৬. আকারন্তপুল্লিঙ্গনামিকপদমালা

অথ পুব্বাচরিযমতং পুরেচরং কত্ৰা আকারন্তপুল্লিঙ্গানং পকতিরূপেসু অভিভৰিতু ইচ্চেতস্স পকতিরূপস্স নামিকপদমালং ৰক্খাম – সত্থা, সত্থা, সত্থারো. সত্থারং, সত্থারো. সত্থারা, সত্থারেহি, সত্থারেভি. সত্থু, সত্থুস্স, সত্থুনো, সত্থানং, সত্থারানং. সত্থারা, সত্থারেহি, সত্থারেভি. সত্থু, সত্থুস্স, সত্থুনো, সত্থানং, সত্থারানং. সত্থরি, সত্থারেসু. ভো সত্থ, ভো সত্থা, ভৰন্তো সত্থারো.

অযং যমকমহাথেরেন কতায চূল়নিরুত্তিযা আগতো নযো. এত্থ চ নিরুত্তিপিটকে চ কচ্চাযনে চ ‘‘সত্থুনা’’তি পদং অনাগতম্পি গহেতব্বমেৰ ‘‘ধম্মরাজেন সত্থুনা’’তি দস্সনতো. ‘‘সত্থারা, সত্থুনা, সত্থারেহি, সত্থারেভী’’তি কমো চ ৰেদিতব্বো. এত্থ চ অসতিপি অত্থৰিসেসে ব্যঞ্জনৰিসেসৰসেন, ব্যঞ্জনৰিসেসাভাৰেপি অত্থনানত্থতাৰসেন সদ্দন্তরসন্দস্সনং নিরুত্তিক্কমোতি ‘‘সত্থা’’তি পদং একৰচনবহুৰচনৰসেন দ্ৰিক্খত্তুং ৰুত্তন্তি ৰেদিতব্বং. নিরুত্তিপিটকাদীসু পন ‘‘সত্থা’’তি পঠমাবহুৰচনং ন আগতং. কিঞ্চাপি ন আগতং, তথাপি ‘‘অৰিতক্কিতা মচ্চুমুপব্বজন্তী’’তি পাল়িযং ‘‘অৰিতক্কিতা’’তি পঠমাবহুৰচনস্স দস্সনতো ‘‘সত্থা’’তি পদস্স পঠমাবহুৰচনত্তং অৰস্সমিচ্ছিতব্বং. তথা ৰত্তা, ধাতা, গন্তাদীনম্পি তগ্গতিকত্তা. তথা নিরুত্তিপিটকে ‘‘সত্থারে’’তি দুতিযাবহুৰচনঞ্চ ‘‘সত্থুস্স, সত্থান’’ন্তি চতুত্থীছট্ঠেকৰচনবহুৰচনানি চ আগতানি, চূল়নিরুত্তিযং পন ন আগতানি. তত্থ ‘‘মাতাপিতরো পোসেতি. ভাতরো অতিক্কমতী’’তি দস্সনতো ‘‘সত্থারে’’তি দুতিযাবহুৰচনরূপং অযুত্তং ৰিয দিস্সতি. কচ্চাযনাদীসু ‘‘ভো সত্থ, ভো সত্থা’’ ইতি রস্সদীঘৰসেন আলপনেকৰচনদ্ৰযং ৰুত্তং. নিরুত্তিপিটকে ‘‘ভো সত্থ’’ ইতিরস্সৰসেন আলপনেকৰচনং ৰত্ৰা ‘‘ভৰন্তো সত্থারো’’তি আরাদেসৰসেন আলপনবহুৰচনং ৰুত্তং. চূল়নিরুত্তিযং ‘‘ভো সত্থ’’ ইতি রস্সৰসেন আলপনেকৰচনং ৰত্ৰা ‘‘ভো সত্থা’’ ইতি দীঘৰসেন আলপনবহুৰচনং লপিতং. সব্বমেতং আগমে উপপরিক্খিত্ৰা যথা ন ৰিরুজ্ঝতি, তথা গহেতব্বং.

ইদানি সত্থুসদ্দস্স যং রূপন্তরং অম্হেহি দিট্ঠং, তং দস্সেস্সাম – তথা হি ‘‘ইমেসং মহানাম তিণ্ণং সত্থূনং একা নিট্ঠা উদাহু পুথু নিট্ঠা’’তি পাল়িযং ‘‘সত্থূন’’ন্তি পদং দিট্ঠং, তস্মা অযম্পি কমো ৰেদিতব্বো ‘‘সত্থু, সত্থুস্স, সত্থুনো, সত্থানং, সত্থারানং, সত্থূন’’ন্তি. অভিভৰিতা, অভিভৰিতা, অভিভৰিতারো. অভিভৰিতারং, অভিভৰিতারো. অভিভৰিতারা, অভিভৰিতুনা, অভিভৰিতারেহি, অভিভৰিতারেভি. অভিভৰিতু, অভিভৰিতুস্স, অভিভৰিতুনো, অভিভৰিতানং, অভিভৰিতারানং, অভিভৰিতূনং. অভিভৰিতারা, অভিভৰিতারেহি, অভিভৰিতারেভি. অভিভৰিতু, অভিভৰিতুস্স, অভিভৰিতুনো, অভিভৰিতানং, অভিভৰিতারানং. অভিভৰিতরি, অভিভৰিতারেসু. ভো অভিভৰিত, ভো অভিভৰিতা, ভৰন্তো অভিভৰিতারো. যথা পনেত্থ অভিভৰিতু ইচ্চেতস্স পকতিরূপস্স নামিকপদমালা সত্থুনযেন যোজিতা, এৰং পরিভৰিতুআদীনঞ্চ অঞ্ঞেসঞ্চ তংসদিসানং নামিকপদমালা সত্থুনযেন যোজেতব্বা. এত্থঞ্ঞানি তংসদিসানি নাম ‘‘ৰত্তা, ধাতা’’ইচ্চাদীনং পদানং ৰত্তুধাতু ইচ্চাদীনি পকতিরূপানি.

ৰত্তা ধাতা গন্তা নেতা,

দাতা কত্তা চেতা তাতা;

ছেত্তা ভেত্তা হন্তা মেতা,

জেতা বোদ্ধা ঞাতা সোতা.

গজ্জিতা ৰস্সিতা ভত্তা, মুচ্ছিতা পটিসেধিতা;

ভাসিতা পুচ্ছিতা খন্তা, উট্ঠাতোক্কমিতা ততা.

নত্তা পনত্তা অক্খাতা, সহিতা পটিসেৰিতা;

নেতা ৰিনেতা ইচ্চাদী, ৰত্তরে সুদ্ধকত্তরি.

উপ্পাদেতা ৰিঞ্ঞাপেতা, সন্দস্সেতা পব্রূহেতা;

বোধেতাদী চঞ্ঞে সদ্দা, ঞেয্যা হেতুস্মিং অত্থস্মিং.

কত্তা খত্তা নেত্তা ভত্তা, পিতা ভাতাতিমে পন;

কিঞ্চি ভিজ্জন্তি সুত্তস্মিং, তং পভেদং কথেস্সহং.

সত্থাতিআদীসু কেচি, উপযোগেন সামিনা;

সহেৰ নিচ্চং ৰত্তন্তি, নেৰ ৰত্তন্তি কেচি তু.

তত্র কত্তুসদ্দাদযো রূপন্তরৰসেন সত্থুসদ্দতো কিঞ্চি ভিজ্জন্তি. তথা হি ‘‘উট্ঠেহি কত্তে তরমানো, গন্ত্ৰা ৰেস্সন্তরংৰদা’’তি এত্থ ‘‘কত্তে’’তি ইদং আলপনেকৰচনরূপং, এৰঞ্হি ‘‘ভো কত্তা’’তি রূপতো রূপন্তরং নাম. ‘‘তেন হি ভো খত্তে যেন চম্পেয্যকা ব্রাহ্মণগহপতিকা তেনুপসঙ্কমা’’তি এত্থ ‘‘খত্তে’’তি ইদঞ্চালপনেকৰচনরূপং. এৰম্পি ‘‘ভো খত্তা’’তি রূপতো রূপন্তরং নাম. ‘‘নেত্তে উজুং গতে সতী’’তি এত্থ ‘‘নেত্তে’’তি ইদং সত্তমিযা একৰচনরূপং, এতম্পি ‘‘নেত্তরী’’তি রূপতো রূপন্তরং. ‘‘আরাধযতি রাজানং, পূজং লভতি ভত্তুসূ’’তি এত্থ ‘‘ভত্তূসূ’’তি ইদং সত্তমিযা বহুৰচনরূপং. ‘‘ভত্তারেসূ’’তি রূপতো রূপন্তরং, অত্র ‘‘ভত্তূসূ’’তি দস্সনতো, ‘‘মাতাপিতূসু পণ্ডিতা’’তি এত্থ ‘‘পিতূসূ’’তি দস্সনতো চ ‘‘ৰত্তূসু ধাতূসু গন্তূসু নেতূসু দাতূসু কত্তূসূ’’তি এৰমাদিনযোপি গহেতব্বো. অযং নযো সত্থুসদ্দেপি ইচ্ছিতব্বো ৰিয অম্হে পটিভাতি.

পিতা, পিতা, পিতরো. পিতরং, পিতরো. পিতরা, পিতুনা, পেত্যা, পিতরেহি, পিতরেভি, পিতূহি, পিতূভি. পিতু, পিতুস্স, পিতুনো, পিতানং, পিতরানং, পিতূনং. পিতরা, পেত্যা, পিতরেহি, পিতরেভি, পিতূহি, পিতূভি. পিতু, পিতুস্স, পিতুনো, পিতানং, পিতরানং, পিতূনং. পিতরি, পিতরেসু, পিতূসু. ভো পিত, ভো পিতা, ভৰন্তো পিতরো. এত্থ পন ‘‘পেত্যা, পিতূন’’ন্তি ইমং নযদ্ৰযং ৰজ্জেত্ৰা ভাতুসদ্দস্স চ পদমালা যোজেতব্বা. তত্থ ‘‘মত্যা চ পেত্যা চ কতং সুসাধু, অনুঞ্ঞাতোসি মাতাপিতূহি, মাতাপিতূনং অচ্চযেনা’’তি চ দস্সনতো পিতুসদ্দস্স ‘‘পেত্যা, পিতূহি, পিতূভি. পিতূন’’ন্তি রূপভেদো চ, ‘‘পিতরো’’ ইচ্চাদীসু রস্সত্তঞ্চ সত্থুসদ্দতো ৰিসেসো. তত্থ চ ‘‘পেত্যা’’তি ইদং ‘‘জন্তুযো, হেতুযো, হেতুযা, অধিপতিযা’’তি পদানি ৰিয অচিন্তেয্যং পুল্লিঙ্গরূপন্তি দট্ঠব্বং.

