৯. ছত্তুপাহনৰগ্গ, ১২. দ্ৰাদসম সিক্খাপুচ্ছা

পুচ্ছা – অনোকাসকতং আৰুসো ভিক্খুং পঞ্হং পুচ্ছন্তিযা পাচিত্তিযং কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – সাৰত্থিযং ভন্তে সম্বহুলা ভিক্খুনিযো আরব্ভ পঞ্ঞত্তং, সম্বহুলা ভন্তে ভিক্খুনিযো অনোকাসকতং ভিক্খুং পঞ্হং পুচ্ছিংসু, তস্মিং ভন্তে ৰত্থুস্মিং পঞ্ঞত্তং.

পুচ্ছা – সপ্পিং ৰা আৰুসো তেলং ৰা মধুং ৰা ফাণিতং ৰা মচ্ছং ৰা মংসং ৰা খীরং ৰা দধিং ৰা ৰিঞ্ঞাপেত্ৰা ভুঞ্জন্তিযা পাটিদেসনীযং কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – সাৰত্থিযং ভন্তে ছব্বগ্গিযা ভিক্খুনিযো আরব্ভ পঞ্ঞত্তং, ছব্বগ্গিযা ভন্তে ভিক্খুনিযো সপ্পিম্পি তেলম্পি মধুম্পি ফাণিতম্পি মচ্ছম্পি মংসম্পি খীরম্পি দধিম্পি ৰিঞ্ঞাপেত্ৰা ভুঞ্জিংসু, তস্মিং ভন্তে ৰত্থুস্মিং পঞ্ঞত্তং.

পুচ্ছা – চতুন্নং আৰুসো ৰিপত্তীনং কতমা ৰিপত্তি.

ৰিস্সজ্জনা – আচারৰিপত্তি ভন্তে.

পুচ্ছা – ছন্নং আৰুসো আপত্তিসমুট্ঠানানং কতিহি সমুট্ঠানেহি সমুট্ঠাতি.

ৰিস্সজ্জনা – চতূহি ভন্তে সমুট্ঠানেহি সমুট্ঠাতি, সিযা কাযতো সমুট্ঠাতি, নৰাচতো নচিত্ততো, সিযা কাযতো চ ৰাচতো চ সমুট্ঠাতি, নচিত্ততো, সিযা কাযতো চ চিত্ততো চ সমুট্ঠাতি, নৰাচতো, সিযা কাযতো চ ৰাচতো চ চিত্ততো চ সমুট্ঠাতি, ইমেহি ভন্তে চতূহি সমুট্ঠানেহি সমুট্ঠাতি.

পুচ্ছা – কা আৰুসো ৰিপত্তি.

ৰিস্সজ্জনা – অসংৰরো ভন্তে ৰিপত্তি.

পুচ্ছা – কা আৰুসো সম্পত্তি.

ৰিস্সজ্জনা – সংৰরো ভন্তে সম্পত্তি.

পুচ্ছা – কা আৰুসো পটিপত্তি.

ৰিস্সজ্জনা – ন এৰরূপং করিস্সামীতি যাৰজীৰং আপাণকোটিকং সমাদায সিক্খতি সিক্খাপদেসু, অযং ভন্তে পটিপত্তি.

পুচ্ছা – কস্স আৰুসো ৰচনং.

ৰিস্সজ্জনা – ভগৰতো ভন্তে ৰচনং অরহতো সম্মাসম্বুদ্ধস্স.

পুচ্ছা – কেনাৰুসো আভতং.

ৰিস্সজ্জনা – পরম্পরায ভন্তে আভতং.

সুণাতু মে ভন্তে সঙ্ঘো…পে… সংগাযেয্যাম.