৪০. কুণ্ডলিযা ৰত্থুম্হি অযমানুপুব্বীকথা

লঙ্কাদীপে রোহণজপদে মহাগামো নাম অহোসি, তত্থ তিস্সৰিহারং নাম অনেকসতভিক্খূহি সমাকিণ্ণং অনেকপরিৰেণপতিমণ্ডিতং ৰিহারং অহোসি. তত্থেকো তিস্সো নাম সামণেরো পটিৰসতি. সো একস্মিংসমযে জনপদচারিকং চরন্তো পাসাণৰাপিগামে ভিক্খং চরিত্ৰা যাপনমত্তং ভত্তং সপ্পিনা সদ্ধিং লভিত্ৰা নিক্খম্ম গামদ্ৰারং পত্ৰা মহাগামাভিমুখো গচ্ছন্তো মনুস্সে উদকফাসুকট্ঠানং পুচ্ছি. তেহি ভন্তে তুম্হাকং অভিমুখে অৰিদূরট্ঠানে ককুবন্দকন্দরং নাম সন্দমানসীতলোদকং ধৰলৰালুকাতলং তত্থ তুম্হে গন্ত্ৰা নহাত্ৰা সীতলচ্ছাযায ৰালুকাতলে নিসিন্নো ভত্তকিচ্চং কত্ৰা গচ্ছথাতি ৰুত্তে সামণেরো সাধূতি ৰত্ৰা তত্থ গন্ত্ৰা ফাসুকট্ঠানে নিসিন্নো ভত্তং ভুঞ্জিতুমারভি. তদা একেন ৰনকম্মিকেন সদ্ধিংঅরঞ্ঞং গতা একা সুনখী তস্মিং কন্দরে একস্মিং পব্ভারট্ঠানে দারকে ৰিজাযিত্ৰা ছাতজ্ঝত্তা পৰেধমানগত্তা দারকানং সমীপেনিপন্না সামণেরস্স পত্তে আহারগন্ধং ঘাযিত্ৰা নিপন্নট্ঠানতো ৰুট্ঠায পৰেধমানা তস্স সমীপং আগম্ম নঙ্গুট্ঠং চালেন্তী অট্ঠাসি, সামণেরো তং দিস্ৰা কম্পিতমানসো অত্তনো ভোজনত্থায ৰট্টিতং পথমালোপং তস্সা পুরতো ঠপেসি, ততো সা সোমনস্সা তং ভুঞ্জি. তং দিস্ৰা তুট্ঠো পুনপ্পুনং আলোপং করোন্তো তস্সা ভত্তং দত্ৰা পত্তং ধোৰিত্ৰা থৰিকায পক্খিপিত্ৰা অগমাসি. ততো সা সুনখী সামণেরগতেন পসাদেন ততো চুতা জম্বুদীপে দেৰপুত্তনগরে রাজানং পটিচ্চ তস্স মহেসিযা কুচ্ছিম্হি পটিসন্ধিং গণ্হিত্ৰা দসমাসচ্চযেন মাতুকুচ্ছিতো নিক্খমি, অথস্সা সিখামঙ্গলদিৰসে সম্পত্তে মাতাপিতরো পনস্সা কুণ্ডলাৰট্টকেসত্তা কুণ্ডলাতি নাম মকংসু. সা অনুক্কমেন সোল়সৰস্সুদ্দেসিকা অহোসি, তস্মিং কির সমযে তিস্সো সামণেরো মহাবোধিং ৰন্দিস্সামীতি নাৰং অভিরুয্হ জম্বুদীপং গন্ত্ৰা অনুপুব্বেন দেৰপুত্তনগরং পত্ৰা সুনিৰত্থো সুপারুতো যুগমত্তদসো ভিক্খায চরন্তো মহাৰীথিং সম্পাপুণি. রাজধীতা সীহপঞ্জরং উগ্ঘাটেত্ৰা অন্তরৰীথিং ওলোকেন্তী ভিক্খন্তং সামণেরং দিস্ৰা পুব্বসিনেহং পটিলভি, তস্মিংখণে তস্সা জাতিস্সরঞাণং অহোসি. সা কির পুব্বে ভিক্খুণী হুত্ৰা পণ্ণসূচিযা সদ্ধিং পোত্থকঞ্চ পদীপিযতেলঞ্চ দত্ৰা জাতিস্সরা ভৰেয্যংতি পত্থনং ঠপেসি, ততো সাজাতিং অনুস্সরন্তী সামণেরেন অত্তনো কতূপকারং দিত্ৰা সোমনস্সা নং পক্কোসাপেত্ৰা রাজগেহে আসনং পঞ্ঞাপেত্ৰা তত্থ নিসিন্নং নানগ্গরস ভোজনেন পরিৰিসিত্ৰা ওনীতপত্তপাণিং সামণেরং উপসঙ্কমিত্ৰা ৰন্দিত্ৰা একমন্তং নিসিন্না তেন সদ্ধিং সল্লপন্তী এৰমাহ.

