৫. সেসকসিণনিদ্দেসো

আপোকসিণকথা

৯১. ইদানি পথৰীকসিণানন্তরে আপোকসিণে ৰিত্থারকথা হোতি. যথেৰ হি পথৰীকসিণং, এৰং আপোকসিণম্পি ভাৰেতুকামেন সুখনিসিন্নেন আপস্মিং নিমিত্তং গণ্হিতব্বং, কতে ৰা অকতে ৰাতি সব্বং ৰিত্থারেতব্বং. যথা চ ইধ, এৰং সব্বত্থ. ইতো পরঞ্হি এত্তকম্পি অৰত্ৰা ৰিসেসমত্তমেৰ ৰক্খাম.

ইধাপি পুব্বেকতাধিকারস্স পুঞ্ঞৰতো অকতে আপস্মিং পোক্খরণিযা ৰা তল়াকে ৰা লোণিযং ৰা সমুদ্দে ৰা নিমিত্তং উপ্পজ্জতি চূল়সিৰত্থেরস্স ৰিয. তস্স কিরাযস্মতো লাভসক্কারং পহায ৰিৰিত্তৰাসং ৰসিস্সামীতি মহাতিত্থে নাৰমারূহিত্ৰা জম্বুদীপং গচ্ছতো অন্তরা মহাসমুদ্দং ওলোকযতো তপ্পটিভাগং কসিণনিমিত্তং উদপাদি.

অকতাধিকারেন চত্তারো কসিণদোসে পরিহরন্তেন নীলপীতলোহিতোদাতৰণ্ণানমঞ্ঞতরৰণ্ণং আপং অগহেত্ৰা যং পন ভূমিং অসম্পত্তমেৰ আকাসে সুদ্ধৰত্থেন গহিতং উদকং, অঞ্ঞং ৰা তথারূপং ৰিপ্পসন্নং অনাৰিলং, তেন পত্তং ৰা কুণ্ডিকং ৰা সমতিত্তিকং পূরেত্ৰা ৰিহারপচ্চন্তে ৰুত্তপ্পকারে পটিচ্ছন্নে ওকাসে ঠপেত্ৰা সুখনিসিন্নেন ন ৰণ্ণো পচ্চৰেক্খিতব্বো. ন লক্খণং মনসি কাতব্বং. নিস্সযসৰণ্ণমেৰ কত্ৰা উস্সদৰসেন পণ্ণত্তিধম্মে চিত্তং ঠপেত্ৰা অম্বু, উদকং, ৰারি, সলিলন্তিআদীসু আপোনামেসু পাকটনামৰসেনেৰ ‘‘আপো আপো’’তি ভাৰেতব্বং.

তস্সেৰং ভাৰযতো অনুক্কমেন ৰুত্তনযেনেৰ নিমিত্তদ্ৰযং উপ্পজ্জতি. ইধ পন উগ্গহনিমিত্তং চলমানং ৰিয উপট্ঠাতি, সচে ফেণপুপ্ফুল়কমিস্সং উদকং হোতি, তাদিসমেৰ উপট্ঠাতি, কসিণদোসো পঞ্ঞাযতি. পটিভাগনিমিত্তং পন নিপ্পরিপ্ফন্দং আকাসে ঠপিতমণিতালৰণ্টং ৰিয মণিমযাদাসমণ্ডলমিৰ চ হুত্ৰা উপট্ঠাতি. সো তস্স সহ উপট্ঠানেনেৰ উপচারজ্ঝানং, ৰুত্তনযেনেৰ চতুক্কপঞ্চকজ্ঝানানি চ পাপুণাতীতি. আপোকসিণং.

