১. কম্বক্খন্ধক

পুচ্ছা – ভণ্ডনাদিকারকস্স আৰুসো ভিক্খুনো তজ্জনীযকম্মং কাতুং ভগৰতা কত্থ অনুঞ্ঞাতং, কং আরব্ভ কিস্মিং ৰত্থুস্মিং অনুঞ্ঞাতং.

ৰিস্সজ্জনা – সাৰত্থিযং ভন্তে পণ্ডুকলোহিতকে ভিক্খূ আরব্ভ অনুঞ্ঞাতং, পণ্ডুকলোহিতকা ভন্তে ভিক্খূ অত্তনা ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা, যেপি চঞ্ঞে ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা তে উপসঙ্কমিত্ৰা এৰমাহংসু ‘‘মা খো তুম্হে আযস্মন্তো এসো অজেসি, বলৰাবলৰং পটিমন্তেথ, তুম্হে তেন পণ্ডিততরা চ ব্যত্ততরা চ বহুস্সুততরা চ অলমত্ততরা চ, মা চস্স ভাযিত্থ, মযম্পি তুম্হাকং পক্খা ভৰিস্সামা’’তি, তেন অনুপ্পন্নানি চেৰ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তি. তস্মিং ভন্তে ৰত্থুস্মিং অনুঞ্ঞাতং.

পুচ্ছা – তজ্জনীযকম্মকতস্স আৰুসো ভিক্খুনো কতিসু ৰত্তেসু সম্মা ৰত্তন্তস্স তং কম্মং পটিপ্পস্সম্ভেতুং ভগৰতা কত্থ অনুঞ্ঞাতং, কং আরব্ভ কিস্মিং ৰত্থুস্মিং অনুঞ্ঞাতং.

ৰিস্সজ্জনা – অট্ঠারসসু ভন্তে ৰত্তেসু সম্মা ৰত্তন্তস্স তজ্জনীযকম্মকতস্স ভিক্খুনো তং কম্মং পটিপ্পস্সম্ভেতুং ভগৰতা সাৰত্থিযং অনুঞ্ঞাতং, তেযেৰ পণ্ডুকলোহিতকা ভিক্খূ সঙ্ঘেন তজ্জনীযকম্মকতা সম্মা ৰত্তিত্ৰা সঙ্ঘং উপসঙ্কমিত্ৰা যাচিংসু, তস্মিং ভন্তে ৰত্থুস্মিং অনুঞ্ঞাতং.

পুচ্ছা – বালস্স আৰুসো অব্যত্তস্স আপত্তিবহুলস্স অনপদানস্স গিহিসংসট্ঠস্স অননুলোমিকেহি গিহিসংসগ্গেহি নিযস্সকম্মং কাতুং কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – সাৰত্থিযং ভন্তে আযস্মন্তং সেয্যসকং আরব্ভ পঞ্ঞত্তং, আযস্মা ভন্তে সেয্যসকো বালো অহোসি অব্যত্তো আপত্তিবহুলো অনপদানো গিহিসংসট্ঠো ৰিহাসি অননুলোমিকেহি গিহিসংসগ্গেহি, তস্মিং ভন্তে ৰত্থুস্মিং পঞ্ঞত্তং.

পুচ্ছা – নিযস্সকম্মকতস্স আৰুসো ভিক্খুনো কতিসু ৰত্তেসু সম্মা ৰত্তন্তস্স তং কম্মং পটিপ্পস্সম্ভেতুং ভগৰতা অনুঞ্ঞাতং.

ৰিস্সজ্জনা – অট্ঠারসসু ভন্তে ৰত্তেসু সম্মা ৰত্তন্তস্স নিযস্স কম্মকতস্স ভিক্খুনো তং কম্মং পটিপ্পস্সম্ভেতুং ভগৰতা অনুঞ্ঞাতং, ন উপসম্পাদেতব্বং, ন নিস্সযো দাতব্বো, ন সামণেরো উপট্ঠাপেতব্বো, ন ভিক্খুনোৰাদকসম্মুতি সাদিতব্বা, সম্মতেনপি ভিক্খুনিযো ন ওৰদিতব্বা, এৰমাদীসু ভন্তে অট্ঠারসসু ৰত্তেসু সম্মা ৰত্তন্তস্স নিযস্সকম্মকতস্স ভিক্খুনো তং কম্মং পটিপ্পস্সম্ভেতুং ভগৰতা অনুঞ্ঞাতং.