চোদনা সোধনা চাত্র ভৰতি – সত্থা পিতা ইচ্চেৰমাদীনি নিপ্ফন্নত্তমুপাদায আকারন্তানীতি চ, পঠমং ঠপেতব্বং পকতিরূপমুপাদায উকারন্তানীতি চ তুম্হে ভণথ, ‘‘হেতু সত্থারদস্সনং. অমাতাপিতরসংৰড্ঢো. কত্তারনিদ্দেসো’’তিআদীসু পন সত্থার ইচ্চাদীনি কথং তুম্হে ভণথাতি? এতানিপি মযং পকতিরূপমুপাদায উকারন্তানীতি ভণামাতি. ননু চ ভো এতানি অকারন্তানীতি? ন, উকারন্তানিযেৰ তানি. ননু চ ভো যো অং নাদীনি পরভূতানি ৰচনানি ন দিস্সন্তি যেহি উকারন্তসদ্দানমন্তস্স আরাদেসো সিযা, তস্মা অকারন্তানীতি? ন, ঈদিসে ঠানে পরভূতানং যো অং নাদীনং ৰচনানমনোকাসত্তা. তথা হি সমাসৰিসযো এসো. সমাসৰিসযস্মিঞ্হি অচিন্তেয্যানিপি রূপানি দিস্সন্তীতি. এৰং সন্তেপি ভো ‘‘গামতো নিক্খমতী’’তি পযোগস্স ৰিয অসমাসৰিসযে ‘‘সত্থারতো সত্থারং গচ্ছতী’’তি নিদ্দেসপাল়িদস্সনতো ‘‘হেতু সত্থারদস্সন’’ন্তিআদীসু সত্থার ইচ্চাদীনি অকারন্তানীতি চিন্তেতব্বানীতি? ন চিন্তেতব্বানি ‘‘সত্থারতো সত্থারং গচ্ছতী’’তি এত্থাপি উকারন্তত্তা. এত্থ হি অসমাসত্তেপি তোপচ্চযং পটিচ্চ সত্থুসদ্দস্স উকারো আরাদেসং লভতি. যানি পন তুম্হে উকারস্স আরাদেসনিমিত্তানি যো অংনাদীনি ৰচনানি ইচ্ছথ, তানি ঈদিসে ঠানে ৰিঞ্ঞূনং পমাণং ন হোন্তি. কানি পন হোন্তীতি চে? অসমাসৰিসযে তোপচ্চযো চ সমাসৰিসযে পরপদানি চ পরপদাভাৰে স্যাদিৰিভত্তিযো চাতি ইমানেৰ ঈদিসে ঠানে একন্তেন পমাণং হোন্তি. তথা হি ধম্মপদট্ঠকথাযং ‘‘যাৰদেৰ অনত্থায, ঞত্তং বালস্স জাযতী’’তি ইমিস্সা পাল়িযা অত্থসংৰণ্ণনাযং ‘‘অযং নিম্মাতাপিতরোতি ইমস্মিং পহটে দণ্ডো নত্থী’’তি এত্থ নিম্মাতাপিতরোতি ইমস্স সমাসৰিসযত্তা সিম্হি পরে উকারো আরাদেসং লভতি, ততো সিস্স ওকারাদেসো, ইচ্চেতং পদং পকতিরূপৰসেন উকারন্তং ভৰতি. নিপ্ফন্নত্তমুপাদায ‘‘পুরিসো, উরগো’’তি পদানি ৰিয ওকারন্তঞ্চ ভৰতি. অযং পনেত্থ সমাসৰিগ্গহো ‘‘মাতা চ পিতা চ মাতাপিতরো, নত্থি মাতাপিতরো এতস্সাতি নিম্মাতাপিতরো’’তি. পকতিরূপৰসেন হি ‘‘নিম্মাতাপিতু’’ ইতি ঠিতে সিৰচনস্মিং পরে উকারস্স আরাদেসো হোতি. কত্থচি পন ধম্মপদট্ঠকথাপোত্থকে ‘‘অযং নিম্মাতাপিতিকো’’তি পাঠো দিস্সতি, এসো পন ‘‘অযং নিম্মাতাপিতরো’’তি পদস্স অযুত্ততং মঞ্ঞমানেহি ঠপিতোতি মঞ্ঞাম, ন সো অযুত্তো অট্ঠকথাপাঠো. সো হি উমঙ্গজাতকট্ঠকথাযং একপিতরোতি সিম্হি আরাদেসপযোগেন সমেতি. তথা হি –

‘‘যথাপি নিযকো ভাতা,

সউদরিযো একমাতুকো;

এৰং পঞ্চালচন্দো তে,

দযিতব্বো রথেসভা’’তি

ইমিস্সা পাল়িযা অত্থং সংৰণ্ণেন্তেহি পাল়িনযঞ্ঞূহি গরূহি ‘‘নিযকোতি অজ্ঝত্তিকো একপিতরো একমাতুযা জাতো’’তি সিম্হি আরাদেসপযোগরচনা কতা. ন কেৰলঞ্চ সিম্হি আরাদেসে পুল্লিঙ্গপ্পযোগোযেৰম্হেহি দিট্ঠো, অথ খো ইত্থিলিঙ্গপ্পযোগোপি সাসনে দিট্ঠো. তথা হি ৰিনযপিটকে চূল়ৰগ্গে ‘‘অস্সমণী হোতি অসক্যধীতরা’’তি পদং দিস্সতি. অযং পনেত্থ সমাসৰিগ্গহো ‘‘সক্যকুলে উপ্পন্নত্তা সক্যস্স ভগৰতো ধীতা সক্যধীতরা, ন সক্যধীতরা অসক্যধীতরা’’তি. ইধাপি সিম্হি পরে উকারস্স আরাদেসো কতো, ইত্থিলিঙ্গভাৰস্স ইচ্ছিতত্তা আপচ্চযো, ততো সিলোপো চ দট্ঠব্বো. এৰং সমাসপদত্তে সত্থু পিতু কত্তুসদ্দানং নামিকপদমালাযং ৰুত্তরূপতো কোচি কোচি রূপৰিসেসো দিস্সতি. অঞ্ঞেসম্পি রূপৰিসেসো নযঞ্ঞুনা মগ্গিতব্বো সুত্তন্তেসু. কো হি নাম সমত্থো নিস্সেসতো বুদ্ধৰচনসাগরে সংকিণ্ণানি ৰিচিত্রানি পণ্ডিতজনানং হদযৰিম্হাপনকরানি পদরূপরতনানি সমুদ্ধরিত্ৰা দস্সেতুং, তস্মা অম্হেহি অপ্পমত্তকানিযেৰ দস্সিতানি.

অদন্ধজাতিকো ৰিঞ্ঞু-জাতিকো সততং ইধ;

যোগং করোতি চে সত্থু, পাল়িযং সো ন কঙ্খতি.

যে পনিধ অম্হেহি ‘‘সত্থা, অভিভৰিতা, ৰত্তা, কত্তা’’দযো সদ্দা পকাসিতা, তেসু কেচি উপযোগৰচনেন সদ্ধিং নিচ্চং ৰত্তন্তি ‘‘পুচ্ছিতা, ওক্কমিতা’’ইচ্চাদযো. তথা হি ‘‘অভিজানাসি নো ত্ৰং মহারাজ ইমং পঞ্হং অঞ্ঞে সমণব্রাহ্মণে পুচ্ছিতা. নিদ্দং ওক্কমিতা’’তিআদিপযোগা বহূ দিস্সন্তি. কেচি সামিৰচনেন সদ্ধিং নিচ্চং ৰত্তন্তি ‘‘অভিভৰিতা, ৰত্তা’’ইচ্চাদযো. তথা হি ‘‘পচ্চামিত্তানং অভিভৰিতা, তস্স ভৰন্তি ৰত্তারো. অমতস্স দাতা. পরিস্সযানং সহিতা. অনুপ্পন্নস্স মগ্গস্স, উপ্পাদেতা নরুত্তমো’’তিআদিপযোগা বহূ দিস্সন্তি. কেচি পন উপযোগৰচনেনপি সদ্ধিং নেৰ ৰত্তন্তি নিযোগা পঞ্ঞত্তিযং পৰত্তনতো. তং যথা? ‘‘সত্থা, পিতা, ভাতা, নত্তা’’ইচ্চাদযো. এত্থ পন ‘‘উপযোগৰচনেন সদ্ধিং নিচ্চং ৰত্তন্তী’’তিআদিৰচনং কম্মভূতং অত্থং সন্ধায কতন্তি ৰেদিতব্বং.

এৰং উকারন্ততাপকতিকানং আকারন্তপদানং পৰত্তিং ৰিদিত্ৰা সদ্দেসু অত্থেসু চ কোসল্লমিচ্ছন্তেহি পুন লিঙ্গঅন্তৰসেন ‘‘সত্থা, সত্থো, সত্থ’’ন্তি তিকং কত্ৰা পদানমত্থো চ পকতিরূপস্স নামিকপদমালা চ পদানং সদিসাসদিসতা চ ৰৰত্থপেতব্বা. তত্র হি ‘‘সত্থা’’তি ইদং পঠমং উকারন্ততাপকতিযং ঠত্ৰা পচ্ছা আকারন্তভূতং পুল্লিঙ্গং, ‘‘সত্থো’’তি ইদং পঠমং অকারন্ততাপকতিযং ঠত্ৰা পচ্ছা ওকারন্তভূতং পুল্লিঙ্গং, ‘‘সত্থ’’ন্তিদং পন পঠমং অকারন্ততাপকতিযং ঠত্ৰা পচ্ছা নিগ্গহীতন্তভূতং নপুংসকলিঙ্গং. তত্র সত্থাতি সদেৰকং লোকং সাসতি অনুসাসতীতি সত্থা, কো সো? ভগৰা. সত্থোতি সহ অত্থেনাতি সত্থো, ভণ্ডমূলং গহেত্ৰা ৰাণিজ্জায দেসন্তরং গতো জনসমূহো. সত্থন্তি সাসতি আচিক্খতি অত্থে এতেনাতি সত্থং, ব্যাকরণাদিগন্থো, অথ ৰা সসতি হিংসতি সত্তে এতেনাতি সত্থং, অসিআদি. ‘‘সত্থা, সত্থা, সত্থারো. সত্থারং, সত্থারো’’তি পুরে ৰিয পদমালা. ‘‘সত্থো, সত্থা. সত্থং, সত্থে’’তি পুরিসনযেন পদমালা. ‘‘সত্থং, সত্থানি, সত্থা. সত্থং, সত্থানি, সত্থে’’তি নপুংসকে ৰত্তমান চিত্তনযেন পদমালা যোজেতব্বা. এৰং তিধা ভিন্নাসু নামিকপদমালাসু পদানং সদিসাসদিসতা ৰৰত্থপেতব্বা.

সত্থা তিট্ঠতি সব্বঞ্ঞূ, সত্থা যন্তি ধনত্থিকা;

সত্থা অপেতি পুরিসো, ভোন্তো সত্থা দদাথ সং.

এৰং সুতিসামঞ্ঞৰসেন সদিসতা ভৰতি.

সত্থং যং তিখিণং তেন, সত্থো কত্ৰান কপ্পিযং;

ফলং সত্থুস্স পাদাসি, সত্থা তং পরিভুঞ্জতি.

এৰং অসুতিসামঞ্ঞৰসেন অসদিসতা ভৰতি, তথা লিঙ্গঅন্তৰসেন. ‘‘চেতা চেতো’’তি চ ‘‘তাতা তাতো’’তি চ দুকং কত্ৰা পদানমত্থো চ পকতিরূপস্স নামিকপদমালা চ পদানং সদিসাসদিসতা চ ৰৰত্থপেতব্বা.

তত্র হি ‘‘চেতা’’তি পঠমং উকারন্ততাপকতিযং ঠত্ৰা পচ্ছা আকারন্তভূতং পুল্লিঙ্গং, তথা ‘‘তাতা’’তি পদম্পি. ‘‘চেতো’’তি ইদং পন পঠমং অকারন্ততাপকতিযং ঠত্ৰা পচ্ছা ওকারন্তভূতং পুল্লিঙ্গং, তথা ‘‘তাতো’’তি পদম্পি. তত্র চেতাতি চিনোতি রাসিং করোতীতি চেতা, পাকারচিননকো পুগ্গলো, ইট্ঠকৰড্ঢকীতি অত্থো. চেতোতি চিত্তং, এৰংনামকো ৰা লুদ্দো. এত্থ চ চিত্তং ‘‘চেতযতি চিন্তেতী’’তি অত্থৰসেন চেতো, লুদ্দো পন পণ্ণত্তিৰসেন. তাতাতি তাযতীতি তাতা. ‘‘অঘস্স তাতা হিতস্স ৰিধাতা’’তিস্স পযোগো. ‘‘তাতো’’তি এত্থাপি তাযতীতি তাতো, পুত্তানং পিতূসু, পিতরানং পুত্তেসু, অঞ্ঞেসঞ্চ অঞ্ঞেসু পিযপুগ্গলেসু ৰত্তব্বৰোহারো এসো. ‘‘সো নূন কপণো তাতো, চিরং রুচ্চতি অস্সমে. কিচ্ছেনাধিগতা ভোগা, তে তাতো ৰিধমং ধমং. এহি তাতা’’তিআদীসু চস্স পযোগো ৰেদিতব্বো. ‘‘চেতা, চেতা, চেতারো. চেতারং, চেতারো’’তি সত্থুনযেন পদমালা. ‘‘চেতো, চেতা. চেতং, চেতে. চেতসা, চেতেনা’’তি মনোগণনযেন ঞেয্যা. অযং চিত্তৰাচকস্স চেতসদ্দস্স নামিকপদমালা. ‘‘চেতো, চেতা. চেতং, চেতে. চেতেনা’’তি পুরিসনযেন ঞেয্যা. অযং পণ্ণত্তিৰাচকস্স চেতসদ্দস্স নামিকপদমালা. ‘‘তাতা, তাতা, তাতারো. তাতার’’ন্তি সত্থুনযেন ঞেয্যা. ‘‘তাতো, তাতা, তাত’’ন্তি পুরিসনযেন ঞেয্যা. এৰমিমাসুপি নামিকপদমালাসু পদানং সদিসাসদিসতা ৰৰত্থপেতব্বা, তথা লিঙ্গঅন্তৰসেন ‘‘ঞাতা, ঞাতো, ঞাতং, ঞাতা’’তি চতুক্কং কত্ৰা পদানমত্থো চ পকতিরূপস্স নামিকপদমালা চ পদানং সদিসাসদিসতা চ ৰৰত্থপেতব্বা.

