১৮. দিট্ঠিৰিসুদ্ধিনিদ্দেসো

নামরূপপরিগ্গহকথা

৬৬২. ইদানি যা ‘‘ইমেসু ভূমিভূতেসু ধম্মেসু উগ্গহপরিপুচ্ছাৰসেন ঞাণপরিচযং কত্ৰা ‘সীলৰিসুদ্ধি চেৰ চিত্তৰিসুদ্ধি চা’তি দ্ৰে মূলভূতা ৰিসুদ্ধিযো সম্পাদেতব্বা’’তি ৰুত্তা. তত্থ সীলৰিসুদ্ধি নাম সুপরিসুদ্ধং পাতিমোক্খসংৰরাদিচতুব্বিধং সীলং, তঞ্চ সীলনিদ্দেসে ৰিত্থারিতমেৰ. চিত্তৰিসুদ্ধি নাম সউপচারা অট্ঠ সমাপত্তিযো, তাপি চিত্তসীসেন ৰুত্তসমাধিনিদ্দেসে সব্বাকারেন ৰিত্থারিতা এৰ. তস্মা তা তত্থ ৰিত্থারিতনযেনেৰ ৰেদিতব্বা.

যং পন ৰুত্তং ‘‘দিট্ঠিৰিসুদ্ধি, কঙ্খাৰিতরণৰিসুদ্ধি, মগ্গামগ্গঞাণদস্সনৰিসুদ্ধি, পটিপদাঞাণদস্সনৰিসুদ্ধি, ঞাণদস্সনৰিসুদ্ধীতি ইমা পন পঞ্চ ৰিসুদ্ধিযো সরীর’’ন্তি, তত্থ নামরূপানং যাথাৰদস্সনং দিট্ঠিৰিসুদ্ধি নাম.

৬৬৩. তং সম্পাদেতুকামেন সমথযানিকেন তাৰ ঠপেত্ৰা নেৰসঞ্ঞানাসঞ্ঞাযতনং অৰসেসরূপারূপাৰচরজ্ঝানানং অঞ্ঞতরতো ৰুট্ঠায ৰিতক্কাদীনি ঝানঙ্গানি, তংসম্পযুত্তা চ ধম্মা লক্খণরসাদিৰসেন পরিগ্গহেতব্বা. পরিগ্গহেত্ৰা সব্বম্পেতং আরম্মণাভিমুখং নমনতো নমনট্ঠেন নামন্তি ৰৰত্থপেতব্বং.

ততো যথা নাম পুরিসো অন্তোগেহে সপ্পং দিস্ৰা তং অনুবন্ধমানো তস্স আসযং পস্সতি, এৰমেৰ অযম্পি যোগাৰচরো তং নামং উপপরিক্খন্তো ‘‘ইদং নামং কিং নিস্সায পৰত্ততী’’তি পরিযেসমানো তস্স নিস্সযং হদযরূপং পস্সতি. ততো হদযরূপস্স নিস্সযভূতানি, ভূতনিস্সিতানি চ সেসুপাদাযরূপানীতি রূপং পরিগ্গণ্হাতি. সো সব্বম্পেতং রুপ্পনতো রূপন্তি ৰৰত্থপেতি. ততো নমনলক্খণং নামং, রুপ্পনলক্খণং রূপন্তি সঙ্খেপতো নামরূপং ৰৰত্থপেতি.

৬৬৪. সুদ্ধৰিপস্সনাযানিকো পন অযমেৰ ৰা সমথযানিকো চতুধাতুৰৰত্থানে ৰুত্তানং তেসং তেসং ধাতুপরিগ্গহমুখানং অঞ্ঞতরমুখৰসেন সঙ্খেপতো ৰা ৰিত্থারতো ৰা চতস্সো ধাতুযো পরিগ্গণ্হাতি. অথস্স যাথাৰসরসলক্খণতো আৰিভূতাসু ধাতূসু কম্মসমুট্ঠানম্হি তাৰ কেসে ‘‘চতস্সো ধাতুযো, ৰণ্ণো, গন্ধো, রসো, ওজা, জীৰিতং, কাযপ্পসাদো’’তি এৰং কাযদসকৰসেন দস রূপানি, তত্থেৰ ভাৰস্স অত্থিতায ভাৰদসকৰসেন দস, তত্থেৰ আহারসমুট্ঠানং ওজট্ঠমকং, উতুসমুট্ঠানং, চিত্তসমুট্ঠানন্তি অপরানিপি চতুৰীসতীতি এৰং চতুসমুট্ঠানেসু চতুৰীসতিকোট্ঠাসেসু চতুচত্তালীস চতুচত্তালীস রূপানি, সেদো, অস্সু, খেল়ো, সিঙ্ঘাণিকাতি ইমেসু পন চতূসু উতুচিত্তসমুট্ঠানেসু দ্ৰিন্নং ওজট্ঠমকানং ৰসেন সোল়স সোল়স রূপানি, উদরিযং, করীসং, পুব্বো, মুত্তন্তি ইমেসু চতূসু উতুসমুট্ঠানেসু উতুসমুট্ঠানস্সেৰ ওজট্ঠমকস্স ৰসেন অট্ঠ অট্ঠ রূপানি পাকটানি হোন্তীতি. এস তাৰ দ্ৰত্তিংসাকারে নযো.

