২. উপোসথক্খন্ধক

পুচ্ছা – চাতুদ্দসে চ আৰুসো পন্নরসে চ পক্খস্স চ অট্ঠমিযা সন্নিপতিত্ৰা ধম্মং ভাসিতুং ভগৰতা কত্থ অনুঞ্ঞাতং, কিস্মিং ৰত্থুস্মিং অনুঞ্ঞাতং.

ৰিস্সজ্জনা – রাজগহে ভন্তে সম্বহুলে ভিক্খূ আরব্ভ অনুঞ্ঞাতা, সম্বহুলা ভন্তে ভিক্খূ চাতুদ্দেস পন্নরসে অট্ঠমিযা চ পক্খস্স সন্নিপতিত্ৰা তুণ্হী নিসীদিংসু, তস্মিং ভন্তে ৰত্থুস্মিং অনুঞ্ঞাতা.

অনুজানামি ভিক্খৰে চাতুদ্দসে পন্নরসে অট্ঠমিযা চ পক্খস্স সন্নিপতিতুং.

ননু নাম সন্নিপতিতেহি ধম্মো ভাসিতব্বো.

পুচ্ছা – কদা আৰুসো ভিক্খূনং পাতিমোক্খুদ্দেসো ভগৰতা অনুঞ্ঞাতো.

ৰিস্সজ্জনা – যদা ভন্তে ভগৰতো রহোগতস্স পটিসল্লীনস্স এৰং চেতসো পরিৰিতক্কো উদপাদি ‘‘যংনূনাহং যানি মযা ভিক্খূনং পঞ্ঞত্তানি সিক্খাপদানি, তানি নেসং পাতিমোক্খুদ্দেসং অনুজানেয্যং, সো নেসং ভৰিস্সতি উপোসথকম্ম’’ন্তি তদা ভন্তে ভগৰতা ভিক্খূনং পাতিমোক্খুদ্দেসো অনুঞ্ঞাতো.

পুচ্ছা – সীমং আৰুসো সম্মনিতুং ভগৰতা কত্থ অনুঞ্ঞাতং, কিস্মিঞ্চ ৰত্থুস্মিং অনুঞ্ঞাতং.

ৰিস্সজ্জনা – রাজগহে ভন্তে অনুঞ্ঞাতং, রাজগহে ভন্তে ভগৰতি ৰিহরতি ভিক্খূনং এতদহোসি ‘‘ভগৰতা পঞ্ঞত্তং এত্তাৰতা সামগ্গী, যাৰতা একাৰাসোতি কিত্তাৰতানুখো একাৰাসো হোতী’’তি, তস্মিং ভন্তে ৰত্থুস্মিং অনুঞ্ঞাতং.

পুচ্ছা – কতি আৰুসো উপোসথা দিৰসৰসেন চ কারকপুগ্গলৰসেন চ কাতব্বাকারৰসেন চ.

ৰিস্সজ্জনা – দিৰসৰসেন ভন্তে তযো উপোসথা, পুগ্গলৰসেন চ ভন্তে তযো উপোসথা, কাতব্বাকারৰসেন চ ভন্তে তযো উপোসথা.

পুচ্ছা – কতি আৰুসো উপোসথকম্মানি তেসু চ কীদিসং উপোসথকম্মং ভগৰতা অনুঞ্ঞাতং, কীদিসং অননুঞ্ঞাতং.

ৰিস্সজ্জনা – চত্তারিমানি ভন্তে উপোসথকম্মানি, অধম্মেন ৰগ্গং উপোসথকম্মং, অধম্মেন সমগ্গং উপোসথকম্মং, ধম্মেন ৰগ্গং উপোসথকম্মং, ধম্মেন সমগ্গং উপোসথকম্মং. তত্র ভন্তে যদিদং অধম্মেন ৰগ্গং উপোসথকম্মং, অধম্মেন সমগ্গং উপোসথকম্মং ধম্মেন ৰগ্গং উপোসথকম্মং, এৰরূপং ভন্তে উপোসথকম্মং অননুঞ্ঞাতং, তত্র ভন্তে যদিদং ধম্মেন সমগ্গং উপোসথকম্মং, এৰরূপং ভন্তে উপোসথকম্মং অনুঞ্ঞাতং.

পুচ্ছা – উপোসথং পুচ্ছিস্সং, সনিদানং সনিদ্দেসং. সমুক্কট্ঠপদানং আৰুসো কতি আপত্তিযো.

ৰিস্সজ্জনা – উপোসথং ৰিস্সজ্জিস্সং, সনিদানং সনিদ্দেসং. সমুক্কট্ঠপদানং ভন্তে তিস্সো আপত্তিযো.