তেজোকসিণকথা

৯২. তেজোকসিণং ভাৰেতুকামেনাপি তেজস্মিং নিমিত্তং গণ্হিতব্বং. তত্থ কতাধিকারস্স পুঞ্ঞৰতো অকতে নিমিত্তং গণ্হন্তস্স দীপসিখায ৰা উদ্ধনে ৰা পত্তপচনট্ঠানে ৰা দৰদাহে ৰা যত্থ কত্থচি অগ্গিজালং ওলোকেন্তস্স নিমিত্তং উপ্পজ্জতি চিত্তগুত্তত্থেরস্স ৰিয. তস্স হাযস্মতো ধম্মস্সৰনদিৰসে উপোসথাগারং পৰিট্ঠস্স দীপসিখং ওলোকেন্তস্সেৰ নিমিত্তং উপ্পজ্জি.

ইতরেন পন কাতব্বং. তত্রিদং করণৰিধানং, সিনিদ্ধানি সারদারূনি ফালেত্ৰা সুক্খাপেত্ৰা ঘটিকং ঘটিকং কত্ৰা পতিরূপং রুক্খমূলং ৰা মণ্ডপং ৰা গন্ত্ৰা পত্তপচনাকারেন রাসিং কত্ৰা আলিম্পেত্ৰা কটসারকে ৰা চম্মে ৰা পটে ৰা ৰিদত্থিচতুরঙ্গুলপ্পমাণং ছিদ্দং কাতব্বং. তং পুরতো ঠপেত্ৰা ৰুত্তনযেনেৰ নিসীদিত্ৰা হেট্ঠা তিণকট্ঠং ৰা উপরি ধূমসিখং ৰা অমনসিকরিত্ৰা ৰেমজ্ঝে ঘনজালায নিমিত্তং গণ্হিতব্বং, নীলন্তি ৰা পীতন্তি ৰাতিআদিৰসেন ৰণ্ণো ন পচ্চৰেক্খিতব্বো, উণ্হত্তৰসেন লক্খণং ন মনসি কাতব্বং. নিস্সযসৰণ্ণমেৰ কত্ৰা উস্সদৰসেন পণ্ণত্তিধম্মে চিত্তং ঠপেত্ৰা পাৰকো, কণ্হৰত্তনী, জাতৰেদো, হুতাসনোতিআদীসু অগ্গিনামেসু পাকটনামৰসেনেৰ ‘‘তেজো তেজো’’তি ভাৰেতব্বং.

তস্সেৰং ভাৰযতো অনুক্কমেন ৰুত্তনযেনেৰ নিমিত্তদ্ৰযং উপ্পজ্জতি. তত্থ উগ্গহনিমিত্তং জালং ছিজ্জিত্ৰা ছিজ্জিত্ৰা পতনসদিসং হুত্ৰা উপট্ঠাতি. অকতে গণ্হন্তস্স পন কসিণদোসো পঞ্ঞাযতি, অলাতখণ্ডং ৰা অঙ্গারপিণ্ডো ৰা ছারিকা ৰা ধূমো ৰা উপট্ঠাতি. পটিভাগনিমিত্তং নিচ্চলং আকাসে ঠপিতরত্তকম্বলক্খণ্ডং ৰিয সুৰণ্ণতালৰণ্টং ৰিয কঞ্চনত্থম্ভো ৰিয চ উপট্ঠাতি. সো তস্স সহ উপট্ঠানেনেৰ উপচারজ্ঝানং, ৰুত্তনযেনেৰ চতুক্কপঞ্চকজ্ঝানানি চ পাপুণাতীতি. তেজোকসিণং.