যে পন ইমস্মিং দ্ৰত্তিংসাকারে আৰিভূতে অপরে দস আকারা আৰিভৰন্তি. তত্থ অসিতাদিপরিপাচকে তাৰ কম্মজে তেজোকোট্ঠাসম্হি ওজট্ঠমকঞ্চেৰ জীৰিতঞ্চাতি নৰ রূপানি, তথা চিত্তজে অস্সাসপস্সাসকোট্ঠাসেপি ওজট্ঠমকঞ্চেৰ সদ্দো চাতি নৰ, সেসেসু চতুসমুট্ঠানেসু অট্ঠসু জীৰিতনৰকঞ্চেৰ তীণি চ ওজট্ঠমকানীতি তেত্তিংস রূপানি পাকটানি হোন্তি.

তস্সেৰং ৰিত্থারতো দ্ৰাচত্তালীসাকারৰসেন ইমেসু ভূতুপাদাযরূপেসু পাকটেসু জাতেসু ৰত্থুদ্ৰারৰসেন পঞ্চ চক্খুদসকাদযো, হদযৰত্থুদসকঞ্চাতি অপরানিপি সট্ঠিরূপানি পাকটানি হোন্তি. সো সব্বানিপি তানি রুপ্পনলক্খণেন একতো কত্ৰা ‘‘এতং রূপ’’ন্তি পস্সতি.

তস্সেৰং পরিগ্গহিতরূপস্স দ্ৰারৰসেন অরূপধম্মা পাকটা হোন্তি. সেয্যথিদং – দ্ৰেপঞ্চৰিঞ্ঞাণানি, তিস্সো মনোধাতুযো, অট্ঠসট্ঠি মনোৰিঞ্ঞাণধাতুযোতি একাসীতি লোকিযচিত্তানি, অৰিসেসেন চ তেহি চিত্তেহি সহজাতো ফস্সো, ৰেদনা, সঞ্ঞা, চেতনা, জীৰিতং, চিত্তট্ঠিতি, মনসিকারোতি ইমে সত্ত সত্ত চেতসিকাতি. লোকুত্তরচিত্তানি পন নেৰ সুদ্ধৰিপস্সকস্স, ন সমথযানিকস্স পরিগ্গহং গচ্ছন্তি অনধিগতত্তাতি. সো সব্বেপি তে অরূপধম্মে নমনলক্খণেন একতো কত্ৰা ‘‘এতং নাম’’ন্তি পস্সতি. এৰমেকো চতুধাতুৰৰত্থানমুখেন ৰিত্থারতো নামরূপং ৰৰত্থপেতি.

৬৬৫. অপরো অট্ঠারসধাতুৰসেন. কথং? ইধ ভিক্খু অত্থি ইমস্মিং অত্তভাৰে চক্খুধাতু…পে… মনোৰিঞ্ঞাণধাতূতি ধাতুযো আৰজ্জিত্ৰা যং লোকো সেতকণ্হমণ্ডলৰিচিত্তং আযতৰিত্থতং অক্খিকূপকে ন্হারুসুত্তকেন আবদ্ধং মংসপিণ্ডং ‘‘চক্খূ’’তি সঞ্জানাতি, তং অগ্গহেত্ৰা খন্ধনিদ্দেসে উপাদারূপেসু ৰুত্তপ্পকারং চক্খুপসাদং ‘‘চক্খুধাতূ’’তি ৰৰত্থপেতি.

যানি পনস্স নিস্সযভূতা চতস্সো ধাতুযো, পরিৰারকানি চত্তারি ৰণ্ণ-গন্ধ-রস-ওজা-রূপানি, অনুপালকং জীৰিতিন্দ্রিযন্তি নৰ সহজাতরূপানি, তত্থেৰ ঠিতানি কাযদসকভাৰদসকৰসেন ৰীসতি কম্মজরূপানি, আহারসমুট্ঠানাদীনং তিণ্ণং ওজট্ঠমকানং ৰসেন চতুৰীসতি অনুপাদিন্নরূপানীতি এৰং সেসানি তেপণ্ণাস রূপানি হোন্তি, ন তানি চ ‘‘চক্খুধাতূ’’তি ৰৰত্থপেতি. এস নযো সোতধাতুআদীসুপি. কাযধাতুযং পন অৰসেসানি তেচত্তালীস রূপানি হোন্তি. কেচি পন উতুচিত্তসমুট্ঠানানি সদ্দেন সহ নৰ নৰ কত্ৰা পঞ্চচত্তালীসাতি ৰদন্তি.