তত্র হি ‘‘ঞাতা’’তি ইদং পঠমং উকারন্ততাপকতিযং ঠত্ৰা পচ্ছা আকারন্তভূতং পুল্লিঙ্গং. ‘‘ঞাতো ঞাত’’ন্তি ইমানি যথাক্কমং পঠমং অকারন্ততাপকতিযং ঠত্ৰা পচ্ছোকারন্তনিগ্গহীতন্তভূতানি ৰাচ্চলিঙ্গেসু পুন্নপুংসকলিঙ্গানি. তথা হি ‘‘ঞাতো অত্থো সুখাৰহো. ঞাতমেতং কুরঙ্গস্সা’’তি নেসং পযোগা দিস্সন্তি. ‘‘ঞাতা’’তি ইদং পন পঠমং আকারন্ততাপকতিযং ঠত্ৰা পচ্ছাপি আকারন্তভূতং ৰাচ্চলিঙ্গেসু ইত্থিলিঙ্গং. তথা হি ‘‘এসা ইত্থিমযা ঞাতা’’তি পযোগো. তত্র পুল্লিঙ্গপক্খে ‘‘জানাতীতি ঞাতা’’তি কত্তুকারকৰত্তমানকালৰসেন অত্থো গহেতব্বো. ইত্থিলিঙ্গাদিপক্খে ‘‘ঞাযিত্থাতি ঞাতা ঞাতো ঞাত’’ন্তি কম্মকারকাতীতকালৰসেন অত্থো গহেতব্বো. এস নযো অঞ্ঞত্থাপি যথাসম্ভৰং দট্ঠব্বো. ‘‘ঞাতা, ঞাতা, ঞাতারো. ঞাতার’’ন্তি সত্থুনযেন ঞেয্যা. ‘‘ঞাতো, ঞাতা. ঞাত’’ন্তি পুরিসনযেন ঞেয্যা. ‘‘ঞাতং, ঞাতানি, ঞাতা. ঞাতং, ঞাতানি, ঞাতে’’তি ৰক্খমানচিত্তনযেন ঞেয্যা. ‘‘ঞাতা, ঞাতা, ঞাতাযো. ঞাতং, ঞাতা, ঞাতাযো’’তি ৰক্খমানকঞ্ঞানযেন ঞেয্যা. এৰমিমাসুপি নামিকপদমালাসু পদানং সদিসাসদিসতা ৰৰত্থপেতব্বা. অঞ্ঞেসুপি ঠানেসু যথারহং ইমিনা নযেন সদিসাসদিসতা উপপরিক্খিতব্বা. ৰত্তা ধাতা গন্তাদীনম্পি ‘‘ৰদতীতি ৰত্তা, ধারেতীতি ধাতা, গচ্ছতীতি গন্তা’’তিআদিনা যথাসম্ভৰং নিব্বচনানি ঞেয্যানি.

যং পনেত্থ অম্হেহি পকিণ্ণকৰচনং কথিতং, তং ‘‘অট্ঠানে ইদং কথিত’’ন্তি ন ৰত্তব্বং. যস্মা অযং সদ্দনীতি নাম সদ্দানমত্থানঞ্চ যুত্তাযুত্তিপকাসনত্থং কতারম্ভত্তা নানপ্পকারেন সব্বং মাগধৰোহারং সঙ্খোভেত্ৰা কথিতাযেৰ সোভতি, ন ইতরথা, তস্মা নানপ্পভেদেন ৰত্তুমিচ্ছায সম্ভৰতো ‘‘অট্ঠানে ইদং কথিত’’ন্তি ন ৰত্তব্বং. নানাউপাযেহি ৰিঞ্ঞূনং ঞাপনত্থং কতারম্ভত্তা চ পন পুনরুত্তিদোসোপেত্থ ন চিন্তেতব্বো, অঞ্ঞদত্থু সদ্ধাসম্পন্নেহি কুলপুত্তেহি অযং সদ্দনীতি পিটকত্তযোপকারায সক্কচ্চং পরিযাপুণিতব্বা.

ইতি অভিভৰিতাপদসদিসানি ৰত্তা, ধাতা, গন্তাদীনি পদানি দস্সিতানি. ইদানি অতংসদিসানি দস্সেস্সাম. সেয্যথিদং –

গুণৰা গণৰা চেৰ, বলৰা যসৰা তথা;

ধনৰা সুতৰা ৰিদ্ৰা, ধুতৰা কতৰাপি চ.

হিতৰা ভগৰা চেৰ, ধিতৰা থামৰা তথা;

যতৰা চাগৰা চাথ, হিমৰিচ্চাদযো রৰা.

পুন্নপুংসকলিঙ্গেহি, অকারন্তেহি পাযতো;

ৰন্তুসদ্দো পরো হোতি, তদন্তা গুণৰাদযো.

সঞ্ঞাৰা রস্মিৰা চেৰ, মস্সুৰা চ যসস্সিৰা;

ইচ্চাদিদস্সনাপেসো, আকারিৰণ্ণুকারতো;

ইত্থিলিঙ্গাদীসু হোতি, কত্থচীতি পকাসযে.

সতিমা গতিমা অত্থ-দস্সিমা ধিতিমা তথা;

মুতিমা মতিমা চেৰ, জুতিমা হিরিমাপি চ.

থুতিমা রতিমা চেৰ, যতিমা বলিমা তথা;

কসিমা সুচিমা ধীমা, রুচিমা চক্খুমাপি চ.

বন্ধুমা হেতুমা’যস্মা, কেতুমা রাহুমা তথা;

খাণুমা ভাণুমা গোমা, ৰিজ্জুমা ৰসুমাদযো.

পাপিমা পুত্তিমা চেৰ, চন্দিমিচ্চাদযোপি চ;

অতংসদিসসদ্দাতি, ৰিঞ্ঞাতব্বা ৰিভাৰিনা.

ইৰণ্ণুকারোকারেহি, মন্তুসদ্দো পরো ভৰে;

আকারন্তা চিকারন্তা, ইমন্তূতি ৰিভাৰযে.

গুণৰা, গুণৰা, গুণৰন্তো. গুণৰন্তং, গুণৰন্তে. গুণৰতা, গুণৰন্তেন, গুণৰন্তেহি, গুণৰন্তেভি. গুণৰতো, গুণৰন্তস্স, গুণৰতং, গুণৰন্তানং. গুণৰতা, গুণৰন্তা, গুণৰন্তস্মা, গুণৰন্তম্হা, গুণৰন্তেহি, গুণৰন্তেভি. গুণৰতো, গুণৰন্তস্স, গুণৰতং, গুণৰন্তানং. গুণৰতি, গুণৰন্তে, গুণৰন্তস্মিং, গুণৰন্তম্হি, গুণৰন্তেসু. ভো গুণৰা, ভৰন্তো গুণৰা, ভোন্তো গুণৰন্তো.

এত্থ পন ‘‘এথ তুম্হে আৰুসো সীলৰাহোথা’’তি চ,

‘‘বলৰন্তো দুব্বলা হোন্তি, থামৰন্তোপি হাযরে;

চক্খুমা অন্ধিকা হোন্তি, মাতুগামৰসং গতা’’তি চ

পাল়িযং ‘‘সীলৰা, চক্খুমা’’তি পঠমাবহুৰচনস্স দস্সনতো ‘‘গুণৰা’’তি পচ্চত্তালপনট্ঠানে বহুৰচনং ৰুত্তং. ‘‘গুণৰা সতিমা’’তিআদীসুপি এসেৰ নযো. চূল়নিরুত্তিযম্পি হি ‘‘গুণৰা’’তি পচ্চত্তালপনবহুৰচনানি আগতানি, নিরুত্তিপিটকে পচ্চত্তেকৰচনভাৰেনেৰ আগতং, চূল়নিরুত্তিযং পন নিরুত্তিপিটকে চ ‘‘ভো গুণৰ’’ইতি রস্সৰসেন আলপনেকৰচনং আগতং. মযং পন ‘‘তগ্ঘ ভগৰা বোজ্ঝঙ্গা. কথং নু ভগৰা তুয্হং সাৰকো সাসনে রতো’’তিএৰমাদীসু অনেকসতেসু পাঠেসু ‘‘ভগৰা’’ইতি আলপনেকৰচনস্স দীঘভাৰদস্সনতো ৰন্তুপচ্চযট্ঠানে ‘‘ভো গুণৰা’’ইচ্চাদি দীঘৰসেন ৰচনং যুত্ততরং ৰিয মঞ্ঞাম, মন্তুপচ্চযট্ঠানে পন ইমন্তুপচ্চযট্ঠানে চ ‘‘সব্বৰেরভযাতীত, পাদে ৰন্দামি চক্খুম. এৰং জানাহি পাপিম’’ইচ্চাদীসু পাল়িপদেসেসু ‘‘চক্খুম’’ইচ্চাদিআলপনেকৰচনস্স রস্সভাৰদস্সনতো ‘‘ভো সতিম, ভো গতিম’’ইচ্চাদি রস্সৰসেন ৰচনং যুত্ততরং ৰিয মঞ্ঞাম, অথ ৰা মহাপরিনিব্বানসুত্তট্ঠকথাযং ‘‘আযস্মা তিস্স’’ ইতিদীঘৰসেন ৰুত্তালপনেকৰচনস্স দস্সনতো ‘‘ভগৰা, আযস্মা’’ ইতিদীঘৰসেন ৰুত্তপদমত্তং ঠপেত্ৰা ৰন্তুপচ্চযট্ঠানেপি মন্তুপচ্চযনযো নেতব্বো, মন্তুপচ্চযট্ঠানেপি ৰন্তুপচ্চযনযো নেতব্বো. তথা হি কচ্চাযনাদীসু ‘‘ভো গুণৰং, ভো গুণৰ, ভো গুণৰা’’ইতি নিগ্গহীতরস্সদীঘৰসেন তীণি আলপনেকৰচনানি ৰুত্তানি, ইমিনা ‘‘ভো সতিমং, ভো সতিম, ভো সতিমা’’তি এৰমাদিনযোপি দস্সিতো. পঠমাবহুৰচনট্ঠানে পন ‘‘গুণৰন্তো, গুণৰন্তা, গুণৰন্তী’’তি তীণি পদানি ৰুত্তানি, ইমিনাপি ‘‘সতিমন্তো, সতিমন্তা, সতিমন্তী’’তি এৰমাদিনযোপি দস্সিতো. তেসু ‘‘ভো গুণৰং ভো সতিমং, গুণৰন্তা, গুণৰন্তী’’তি ইমানি পদানি এৰংগতিকানি চ অঞ্ঞানি পদানি পাল়িযং অপ্পসিদ্ধানি যথা ‘‘আযস্মন্তা’’তি পদং পসিদ্ধং, তস্মা যং চূল়নিরুত্তিযং ৰুত্তং, যঞ্চ নিরুত্তিপিটকে, যঞ্চ কচ্চাযনাদীসু, তং সব্বং পাল়িযা অট্ঠকথাহি চ সদ্ধিং যথা ন ৰিরুজ্ঝতি, গঙ্গোদকেন যমুনোদকং ৰিয অঞ্ঞদত্থু সংসন্দতি সমেতি, তথা গহেতব্বং.

