১০. অব্ভোকাসিকঙ্গকথা

৩৩. অব্ভোকাসিকঙ্গম্পি ‘‘ছন্নঞ্চ রুক্খমূলঞ্চ পটিক্খিপামি, অব্ভোকাসিকঙ্গং সমাদিযামী’’তি ইমেসং অঞ্ঞতরৰচনেন সমাদিন্নং হোতি.

তস্স পন অব্ভোকাসিকস্স ধম্মস্সৰনায ৰা উপোসথত্থায ৰা উপোসথাগারং পৰিসিতুং ৰট্টতি. সচে পৰিট্ঠস্স দেৰো ৰস্সতি, দেৰে ৰস্সমানে অনিক্খমিত্ৰা ৰস্সূপরমে নিক্খমিতব্বং. ভোজনসালং ৰা অগ্গিসালং ৰা পৰিসিত্ৰা ৰত্তং কাতুং, ভোজনসালায থেরে ভিক্খূ ভত্তেন আপুচ্ছিতুং, উদ্দিসন্তেন ৰা উদ্দিসাপেন্তেন ৰা ছন্নং পৰিসিতুং, বহি দুন্নিক্খিত্তানি মঞ্চপীঠাদীনি অন্তো পৰেসেতুঞ্চ ৰট্টতি. সচে মগ্গং গচ্ছন্তেন ৰুড্ঢতরানং পরিক্খারো গহিতো হোতি, দেৰে ৰস্সন্তে মগ্গমজ্ঝে ঠিতং সালং পৰিসিতুং ৰট্টতি. সচে ন কিঞ্চি গহিতং হোতি, সালায ঠস্সামীতি ৰেগেন গন্তুং ন ৰট্টতি. পকতিগতিযা গন্ত্ৰা পৰিট্ঠেন পন যাৰ ৰস্সূপরমা ঠত্ৰা গন্তব্বন্তি ইদমস্স ৰিধানং. রুক্খমূলিকস্সাপি এসেৰ নযো.

পভেদতো পন অযম্পি তিৰিধো হোতি. তত্থ উক্কট্ঠস্স রুক্খং ৰা পব্বতং ৰা গেহং ৰা উপনিস্সায ৰসিতুং ন ৰট্টতি. অব্ভোকাসেযেৰ চীৰরকুটিং কত্ৰা ৰসিতব্বং. মজ্ঝিমস্স রুক্খপব্বতগেহানি উপনিস্সায অন্তো অপ্পৰিসিত্ৰা ৰসিতুং ৰট্টতি. মুদুকস্স অচ্ছন্নমরিযাদং পব্ভারম্পি সাখামণ্ডপোপি পীঠপটোপি খেত্তরক্খকাদীহি ছড্ডিতা তত্রট্ঠককুটিকাপি ৰট্টতীতি.

ইমেসং পন তিণ্ণম্পি ৰাসত্থায ছন্নং ৰা রুক্খমূলং ৰা পৰিট্ঠক্খণে ধুতঙ্গং ভিজ্জতি. জানিত্ৰা তত্থ অরুণং উট্ঠাপিতমত্তেতি অঙ্গুত্তরভাণকা. অযমেত্থ ভেদো.

অযং পনানিসংসো, আৰাসপলিবোধুপচ্ছেদো, থিনমিদ্ধপনূদনং, ‘‘মিগা ৰিয অসঙ্গচারিনো, অনিকেতা ৰিহরন্তি ভিক্খৰো’’তি (সং. নি. ১.২২৪) পসংসায অনুরূপতা, নিস্সঙ্গতা, চাতুদ্দিসতা, অপ্পিচ্ছতাদীনং অনুলোমৰুত্তিতাতি.

অনগারিযভাৰস্স, অনুরূপে অদুল্লভে;

তারামণিৰিতানম্হি, চন্দদীপপ্পভাসিতে.

অব্ভোকাসে ৰসং ভিক্খু, মিগভূতেন চেতসা;

থিনমিদ্ধং ৰিনোদেত্ৰা, ভাৰনারামতং সিতো.

পৰিৰেকরসস্সাদং, নচিরস্সেৰ ৰিন্দতি;

যস্মা তস্মা হি সপ্পঞ্ঞো, অব্ভোকাসরতো সিযাতি.

অযং অব্ভোকাসিকঙ্গে সমাদানৰিধানপ্পভেদভেদানিসংসৰণ্ণনা.