ইতি ইমে পঞ্চ পসাদা, তেসঞ্চ ৰিসযা রূপসদ্দগন্ধরসফোট্ঠব্বা পঞ্চাতি দস রূপানি দস ধাতুযো হোন্তি. অৰসেসরূপানি ধম্মধাতুযেৰ হোন্তি. চক্খুং পন নিস্সায রূপং আরব্ভ পৰত্তং চিত্তং চক্খুৰিঞ্ঞাণধাতু নামাতি এৰং দ্ৰেপঞ্চৰিঞ্ঞাণানি পঞ্চ ৰিঞ্ঞাণধাতুযো হোন্তি. তীণি মনোধাতুচিত্তানি একা মনোধাতু, অট্ঠসট্ঠি মনোৰিঞ্ঞাণধাতুচিত্তানি মনোৰিঞ্ঞাণধাতূতি সব্বানিপি একাসীতি লোকিযচিত্তানি সত্ত ৰিঞ্ঞাণধাতুযো. তংসম্পযুত্তা ফস্সাদযো ধম্মধাতূতি এৰমেত্থ অড্ঢেকাদস ধাতুযো রূপং, অড্ঢট্ঠমা ধাতুযো নামন্তি এৰমেকো অট্ঠারসধাতুৰসেন নামরূপং ৰৰত্থপেতি.

৬৬৬. অপরো দ্ৰাদসাযতনৰসেন. কথং? চক্খুধাতুযং ৰুত্তনযেনেৰ ঠপেত্ৰা তেপণ্ণাস রূপানি চক্খুপসাদমত্তং ‘‘চক্খাযতন’’ন্তি ৰৰত্থপেতি. তত্থ ৰুত্তনযেনেৰ চ সোতঘানজিৰ্হাকাযধাতুযো ‘‘সোতঘানজিৰ্হাকাযাযতনানী’’তি, তেসং ৰিসযভূতে পঞ্চধম্মে ‘‘রূপসদ্দগন্ধরসফোট্ঠব্বাযতনানী’’তি, লোকিযসত্তৰিঞ্ঞাণধাতুযো ‘‘মনাযতন’’ন্তি, তংসম্পযুত্তা ফস্সাদযো সেসরূপঞ্চ ‘‘ধম্মাযতন’’ন্তি এৰমেত্থ অড্ঢেকাদস আযতনানি রূপং, দিযড্ঢআযতনানি নামন্তি এৰমেকো দ্ৰাদসাযতনৰসেন নামরূপং ৰৰত্থপেতি.

৬৬৭. অপরো ততো সংখিত্ততরং খন্ধৰসেন ৰৰত্থপেতি. কথং? ইধ ভিক্খু ইমস্মিং সরীরে চতুসমুট্ঠানা চতস্সো ধাতুযো, তংনিস্সিতো ৰণ্ণো, গন্ধো, রসো, ওজা, চক্খুপসাদাদযো পঞ্চ পসাদা, ৰত্থুরূপং, ভাৰো, জীৰিতিন্দ্রিযং, দ্ৰিসমুট্ঠানো সদ্দোতি ইমানি সত্তরস রূপানি সম্মসনুপগানি নিপ্ফন্নানি রূপরূপানি. কাযৰিঞ্ঞত্তি, ৰচীৰিঞ্ঞত্তি, আকাসধাতু, রূপস্স লহুতা, মুদুতা, কম্মঞ্ঞতা, উপচযো, সন্ততি, জরতা, অনিচ্চতাতি ইমানি পন দস রূপানি ন সম্মসনুপগানি, আকারৰিকারঅন্তরপরিচ্ছেদমত্তকানি, ন নিপ্ফন্নরূপানি, ন রূপরূপানি. অপিচ খো রূপানং আকারৰিকারঅন্তরপরিচ্ছেদমত্ততো রূপন্তি সঙ্খং গতানি. ইতি সব্বানি পেতানি সত্তৰীসতি রূপানি রূপক্খন্ধো, একাসীতিযা লোকিযচিত্তেহি সদ্ধিং উপ্পন্না ৰেদনা ৰেদনাক্খন্ধো, তংসম্পযুত্তা সঞ্ঞা সঞ্ঞাক্খন্ধো, সঙ্খারা সঙ্খারক্খন্ধো, ৰিঞ্ঞাণং ৰিঞ্ঞাণক্খন্ধোতি. ইতি রূপক্খন্ধো রূপং, চত্তারো অরূপিনো খন্ধা নামন্তি এৰমেকো পঞ্চক্খন্ধৰসেন নামরূপং ৰৰত্থপেতি.

৬৬৮. অপরো ‘‘যংকিঞ্চি রূপং সব্বং রূপং চত্তারি মহাভূতানি চতুন্নঞ্চ মহাভূতানং উপাদাযরূপ’’ন্তি (ম. নি. ১.৩৪৭; অ. নি. ১১.১৭) এৰং সংখিত্তেনেৰ ইমস্মিং অত্তভাৰে রূপং পরিগ্গহেত্ৰা, তথা মনাযতনঞ্চেৰ ধম্মাযতনেকদেসঞ্চ নামন্তি পরিগ্গহেত্ৰা ‘‘ইতি ইদঞ্চ নামং ইদঞ্চ রূপং, ইদং ৰুচ্চতি নামরূপ’’ন্তি সঙ্খেপতো নামরূপং ৰৰত্থপেতি.

