৩১. মহাসেনরঞ্ঞো ৰত্থুম্হি অযমানুপুব্বীকথা

ভগৰতি পরিনিব্বুতে পাটলিপুত্তনগরে মহাসেনো নাম রাজা রজ্জং কারেসি ধম্মিকো ধম্মরাজা. সো পন পিতুপিতামহাদীনং ধনরাসিং ওলোকেত্ৰা ইমে ইমং সাপতেয্যং পহায মচ্চুনো মুখমুপগতা. অহো সংসারিকানং অঞ্ঞাণতা. ধনং ঠপেত্ৰা অত্তনো ৰিনাসঞ্চ অত্তানং ঠপেত্ৰা ধনৰিনাসঞ্চ ন জানন্তীতি সম্পত্তিযা অধিগমঞ্চ ৰিনাসং চাতি সব্বং চিন্তেত্ৰা ধম্মঞ্চ সুত্ৰা পটিলদ্ধসদ্ধো দিৰসে দিৰসে দসসহস্সানং ভিক্খূনং মধুরেন অন্নপানেন সন্তপ্পেন্তো অনেকানি পুঞ্ঞানি উপচিনন্তো একদিৰসং রহো পটিসল্লিনো এৰং চিন্তেসি. এৰং রাজনিযোগেন জনস্স পীল়নং কত্ৰা দিন্নদানতো সহত্থেন কম্মং কত্ৰা লদ্ধেন দিন্নদানং মহপ্ফলং মহানিসংসং ভৰিস্সতি, এৰং মযা কাতব্বন্তি সো সুহদা মচ্চস্স রজ্জং নীয্যাতেত্ৰা অত্তনো কণিট্ঠিকং আদায কিঞ্চি অজানাপেত্ৰা অঞ্ঞতরৰেসেন নগরা নিক্খম্ম উত্তরমধুরং নাম নগরং অগমাসি, তত্থ মহাৰিভৰো একো সেট্ঠি পটিৰসতি, তে সেট্ঠিনো সমীপ মুপগম্ম ঠিতা. তেন কিমত্থাযাগতাতি ৰুত্তে রাজা তৰ গেহে ভতিযা কম্মং করিস্সামীতি ৰত্ৰা তেনানুঞ্ঞাতো তীণি ৰস্সানি কম্ম মকাসি, ততো একদিৰসং সেট্ঠি তে দিস্ৰা পক্কোসিত্ৰা অতীৰ তুম্হে সুখুমালতরা. তথাপি ইমস্মিং গেহে কম্মকরণেন চিরং ৰসিত্থ, এত্তকং কালং কিস্মিঞ্চি কম্মেপি কুসীতত্তং ন পঞ্ঞাযতি. পগেৰ অনাচারম্পি, যাগুভত্তং ঠপেত্ৰা অঞ্ঞং উপকারম্পি মম সন্তিকা নত্থি, কেনত্থেন কম্মং করোথাতি পুচ্ছি. রাজা তস্স ৰচনং সুত্ৰা ইমস্মিং জনপদে সালিনো মনাপভাৰো বহুসো সূযতি. তস্মা সালীনমত্থায ইধা গতম্হাতি আহ, তং সুত্ৰা তেসং তুট্ঠো সেট্ঠি সালীনং সকটসহস্সং অদাসি, রাজা সালিংলভিত্ৰা সেট্ঠিনো এৰমাহ, ভো ইমং অম্হাকং নগরং পাপেথাতি, তং সুত্ৰা সেট্ঠি সাধূতি ৰত্ৰা সালিপরিপুণ্ণসকটসহস্সং রঞ্ঞো নগরং পাপেসি, রাজা নগরং গন্ত্ৰা সেট্ঠিস্স নানাৰণ্ণৰত্থহিরঞ্ঞসুৰণ্ণাদীহি সকটে পূরেত্ৰা পটিপেসেত্ৰা মেত্তিং থিরং কত্ৰা আভতৰীহযো রাজগেহে সন্নিচযমকাসি, অথ রাজা কতিপাহচ্চযেন মুসলং পগ্গয্হ সহত্থেনেৰ ৰীহিং কোট্টেতি, কোট্টিতকোট্টিতং কণিট্ঠিকা পপ্ফোটেতি. এৰং উভোপি তণ্ডুলানং মহন্তং রাসিং কত্ৰা দারূদকাদযো আহরিত্ৰা অম্বিলভত্তং পচিত্ৰা রাজগেহে পঞ্চসতআসনানি পঞ্ঞাপেত্ৰা কালং উগ্ঘোসেসুং, আগচ্ছন্তু অয্যা অনুকম্পং উপাদায মম গেহে ভুঞ্জন্তূতি. তং সুত্ৰা পঞ্চসতা ভিক্খূ আকাসেন আগমিংসু, রাজা তে যাৰদত্থং পরিৰিসি, ততো তেসং অন্তরে পিযংগুদীপৰাসী একো মহাসিৰত্থেরো নাম ভত্তং গহেত্ৰা এতে মং পস্সন্তূতি অধিট্ঠহিত্ৰা আকাসেন পিযংগুদীপং গন্ত্ৰা ভত্তং পঞ্চসতানং ভিক্খূনং দত্ৰা পরিভুঞ্চি. তং তস্সানুভাৰেন সব্বেসং যাৰদত্থং অহোসি. এৰং অপ্পকেনাপি দেয্যধম্মেন সপ্পুরিসা দাযকানং মনং পসাদেত্ৰা পতিট্ঠং করোন্তীতি. ৰুত্তঞ্হি.

১. অপ্পকেনপি মেধাৰী, দাযকানং মনং পতি;

সদ্ধং ৰড্ঢেন্তি চন্দোৰ, রংসিনা খীরসাগরং.

২. অট্ঠানে ন নিযোজেন্তা, করোন্তা নেৰ সন্নিধিং;

পরিভোগ মকত্ৰান, নেৰ নাসেন্তি পচ্চযং.

৩. ন পাপেন্তাচ থেয্যস্স, ন করোন্তা তথেৰিণং;

ৰিভজন্তি সুসীলেসু, সযং ভুত্ৰান সীলৰাতি.

অথ রাজা কণিট্ঠিকায সদ্ধিং থত্থেৰ ঠিতো পিযংগুদীপে পরিভুঞ্জন্তে পঞ্চসতভিক্খূ দিস্ৰা হট্ঠো উদগ্গো অহোসি. অথ তে অপরভাগে অত্তনা কতং দানৰরং অনুস্সরন্তা ন চিরেনেৰ উভোপি সোতাপন্না অহেসুংতি.

৪. ন গণেন্তাত্তনো দুক্খং, ৰিহায মহতিং সিরিং;

আযতিংভৰমিচ্ছন্তা, সুজনেৰং সুভে রতা.

৫. আযাসেন কতং পুঞ্ঞং, মহন্তফলদাযকং;

ইতি মন্ত্ৰান মেধাৰী, সহত্থেনেৰ তং করেতি.

মহাসেনরঞ্ঞো ৰত্থুং পথমং.