ৰাযোকসিণকথা

৯৩. ৰাযোকসিণং ভাৰেতুকামেনাপি ৰাযুস্মিং নিমিত্তং গণ্হিতব্বং. তঞ্চ খো দিট্ঠৰসেন ৰা ফুট্ঠৰসেন ৰা. ৰুত্তঞ্হেতং অট্ঠকথাসু ‘‘ৰাযোকসিণং উগ্গণ্হন্তো ৰাযুস্মিং নিমিত্তং গণ্হাতি, উচ্ছগ্গং ৰা এরিতং সমেরিতং উপলক্খেতি, ৰেল়গ্গং ৰা…পে… রুক্খগ্গং ৰা কেসগ্গং ৰা এরিতং সমেরিতং উপলক্খেতি, কাযস্মিং ৰা ফুট্ঠং উপলক্খেতী’’তি. তস্মা সমসীসট্ঠিতং ঘনপত্তং উচ্ছুং ৰা ৰেল়ুং ৰা রুক্খং ৰা চতুরঙ্গুলপ্পমাণং ঘনকেসস্স পুরিসস্স সীসং ৰা ৰাতেন পহরিযমানং দিস্ৰা ‘‘অযং ৰাতো এতস্মিং ঠানে পহরতী’’তি সতিং ঠপেত্ৰা, যং ৰা পনস্স ৰাতপানন্তরিকায ৰা ভিত্তিছিদ্দেন ৰা পৰিসিত্ৰা ৰাতো কাযপ্পদেসং পহরতি, তত্থ সতিং ঠপেত্ৰা ৰাতমালুতঅনিলাদীসু ৰাযুনামেসু পাকটনামৰসেনেৰ ‘‘ৰাতো ৰাতো’’তি ভাৰেতব্বং. ইধ উগ্গহনিমিত্তৰড্ঢনতো ওতারিতমত্তস্স পাযাসস্স উসুমৰট্টিসদিসং চলং হুত্ৰা উপট্ঠাতি. পটিভাগনিমিত্তং সন্নিসিন্নং হোতি নিচ্চলং. সেসং ৰুত্তনযেনেৰ ৰেদিতব্বন্তি. ৰাযোকসিণং.

নীলকসিণকথা

৯৪. তদনন্তরং পন নীলকসিণং উগ্গণ্হন্তো নীলকস্মিং নিমিত্তং গণ্হাতি পুপ্ফস্মিং ৰা ৰত্থস্মিং ৰা ৰণ্ণধাতুযা ৰাতি ৰচনতো কতাধিকারস্স পুঞ্ঞৰতো তাৰ তথারূপং মালাগচ্ছং ৰা পূজাঠানেসু পুপ্ফসন্থরং ৰা নীলৰত্থমণীনং ৰা অঞ্ঞতরং দিস্ৰাৰ নিমিত্তং উপ্পজ্জতি. ইতরেন নীলুপ্পলগিরিকণ্ণিকাদীনি পুপ্ফানি গহেত্ৰা যথা কেসরং ৰা ৰণ্টং ৰা ন পঞ্ঞাযতি, এৰং চঙ্গোটকং ৰা করণ্ডপটলং ৰা পত্তেহিযেৰ সমতিত্তিকং পূরেত্ৰা সন্থরিতব্বং. নীলৰণ্ণেন ৰা ৰত্থেন ভণ্ডিকং বন্ধিত্ৰা পূরেতব্বং. মুখৰট্টিযং ৰা অস্স ভেরিতলমিৰ বন্ধিতব্বং. কংসনীলপলাসনীলঅঞ্জননীলানং ৰা অঞ্ঞতরেন ধাতুনা পথৰীকসিণে ৰুত্তনযেন সংহারিমং ৰা ভিত্তিযংযেৰ ৰা কসিণমণ্ডলং কত্ৰা ৰিসভাগৰণ্ণেন পরিচ্ছিন্দিতব্বং. ততো পথৰীকসিণে ৰুত্তনযেন ‘‘নীলং নীল’’ন্তি মনসিকারো পৰত্তেতব্বো. ইধাপি উগ্গহনিমিত্তে কসিণদোসো পঞ্ঞাযতি, কেসরদণ্ডকপত্তন্তরিকাদীনি উপট্ঠহন্তি. পটিভাগনিমিত্তং কসিণমণ্ডলতো মুঞ্চিত্ৰা আকাসে মণিতালৰণ্টসদিসং উপট্ঠাতি. সেসং ৰুত্তনযেনেৰ ৰেদিতব্বন্তি. নীলকসিণং.

