২. পারিৰাসিকক্খন্ধক

পুচ্ছা – পারিৰাসিকস্স আৰুসো পকতত্তানং ভিক্খূনং অভিৰাদনাদীনি সাদিযন্তস্স দুক্কটং ভগৰতা কত্থ পঞ্ঞত্তং, কং আরব্ভ কিস্মিং ৰত্থুস্মিং পঞ্ঞত্তং.

ৰিস্সজ্জনা – সাৰত্থিযং ভন্তে পারিৰাসিকে ভিক্খূ আরব্ভ পঞ্ঞত্তং, পারিৰাসিকা ভন্তে ভিক্খূ সাদিযিংসু পকতত্তানং ভিক্খূনং অভিৰাদনাদীনি, তস্মিং ভন্তে ৰত্থুস্মিং পঞ্ঞত্তং.

পুচ্ছা – পারিৰাসিকেন আৰুসো ভিক্খুনা কতিসু ৰত্তেসু সম্মা ৰত্তিতব্বং.

ৰিস্সজ্জনা – পারিৰাসিকেন ভন্তে ভিক্খুনা চতুনৰুতিযা ৰত্তেসু সম্মা ৰত্তিতব্বং.

পুচ্ছা – পারিৰাসিকং পুচ্ছিস্সং, সনিদানং সনিদ্দেসং. সমুক্কট্ঠপদানং আৰুসো কতি আপত্তিযো.

ৰিস্সজ্জনা – পারিৰাসিকং ৰিস্সজ্জিস্সং, সনিদানং সনিদ্দেসং. সমুক্কট্ঠপদানং ভন্তে একা আপত্তি.