অপিচেত্থ অযম্পি ৰিসেসো গহেতব্বো. তং যথা? ‘‘তুয্হং ধীতা মহাৰীর, পঞ্ঞৰন্ত জুতিন্ধরা’’তি পাল়িযং ‘‘পঞ্ঞৰন্ত’’ইতি আলপনেকৰচনস্স দস্সনতো.

‘‘সব্বা কিরেৰং পরিনিট্ঠিতানি,

যসস্সি নং পঞ্ঞৰন্তং ৰিসয্হ;

যসো চ লদ্ধা পুরিমং উল়ারং,

নপ্পজ্জহে ৰণ্ণবলং পুরাণ’’ন্তি.

ইমিস্সা জাতকপাল়িযা অট্ঠকথাযং ‘‘পঞ্ঞৰন্ত’’ইতি আলপনেকৰচনস্স দস্সনতো চ ‘‘ভো গুণৰন্ত, ভো গুণৰন্তা, ভো সতিমন্ত, ভো সতিমন্তা’’তিআদীনিপি আলপনেকৰচনানি অৰস্সমিচ্ছিতব্বানি. তথা হি তিস্সং পাল়িযং ‘‘যসস্সি পঞ্ঞৰন্ত’’ ইচ্চালপনৰচনং অট্ঠকথাচরিযা ইচ্ছন্তি. নন্তি হি পদপূরণে নিপাতমত্তং. পঞ্ঞৰন্তন্তি পন ছন্দানুরক্খণত্থং অনুসারাগমং কত্ৰা ৰুত্তং. এৰং পাৰচনে ৰন্তুপচ্চযাদিসহিতানং সদ্দানং ‘‘ভগৰা, আযস্মা, পঞ্ঞৰন্ত, চক্খুম, পাপিম’’ইতিদস্সিতনযেন আলপনপ্পৰত্তি ৰেদিতব্বা. এত্থ চ ‘‘গঙ্গাভাগীরথী নাম, হিমৰন্তা পভাৰিতা’’তি চ ‘‘কুতো আগতত্থ ভন্তেতি, হিমৰন্তা মহারাজা’’তি চ দস্সনতো ‘‘গুণৰন্তা’’তি পঞ্চমিযা একৰচনং কথিতং. যথা গুণৰন্তু সদ্দস্স নামিকপদমালা যোজিতা, এৰং ধনৰন্তুবলৰন্তাদীনং সতিমন্তু গতিমন্তাদীনঞ্চ নামিকপদমালা যোজেতব্বা.

ইদানি ৰিদ্ৰাদিপদানং গুণৰাপদেন সমানগতিকত্তম্পি সোতূনং পযোগেসু সম্মোহাপগমত্থং একদেসতো নিব্বচনাদীহি সদ্ধিং ৰিদ্ৰন্তুইচ্চাদিপকতিরূপস্স নামিকপদমালা ৰুচ্চতে – ঞাণসঙ্খাতো ৰেদো অস্স অত্থীতি ৰিদ্ৰা, পণ্ডিতো. এত্থ চ ৰিদ্ৰাসদ্দস্স অত্থিভাৰে ‘‘ইতি ৰিদ্ৰা সমং চরে’’তিআদি আহচ্চপাঠো নিদস্সনং. অত্রাযং পদমালা – ৰিদ্ৰা, ৰিদ্ৰা, ৰিদ্ৰন্তো. ৰিদ্ৰন্তং, ৰিদ্ৰন্তে. ৰিদ্ৰতা, ৰিদ্ৰন্তেন. সেসং সব্বং নেয্যং. ৰেদনাৰা, ৰেদনাৰা, ৰেদনাৰন্তো. ৰেদনাৰন্তং, ৰেদনাৰন্তে. ৰেদনাৰতা, ৰেদনাৰন্তেন. সেসং সব্বং নেয্যং. এৰং ‘‘সঞ্ঞাৰাচেতনাৰা সদ্ধাৰা পঞ্ঞৰা সব্বাৰা’’ইচ্চাদীসুপি. এত্থ চ ‘‘ৰেদনাৰন্তং ৰা অত্তানং সব্বাৰন্তং লোক’’ন্তিআদীনি নিদস্সনপদানি. তত্থ সব্বাৰন্তন্তি সব্বসত্তৰন্তং, সব্বসত্তযুত্তন্তি অত্থো. মজ্ঝেদীঘঞ্হি ইদং পদং. যেভুয্যেন পন ‘‘পঞ্ঞৰাপঞ্ঞৰন্তো’’তিআদীনি মজ্ঝেরস্সানিপি ভৰন্তি. যসস্সিনো পরিৰারভূতা জনা অস্স অত্থীতি যসস্সিৰা, অথ ৰা যসস্সী চ যসস্সিৰা চাতি যসস্সিৰা. একদেসসরূপেকসেসোযং. ‘‘যসস্সিৰা’’তি পদস্স পন অত্থিভাৰে –

‘‘খত্তিযো জাতিসম্পন্নো, অভিজাতো যসস্সিৰা;

ধম্মরাজা ৰিদেহানং, পুত্তো উপ্পজ্জতে তৰা’’তি

ইদং নিদস্সনং. ‘‘যসস্সিৰা, যসস্সিৰা, যসস্সিৰন্তো. যসস্সিৰন্তং’’ ইচ্চাদি নেতব্বং. অত্থে দস্সনসীলং অত্থদস্সি, কিং তং? ঞাণং. অত্থদস্সি অস্স অত্থীতি অত্থদস্সিমা, এত্থ চ –

‘‘তং তত্থ গতিমা ধিতিমা, মুতিমা অত্থদস্সিমা;

সঙ্খাতা সব্বধম্মানং, ৰিধুরো এতদব্রৰী’’তি

ইদমেতস্সত্থস্স সাধকং ৰচনং. ‘‘অত্থদস্সিমা, অত্থদস্সিমা, অত্থদস্সিমন্তো. অত্থদস্সিমন্তং’’ ইচ্চাদি নেতব্বং. পাপং অস্স অত্থীতি পাপিমা, অকুসলরাসিসমন্নাগতো মারো. পুত্তা অস্স অত্থীতি পুত্তিমা, বহুপুত্তো. ‘‘সোচতি পুত্তেহি পুত্তিমা’’তি এত্থ হি বহুপুত্তো ‘‘পুত্তিমা’’তি ৰুচ্চতি. চন্দো অস্স অত্থীতি চন্দিমা. চন্দোতি চেত্থ চন্দৰিমানমধিপ্পেতং, চন্দৰিমানৰাসী পন দেৰপুত্তো ‘‘চন্দিমা’’তি. তথা হি ‘‘চন্দো উগ্গতো, পমাণতো চন্দো আযামৰিত্থারতো উব্বেধতো চ একূনপঞ্ঞাসযোজনো, পরিক্খেপতো তীহি যোজনেহি ঊনদিযড্ঢসতযোজনো’’তিআদীসু চন্দৰিমানং ‘‘চন্দো’’তি ৰুত্তং. ‘‘তথাগতং অরহন্তং, চন্দিমা সরণং গতো’’তিআদীসু পন চন্দদেৰপুত্তো ‘‘চন্দিমা’’তি. অপরো নযো – চন্দো অস্স অত্থীতি চন্দিমা. চন্দোতি চেত্থ চন্দদেৰপুত্তো অধিপ্পেতো, তন্নিৰাসট্ঠানভূতং পন চন্দৰিমানং ‘‘চন্দিমা’’তি. তথা হি ‘‘রাহু চন্দং পমুঞ্চস্সু, চন্দো মণিমযৰিমানে ৰসতী’’তিআদীসু চন্দদেৰপুত্তো ‘‘চন্দো’’তি ৰুত্তো.

‘‘যো হৰে দহরো ভিক্খু, যুঞ্জতি বুদ্ধসাসনে;

সোমংলোকংপভাসেতি, অব্ভা মুত্তোৰ চন্দিমা’’তি

আদীসু পন তন্নিৰাসট্ঠানভূতং চন্দৰিমানং ‘‘চন্দিমা’’তি ৰুত্তং. ইতি ‘‘চন্দো’’তি চ ‘‘চন্দিমা’’তি চ চন্দদেৰপুত্তস্সপি চন্দৰিমানস্সপি নামন্তি ৰেদিতব্বং. তত্র ‘‘পাপিমা পুত্তিমা চন্দিমা’’তি ইমানি পাপসদ্দাদিতো ‘‘তদস্সত্থি’’ ইচ্চেতস্মিং অত্থে পৰত্তস্স ইমন্তুপচ্চযস্স ৰসেন সিদ্ধিমুপাগতানীতি গহেতব্বানি.

ননু চ ভো মন্তুপচ্চযৰসেনেৰ সাধেতব্বানীতি? ন, কত্থচিপি অকারন্ততো মন্তুনো অভাৰা. ননু চ ভো এৰং সন্তেপি পাপ পুত্ত চন্দতো পঠমং ইকারাগমং কত্ৰা ততো মন্তুপচ্চযং কত্ৰা সক্কা সাধেতুন্তি? সক্কা রূপমত্তসিজ্ঝনতো, নযো পন সোভনো ন হোতি. তথা হি পাপ পুত্তাদিতো অকারন্ততো ইকারাগমং কত্ৰা মন্তুপচ্চযে ৰিধিযমানে অঞ্ঞেহি গুণযসাদীহি অকারন্তেহি ইকারাগমং কত্ৰা মন্তুপচ্চযস্স কাতব্বতাপসঙ্গো সিযা. ন হি অনেকেসু পাল়িসতসহস্সেসু কত্থচিপি অকারন্ততো গুণ যসাদিতো ইকারাগমেন সদ্ধিং মন্তুপচ্চযো দিস্সতি, অট্ঠানত্তা পন পাপ পুত্তাদিতো অকারন্ততো ইকারাগমং অকত্ৰা ইমন্তুপচ্চযে কতেযেৰ ‘‘পাপিমা পুত্তিমা’’তিআদীনি সিজ্ঝন্তীতি.

এৰং সন্তেপি ভো কস্মা কচ্চাযনপ্পকরণে মন্তুপচ্চযোৰ ৰুত্তো, ন ইমন্তুপচ্চযোতি? দ্ৰযম্পি ৰুত্তমেৰ. কথং ঞাযতীতি চে? যস্মা তত্থ ‘‘তপাদিতো সী, দণ্ডাদিতো ইক ঈ, মধ্ৰাদিতো রো, গুণাদিতো ৰন্তূ’’তি ইমানি চত্তারি সুত্তানি সন্নিহিততোদন্তসদ্দভাৰেন ৰত্ৰা মজ্ঝে ‘‘সত্যাদীহি মন্তূ’’তি অঞ্ঞথা সুত্তং ৰত্ৰা ততো সন্নিহিততোদন্তৰসেন ‘‘সদ্ধাদিতো ণা’’তি সুত্তং ৰুত্তং, তস্মা তত্থ ‘‘সত্যাদীহিমন্তূ’’তি ৰিসদিসং কত্ৰা ৰুত্তস্স সুত্তস্স ৰসেন ইমন্তু পচ্চযো চ ৰুত্তোতি ৰিঞ্ঞাযতি. পকতি হেসাচরিযানং যেন কেনচি আকারেন অত্তনো অধিপ্পাযৰিঞ্ঞাপনং. এত্থ চ দুতিযো অত্থো সরসন্ধিৰসেন গহেতব্বো. তথা হিস্স ‘‘সত্যাদীহি মন্তূ’’তি পঠমো অত্থো, ‘‘সত্যাদীহি ইমন্তূ’’তি দুতিযো অত্থো. ইতি ‘‘সেতো ধাৰতী’’তি পযোগে ৰিয ‘‘সত্যাদীহি মন্তূ’’তি সুত্তে ভিন্নসত্তিসমৰেতৰসেন অত্থদ্ৰযপটিপত্তি ভৰতি, তস্মা পরমসুখুমসুগম্ভীরত্থৰতা অনেন সুত্তেন কত্থচি সতি গতি সেতু গোইচ্চাদিতো মন্তুপচ্চযো ইচ্ছিতো. কত্থচি সতি পাপ পুত্তইচ্চাদিতো ইমন্তুপচ্চযো ইচ্ছিতোতি দট্ঠব্বং.