পীতকসিণকথা

৯৫. পীতকসিণেপি এসেৰ নযো. ৰুত্তঞ্হেতং পীতকসিণং উগ্গণ্হন্তো পীতকস্মিং নিমিত্তং গণ্হাতি পুপ্ফস্মিং ৰা ৰত্থস্মিং ৰা ৰণ্ণধাতুযা ৰাতি. তস্মা ইধাপি কতাধিকারস্স পুঞ্ঞৰতো তথারূপং মালাগচ্ছং ৰা পুপ্ফসন্থরং ৰা পীতৰত্থধাতূনং ৰা অঞ্ঞতরং দিস্ৰাৰ নিমিত্তং উপ্পজ্জতি চিত্তগুত্তত্থেরস্স ৰিয. তস্স কিরাযস্মতো চিত্তলপব্বতে পত্তঙ্গপুপ্ফেহি কতং আসনপূজং পস্সতো সহ দস্সনেনেৰ আসনপ্পমাণং নিমিত্তং উদপাদি. ইতরেন কণিকারপুপ্ফাদিনা ৰা পীতৰত্থেন ৰা ধাতুনা ৰা নীলকসিণে ৰুত্তনযেনেৰ কসিণং কত্ৰা ‘‘পীতকং পীতক’’ন্তি মনসিকারো পৰত্তেতব্বো. সেসং তাদিসমেৰাতি. পীতকসিণং.

লোহিতকসিণকথা

৯৬. লোহিতকসিণেপি এসেৰ নযো. ৰুত্তঞ্হেতং লোহিতকসিণং উগ্গণ্হন্তো লোহিতকস্মিং নিমিত্তং গণ্হাতি পুপ্ফস্মিং ৰা ৰত্থস্মিং ৰা ৰণ্ণধাতুযা ৰাতি. তস্মা ইধাপি কতাধিকারস্স পুঞ্ঞৰতো তথারূপং বন্ধুজীৰকাদিমালাগচ্ছং ৰা পুপ্ফসন্থরং ৰা লোহিতকৰত্থমণিধাতূনং ৰা অঞ্ঞতরং দিস্ৰাৰ নিমিত্তং উপ্পজ্জতি. ইতরেন জযসুমনবন্ধুজীৰকরত্তকোরণ্ডকাদিপুপ্ফেহি ৰা রত্তৰত্থেন ৰা ধাতুনা ৰা নীলকসিণে ৰুত্তনযেনেৰ কসিণং কত্ৰা ‘‘লোহিতকং লোহিতক’’ন্তি মনসিকারো পৰত্তেতব্বো. সেসং তাদিসমেৰাতি. লোহিতকসিণং.

ওদাতকসিণকথা

৯৭. ওদাতকসিণেপি ওদাতকসিণং উগ্গণ্হন্তো ওদাতস্মিং নিমিত্তং গণ্হাতি পুপ্ফস্মিং ৰা ৰত্থস্মিং ৰা ৰণ্ণধাতুযা ৰাতি ৰচনতো কতাধিকারস্স তাৰ পুঞ্ঞৰতো তথারূপং মালাগচ্ছং ৰা ৰস্সিকসুমনাদিপুপ্ফসন্থরং ৰা কুমুদপদুমরাসিং ৰা ওদাতৰত্থধাতূনং ৰা অঞ্ঞতরং দিস্ৰাৰ নিমিত্তং উপ্পজ্জতি, তিপুমণ্ডলরজতমণ্ডলচন্দমণ্ডলেসুপি উপ্পজ্জতিযেৰ. ইতরেন ৰুত্তপ্পকারেহি ওদাতপুপ্ফেহি ৰা ওদাতৰত্থেন ৰা ধাতুনা ৰা নীলকসিণে ৰুত্তনযেনেৰ কসিণং কত্ৰা ‘‘ওদাতং ওদাত’’ন্তি মনসিকারো পৰত্তেতব্বো. সেসং তাদিসমেৰাতি. ওদাতকসিণং.

