২৩. পাদপীঠিকায ৰত্থুম্হি অযমানুপুব্বীকথা

জম্বুদীপে মহাবোধিতো কির দক্খিণপস্সে এতং পচ্চন্তনগরং অহোসি. তত্থ সদ্ধাসম্পন্নো রতনত্তযমামকো একো উপাসকো পটিৰসতি. তদা একো খীণাসৰো ভগৰতা পরিভুত্তং পাদপীঠং থৰিকায পক্খিপিত্ৰা গতগতট্ঠানে পূজেন্তো অনুক্কমেন তং নগরং সম্পাপুণিত্ৰা সুনিৰত্থো সুপারুতো পত্তং গহেত্ৰা অন্তরৰীথিং পটিপজ্জি যুগমত্তদসো পব্বজ্জালীলায জনং পরিতোসেন্তো. অথ সো উপাসকো তথা গচ্ছন্তং থেরং দিস্ৰা পসন্নমানসো উপগন্ত্ৰা পঞ্চপতিট্ঠিতেন ৰন্দিত্ৰা পত্তং গহেত্ৰা ভোজেত্ৰা নিবদ্ধং মম গেহং আগমনমিচ্ছামি, মমানুকম্পায এত্থেৰ ৰসথ সামীতি যাচিত্ৰা নগরাসন্নে রমণীযে ৰনসণ্ডে নদীকূলে পণ্ণসালং কত্ৰা থেরস্স তং নীয্যাতেত্ৰা চতুপচ্চযেহি পটিজগ্গন্তো মানেন্তো পূজেন্তো ৰসতি. থেরোপি তত্থ ফাসুকট্ঠানে ভগৰতা পরিভুত্তপাদপীঠধাতুং নিধায ৰালুকাহি থূপং কত্ৰা নিচ্চং গন্ধধূপদীপপুপ্ফপূজাদীহি পূজযমানো ৰাসং কপ্পেতি. তস্মিং সমযে তস্সো পাসকস্স অনন্তরগেহৰাসিকো একো ইস্সরভত্তিকো অত্তনো দেৰতং নিবদ্ধং নমস্সতি. তং দিস্ৰাস্স উপাসকো বুদ্ধগুণে ৰত্ৰা অখেত্তে সম্ম মা ৰিরিযং করোহি. পজহেতং দিট্ঠিংতি আহ. ততো সো কেরাটিকো ইস্সরভত্তিকো কো তে সত্থু গুণানুভাৰো, অম্হাকং ইস্সরস্স গুণোৰ মহন্তোতি ৰত্ৰা তস্স অগুণং গুণন্তি কথেন্তো আহ.

১. তিপুরং সো ৰিনাসেসি, ললাটনযনগ্গিনা;

অসুরেচ ৰিনাসেসি, তিসূলেন মহিস্সরো.

২. জটাকলাপমাৰত্তং, নচ্চতী দিনসন্ধিযং;

ৰাদেতি ভেরিৰীণাদিং, গীতংচাপি স গাযতি.

৩. ভরিযাযো তস্স তিস্সো, জটাযেকং সমুব্বহে;

একমেকেন পস্সেন, পস্সমানো চরেককং.

৪. হত্থিচম্মম্বরধরো, তেনেৰ ৰারিতা তপো;

অসাদিসেহি পুত্তেহি, রূপেন চ সুপাকটো.

৫. রতিযা চ মধুপানে চ, ব্যাৰটো সব্বদা চ সো;

মনুস্সট্ঠিধরো সীস, কপালেনেস ভুঞ্জকি.

৬. ন জাতো ন ভযং তস্স, মরণং নত্থি সস্সতো;

ঈদিসো মে মহাদেৰো, নত্থঞ্ঞস্সীদিসো গুণোতি.

তং সুত্ৰা উপাসকো সম্ম তুয্হং ইস্সরস্স এতে গুণা নাম তাৰ হোন্তু. অগুণা নাম কিত্তকা হোন্তীতি ৰত্ৰা ভগৰতো সকলগুণে সংহরিত্ৰা কথেন্তো আহ.

৭. লোকে সব্বসৰন্তীনং, আধারো সাগরো যথা;

সব্বেসং গুণরাসীনং, আধারোৰ তথাগতো.

৮. চরাচরানং সব্বেসং, আধারাৰ ধরা অযং;

তথা গুণানং সব্বেসং, আধারোৰ তথাগতো.

৯. এৰং সন্তো ৰিযত্তোচ [ৰিযন্তো ইতিকত্থচি], এৰং সো করুণাপরো;

এৰ মিদ্ধিৰিধা তস্স, এৰমেৰং গুণা ইতি.

১০. বুদ্ধোপি সক্কোতি ন যস্স ৰণ্ণে,

কপ্পম্পি ৰত্ৰা খযতং গমেতুং;

পগেৰ চ ব্রহ্মসুরা সুরেহি,

ৰত্তুং ন হানন্তগুণস্স ৰণ্ণন্তি.