যস্মা পন সতিসদ্দো মন্তুৰসেন গতিধীসেথুগো ইচ্চাদীহি, ইমন্তুৰসেন পাপপুত্তাদীহি চ সমানগতিকত্তা তেসং পকারভাৰেন গহিতো, তস্মা এৰং সুত্তত্থো ভৰতি ‘‘সত্যাদীহি মন্তু সতিপ্পকারেহি সদ্দেহি মন্তুপচ্চযো হোতি ইমন্তুপচ্চযো চ যথারহং ‘তদস্সত্থি’ ইচ্চেতস্মিং অত্থে’’তি. অযং পনেত্থ অধিপ্পাযো – যথা ‘‘সতিমা’’তি এত্থ সতীতি ইকারন্ততো মন্তুপচ্চযো হোতি, তথা ‘‘গতিমা, ধীমা, সেতুমা, গোমা’’তিআদীসু ইকারন্ত ঈকারন্ত উকারন্তনিচ্চোকারন্ততো মন্তুপচ্চযো হোতি. যথা চ ‘‘সতিমা’’তি এত্থ ‘‘সতী’’তি ইকারন্ততো ইমন্তুপচ্চযো হোতি, তথা ‘‘গতিমা, পাপিমা, পুত্তিমা’’তিআদীসু ইকারন্ত অকারন্ততো ইমন্তুপচ্চযো হোতি. এৰং সতিপ্পকারেহি সদ্দেহি যথাসম্ভৰং মন্তু ইমন্তুপচ্চযা হোন্তীতি.

যজ্জেৰং পচ্চযদ্ৰযৰিধাযকং ‘‘দণ্ডাদিতো ইক ঈ’’তি সুত্তং ৰিয ‘‘সত্যাদিতো ইমন্তু মন্তূ’’তি ৰত্তব্বং, কস্মা নাৰোচাতি? তথা অৰচনে কারণমত্থি. যদি হি ‘‘দণ্ডাদিতো ইক ঈ’’তি সুত্তং ৰিয ‘‘সত্যাদিতো ইমন্তু মন্তূ’’তি সুত্তং ৰুত্তং সিযা, একক্খণেযেৰ ইমন্তু মন্তূনং ৰচনেন দণ্ডসদ্দতো সম্ভূতং ‘‘দণ্ডিকো দণ্ডী’’তি রূপদ্ৰযমিৰ সতিগতিআদিতোপি ৰিসদিসরূপদ্ৰযমিচ্ছিতব্বং সিযা, তঞ্চ নত্থি, তস্মা ‘‘সত্যাদিতো ইমন্তু মন্তূ’’তি ন ৰুত্তং. অপিচ তথা ৰুত্তে বৰ্হক্খরতায গন্থগরুতা সিযা. যস্মা চ সুত্তেন নাম অপ্পক্খরেন অসন্দিদ্ধেন সারৰন্তেন গূল়্হনিন্নযেন সব্বতোমুখেন অনৰজ্জেন ভৰিতব্বং. কচ্চাযনে চ যেভুয্যেন তাদিসানি গম্ভীরত্থানি সুৰিসদঞাণৰিসযভূতানি সুত্তানি দিস্সন্তি ‘‘উপাঝধিকিস্সরৰচনে, সরা সরে লোপ’’ন্তিআদীনি, ইদম্পি তেসমঞ্ঞতরং, তস্মা ‘‘সত্যাদিতো ইমন্তু মন্তূ’’তি ন ৰুত্তং. এৰং সুত্তোপদেসে অকতেপি ইমন্তুনোপি গহণত্থং ভিন্নসত্তিসমৰেতৰসেন ‘‘সত্যাদীহি মন্তূ’’তি ৰুত্তন্তি দট্ঠব্বং.

অপরো নযো – ‘‘তপাদিতো সী’’তিআদীসু তোদন্তসদ্দস্স বহুৰচনন্ততা ন সুট্ঠু পাকটা তোপচ্চযস্স একত্থবৰ্হত্থেসু ৰত্তনতো, ‘‘সত্যাদীহি মন্তূ’’তি এত্থ পন হিসদ্দস্স বহুৰচনত্থতা অতীৰ পাকটা, তস্মা বহুৰচনগ্গহণেন ইমন্তু পচ্চযো হোতীতিপি দট্ঠব্বং. ননু চ ভো ৰিনাপি ইমন্তুপচ্চযেন পাপমস্সত্থীতি পাপী, পাপী এৰ পাপিমাতি সকত্থে মাপচ্চযে কতেযেৰ ‘‘পাপিমা পুত্তিমা’’তিআদীনি সিজ্ঝন্তি ‘‘ছট্ঠমো সো পরাভৰো’’তি এত্থ মপচ্চযেন ‘‘ছট্ঠমো’’তি পদং ৰিযাতি? অতিনযঞ্ঞূ ভৰং, অতিনযঞ্ঞূ নামাতি ভৰং ৰত্তব্বো, ন পন ভৰং সদ্দগতিং জানাতি, সদ্দগতিযো চ নাম বহুৰিধা. তথা হি ছট্ঠোযেৰ ছট্ঠমো, ‘‘সুত্তমেৰ সুত্তন্তো’’তিআদীসু পুরিসনযেন যোজেতব্বা সদ্দগতি, ‘‘দেৰোযেৰ দেৰতা’’তিআদীসু কঞ্ঞানযেন যোজেতব্বা সদ্দগতি, ‘‘দিট্ঠি এৰ দিট্ঠিগত’’ন্তিআদীসু চিত্তনযেন যোজেতব্বা সদ্দগতি. এৰংৰিধাসু সদ্দগতীসু ‘‘পাপী এৰ পাপিমা’’তিআদিকং কতরং সদ্দগতিং ৰদেসি? ‘‘সত্থা রাজা ব্রহ্মা সখা অত্তা সা পুমা’’তিআদীসু চ কতরং সদ্দগতিং ৰদেসি? কতরসদ্দন্তোগধং কতরায চ নামিকপদমালাযং যোজেতব্বং মঞ্ঞসীতি? সো এৰং পুট্ঠো অদ্ধা উত্তরি কিঞ্চি অদিস্ৰা তুণ্হী ভৰিস্সতি, তস্মা তাদিসো নযো ন গহেতব্বো. তাদিসস্মিঞ্হি নযে ‘‘পাপিমতা পাপিমতো’’তিআদীনি রূপানি ন সিজ্ঝন্তি, ইমন্তুপচ্চযনযেন পন সিজ্ঝন্তি, তস্মা অযমেৰ নযো পসত্থতরো আযস্মন্তেহি সম্মা চিত্তে ঠপেতব্বো. অত্রিদং নিদস্সনং –

‘‘জযো হি বুদ্ধস্স সিরীমতো অযং,

মারস্স চ পাপিমতো পরাজযো;

উগ্ঘোসযুং বোধিমণ্ডে পমোদিতা,

জযং তদা দেৰগণা মহেসিনো’’তি চ,

‘‘সাখাপত্তফলূপেতো, খন্ধিমাৰমহাদুমো’’তি চ.

পাপিমা, পাপিমা, পাপিমন্তো. পাপিমন্তং. সেসং নেয্যং, এস নযো ‘‘খন্ধিমা, পুত্তিমা’’তিআদীসুপি.

ইদানি যথাপাৰচনং কিঞ্চিদেৰ হিমৰন্তু সতিমন্তাদীনং ৰিসেসং ব্রূম. হিমৰন্তোৰ পব্বতো. সতিমং ভিক্খুং. বন্ধুমং রাজানং. চন্দিমং দেৰপুত্তং. সতিমস্স ভিক্খুনো. বন্ধুমস্স রঞ্ঞো. ইদ্ধিমস্স চ পরস্স চ একক্খণে চিত্তং উপ্পজ্জতি. ইচ্চাদি ৰিসেসো ৰেদিতব্বো. অপিচেত্থ ‘‘আযস্মন্তা’’তি দ্ৰিন্নং ৰত্তব্বৰচনং, ‘‘আযস্মন্তো’’তি বহূনং ৰত্তব্বৰচনন্তি অযম্পি ৰিসেসো ৰেদিতব্বো. তথা হি ‘‘দ্ৰিন্নং আরোচেন্তেন ‘আযস্মন্তা ধারেন্তূ’তি, তিণ্ণং আরোচেন্তেন ‘আযস্মন্তো ধারেন্তূ’তি ৰত্তব্ব’’ন্তি ৰুত্তং. ‘‘তিণ্ণ’’ন্তি চেত্থ কথাসীসমত্তং, তেন চতুন্নম্পি পঞ্চন্নম্পি অতিরেকসতানম্পীতি দস্সিতং হোতি. বহৰোহি উপাদায ‘‘উদ্দিট্ঠা খো আযস্মন্তো চত্তারো পারাজিকা ধম্মা’’তিআদিকা পাল়িযো ঠপিতা. তত্থ ‘‘আযস্মন্তা’’তিদং ৰিনযৰোহারৰসেন দ্ৰেযেৰ সন্ধায ৰুত্তত্তা ন সব্বসাধারণং. ৰিনযৰোহারঞ্হি ৰজ্জেত্ৰা অঞ্ঞস্মিং ৰোহারে ন পৰত্ততি. ‘‘আযস্মন্তো’’তিদং পন সব্বত্থ পৰত্ততীতি দ্ৰিন্নং ৰিসেসো ৰেদিতব্বো.

তত্র ‘‘হিমৰন্তো’’তি ইদং যেভুয্যেনেকৰচনং ভৰতি, কত্থচি বহুৰচনম্পি, তেনাহ নিরুত্তিপিটকে থেরো ‘‘হিমৰা তিট্ঠতি, হিমৰন্তো তিট্ঠন্তী’’তি. ‘‘হিমৰন্তোৰ পব্বতো’’তি অযং একৰচননযো যথারুতপাল়িৰসেন গহেতব্বো. যথারুতপাল়ি চ নাম –

‘‘দূরে সন্তো পকাসন্তি, হিমৰন্তোৰ পব্বতো;

অসন্তেত্থ ন দিস্সন্তি, রত্তিং খিত্তা যথা সরা.

অহং তেন সমযেন, নাগরাজা মহিদ্ধিকো;

অতুলো নাম নামেন, পুঞ্ঞৰন্তো জুতিন্ধরো.

গতিমন্তো সতিমন্তো, ধিতিমন্তো চ সো ইসি;

সদ্ধম্মধারকো থেরো, আনন্দো রতনাকরো’’

ইচ্চাদি. এত্থ ‘‘পুঞ্ঞৰন্তো’’তিআদীনি অনেকেসু ঠানেসু বহুৰচনভাৰেন পুনপ্পুনং ৰদন্তানিপি কত্থচি একৰচনানি হোন্তি, একৰচনভাৰো চ নেসং গাথাৰিসযে দিস্সতি, তস্মা তানি যথাপাৰচনং গহেতব্বানি.

এৰং হিমৰন্তুসতিমন্তুসদ্দাদীনং ৰিসেসং ঞত্ৰা পুন লিঙ্গন্তৰসেন দ্ৰিলিঙ্গকপদানমত্থো চ পকতিরূপস্স নামিকপদমালা চ পদানং সদিসাসদিসতা চ ৰৰত্থপেতব্বা.