৬৬৯. সচে পনস্স তেন তেন মুখেন রূপং পরিগ্গহেত্ৰা অরূপং পরিগ্গণ্হতো সুখুমত্তা অরূপং ন উপট্ঠাতি, তেন ধুরনিক্খেপং অকত্ৰা রূপমেৰ পুনপ্পুনং সম্মসিতব্বং মনসিকাতব্বং পরিগ্গহেতব্বং ৰৰত্থপেতব্বং. যথা যথা হিস্স রূপং সুৰিক্খালিতং হোতি নিজ্জটং সুপরিসুদ্ধং, তথা তথা তদারম্মণা অরূপধম্মা সযমেৰ পাকটা হোন্তি.

যথা হি চক্খুমতো পুরিসস্স অপরিসুদ্ধে আদাসে মুখনিমিত্তং ওলোকেন্তস্স নিমিত্তং ন পঞ্ঞাযতি, সো ‘‘নিমিত্তং ন পঞ্ঞাযতী’’তি ন আদাসং ছড্ডেতি, অথ খো নং পুনপ্পুনং পরিমজ্জতি. তস্স পরিসুদ্ধে আদাসে নিমিত্তং সযমেৰ পাকটং হোতি. যথা চ তেলত্থিকো তিলপিট্ঠং দোণিযং আকিরিত্ৰা উদকেন পরিপ্ফোসেত্ৰা একৰারং দ্ৰেৰারং পীল়নমত্তেন তেলে অনিক্খমন্তে ন তিলপিট্ঠং ছড্ডেতি, অথ খো নং পুনপ্পুনং উণ্হোদকেন পরিপ্ফোসেত্ৰা মদ্দিত্ৰা পীল়েতি. তস্সেৰং করোতো ৰিপ্পসন্নং তিলতেলং নিক্খমতি. যথা ৰা পন উদকং পসাদেতুকামো কতকট্ঠিং গহেত্ৰা অন্তোঘটে হত্থং ওতারেত্ৰা একদ্ৰেৰারে ঘংসনমত্তেন উদকে অৰিপ্পসীদন্তে ন কতকট্ঠিং ছড্ডেতি, অথ খো নং পুনপ্পুনং ঘংসতি. তস্সেৰং করোন্তস্স কললকদ্দমং সন্নিসীদতি. উদকং অচ্ছং হোতি ৰিপ্পসন্নং, এৰমেৰং তেন ভিক্খুনা ধুরনিক্খেপং অকত্ৰা রূপমেৰ পুনপ্পুনং সম্মসিতব্বং মনসিকাতব্বং পরিগ্গহেতব্বং ৰৰত্থপেতব্বং.

যথা যথা হিস্স রূপং সুৰিক্খালিতং হোতি নিজ্জটং সুপরিসুদ্ধং, তথা তথা তপ্পচ্চনীককিলেসা সন্নিসীদন্তি, কদ্দমুপরি উদকং ৰিয চিত্তং পসন্নং হোতি. তদারম্মণা অরূপধম্মা সযমেৰ পাকটা হোন্তি. এৰং অঞ্ঞাহিপি উচ্ছুচোরগোণদধিমচ্ছাদীহি উপমাহি অযমত্থো পকাসেতব্বো.

অরূপধম্মানং উপট্ঠানাকারকথা

৬৭০. এৰং সুৰিসুদ্ধরূপপরিগ্গহস্স পনস্স অরূপধম্মা তীহি আকারেহি উপট্ঠহন্তি ফস্সৰসেন ৰা ৰেদনাৰসেন ৰা ৰিঞ্ঞাণৰসেন ৰা. কথং? একস্স তাৰ ‘‘পথৰীধাতু কক্খল়লক্খণা’’তিআদিনা নযেন ধাতুযো পরিগ্গণ্হন্তস্স পঠমাভিনিপাতো ফস্সো, তংসম্পযুত্তা ৰেদনা ৰেদনাক্খন্ধো, সঞ্ঞা সঞ্ঞাক্খন্ধো, সদ্ধিং ফস্সেন চেতনা সঙ্খারক্খন্ধো, চিত্তং ৰিঞ্ঞাণক্খন্ধোতি উপট্ঠাতি. তথা ‘‘কেসে পথৰীধাতু কক্খল়লক্খণা…পে… অস্সাসপস্সাসে পথৰীধাতু কক্খল়লক্খণা’’তি (ৰিসুদ্ধি. ১.৩০৭) পঠমাভিনিপাতো ফস্সো, তংসম্পযুত্তা ৰেদনা ৰেদনাক্খন্ধো…পে… চিত্তং ৰিঞ্ঞাণক্খন্ধোতি উপট্ঠাতি. এৰং অরূপধম্মা ফস্সৰসেন উপট্ঠহন্তি.