এৰং ৰদন্তা পন তে উভোপি অম্হাকং দেৰো উত্তমো অম্হাকং দেৰো উত্তমোতি কলহং ৰড্ঢেত্ৰা রঞ্ঞো সন্তিকমগমংসু, রাজা তেসং কথং সুত্ৰা তেনহি তুম্হাকং দেৰতানং মহন্তভাৰং ইদ্ধিপাটিহারিযেন জানিস্সাম. দস্সেথ তেহি নো ইদ্ধিংতি নগরে ভেরিং চরাপেসি. ইতো কির সত্তাহচ্চযেন ইমেসং দ্ৰিন্নং সত্থারানং পাটিহারিযানি ভৰিস্সন্তি. সব্বে সন্নিপতন্তূতি তং সুত্ৰা নানাদিসাসু বহূ মনুস্সা সমাগমিংসু, অথ মিচ্ছাদিট্ঠিকা অজ্জ অম্হাকং দেৰস্স আনুভাৰং পস্সামাতি মহন্তং পূজং করোন্তো তত্থ সারং নাদ্দসংসু, সম্মাদিট্ঠিকাপি অজ্জ অম্হাকং ভগৰতো আনুভাৰং পস্সিস্সামাতি ৰাল়ুকাথূপং গন্ত্ৰা গন্ধমালাদীহি পূজেত্ৰা পদক্খিণং কত্ৰা অঞ্জলিম্পগ্গয্হ অট্ঠংসু. অথ রাজাপি বলৰাহনপরিৰুতো একমন্তে অট্ঠাসি. নানাসমযৰাদিনোপি অজ্জ তেসং পাটিহারিযং পস্সিস্সামাতি মঞ্চাতিমঞ্চং কত্ৰা অট্ঠংসু. তেসং সমাগমে সম্মাদিট্ঠিকা ৰাল়ুকাথূপ মভিমুখং কত্ৰা অঞ্জলিম্পগ্গয্হ সামি অম্হাকং ভগৰা সব্ববুদ্ধকিচ্চানি নিট্ঠাপেত্ৰা অনুপাদিসেসায নিব্বাণধাতুযা পরিনিব্বাযি. সারিপুত্তমহামোগ্গল্লানাদযো অসীতিমহাসাৰকাপি পরিনিব্বাযিংসু, নত্থেত্থ অম্হাকং অঞ্ঞং পটিসরণন্তি ৰত্ৰা সচ্চকিরিযং করোন্তা আহংসু.

১১. আপাণকোটিং বুদ্ধস্স, সরণং নো গতা যদি;

তেন সচ্চেন যং ধাতু, দস্সেতু পাটিহারিযং.

১২. আপাণকোটিং ধম্মস্স, সরণং নো গতা যদি;

তেন সচ্চেন যং ধাতু, দস্সেতু পাটিহারিযং.

১৩. আপাণকোটিং সঙ্ঘস্স, সরণং নো গতা যদি;

তেন সচ্চেন যং ধাতু, দস্সেতু পাটিহারিযং.

১৪. রামকালে মুনিন্দস্স, পাদুকা চাসি অব্ভুতা;

তেন সচ্চেন যং ধাতু, দস্সেতু পাটিহারিযং.

১৫. ছদ্দন্তকালে মুনিনো, দাঠা ছরংসিরঞ্জিতা;

তেন সচ্চেনযং ধাতু, নিচ্ছারেতু ছ রংসিযো.

১৬. জাতমত্তো তদা বুদ্ধো, ঠিতো পঙ্কজমুদ্ধনি;

নিচ্ছারেসাসভিংৰাচং, অগ্গো সেট্ঠোতিআদিনা;

তেন সচ্চেনযং ধাতু, দস্সেতু পাটিহারিযং.

১৭. নিমিত্তে চতুরো দিস্ৰা, নিক্খন্তো অভিনিক্খমং;

তেন সচ্চেন যং ধাতু, দস্সেতু পাটিহারিযং.

১৮. মারসেনং পলাপেত্ৰা, নিসিন্নো বুজ্ঝি বোধিযং;

তেন সচ্চেন যং ধাতু দস্সেতু পাটিহারিযং.

১৯. ধম্মচক্কং পৰত্তেসি, জিনো সিপতনে তদা;

তেন সচ্চেন যং ধাতু, দস্সেতু পাটিহারিযং.

২০. নন্দোপনন্দভোগিন্দং, নাগং নালাগিরিৰ্হযং;

আল়ৰকা দযো যক্খে, ব্রহ্মানো চ বকা দযো.

২১. সচ্চকাদিনিগণ্ঠেচ, কূটদন্তা দযো দ্ৰিজে;

দমেসি তেন সচ্চেন, দস্সেতু পাটিহারিযংতি.

এৰঞ্চ পন ৰত্ৰা উপাসকা অম্হাকং অনুকম্মং পটিচ্চ মহাজনস্স মিচ্ছাদিট্ঠিভেদনত্তং পাটিহারিযং দস্সেথ সামীতি আরাধেসুং. অথ বুদ্ধানুভাৰঞ্চ থেরানুভাৰঞ্চ উপাসকানং সচ্চকিরিযানুভাৰঞ্চ পটিচ্চ ৰাল়ুকাথূপং দ্ৰিধা ভিন্দিত্ৰা পাদপীঠধাতু আকাস মব্ভুগ্গন্ত্ৰা ছব্বণ্ণরংসিযো ৰিস্সজ্জেন্তী ৰিলাসমানা অট্ঠাসি. অথ মহাজনা চেলুক্খেপসহস্সানি পৰত্তেন্তা সাধুকীল়্হং কীল়ন্তা মহানাদং পৰত্তেন্তা মহন্তং পূজমকংসু. মিচ্ছাদিট্ঠিকাপি ইমং অচ্ছরিযং দিস্ৰা ৰিম্হিতমানসা মিচ্ছাদিট্ঠিং ভিন্দিত্ৰা রতনত্তযপরাযণা সরণ মগমংসূতি.

২২. ফুট্ঠোপি পাদেন জিনস্স এৰং,

কলিঙ্গরো পা সি মহানুভাৰো;

লোকেকনাথস্স অনাসৰস্স,

মহানুভাৰো হি অচিন্তনীযোতি.

পাদপীঠিকায ৰত্থুং ততিযং.