তত্র হি ‘‘সিরিমা’’তি পদং সুতিসামঞ্ঞৰসেন লিঙ্গদ্ৰযে ৰত্তনতো দ্ৰিধা ভিজ্জতি. ‘‘সিরিমা পুরিসো’’তি হি অত্থে আকারন্তং পুল্লিঙ্গং, ‘‘সিরিমা নাম দেৰী’’তি অত্থে আকারন্তং ইত্থিলিঙ্গং, উভযম্পেতং উকারন্ততাপকতিকা. অথ ৰা পন পচ্ছিমং আকারন্ততাপকতিকং, সিরী যস্স অত্থি সো সিরিমাতি পুল্লিঙ্গৰসেন নিব্বচনং, সিরী যস্সা অত্থি সা সিরিমাতি ইত্থিলিঙ্গৰসেন নিব্বচনং. অত্রিমানি কিঞ্চাপি সুতিৰসেন নিব্বচনত্থৰসেন চ অঞ্ঞমঞ্ঞং সমানত্থানি, তথাপি পুরিসপদত্থইত্থিপদত্থৰাচকত্তা ভিন্নত্থানীতি ৰেদিতব্বানি. এস নযো অঞ্ঞেসুপি ঈদিসেসু ঠানেসু নেতব্বো. সিরিমা, সিরিমা, সিরিমন্তো. সিরিমন্তং, সিরিমন্তে. সিরিমতা, সিরিমন্তেন. গুণৰন্তুসদ্দস্সেৰ নামিকপদমালা. সিরিমা, সিরিমা, সিরিমাযো. সিরিমং, সিরিমা, সিরিমাযো. সিরিমায. ৰক্খমানকঞ্ঞানযেন ঞেয্যা. এৰং দ্ৰিধা ভিন্নানং সমানসুতিকসদ্দানং নামিকপদমালাসু পদানং সদিসাসদিসতা ৰৰত্থপেতব্বা. সমাননিব্বচনত্থস্সপি হি অসমানসুতিকস্স ‘‘সিরিমা’’তি সদ্দস্স নামিকপদমালাযং পদানং ইমেহি পদেহি কাচিপি সমানতা ন লব্ভতি. অত্রিদং ৰুচ্চতি –

‘‘সিরিমা’’তি পদং দ্ৰেধা, পুমিত্থীসু পৰত্তিতো;

ভিজ্জতীতি ৰিভাৰেয্য, এত্থ পুল্লিঙ্গমিচ্ছিতং.

ইতি অভিভৰিতা পদেন ৰিসদিসানি গুণৰাসতিমাদীনি পদানি দস্সিতানি সদ্ধিং নামিকপদমালাহি. ইদানি অপরানিপি তব্বিসদিসানি পদানি দস্সেস্সাম সদ্ধিং নামিকপদমালাহি. সেয্যথিদং?

রাজা ব্রহ্মা সখা অত্তা, আতুমা সা পুমা রহা;

দল়্হধম্মা চ পচ্চক্খ-ধম্মা চ ৰিৰটচ্ছদা.

ৰত্তহা চ তথা ৰুত্ত-সিরা চেৰ যুৰাপি চ;

মঘৰ অদ্ধ মুদ্ধাদি, ৰিঞ্ঞাতব্বা ৰিভাৰিনা.

এত্থ ‘‘সা’’তি পদমেৰ আকারন্ততাপকতিকমাকারন্তং, সেসানি পন অকারন্ততাপকতিকানি আকারন্তানি.

রাজা, রাজা, রাজানো. রাজানং, রাজং, রাজানো. রঞ্ঞা, রাজিনা, রাজূহি, রাজূভি. রঞ্ঞো, রাজিনো, রঞ্ঞং, রাজূনং, রাজানং. রঞ্ঞা, রাজূহি, রাজূভি. রঞ্ঞো, রাজিনো, রঞ্ঞং, রাজূনং, রাজানং. রঞ্ঞে, রাজিনি, রাজূসু. ভো রাজ, ভৰন্তো রাজানো, ভৰন্তো রাজা ইতি ৰা, অযমম্হাকং রুচি.

নিরুত্তিপিটকাদীসু ‘‘রাজা’’তি বহুৰচনং ন আগতং, চূল়নিরুত্তিযং পন আগতং. কিঞ্চাপি নিরুত্তিপিটকাদীসু ন আগতং, তথাপি ‘‘নেতাদিসা সখা হোন্তি, লব্ভা মে জীৰতো সখা’’তি পাল়িযং বহুৰচনেকৰচনৰসেন ‘‘সখা’’তি পদস্স দস্সনতো ‘‘রাজা’’তি বহুৰচনং ইচ্ছিতব্বমেৰ. তথা ‘‘ব্রহ্মা, অত্তা’’ইচ্চাদীনিপি বহুৰচনানি তগ্গতিকত্তা ৰিনা কেনচি রূপৰিসেসেন.

এত্থ চ ‘‘গহপতিকো নাম ঠপেত্ৰা রাজং রাজভোগং ব্রাহ্মণং অৰসেসো গহপতিকো নামা’’তি দস্সনতো রাজন্তি ৰুত্তং, ইদং পন নিরুত্তিপিটকে ন আগতং. ‘‘সব্বদত্তেন রাজিনা’’তি দস্সনতো ‘‘রাজিনা’’তি ৰুত্তং. ‘‘আরাধযতি রাজানং, পূজং লভতি ভত্তুসূ’’তি দস্সনতো চতুত্থীছট্ঠীৰসেন ‘‘রাজান’’ন্তি ৰুত্তং. কচ্চাযনরূপসিদ্ধিগন্থেসু পন ‘‘রাজেন, রাজেহি, রাজেভি. রাজেসূ’’তি পদানি ৰুত্তানি. চূল়নিরুত্তিনিরুত্তিপিটকেসু তানি নাগতানি, অনাগতভাৰোযেৰ তেসং যুত্ততরো পাল়িযং অদস্সনতো, তস্মা এত্থেতানি অম্হেহি ন ৰুত্তানি. পাল়িনযে হি উপপরিক্খিযমানে ঈদিসানি পদানি সমাসেযেৰ পস্সাম, ন পনাঞ্ঞত্র, অত্রিমে পযোগা – ‘‘আৰুত্থং ধম্মরাজেনা’’তি চ, ‘‘সিৰিরাজেন পেসিতো’’তি চ, ‘‘পজাপতিস্স দেৰরাজস্স ধজগ্গ’’ন্তি চ, ‘‘নিক্খমন্তে মহারাজে, সিৰীনং রট্ঠৰড্ঢনে’’তি চ, এৰং পাল়িনযে উপপরিক্খিযমানে ‘‘রাজেনা’’তিআদীনি সমাসেযেৰ পস্সাম, ন কেৰলং পাল়িনযে পোরাণট্ঠকথানযেপি উপপরিক্খিযমানে সমাসেযেৰ পস্সাম, ন পনাঞ্ঞত্র, এৰং সন্তেপি সুট্ঠু উপপরিক্খিতব্বমিদং ঠানং. কো হি নাম সাট্ঠকথে তেপিটকে বুদ্ধৰচনে সব্বসো নযং সল্লক্খেতুং সমত্থো অঞ্ঞত্র পভিন্নপটিসম্ভিদেহি খীণাসৰেহি.

এত্থ চ সমাসন্তগতরাজ-সদ্দস্স নামিকপদমালাযো দ্ৰিধা ৰুচ্চন্তে ওকারন্তাকারন্তৰসেন. তত্রোকারন্তা ‘‘মহারাজো যুৰরাজো সিৰিরাজো ধম্মরাজো’’ইচ্চেৰমাদযো ভৰন্তি. আকারন্তা পন ‘‘মহারাজা যুৰরাজা সিৰিরাজা ধম্মরাজা’’ইচ্চেৰমাদযো. এত্থ কিঞ্চাপি পাল়িযং পোরাণট্ঠকথাসু চ ‘‘মহারাজো’’তিআদীনি ন সন্তি, তথাপি ‘‘সব্বমিত্তো সব্বসখো, সব্বভূতানুকম্পকো’’তি পাল়িযং ‘‘সব্বসখো’’তি দস্সনতো ‘‘মহারাজো’’তিআদীনিপি অৰস্সমিচ্ছিতব্বানি. তথা হি সমাসেসু ‘‘ধম্মরাজেন, ধম্মরাজস্সা’’তিআদীনি দিস্সন্তি. এতানি ওকারন্তরূপানি এৰ, নাকারন্তরূপানি. মহারাজো, মহারাজা. মহারাজং, মহারাজে. মহারাজেন, মহারাজেহি, মহারাজেভি. মহারাজস্স, মহারাজানং. মহারাজা, মহারাজস্মা, মহারাজম্হা, মহারাজেহি, মহারাজেভি. মহারাজস্স, মহারাজানং. মহারাজে, মহারাজস্মিং, মহারাজম্হি, মহারাজেসু. ভো মহারাজ, ভৰন্তো মহারাজা. কচ্চাযনচূল়নিরুত্তিনযেহি পন ‘‘ভো মহারাজা’’ইতি একৰচনবহুৰচনানিপি দট্ঠব্বানি. যথা ‘‘মহারাজো’’তি ওকারন্তপদস্স ৰসেন, এৰং ‘‘সিৰিরাজো ধম্মরাজো দেৰরাজো’’তিআদীনম্পি ওকারন্তপদানং ৰসেন পকতিরূপস্স নামিকপদমালা যোজেতব্বা.

অযং পনাকারন্তৰসেন নামিকপদমালা –

মহারাজা, মহারাজা, মহারাজানো. মহারাজানং, মহারাজং, মহারাজানো. মহারঞ্ঞা, মহারাজিনা, মহারাজূহি, মহারাজূভি. মহারঞ্ঞো, মহারাজিনো, মহারঞ্ঞং, মহারাজূনং. মহারঞ্ঞা, মহারাজূহি, মহারাজূভি. মহারঞ্ঞো, মহারাজিনো, মহারঞ্ঞং, মহারাজূনং. মহারঞ্ঞে, মহারাজিনি, মহারাজূসু. ভো মহারাজ, ভৰন্তো মহারাজানো.

ইধাপি পকরণদ্ৰযনযেন ‘‘ভো মহারাজা’’ ইতি একৰচনবহুৰচনানিপি দট্ঠব্বানি. যথা চ ‘‘মহারাজা’’তি আকারন্তপদস্স ৰসেন, এৰং ‘‘সিৰিরাজা, ধম্মরাজা, দেৰরাজা’’তিআদীনম্পি আকারন্তপদানং ৰসেন পকতিরূপস্স নামিকপদমালা যোজেতব্বা.

ইধ অপরাপি অত্থস্স পাকটীকরণত্থং ক্রিযাপদেহি সদ্ধিং যোজেত্ৰা আকারন্তোকারন্তানং মিস্সকৰসেন নামিকপদমালা ৰুচ্চতে –

মহারাজা, মহারাজো তিট্ঠতি, মহারাজানো, মহারাজা তিট্ঠন্তি. মহারাজানং, মহারাজং পস্সতি, মহারাজানো, মহারাজে পস্সতি. মহারঞ্ঞা, মহারাজিনা, মহারাজেন কতং, মহারাজূহি, মহারাজূভি, মহারাজেহি, মহারাজেভি কতং. মহারঞ্ঞো, মহারাজিনো, মহারাজস্স দীযতে, মহারঞ্ঞা, মহারাজা, মহারাজস্মা, মহারাজম্হা নিস্সটং, মহারাজূহি, মহারাজূভি, মহারাজেহি, মহারাজেভি নিস্সটং. মহারঞ্ঞো, মহারাজিনো, মহারাজস্স পরিগ্গহো, মহারঞ্ঞং, মহারাজূনং, মহারাজানং পরিগ্গহো. মহারঞ্ঞে, মহারাজিনি, মহারাজে, মহারাজস্মিং, মহারাজম্হি পতিট্ঠিতং, মহারাজূসু, মহারাজেসু পতিট্ঠিতং. ভো মহারাজ ত্ৰং তিট্ঠ, ভোন্তো মহারাজানো, মহারাজা তুম্হে তিট্ঠথাতি. এৰং ‘‘যুৰরাজা, যুৰরাজো’’তিআদীসুপি.

