত্থো অত্থীতি ৰুসীমা, উক্কট্ঠনিদ্দেসেন অরহা. অগ্গফলং ৰা পরিনিট্ঠিতৰাসত্তা ‘‘ৰুসী’’তি ৰুচ্চতি, তং এতস্স অত্থীতি ৰুসীমা.