একস্স ‘‘পথৰীধাতু কক্খল়লক্খণা’’তি তদারম্মণরসানুভৰনকৰেদনা ৰেদনাক্খন্ধো, তংসম্পযুত্তা সঞ্ঞা সঞ্ঞাক্খন্ধো, তংসম্পযুত্তো ফস্সো চ চেতনা চ সঙ্খারক্খন্ধো, তংসম্পযুত্তং চিত্তং ৰিঞ্ঞাণক্খন্ধোতি উপট্ঠাতি. তথা ‘‘কেসে পথৰীধাতু কক্খল়লক্খণা …পে… অস্সাসপস্সাসে পথৰীধাতু কক্খল়লক্খণা’’তি তদারম্মণরসানুভৰনকৰেদনা ৰেদনাক্খন্ধো…পে… তংসম্পযুত্তং চিত্তং ৰিঞ্ঞাণক্খন্ধোতি উপট্ঠাতি. এৰং ৰেদনাৰসেন অরূপধম্মা উপট্ঠহন্তি.

অপরস্স ‘‘পথৰীধাতু কক্খল়লক্খণা’’তি আরম্মণপটিৰিজাননং ৰিঞ্ঞাণং ৰিঞ্ঞাণক্খন্ধো, তংসম্পযুত্তা ৰেদনা ৰেদনাক্খন্ধো, সঞ্ঞা সঞ্ঞাক্খন্ধো, ফস্সো চ চেতনা চ সঙ্খারক্খন্ধোতি উপট্ঠাতি. তথা ‘‘কেসে পথৰীধাতু কক্খল়লক্খণা…পে… অস্সাসপস্সাসে পথৰীধাতু কক্খল়লক্খণা’’তি আরম্মণপটিৰিজাননং ৰিঞ্ঞাণং ৰিঞ্ঞাণক্খন্ধো, তংসম্পযুত্তা ৰেদনা ৰেদনাক্খন্ধো, সঞ্ঞা সঞ্ঞাক্খন্ধো, ফস্সো চ চেতনা চ সঙ্খারক্খন্ধোতি উপট্ঠাতি. এৰং ৰিঞ্ঞাণৰসেন অরূপধম্মা উপট্ঠহন্তি.

এতেনেৰ উপাযেন ‘‘কম্মসমুট্ঠানে কেসে পথৰীধাতু কক্খল়লক্খণা’’তিআদিনা নযেন দ্ৰাচত্তালীসায ধাতুকোট্ঠাসেসু চতুন্নং চতুন্নং ধাতূনং ৰসেন, সেসেসু চ চক্খুধাতুআদীসু রূপপরিগ্গহমুখেসু সব্বং নযভেদং অনুগন্ত্ৰা যোজনা কাতব্বা.

৬৭১. যস্মা চ এৰং সুৰিসুদ্ধরূপপরিগ্গহস্সেৰ তস্স অরূপধম্মা তীহাকারেহি পাকটা হোন্তি. তস্মা সুৰিসুদ্ধরূপপরিগ্গহেনেৰ অরূপপরিগ্গহায যোগো কাতব্বো, ন ইতরেন. সচে হি একস্মিং ৰা রূপধম্মে উপট্ঠিতে দ্ৰীসু ৰা রূপং পহায অরূপপরিগ্গহং আরভতি কম্মট্ঠানতো পরিহাযতি, পথৰীকসিণভাৰনায ৰুত্তপ্পকারা পব্বতেয্যা গাৰী ৰিয. সুৰিসুদ্ধরূপপরিগ্গহস্স পন অরূপপরিগ্গহায যোগং করোতো কম্মট্ঠানং ৰুদ্ধিং ৰিরূল়্হিং ৰেপুল্লং পাপুণাতি.

সো এৰং ফস্সাদীনং ৰসেন উপট্ঠিতে চত্তারো অরূপিনো খন্ধে নামন্তি, তেসং আরম্মণভূতানি চত্তারি মহাভূতানি, চতুন্নঞ্চ মহাভূতানং উপাদাযরূপং রূপন্তি ৰৰত্থপেতি. ইতি অট্ঠারস ধাতুযো দ্ৰাদসাযতনানি পঞ্চক্খন্ধাতি সব্বেপি তেভূমকে ধম্মে খগ্গেন সমুগ্গং ৰিৰরমানো ৰিয যমকতালকন্দং ফালযমানো ৰিয চ নামঞ্চ রূপঞ্চাতি দ্ৰেধা ৰৰত্থপেতি. নামরূপমত্ততো উদ্ধং অঞ্ঞো সত্তো ৰা পুগ্গলো ৰা দেৰো ৰা ব্রহ্মা ৰা নত্থীতি নিট্ঠং গচ্ছতি.

সম্বহুলসুত্তন্তসংসন্দনা

৬৭২. সো এৰং যাথাৰসরসতো নামরূপং ৰৰত্থপেত্ৰা সুট্ঠুতরং ‘‘সত্তো পুগ্গলো’’তি ইমিস্সা লোকসমঞ্ঞায পহানত্থায সত্তসম্মোহস্স সমতিক্কমত্থায অসম্মোহভূমিযং চিত্তং ঠপনত্থায সম্বহুলসুত্তন্তৰসেন ‘‘নামরূপমত্তমেৰিদং, ন সত্তো, ন পুগ্গলো অত্থী’’তি এতমত্থং সংসন্দেত্ৰা ৰৰত্থপেতি. ৰুত্তঞ্হেতং –