আলোককসিণকথা

৯৮. আলোককসিণে পন আলোককসিণং উগ্গণ্হন্তো আলোকস্মিং নিমিত্তং গণ্হাতি ভিত্তিছিদ্দে ৰা তাল়চ্ছিদ্দে ৰা ৰাতপানন্তরিকায ৰাতি ৰচনতো কতাধিকারস্স তাৰ পুঞ্ঞৰতো যং ভিত্তিছিদ্দাদীনং অঞ্ঞতরেন সূরিযালোকো ৰা চন্দালোকো ৰা পৰিসিত্ৰা ভিত্তিযং ৰা ভূমিযং ৰা মণ্ডলং সমুট্ঠাপেতি, ঘনপণ্ণরুক্খসাখন্তরেন ৰা ঘনসাখামণ্ডপন্তরেন ৰা নিক্খমিত্ৰা ভূমিযমেৰ মণ্ডলং সমুট্ঠাপেতি, তং দিস্ৰাৰ নিমিত্তং উপ্পজ্জতি. ইতরেনাপি তদেৰ ৰুত্তপ্পকারমোভাসমণ্ডলং ‘‘ওভাসো ওভাসো’’তি ৰা ‘‘আলোকো আলোকো’’তি ৰা ভাৰেতব্বং. তথা অসক্কোন্তেন ঘটে দীপং জালেত্ৰা ঘটমুখং পিদহিত্ৰা ঘটে ছিদ্দং কত্ৰা ভিত্তিমুখং ঠপেতব্বং. তেন ছিদ্দেন দীপালোকো নিক্খমিত্ৰা ভিত্তিযং মণ্ডলং করোতি, তং আলোকো আলোকোতি ভাৰেতব্বং. ইদমিতরেহি চিরট্ঠিতিকং হোতি. ইধ উগ্গহনিমিত্তং ভিত্তিযং ৰা ভূমিযং ৰা উট্ঠিতমণ্ডলসদিসমেৰ হোতি. পটিভাগনিমিত্তং ঘনৰিপ্পসন্নআলোকপুঞ্জসদিসং. সেসং তাদিসমেৰাতি. আলোককসিণং.

পরিচ্ছিন্নাকাসকসিণকথা

৯৯. পরিচ্ছিন্নাকাসকসিণেপি আকাসকসিণং উগ্গণ্হন্তো আকাসস্মিং নিমিত্তং গণ্হাতি ভিত্তিছিদ্দে ৰা তাল়চ্ছিদ্দে ৰা ৰাতপানন্তরিকায ৰাতি ৰচনতো কতাধিকারস্স তাৰ পুঞ্ঞৰতো ভিত্তিছিদ্দাদীসু অঞ্ঞতরং দিস্ৰাৰ নিমিত্তং উপ্পজ্জতি. ইতরেন সুচ্ছন্নমণ্ডপে ৰা চম্মকটসারকাদীনং ৰা অঞ্ঞতরস্মিং ৰিদত্থিচতুরঙ্গুলপ্পমাণং ছিদ্দং কত্ৰা তদেৰ ৰা ভিত্তিছিদ্দাদিভেদং ছিদ্দং ‘‘আকাসো আকাসো’’তি ভাৰেতব্বং. ইধ উগ্গহনিমিত্তং সদ্ধিং ভিত্তিপরিযন্তাদীহি ছিদ্দসদিসমেৰ হোতি, ৰড্ঢিযমানম্পি ন ৰড্ঢতি. পটিভাগনিমিত্তমাকাসমণ্ডলমেৰ হুত্ৰা উপট্ঠাতি, ৰড্ঢিযমানঞ্চ ৰড্ঢতি. সেসং পথৰীকসিণে ৰুত্তনযেনেৰ ৰেদিতব্বন্তি. পরিচ্ছিন্নাকাসকসিণং.

ইতি কসিণানি দসবলো,

দস যানি অৰোচ সব্বধম্মদসো;

রূপাৰচরম্হি চতুক্কপঞ্চকজ্ঝানহেতূনি.

এৰং তানি চ তেসঞ্চ,

ভাৰনানযমিমং ৰিদিত্ৰান;

তেস্ৰেৰ অযং ভিয্যো,

পকিণ্ণককথাপি ৰিঞ্ঞেয্যা.