পুচ্ছা – কুলদূসকস্স আৰুসো পাপসমাচারস্স ভিক্খুনো পব্বাজনীযকম্মং কাতুং ভগৰতা কত্থ অনুঞ্ঞাতং, কং আরব্ভ কিস্মিং ৰত্থুস্মিং অনুঞ্ঞাতং.

ৰিস্সজ্জনা – সাৰত্থিযং ভন্তে অস্সজিপুনব্বসুকে ভিক্খূ আরব্ভ অনুঞ্ঞাতং, অস্সজিপুনব্বসুকা ভন্তে ভিক্খূ কীটাগিরিস্মিং কুলদূসকা অহেসুং পাপসমাচারা, তস্মিং ভন্তে ৰত্থুস্মিং অনুঞ্ঞাতং.

পুচ্ছা – পটিসারণীযকম্মং আৰুসো পুচ্ছামি, সদ্ধং আৰুসো পসন্নং গহপতিং দাযকং কারকং সঙ্ঘুপট্ঠাকং হীনেন খুংসেন্তস্স ভিক্খুনো পটিসারণীযকম্মং কাতুং ভগৰতা কত্থ অনুঞ্ঞাতং, কং আরব্ভ কিস্মিং ৰত্থুস্মিং অনুঞ্ঞাতং.

ৰিস্সজ্জনা – সাৰত্থিযং ভন্তে আযস্মন্তং সুধম্মং আরব্ভ অনুঞ্ঞাতং, ভগৰতি ভন্তে সাৰত্থিযং ৰিহরতি আযস্মা সুধম্মো মচ্ছিকাসণ্ডে চিত্তং গহপতিং সদ্ধং পসন্নং দাযকং কারকং সঙ্ঘুপট্ঠাকং হীনেন খুংসেসি হীনেন ৰম্ভেসি, তস্মিং ভন্তে ৰত্থুস্মিং অনুঞ্ঞাতং.

তেনহি ভিক্খৰে সঙ্ঘো সুধম্মস্স ভিক্খুনো পটিসারণীযকম্মং করোতু ‘‘চিত্তো তে গহপতি খমাপেতব্বো’’তি –

পুচ্ছা – পটিসারণীযকম্মকতস্স আৰুসো ভিক্খুনো অনুদূতং দাতুঞ্চ তেন অনুদূতেন সদ্ধিং গন্ত্ৰা যথাখুংসিতং গহপতিং খমাপেতুং চ ভগৰতা কত্থ অনুঞ্ঞাতং, কং আরব্ভ কিস্মিং ৰত্থুস্মিং অনুঞ্ঞাতং.

ৰিস্সজ্জনা – সাৰত্থিযং ভন্তে আযস্মন্তংযেৰ সুধম্মং আরব্ভ অনুঞ্ঞাতং, আযস্মা ভন্তে সুধম্মো মচ্ছিকাসণ্ডং গন্ত্ৰা মঙ্কুভূতো নাসক্খি চিত্তং গহপতিং খমাপেতুং, তস্মিং ভন্তে ৰত্থুস্মিং অনুঞ্ঞাতং.

পুচ্ছা – পটিসারণীযকম্মকতস্স আৰুসো ভিক্খুনো কতিসু ৰত্তেসু সম্মা ৰত্তন্তস্স তং কম্মং পটিপ্পস্সম্ভেতুং ভগৰতা অনুঞ্ঞাতং.

ৰিস্সজ্জনা – অট্ঠারসসু ভন্তে ৰত্তেসু সম্মা ৰত্তন্তস্স পটিসারণীয কম্মকতস্স ভিক্খুনো তং কম্মং পটিপ্পস্সম্ভেতুং ভগৰতা অনুঞ্ঞাতং.