‘‘যথাপি অঙ্গসম্ভারা, হোতি সদ্দো রথো ইতি;

এৰং খন্ধেসু সন্তেসু, হোতি সত্তোতি সম্মুতী’’তি. (সং. নি. ১.১৭১);

অপরম্পি ৰুত্তং, ‘‘সেয্যথাপি, আৰুসো, কট্ঠঞ্চ পটিচ্চ ৰল্লিঞ্চ পটিচ্চ মত্তিকঞ্চ পটিচ্চ তিণঞ্চ পটিচ্চ আকাসো পরিৰারিতো অগারন্ত্ৰেৰ সঙ্খং গচ্ছতি, এৰমেৰ খো, আৰুসো, অট্ঠিঞ্চ পটিচ্চ ন্হারুঞ্চ পটিচ্চ মংসঞ্চ পটিচ্চ চম্মঞ্চ পটিচ্চ আকাসো পরিৰারিতো রূপন্ত্ৰেৰ সঙ্খং গচ্ছতী’’তি (ম. নি. ১.৩০৬).

অপরম্পি ৰুত্তং –

‘‘দুক্খমেৰ হি সম্ভোতি, দুক্খং তিট্ঠতি ৰেতি চ;

নাঞ্ঞত্র দুক্খা সম্ভোতি, নাঞ্ঞং দুক্খা নিরুজ্ঝতী’’তি. (সং. নি. ১.১৭১);

উপমাহি নামরূপৰিভাৰনা

৬৭৩. এৰং অনেকসতেহি সুত্তন্তেহি নামরূপমেৰ দীপিতং, ন সত্তো ন পুগ্গলো. তস্মা যথা অক্খচক্কপঞ্জরঈসাদীসু অঙ্গসম্ভারেসু একেনাকারেন সণ্ঠিতেসু রথোতি ৰোহারমত্তং হোতি, পরমত্থতো একেকস্মিং অঙ্গে উপপরিক্খিযমানে রথো নাম নত্থি. যথা চ কট্ঠাদীসু গেহসম্ভারেসু একেনাকারেন আকাসং পরিৰারেত্ৰা ঠিতেসু গেহন্তি ৰোহারমত্তং হোতি, পরমত্থতো গেহং নাম নত্থি. যথা চ অঙ্গুলিঅঙ্গুট্ঠাদীসু একেনাকারেন ঠিতেসু মুট্ঠীতি ৰোহারমত্তং হোতি. দোণিতন্তিআদীসু ৰীণাতি. হত্থিঅস্সাদীসু সেনাতি. পাকারগেহগোপুরাদীসু নগরন্তি. খন্ধসাখাপলাসাদীসু একেনাকারেন ঠিতেসু রুক্খোতি ৰোহারমত্তং হোতি, পরমত্থতো একেকস্মিং অৰযৰে উপপরিক্খিযমানে রুক্খো নাম নত্থি. এৰমেৰং পঞ্চসু উপাদানক্খন্ধেসু সতি ‘‘সত্তো, পুগ্গলো’’তি ৰোহারমত্তং হোতি, পরমত্থতো একেকস্মিং ধম্মে উপপরিক্খিযমানে ‘‘অস্মীতি ৰা অহন্তি ৰা’’তি গাহস্স ৰত্থুভূতো সত্তো নাম নত্থি. পরমত্থতো পন নামরূপমত্তমেৰ অত্থীতি. এৰং পস্সতো হি দস্সনং যথাভূতদস্সনং নাম হোতি.

৬৭৪. যো পনেতং যথাভূতদস্সনং পহায ‘‘সত্তো অত্থী’’তি গণ্হাতি. সো তস্স ৰিনাসং অনুজানেয্য অৰিনাসং ৰা. অৰিনাসং অনুজানন্তো সস্সতে পততি. ৰিনাসং অনুজানন্তো উচ্ছেদে পততি. কস্মা? খীরন্ৰযস্স দধিনো ৰিয তদন্ৰযস্স অঞ্ঞস্স অভাৰতো. সো ‘‘সস্সতো সত্তো’’তি গণ্হন্তো ওলীযতি নাম. ‘‘উচ্ছিজ্জতী’’তি গণ্হন্তো অতিধাৰতি নাম. তেনাহ ভগৰা –

‘‘দ্ৰীহি, ভিক্খৰে, দিট্ঠিগতেহি পরিযুট্ঠিতা দেৰমনুস্সা ওলীযন্তি একে, অতিধাৰন্তি একে, চক্খুমন্তো চ পস্সন্তি.

‘‘কথঞ্চ, ভিক্খৰে, ওলীযন্তি একে? ভৰারামা, ভিক্খৰে, দেৰমনুস্সা ভৰরতা ভৰসমুদিতা. তেসং ভৰনিরোধায ধম্মে দেসিযমানে চিত্তং ন পক্খন্দতি নপ্পসীদতি ন সন্তিট্ঠতি নাধিমুচ্চতি. এৰং খো, ভিক্খৰে, ওলীযন্তি একে.