১. ন সঞ্জানাসি মং ধীর, পুব্বেহং তৰ দাসিকা;

তেনাহং সুখিতা আসিং, তস্মা ত্ৰমসি ইস্সরোতি.

তং সুত্ৰা সামণেরো আহ.

২. নত্থি মে তাদিসী দাসী, ন সঞ্জানামি তং অহং;

কাসি ত্ৰং কস্স ৰা ধীতা, তং মে অক্খাহি পুচ্ছিতাতি.

ততো সা তং সারাপেন্তী আহ.

৩. সারাপেমি তুৰং অজ্জ, যথা জানাসিমং ইসে;

বুজ্ঝস্সু বোধিতো দানি, মযা জাতিংসরন্তিযা.

৪. পাসাণৰাপিগামম্হি, তম্বপণ্ণিম্হি রোহণে;

ভিক্খিত্ৰান তুৰং ভন্তে, যদা ককুবন্দকন্দরে.

৫. নিসীদিত্ৰান ত্ৰং ভত্তং, ভুত্তকালং সরিস্সসি;

তদাহং সুনখী আসিং, ৰিজাতা লদ্ধগোচরা.

৬. দারকে খাদিতুং ময্হ, মাসন্না খুদপীল়িতা;

পৰেধমানসব্বঙ্গা, অট্ঠাসিং তৰ সন্তিকে.

৭. দিস্ৰা তং মং তদা ভন্তে, ৰেধমানং বুভুক্খিতং;

ছিন্নভত্তো তুৰং হুত্ৰা, মমং ভত্তেন তোসযী.

৮. তদাহং মুদুচিত্তেন, চিত্তং তযি পসাদযিং;

তেনাহং পুঞ্ঞকম্মেন, দুতিযে অত্তসম্ভৰে.

৯. ইধ রাজকুলে জাতা, সব্বকামসমিদ্ধিনী;

চিত্তপ্পসাদমত্তেন, লোকনাথস্স সাসনে.

১০. তদহুপব্বজিতস্সাপি, ঈদিসা হোন্তি সম্পদা;

কীদিসং হোতি সম্বুদ্ধে, পসাদেন ফলং অহো.

১১. অঞ্ঞানি পন কিচ্চানি, পহাযাত্তহিতে রতো;

অতন্দিতো দিৰারত্তিং, সরাতু রতনত্তযংতি.

এৰং সামণেরেন কতূপকারং সারাপেত্ৰা ভন্তে তৰ দাসিযা অনুগ্গহং পটিচ্চ ইধেৰ ৰসথাতি নিমন্তিত্ৰা তেন সম্পটিচ্ছিতে মহন্তং ৰিহারং কারাপেত্ৰা সামণেরং আদিং কত্ৰা অনেকভিক্খুসতে নিমন্তেত্ৰা ৰিহারে ৰসাপেত্ৰা সুলভং কত্ৰা চতুপচ্চযেহি উপট্ঠাসি. সামণেরোপি সুনখিযা দিন্নদানং অনুস্সরিত্ৰা তুট্ঠো বুদ্ধানুস্সতিং মনসিকরোন্তো ন চিরেনৰ অরহত্তং পত্ৰা তস্মিংযেৰ ৰিহারে ৰসন্তো আযুপরিযোসানে তত্থেৰ পরিনিব্বাযীতি.

১২. তিযদ্ধেসু তিলোকস্মিং, নত্থি ৰত্থুত্তযং ৰিনা;

সত্তান মঞ্ঞ মিচ্ছত্থ, দাযকং সুরপাদপং.

কুণ্ডলিযা ৰত্থুং দসমং.

মহাসেনৰগ্গো চতুত্থো.

এত্তাৰতা জম্বুদীপুপ্পত্তিকথা সমত্তা.