কেচেত্থ ৰদেয্যুং ‘‘কস্মা পকরণকত্তুনা ইমস্মিং ঠানে মহন্তো ৰাযামো চ মহন্তো চ পরক্কমো কতো, নন্ৰেতেসুপি পদেসু কানিচি বুদ্ধৰচনে ৰিজ্জন্তি, কানিচি ন ৰিজ্জন্তীতি? ৰিঞ্ঞূহি তে এৰং ৰত্তব্বা ‘‘পকরণকত্তারেনেত্থ সো চ মহন্তো ৰাযামো সো চ মহন্তো পরক্কমো সাট্ঠকথে নৰঙ্গে সত্থুসাসনে সদ্দেসু চ অত্থেসু চ সোতারানং সুট্ঠু কোসল্লুপ্পাদনেন সাসনস্সোপকারত্থং কতো, যানি চেতানি তেন পদানি দস্সিতানি, এতেসু কানিচি বুদ্ধৰচনে ৰিজ্জন্তি, কানিচি ন ৰিজ্জন্তি. এত্থ যানি বুদ্ধৰচনে ৰিজ্জন্তি, তানি ৰিজ্জমানৰসেন গহিতানি. যানি ন ৰিজ্জন্তি, তানি পোরাণট্ঠকথাদীসু ৰিজ্জমানৰসেন পাল়িনযৰসেন চ গহিতানী’’তি. অত্রাযং সঙ্খেপতো অধিপ্পাযৰিভাৰনা –

‘‘ইদং ৰত্ৰা মহারাজা, কংসো বারাণসিগ্গহো;

ধনুং তূণিঞ্চ নিক্খিপ্প, সংযমং অজ্ঝুপাগমী’’তি

ইদং আকারন্তস্স মহারাজসদ্দস্স নিদস্সনং. যস্মা ‘‘সব্বসখো’’তি পাল়ি ৰিজ্জতি, তস্মা তেন নযেন ‘‘মহারাজো’’তিপি ওকারন্তো দিট্ঠো নাম হোতি পুরিসনযেন যোজেতব্বো চ. তেনেৰ চ ‘‘তমব্রৰি মহারাজা. নিক্খমন্তে মহারাজে’’তিআদীনি দিস্সন্তি.

এৰং মহারাজসদ্দস্স ওকারন্তত্তে সিদ্ধে ‘‘মহারাজা, মহারাজস্মা, মহারাজম্হা’’তি পঞ্চমিযা একৰচনঞ্চ ‘‘মহারাজে, মহারাজস্মিং, মহারাজম্হী’’তি সত্তমিযা একৰচনঞ্চ সিদ্ধানি এৰ হোন্তি পাল়িযং অৰিজ্জমানানম্পি নযৰসেন গহেতব্বত্তা. ‘‘রাজেন, রাজস্সা’’তিআদীনি পন নযৰসেন গহেতব্বানি ন হোন্তি. কস্মাতি চে? যস্মা ‘‘রাজা ব্রহ্মা সখা অত্তা’’ইচ্চেৰমাদীনি ‘‘পুরিসো উরগো’’তিআদীনি ৰিয অঞ্ঞমঞ্ঞং সব্বথা সদিসানি ন হোন্তি. তথা হি নেসং ‘‘রঞ্ঞা ব্রহ্মুনা সখিনা অত্তনা অত্তেন সানা পুমুনা’’তিআদীনি ৰিসদিসানিপি রূপানি ভৰন্তি, তস্মা তানি ন সক্কা নযৰসেন জানিতুং. এৰং দুজ্জানত্তা পন পাল়িযং পোরাণট্ঠকথাসু চ যথারুতপদানেৰ গহেতব্বানি. মহারাজসদ্দাদীনং পন ওকারন্তভাৰে সিদ্ধেযেৰ ‘‘পুরিসনযোগধা ইমে সদ্দা’’তি নযগ্গহণং দিস্সতি, তস্মা অম্হেহি নযৰসেন ‘‘মহারাজা, মহারাজস্মা’’তিআদীনি ৰুত্তানি. যথা হি –

‘‘এতঞ্হি তে দুরাজানং, যং সেসি মতসাযিকং;

যস্স তে কড্ঢমানস্স, হত্থা দণ্ডোন মুচ্চতী’’তি

এত্থ ‘‘হত্থা’’তি, ‘‘অত্তদণ্ডা ভযং জাত’’ন্তি এত্থ পন ‘‘দণ্ডা’’তি চ ওকারন্তস্স পঞ্চমিযেকৰচনস্স দস্সনতো ‘‘উরগা, পটঙ্গা, ৰিহগা’’তিআদীনিপি ওকারন্তানি পঞ্চমিযেকৰচনানি গহেতব্বানি হোন্তি. যথা চ ‘‘দাঠিনি মাতিমঞ্ঞৰ্হো, সিঙ্গালো মম পাণদো’’তি এত্থ ‘‘মঞ্ঞৰ্হো’’তি, ‘‘সুদ্ধা সুদ্ধেহি সংৰাসং, কপ্পযৰ্হো পতিস্সতা’’তি এত্থ পন ‘‘কপ্পযৰ্হো’’তি চ ক্রিযাপদস্স দস্সনতো ‘‘গচ্ছৰ্হো, ভুঞ্জৰ্হো, সযৰ্হো’’তিআদীনিপি গহেতব্বানি হোন্তি. গণ্হন্তি চ তাদিসানি পদরূপানি সাসনে সুকুসলা কুসলা, তস্মা অম্হেহিপি নযগ্গাহৰসেন ‘‘মহারাজা, মহারাজস্মা’’তিআদীনি ৰুত্তানি. নযগ্গাহৰসেন পন গহণে অসতি কথং নামিকপদমালা পরিপুণ্ণা ভৰিস্সন্তি, সতিযেৰ তস্মিং পরিপুণ্ণা ভৰন্তি.

তথা হি বুদ্ধৰচনে অনেকসতসহস্সানি নামিকপদানি ক্রিযাপদানি চ পাটিএক্কং পাটিএক্কং একৰচনবহুৰচনকাহি সত্তহি অট্ঠহি ৰা নামৰিভত্তীহি ছন্নৰুতিযা চ আখ্যাতিকৰচনেহি যোজিতানি ন সন্তি, নযৰসেন পন সন্তিযেৰ, ইতি নযৰসেন ‘‘মহারাজা, মহারাজস্মা’’তিআদীনি অম্হেহি ঠপিতানি. ‘‘মহারাজা তিট্ঠন্তি, মহারাজা তুম্হে তিট্ঠথা’’তি ইমানি পন ‘‘অথ খো চত্তারো মহারাজা মহতিযা চ যক্খসেনায মহতিযা চ কুম্ভণ্ডসেনাযা’’তি দস্সনতো,

‘‘চত্তারো তে মহারাজা, সমন্তা চতুরো দিসা;

দদ্দল়্হমানা অট্ঠংসু, ৰনে কাপিলৰত্থৰে’’তি

দস্সনতো চ ৰুত্তানি. ‘‘মহারাজ’’ন্তিআদীনিপি পাল়িঞ্চ পাল়িনযঞ্চ দিস্ৰা এৰ ৰুত্তানি. অসমাসে ‘‘রাজং, রাজেনা’’তিআদীনি ন পস্সাম, তস্মা সুট্ঠু ৰিচারেতব্বমিদং ঠানং. ইদঞ্হি দুদ্দসং ৰীরজাতিনা জানিতব্বট্ঠানং. সচে পনাযস্মন্তো বুদ্ধৰচনে ৰা পোরাণিকাসু ৰা অট্ঠকথাসু অসমাসে ‘‘রাজং, রাজেনা’’তিআদীনি পস্সেয্যাথ, তদা সাধুকং মনসি করোথ. কো হি নাম সব্বপ্পকারেন বুদ্ধৰচনে ৰোহারপ্পভেদং জানিতুং সমত্থো অঞ্ঞত্র পভিন্নপটিসম্ভিদেহি মহাখীণাসৰেহি.

ৰুত্তঞ্হেতং ভগৰতা –

‘‘ৰীততণ্হো অনাদানো, নিরুত্তিপদকোৰিদো;

অক্খরানং সন্নিপাতং, জঞ্ঞা পুব্বাপরানি চা’’তি.

ব্রহ্মা, ব্রহ্মা, ব্রহ্মানো. ব্রহ্মানং, ব্রহ্মং, ব্রহ্মানো. ব্রহ্মুনা, ব্রহ্মেহি, ব্রহ্মেভি, ব্রহ্মূহি, ব্রহ্মূভি. ব্রহ্মস্স, ব্রহ্মুনো, ব্রহ্মানং, ব্রহ্মূনং. ব্রহ্মুনা, ব্রহ্মেহি, ব্রহ্মেভি, ব্রহ্মূহি, ব্রহ্মূভি. ব্রহ্মস্স, ব্রহ্মুনো, ব্রহ্মানং, ব্রহ্মূনং. ব্রহ্মনি, ব্রহ্মেসু, ভো ব্রহ্ম, ভো ব্রহ্মে, ভৰন্তো ব্রহ্মানো.

যমকমহাথেররুচিযা ‘‘ভো ব্রহ্মা’’ইতি বহুৰচনং ৰা. এত্থ পন ‘‘পণ্ডিতপুরিসেহি দেৰেহি ব্রহ্মূহী’’তি টীকাৰচনস্স দস্সনতো, ‘‘ব্রহ্মূনং ৰচীঘোসো হোতী’’তি চ ‘‘ব্রহ্মূনং ৰিমানাদীসু ছন্দরাগো কামাসৰো ন হোতী’’তি চ অট্ঠকথাৰচনস্স দস্সনতো, ‘‘ৰিহিংসসঞ্ঞী পগুণং ন ভাসিং, ধম্মং পণীতং মনুজেসু ব্রহ্মে’’তি আহচ্চভাসিতস্স চ দস্সনতো ‘‘ব্রহ্মূহি, ব্রহ্মূভি, ব্রহ্মূনং, ব্রহ্মে’’তি পদানি ৰুত্তানি, এতানি চূল়নিরুত্তিনিরুত্তিপিটককচ্চাযনেসু ন আগতানি.

সখা, সখা, সখিনো, সখানো, সখাযো. সখং, সখারং, সখানং, সখিনো, সখানো, সখাযো. সখিনা, সখারেহি, সখারেভি, সখেহি, সখেভি. সখিস্স, সখিনো, সখীনং, সখারানং, সখানং. সখারস্মা, সখিনা, সখারেহি, সখারেভি, সখেহি, সখেভি. সখিস্স, সখিনো, সখীনং, সখারানং, সখানং. সখে, সখেসু, সখারেসু. ভো সখ, ভো সখা, ভো সখি, ভো সখী, ভো সখে, ভৰন্তো সখিনো, সখানো, সখাযো.

যমকমহাথেরমতেন ‘‘ভো সখা’’ইতি বহুৰচনং ৰা. পাল়িযং পন সুৰণ্ণকক্কটজাতকে ‘‘হরে সখা কিস্স নু মং জহাসী’’তি দীঘৰসেন ৰুত্তো সখাসদ্দো আলপনেকৰচনং, তস্মা যমকমহাথেরনযো ন যুজ্জতীতি চে? নো ন যুজ্জতি. যস্মা ‘‘নেতাদিসা সখা হোন্তি, লব্ভা মে জীৰতো সখা’’তি মনোজজাতকে সখাসদ্দো একৰচনম্পি হোতি বহুৰচনম্পি. তথা হি তত্থ পঠমপাদে বহুৰচনং, দুতিযপাদে পনেকৰচনং, তস্মা যমকমহাথেরেন পচ্চত্তালপনবহুৰচনট্ঠানে সখাসদ্দো ৰুত্তো. এত্থ চ ‘‘সব্বমিত্তো সব্বসখো, সব্বভূতানুকম্পকো’’তি পাঠানুলোমেন সমাসে লব্ভমানস্স সখসদ্দস্স নামিকপদমালা ভৰতি ‘‘সব্বসখো, সব্বসখা, সব্বসখং, সব্বসখে’’তিআদিনা পুরিসনযেন. তত্রাযং সমাসৰিগ্গহো – সব্বেসং জনানং সখা, সব্বে ৰা জনা সখিনো এতস্সাতি সব্বসখো, যথা সব্বৰেরীতি.

অত্তা, অত্তা, অত্তানো. অত্তানং, অত্তং, অত্তানো. অত্তনা, অত্তেন, অত্তনেহি, অত্তনেভি. অত্তনো, অত্তানং. অত্তনা, অত্তনেহি, অত্তনেভি. অত্তনো, অত্তানং. অত্তনি, অত্তনেসু. ভো অত্ত, ভৰন্তো অত্তা, ভোন্তো অত্তানো.