‘‘কথঞ্চ, ভিক্খৰে, অতিধাৰন্তি একে? ভৰেনেৰ খো পনেকে অট্টীযমানা হরাযমানা জিগুচ্ছমানা ৰিভৰং অভিনন্দন্তি, যতো কির ভো অযং অত্তা কাযস্স ভেদা উচ্ছিজ্জতি ৰিনস্সতি, ন হোতি পরংমরণা, এতং সন্তং, এতং পণীতং, এতং যাথাৰন্তি. এৰং খো, ভিক্খৰে, অতিধাৰন্তি একে.

‘‘কথঞ্চ, ভিক্খৰে, চক্খুমন্তো পস্সন্তি? ইধ, ভিক্খৰে, ভিক্খু ভূতং ভূততো পস্সতি, ভূতং ভূততো দিস্ৰা ভূতস্স নিব্বিদায ৰিরাগায নিরোধায পটিপন্নো হোতি. এৰং খো, ভিক্খৰে, চক্খুমন্তো পস্সন্তী’’তি (ইতিৰু. ৪৯).

৬৭৫. তস্মা যথা দারুযন্তং সুঞ্ঞং নিজ্জীৰং নিরীহকং, অথ চ পন দারুরজ্জুকসমাযোগৰসেন গচ্ছতিপি তিট্ঠতিপি. সঈহকং সব্যাপারং ৰিয খাযতি, এৰমিদং নামরূপম্পি সুঞ্ঞং নিজ্জীৰং নিরীহকং, অথ চ পন অঞ্ঞমঞ্ঞসমাযোগৰসেন গচ্ছতিপি তিট্ঠতিপি. সঈহকং সব্যাপারং ৰিয খাযতীতি দট্ঠব্বং. তেনাহু পোরাণা –

‘‘নামঞ্চ রূপঞ্চ ইধত্থি সচ্চতো,

ন হেত্থ সত্তো মনুজো চ ৰিজ্জতি;

সুঞ্ঞং ইদং যন্তমিৰাভিসঙ্খতং,

দুক্খস্স পুঞ্জো তিণকট্ঠসাদিসো’’তি.

ন কেৰলঞ্চেতং দারুযন্তুপমায, অঞ্ঞাহিপি নল়কলাপীআদীহি উপমাহি ৰিভাৰেতব্বং – যথা হি দ্ৰীসু নল়কলাপীসু অঞ্ঞমঞ্ঞং নিস্সায ঠপিতাসু একা একিস্সা উপত্থম্ভো হোতি, একিস্সা পতমানায ইতরাপি পততি, এৰমেৰং পঞ্চৰোকারভৰে নামরূপং অঞ্ঞমঞ্ঞং নিস্সায পৰত্ততি, একং একস্স উপত্থম্ভো হোতি. মরণৰসেন একস্মিং পতমানে ইতরম্পি পততি. তেনাহু পোরাণা –

‘‘যমকং নামরূপঞ্চ, উভো অঞ্ঞোঞ্ঞনিস্সিতা;

একস্মিং ভিজ্জমানস্মিং, উভো ভিজ্জন্তি পচ্চযা’’তি.

৬৭৬. যথা চ দণ্ডাভিহতং ভেরিং নিস্সায সদ্দে পৰত্তমানে অঞ্ঞা ভেরী, অঞ্ঞো সদ্দো, ভেরিসদ্দা অসম্মিস্সা, ভেরী সদ্দেন সুঞ্ঞা, সদ্দো ভেরিযা সুঞ্ঞো, এৰমেৰং ৰত্থুদ্ৰারারম্মণসঙ্খাতং রূপং নিস্সায নামে পৰত্তমানে অঞ্ঞং রূপং, অঞ্ঞং নামং, নামরূপা অসম্মিস্সা, নামং রূপেন সুঞ্ঞং, রূপং নামেন সুঞ্ঞং, অপিচ খো ভেরিং পটিচ্চ সদ্দো ৰিয রূপং পটিচ্চ নামং পৰত্ততি. তেনাহু পোরাণা –

‘‘ন চক্খুতো জাযরে ফস্সপঞ্চমা,

ন রূপতো নো চ উভিন্নমন্তরা;

হেতুং পটিচ্চপ্পভৰন্তি সঙ্খতা,

যথাপি সদ্দো পহটায ভেরিযা.

‘‘ন সোততো জাযরে ফস্সপঞ্চমা,

ন সদ্দতো নো চ উভিন্নমন্তরা…পে….

‘‘ন ঘানতো জাযরে ফস্সপঞ্চমা,

ন গন্ধতো নো চ উভিন্নমন্তরা…পে….

‘‘ন জিৰ্হাতো জাযরে ফস্সপঞ্চমা,

ন রসতো নো চ উভিন্নমন্তরা…পে….

‘‘ন কাযতো জাযরে ফস্সপঞ্চমা,

ন ফস্সতো নো চ উভিন্নমন্তরা…পে….

‘‘ন ৰত্থুরূপা পভৰন্তি সঙ্খতা,

ন চাপি ধম্মাযতনেহি নিগ্গতা;

হেতুং পটিচ্চপ্পভৰন্তি সঙ্খতা,

যথাপি সদ্দো পহটায ভেরিযা’’তি.