পুচ্ছা – আপত্তিং আৰুসো আপজ্জিত্ৰা তং আপত্তিং পস্সিতুং ৰা পটিকাতুং ৰা ন ইচ্ছন্তস্স ভিক্খুনো আপত্তিযা অদস্সনে ৰা অপ্পটিকম্মে ৰা উক্খেপনীযকম্মং কাতুং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – কোসম্বিযং ভন্তে আযস্মন্তং ছন্নত্থেরং আরব্ভ পঞ্ঞত্তং, আযস্মা ভন্তে ছন্নো আপত্তিং আপজ্জিত্ৰা ন ইচ্ছি তং আপত্তিং পস্সিতুং ৰা পটিকাতুং ৰা, তস্মিং ভন্তে ৰত্থুস্মিং পঞ্ঞত্তং.

পুচ্ছা – আপত্তিযা আৰুসো অদস্সনেন ৰা অপ্পটিকম্মে ৰা উক্খেপনীয কম্মকতেন ভিক্খুনা কতিসু ৰত্তেসু সম্মা ৰত্তিতব্বং.

ৰিস্সজ্জনা – তেচত্তালীসায ভন্তে ৰত্তেসু সম্মা ৰত্তিতব্বং.

পুচ্ছা – উক্খেপনীযকম্মকতস্স আৰুসো ভিক্খুনো সম্মা ৰত্তন্তস্স তং কম্মং পটিপ্পস্সম্ভেতুং ভগৰতা কত্থ অনুঞ্ঞাতং, কং আরব্ভ কিস্মিং ৰত্থুস্মিং অনুঞ্ঞাতং.

ৰিস্সজ্জনা – কোসম্বিযং ভন্তে আযস্মন্তংযেৰ ছন্নং আরব্ভ অনুঞ্ঞাতং, আযস্মা ভন্তে ছন্নো সঙ্ঘেন আপত্তিযা অদস্সনে ৰা অপ্পটিকম্মে ৰা উক্খেপনীযকম্মকতো সম্মা ৰত্তেসি লোমংপাতেসি নেত্থারং ৰত্তেসি সঙ্ঘং উপসঙ্কমিত্ৰা তস্স কম্মস্স পটিপ্পস্সদ্ধিযা যাচি, তস্মিং ভন্তে ৰত্থুস্মিং অনুঞ্ঞাতং.

পুচ্ছা – পাপিকং আৰুসো দিট্ঠিং গহেত্ৰা তং দিট্ঠিং ন পটিনিস্সজ্জন্তস্স পাপিকায দিট্ঠিযা অপ্পটিনিস্সগ্গে উক্খেপনীযকম্মং কাতুং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – সাৰত্থিযং ভন্তে অরিট্ঠং ভিক্খুং গদ্ধবাধিপুব্বং আরব্ভ পঞ্ঞত্তং, ভগৰতি ভন্তে সাৰত্থিযং ৰিহরতি অরিট্ঠস্স নাম ভিক্খুনো গদ্ধবাধিপুব্বস্স এৰরূপং পাপকং দিট্ঠিগতং উপ্পন্নং অহোসি ‘‘তথাহং ভগৰতা ধম্মং দেসিতং আজানামি, যথাযেমে অন্তরাযিকা ধম্মা ৰুত্তা ভগৰতা, তে পটিসেৰতো নালং অন্তরাযাযা’’তি, তস্মিং ভন্তে ৰত্থুস্মিং পঞ্ঞত্তং.

পুচ্ছা – পাপিকায আৰুসো দিট্ঠিযা অপ্পটিনিস্সগ্গে উক্খেপনীযকম্মকতেন ভিক্খুনা কতিসু ৰত্তেসু সম্মা ৰত্তিতব্বং.

ৰিস্সজ্জনা – তেচত্তালীসায ভন্তে ৰত্তেসু সম্মা ৰত্তিতব্বং.

পুচ্ছা – কম্মক্খন্ধকং পুচ্ছিস্সং, সনিদানি সনিদ্দেসং. সমুক্কট্ঠপদানং আৰুসো কতি আপত্তিযো.

ৰিস্সজ্জনা – কম্মক্খন্ধকং ৰিস্সজ্জিস্সং, সনিদানং সনিদ্দেসং. সমুক্কট্ঠপদানং ভন্তে একা আপত্তি.