এত্থ পন অত্তং নিরঙ্কত্ৰান পিযানি সেৰতি.

‘‘সচে গচ্ছসি পঞ্চালং, খিপ্প’মত্তং জহিস্সসি;

মিগং পন্থানুপন্নংৰ, মহন্তং ভযমেস্সতী’’তি

পাল়ীসু ‘‘অত্ত’’ন্তি দস্সনতো ‘‘অত্ত’’ন্তি ইধ ৰুত্তং, ‘‘অত্তেন ৰা অত্তনিযেন ৰা’’তি পাল়িদস্সনতো পন ‘‘অত্তেনা’’তি. চূল়নিরুত্তিযং পন ‘‘অত্তস্সা’’তি চতুত্থীছট্ঠীনমেকৰচনং আগতং, এতং কচ্চাযনে নিরুত্তিপিটকে চ ন দিস্সতি. কত্থচি পন ‘‘অত্তেসূ’’তি আগতং. সব্বানেতানি সাট্ঠকথং জিনতন্তিং ওলোকেত্ৰা গহেতব্বানি.

‘‘আতুমা, আতুমা, আতুমানো. আতুমানং, আতুমং, আতুমানো. আতুমেন, আতুমেহি, আতুমেভী’’তিআদিনা পুরিসনযেন ৰত্ৰা ‘‘ভো আতুম, ভৰন্তো আতুমা, আতুমানো’’তি ৰত্তব্বং.

তত্র অত্তসদ্দস্স সমাসে ‘‘ভাৰিতত্তো, ভাৰিতত্তা. ভাৰিতত্তং, ভাৰিতত্তে. ভাৰিতত্তেন, ভাৰিতত্তেহি, ভাৰিতত্তেভী’’তি পুরিসনযেনেৰ নামিকপদমালা যোজেতব্বা.

সা, সা, সানো. সানং, সানে. সানা, সানেহি, সানেভি. সাস্স, সানং. সানা, সানেহি, সানেভি. সাস্স, সানং. সানে, সানেসু. ভো সা, ভৰন্তো সানো. সা ৰুচ্চতি সুনখো.

এত্থ চ ‘‘ন যত্থ সা উপট্ঠিতো হোতি. সাৰ ৰারেন্তি সূকর’’ন্তি নিদস্সনপদানি. কেচি পন সাসদ্দস্স দুতিযাততিযাদীসু ‘‘সং, সে. সেনা’’তিআদীনি রূপানি ৰদন্তি, তং ন যুত্তং. ন হি তানি ‘‘সং, সে. সেনা’’তিআদীনি রূপানি বুদ্ধৰচনে চেৰ অট্ঠকথাদীসু চ নিরুত্তিপিটকে চ দিস্সন্তি. এৰং পন নিরুত্তিপিটকে ৰুত্তং ‘‘সা তিট্ঠতি, সানো তিট্ঠন্তি. সানং পস্সতি, সানে পস্সতি. সানা কতং, সানেহি কতং, সানেভি কতং. সাস্স দীযতে, সানং দীযতে. সানা নিস্সটং, সানেহি নিস্সটং, সানেভি নিস্সটং. সাস্স পরিগ্গহো, সানং পরিগ্গহো. সানে পতিট্ঠিতং, সানেসু পতিট্ঠিতং. ভো সা, ভৰন্তো সানো’’তি, তস্মা নিরুত্তিপিটকে ৰুত্তনযেনেৰ নামিকপদমালা গহেতব্বা.

অত্রিদং ৰত্তব্বং – যথা ‘‘সেহি দারেহি অসন্তুট্ঠো’’তিআদীসু পুল্লিঙ্গে ৰত্তমানস্স ‘‘সকো’’ইতি অত্থৰাচকস্স সসদ্দস্স ‘‘অত্তনো অযন্তি সো’’তি এতস্মিং অত্থে ‘‘সো, সা. সং, সে. সেন, সেহি, সেভি. সস্স, সানং. সা, সস্মা, সম্হা, সেহি, সেভি. সস্স, সানং. সে, সস্মিং, সম্হি, সেসূ’’তি পুরিসনযেন রূপানি ভৰন্তি, ন তথা সুনখৰাচকস্স সাসদ্দস্স রূপানি ভৰন্তি. যথা ৰা ‘‘হিংসন্তি অত্তসম্ভূতা, তচসারংৰ সং ফলং. সানি কম্মানি তপ্পেন্তি, কোসলং সেন’সন্তুট্ঠং, জীৰগ্গাহং অগাহযী’’তিআদীসু নপুংসকলিঙ্গে ৰত্তমানস্স সকমিচ্চত্থৰাচকস্স সসদ্দস্স ‘‘সং, সানি, সা. সং, সানি, সে. সেন, সেহি, সেভি. সস্স, সানং. সা, সস্মা, সম্হা, সেহি, সেভি. সস্স, সানং. সে, সস্মিং, সম্হি, সেসূ’’তি চিত্তনযেন রূপানি ভৰন্তি, ন তথা সুনখৰাচকস্স সাসদ্দস্স রূপানি ভৰন্তি. এৰং সন্তে কস্মা তেহি আচরিযেহি দুতিযাততিযাঠানে ‘‘সং, সে. সেনা’’তি ৰুত্তং, কস্মা চ পঞ্চমীঠানে ‘‘সা, সস্মা, সম্হা’’তি ৰুত্তং, সত্তমীঠানে চ ‘‘সে, সস্মিং, সম্হী’’তি চ ৰুত্তং? সব্বমেতং অকারণং, তক্কগাহমত্তেন গহিতং অকারণং. সুনখৰাচকো হি সাসদ্দো আকারন্ততাপকতিকো, ন পুরিস চিত্তসদ্দাদযো ৰিয অকারন্ততাপকতিকো. যায ইমস্স ঈদিসানি রূপানি সিযুং, সা চ পকতি নত্থি. ন চেসো ‘‘রাজা, ব্রহ্মা, সখা, অত্তা’’ ইচ্চেৰমাদযো ৰিয পঠমং অকারন্তভাৰে ঠত্ৰা পচ্ছা পটিলদ্ধআকারন্ততা, অথ খো নিচ্চমোকারন্ততাপকতিকো গোসদ্দো ৰিয নিচ্চমাকারন্ততাপকতিকো. নিচ্চমাকারন্ততাপকতিকস্স চ এৰরূপানি রূপানি ন ভৰন্তি, তস্মা নিরুত্তিপিটকে পভিন্নপটিসম্ভিদেন আযস্মতা মহাকচ্চাযনেন ন ৰুত্তানি. সচেপি মঞ্ঞেয্যুং ‘‘অত্তং, অত্তেনা’তি চ দস্সনতো ‘সং, সেনা’তি ইমানি পন গহেতব্বানী’’তি. ন গহেতব্বানি ‘‘রাজা, ব্রহ্মা, সখা, অত্তা, সা, পুমা’’ইচ্চেৰমাদীনং অঞ্ঞমঞ্ঞং পদমালাৰসেন ৰিসদিসত্তা নযৰসেন গহেতব্বাকারস্স অসম্ভৰতো. ঈদিসে হি ঠানে নযগ্গাহৰসেন গহণং নাম সদোসংযেৰ সিযা, তস্মা নযগ্গাহৰসেনপি ন গহেতব্বানি.

অপরম্পি অত্র ৰত্তব্বং – যথা হি ‘‘সাহি নারীহি তে যন্তী’’তি ৰুত্তে ‘‘অত্তনো নারী’’তি, ‘‘সা নারী’’তি এৰং অত্থৰতো ইত্থিলিঙ্গস্স কঞ্ঞাসদ্দেন সদিসস্স সাসদ্দস্স ‘‘সা, সা, সাযো. সং, সা, সাযো. সায, সাহি, সাভি. সায, সানং. সায, সাহি, সাভি. সায, সানং. সায, সাযং, সাসূ’’তি কঞ্ঞানযেন রূপানি ভৰন্তি, ন তথা ইমস্স সুনখৰাচকস্স সাসদ্দস্স রূপানি ভৰন্তি. এৰং সন্তে কস্মা তে আচরিযা ততিযাবহুৰচনট্ঠানে চ ‘‘সাহি, সাভী’’তি রূপানি ইচ্ছন্তি, কস্মা চ সত্তমীবহুৰচনট্ঠানে ‘‘সাসূ’’তি? ইদম্পি অকারণং আকারন্তপুল্লিঙ্গত্তা. কস্মা চ পন চতুত্থীছট্ঠেকৰচনট্ঠানে পুব্বক্খরস্স রস্সৰসেন ‘‘সস্স’’ইতি রূপং ইচ্ছন্তি? ইদম্পি অকারণং সুনখৰাচকস্স সাসদ্দস্স আকারন্ততাপকতিকত্তা. আকারন্ততাপকতিকস্স চ সাসদ্দস্স যথা অকারন্ততাপকতিকস্স পুরিসসদ্দস্স ‘‘পুরিসস্সা’’তি চতুত্থীছট্ঠেকৰচনরূপং ভৰতি এৰরূপস্স রূপস্স অভাৰতো. তেনেৰ আযস্মা কচ্চানো নিরুত্তিপিটকে সুনখৰাচকস্স সাসদ্দস্স রূপং দস্সেন্তো চতুত্থীছট্ঠেকৰচনট্ঠানে পুব্বক্খরস্স দীঘৰসেন ‘‘সাস্স’’ইতি রূপমাহ. কস্মা চ পন তে আচরিযা চতুত্থেকৰচনট্ঠানে ‘‘সায’’ইতি রূপং ইচ্ছন্তি? ইদম্পি অকারণং, ঠপেত্ৰা হি আকারন্তিত্থিলিঙ্গে ঘসঞ্ঞতো আকারতো পরেসং নাদীনং আযাদেসঞ্চ অকারন্ততো পুন্নপুংসকলিঙ্গতো পরস্স চতুত্থেকৰচনস্স আযাদেসঞ্চ আকারন্তপুল্লিঙ্গে অঘতো আকারন্ততো পরস্স চতুত্থেকৰচনস্স কত্থচিপি আযাদেসো ন দিস্সতি. নিরুত্তিপিটকে চ তাদিসং রূপং ন ৰুত্তং, অৰচনংযেৰ যুত্ততরং বুদ্ধৰচনে অট্ঠকথাদীসু চ অনাগমনতো. যা পনম্হেহি নিরুত্তিপিটকং নিস্সায বুদ্ধৰচনঞ্চ সুনখৰাচকস্স সাসদ্দস্স নামিকপদমালা ৰুত্তা, সাযেৰ সারতো পচ্চেতব্বা. এত্থাপি নানাঅত্থেসু ৰত্তমানানং লিঙ্গত্তযপরিযাপন্নানং সা সো সংইচ্চেতেসং তিণ্ণং পদানং পকতিরূপস্স নামিকপদমালাসু পদানং সদিসাসদিসতা দট্ঠব্বা.

এত্থ সিযা – যো তুম্হেহি সাসদ্দো ‘‘তংসদ্দত্থে চ সুনখে চ সকমিচ্চত্থে চ ৰত্ততী’’তি ইচ্ছিতো, কথং তং ‘‘সা’’তি ৰুত্তেযেৰ ‘‘ইমস্স অত্থস্স ৰাচকো’’তি জানন্তীতি? ন জানন্তি, পযোগৰসেন পন জানন্তি লোকিযজনা চেৰ পণ্ডিতা চ. পযোগৰসেন হি ‘‘সা মদ্দী নাগমারুহি, নাতিবদ্ধংৰ কুঞ্জর’’ন্তিআদীসু সাসদ্দস্স তংসদ্দত্থতা ৰিঞ্ঞাযতি, এৰং সাসদ্দো তংসদ্দত্থে চ ৰত্ততি. ‘‘ন যত্থ সা উপট্ঠিতো হোতি. ভগৰতো সাজাতিম্পি সুত্ৰা সত্তা অমতরসভাগিনো ভৰন্তী’’তিআদীসু সাসদ্দস্স সুনখৰাচকতা ৰিঞ্ঞাযতি.