৬৭৭. অপিচেত্থ নামং নিত্তেজং ন সকেন তেজেন পৰত্তিতুং সক্কোতি, ন খাদতি, ন পিৰতি, ন ব্যাহরতি, ন ইরিযাপথং কপ্পেতি. রূপম্পি নিত্তেজং ন সকেন তেজেন পৰত্তিতুং সক্কোতি. ন হি তস্সা খাদিতুকামতা, নাপি পিৰিতুকামতা, ন ব্যাহরিতুকামতা, ন ইরিযাপথং কপ্পেতুকামতা, অথ খো নামং নিস্সায রূপং পৰত্ততি, রূপং নিস্সায নামং পৰত্ততি, নামস্স খাদিতুকামতায পিৰিতুকামতায ব্যাহরিতুকামতায ইরিযাপথং কপ্পেতুকামতায সতি রূপং খাদতি, পিৰতি, ব্যাহরতি, ইরিযাপথং কপ্পেতি.

ইমস্স পনত্থস্স ৰিভাৰনত্থায ইমং উপমং উদাহরন্তি – যথা জচ্চন্ধো চ পীঠসপ্পী চ দিসাপক্কমিতুকামা অস্সু, জচ্চন্ধো পীঠসপ্পিং এৰমাহ ‘‘অহং খো ভণে, সক্কোমি পাদেহি পাদকরণীযং কাতুং, নত্থি চ মে চক্খূনি যেহি সমৰিসমং পস্সেয্য’’ন্তি. পীঠসপ্পীপি জচ্চন্ধং এৰমাহ ‘‘অহং খো ভণে, সক্কোমি চক্খুনা চক্খুকরণীযং কাতুং, নত্থি চ মে পাদানি যেহি অভিক্কমেয্যং ৰা পটিক্কমেয্যং ৰা’’তি. সো তুট্ঠহট্ঠো জচ্চন্ধো পীঠসপ্পিং অংসকূটং আরোপেসি. পীঠসপ্পী জচ্চন্ধস্স অংসকূটে নিসীদিত্ৰা এৰমাহ ‘‘ৰামং মুঞ্চ দক্খিণং গণ্হ, দক্খিণং মুঞ্চ ৰামং গণ্হা’’তি. তত্থ জচ্চন্ধোপি নিত্তেজো দুব্বলো ন সকেন তেজেন সকেন বলেন গচ্ছতি, পীঠসপ্পীপি নিত্তেজো দুব্বলো ন সকেন তেজেন সকেন বলেন গচ্ছতি, ন চ তেসং অঞ্ঞমঞ্ঞং নিস্সায গমনং নপ্পৰত্ততি, এৰমেৰং নামম্পি নিত্তেজং ন সকেন তেজেন উপ্পজ্জতি, ন তাসু তাসু কিরিযাসু পৰত্ততি. রূপম্পি নিত্তেজং ন সকেন তেজেন উপ্পজ্জতি, ন তাসু তাসু কিরিযাসু পৰত্ততি, ন চ তেসং অঞ্ঞমঞ্ঞং নিস্সায উপ্পত্তি ৰা পৰত্তি ৰা ন হোতি. তেনেতং ৰুচ্চতি –

‘‘ন সকেন বলেন জাযরে,

নোপি সকেন বলেন তিট্ঠরে;

পরধম্মৰসানুৰত্তিনো,

জাযরে সঙ্খতা অত্তদুব্বলা.

‘‘পরপচ্চযতো চ জাযরে,

পরআরম্মণতো সমুট্ঠিতা;

আরম্মণপচ্চযেহি চ,

পরধম্মেহি চিমে পভাৰিতা.

‘‘যথাপি নাৰং নিস্সায, মনুস্সা যন্তি অণ্ণৰে;

এৰমেৰ রূপং নিস্সায, নামকাযো পৰত্ততি.

‘‘যথা চ মনুস্সে নিস্সায, নাৰা গচ্ছতি অণ্ণৰে;

এৰমেৰ নামং নিস্সায, রূপকাযো পৰত্ততি.

‘‘উভো নিস্সায গচ্ছন্তি, মনুস্সা নাৰা চ অণ্ণৰে;

এৰং নামঞ্চ রূপঞ্চ, উভো অঞ্ঞোঞ্ঞনিস্সিতা’’তি.

এৰং নানানযেহি নামরূপং ৰৰত্থাপযতো সত্তসঞ্ঞং অভিভৰিত্ৰা অসম্মোহভূমিযং ঠিতং নামরূপানং যাথাৰদস্সনং দিট্ঠিৰিসুদ্ধীতি ৰেদিতব্বং. নামরূপৰৰত্থানন্তিপি সঙ্খারপরিচ্ছেদোতিপি এতস্সেৰ অধিৰচনং.

ইতি সাধুজনপামোজ্জত্থায কতে ৰিসুদ্ধিমগ্গে

পঞ্ঞাভাৰনাধিকারে

দিট্ঠিৰিসুদ্ধিনিদ্দেসো নাম

অট্ঠারসমো পরিচ্ছেদো.