পকিণ্ণককথা

১০০. ইমেসু হি পথৰীকসিণৰসেন একোপি হুত্ৰা বহুধা হোতীতিআদিভাৰো, আকাসে ৰা উদকে ৰা পথৰিং নিম্মিনিত্ৰা পদসা গমনং, ঠাননিসজ্জাদিকপ্পনং ৰা, পরিত্তঅপ্পমাণনযেন অভিভাযতনপটিলাভোতি এৰমাদীনি ইজ্ঝন্তি.

আপোকসিণৰসেন পথৰিযং উম্মুজ্জননিম্মুজ্জনং, উদকৰুট্ঠিসমুপ্পাদনং, নদীসমুদ্দাদিনিম্মানং, পথৰীপব্বতপাসাদাদীনং কম্পনন্তি এৰমাদীনি ইজ্ঝন্তি.

তেজোকসিণৰসেন ধূমাযনা, পজ্জলনা, অঙ্গারৰুট্ঠিসমুপ্পাদনং, তেজসা তেজোপরিযাদানং, যদেৰ সো ইচ্ছতি তস্স ডহনসমত্থতা, দিব্বেন চক্খুনা রূপদস্সনত্থায আলোককরণং, পরিনিব্বানসমযে তেজোধাতুযা সরীরজ্ঝাপনন্তি এৰমাদীনি ইজ্ঝন্তি.

ৰাযোকসিণৰসেন ৰাযুগতিগমনং, ৰাতৰুট্ঠিসমুপ্পাদনন্তি এৰমাদীনি ইজ্ঝন্তি.

নীলকসিণৰসেন নীলরূপনিম্মানং, অন্ধকারকরণং, সুৰণ্ণদুব্বণ্ণনযেন অভিভাযতনপটিলাভো, সুভৰিমোক্খাধিগমোতি এৰমাদীনি ইজ্ঝন্তি.

পীতকসিণৰসেন পীতকরূপনিম্মানং, সুৰণ্ণন্তি অধিমুচ্চনা, ৰুত্তনযেনেৰ অভিভাযতনপটিলাভো, সুভৰিমোক্খাধিগমো চাতি এৰমাদীনি ইজ্ঝন্তি.

লোহিতকসিণৰসেন লোহিতকরূপনিম্মানং, ৰুত্তনযেনেৰ অভিভাযতনপটিলাভো, সুভৰিমোক্খাধিগমোতি এৰমাদীনি ইজ্ঝন্তি.

ওদাতকসিণৰসেন ওদাতরূপনিম্মানং, থিনমিদ্ধস্স দূরভাৰকরণং, অন্ধকারৰিধমনং, দিব্বেন চক্খুনা রূপদস্সনত্থায আলোককরণন্তি এৰমাদীনি ইজ্ঝন্তি.

আলোককসিণৰসেন সপ্পভারূপনিম্মানং, থিনমিদ্ধস্স দূরভাৰকরণং, অন্ধকারৰিধমনং, দিব্বেন চক্খুনা রূপদস্সনত্থং আলোককরণন্তি এৰমাদীনি ইজ্ঝন্তি.

আকাসকসিণৰসেন পটিচ্ছন্নানং ৰিৰটকরণং, অন্তোপথৰীপব্বতাদীসুপি আকাসং নিম্মিনিত্ৰা ইরিযাপথকপ্পনং, তিরোকুড্ডাদীসু অসজ্জমানগমনন্তি এৰমাদীনি ইজ্ঝন্তি.

সব্বানেৰ উদ্ধং অধো তিরিযং অদ্ৰযং অপ্পমাণন্তি ইমং পভেদং লভন্তি. ৰুত্তঞ্হেতং ‘‘পথৰীকসিণমেকো সঞ্জানাতি. উদ্ধমধোতিরিযং অদ্ৰযমপ্পমাণ’’ন্তিআদি.

তত্থ উদ্ধন্তি উপরিগগনতলাভিমুখং. অধোতি হেট্ঠাভূমিতলাভিমুখং. তিরিযন্তি খেত্তমণ্ডলমিৰ সমন্তা পরিচ্ছিন্দিতং. একচ্চো হি উদ্ধমেৰ কসিণং ৰড্ঢেতি, একচ্চো অধো, একচ্চো সমন্ততো. তেন তেন ৰা কারণেন এৰং পসারেতি. আলোকমিৰ দিব্বচক্খুনা রূপদস্সনকামো. তেন ৰুত্তং উদ্ধমধোতিরিযন্তি. অদ্ৰযন্তি ইদং পন একস্স অঞ্ঞভাৰানুপগমনত্থং ৰুত্তং. যথা হি উদকং পৰিট্ঠস্স সব্বদিসাসু উদকমেৰ হোতি, ন অঞ্ঞং, এৰমেৰ পথৰীকসিণং পথৰীকসিণমেৰ হোতি, নত্থি তস্স অঞ্ঞো কসিণসম্ভেদোতি. এসেৰ নযো সব্বত্থ. অপ্পমাণন্তি ইদং তস্স ফরণঅপ্পমাণৰসেন ৰুত্তং. তঞ্হি চেতসা ফরন্তো সকলমেৰ ফরতি. ন অযমস্স আদি ইদং মজ্ঝন্তি পমাণং গণ্হাতীতি.

১০১. যে চ তে সত্তা কম্মাৰরণেন ৰা সমন্নাগতা কিলেসাৰরণেন ৰা সমন্নাগতা ৰিপাকাৰরণেন ৰা সমন্নাগতা অসদ্ধা অচ্ছন্দিকা দুপ্পঞ্ঞা অভব্বা নিযামং ওক্কমিতুং কুসলেসু ধম্মেসু সম্মত্তন্তি ৰুত্তা, তেসমেকস্সাপেককসিণেপি ভাৰনা ন ইজ্ঝতি. তত্থ কম্মাৰরণেন সমন্নাগতাতি আনন্তরিযকম্মসমঙ্গিনো. কিলেসাৰরণেন সমন্নাগতাতি নিযতমিচ্ছাদিট্ঠিকা চেৰ উভতোব্যঞ্জনকপণ্ডকা চ. ৰিপাকাৰরণেন সমন্নাগতাতি অহেতুকদ্ৰিহেতুকপটিসন্ধিকা. অসদ্ধাতি বুদ্ধাদীসু সদ্ধাৰিরহিতা. অচ্ছন্দিকাতি অপচ্চনীকপটিপদাযং ছন্দৰিরহিতা. দুপ্পঞ্ঞাতি লোকিযলোকুত্তরসম্মাদিট্ঠিযা ৰিরহিতা. অভব্বা নিযামং ওক্কমিতুং কুসলেসু ধম্মেসু সম্মত্তন্তি কুসলেসু ধম্মেসু নিযামসঙ্খাতং সম্মত্তসঙ্খাতঞ্চ অরিযমগ্গং ওক্কমিতুং অভব্বাতি অত্থো. ন কেৰলঞ্চ কসিণেযেৰ, অঞ্ঞেসুপি কম্মট্ঠানেসু এতেসমেকস্সপি ভাৰনা ন ইজ্ঝতি. তস্মা ৰিগতৰিপাকাৰরণেনপি কুলপুত্তেন কম্মাৰরণঞ্চ কিলেসাৰরণঞ্চ আরকা পরিৰজ্জেত্ৰা সদ্ধম্মস্সৰনসপ্পুরিসূপনিস্সযাদীহি সদ্ধঞ্চ ছন্দঞ্চ পঞ্ঞঞ্চ ৰড্ঢেত্ৰা কম্মট্ঠানানুযোগে যোগো করণীযোতি.

ইতি সাধুজনপামোজ্জত্থায কতে ৰিসুদ্ধিমগ্গে

সমাধিভাৰনাধিকারে

সেসকসিণনিদ্দেসো নাম

পঞ্চমো পরিচ্ছেদো.