১০. কোসম্বকক্খন্ধক

পুচ্ছা – ভেদগরুকেহি ভিক্খৰে ভিক্খূহি ন সো ভিক্খু আপত্তিযা অদস্সনে উক্খিপিতব্বোতি চ, ভেদগরুকেন ভিক্খৰে ভিক্খুনা পরেসম্পি সদ্ধায আপত্তিদেসেতব্বাতি চ আৰুসো অযং সামগ্গিরসওৰাদো ভগৰতা কত্থ দিন্নো, কং আরব্ভ কিস্মিং ৰত্থুস্মিং দিন্নো.

ৰিস্সজ্জনা – কোসম্বিযং ভন্তে সম্বহুলে ভিক্খূ আরব্ভ দিন্নো, ভগৰতি ভন্তে কোসম্বিযং ৰিহরতি অঞ্ঞতরো ভিক্খু আপত্তিং আপন্নো অহোসি, সো তস্সা আপত্তিযা আপত্তি দিট্ঠি অহোসি, অঞ্ঞে ভিক্খূ তস্সা আপত্তিযা অনাপত্তি দিট্ঠিনো অহেসুং. সো অপরেন সমযেন তস্সা আপত্তিযা অনাপত্তিদিট্ঠি অহোসি, অঞ্ঞে ভিক্খূ তস্সা আপত্তিযা আপত্তিদিট্ঠিনো অহেসুং. অথ খো তে ভন্তে ভিক্খূ সামগ্গিং লভিত্ৰা তং ভিক্খুং আপত্তিযা অদস্সনে উক্খিপিংসু, তস্মিং ভন্তে ৰত্থুস্মিং দিন্নো.

পুচ্ছা – সঙ্ঘভেদস্স আৰুসো মূলভূতে ভিক্খুম্হি উক্খিত্তকে ওসারিতে তস্স ৰত্থুস্স ৰূপসমায সঙ্ঘসামগ্গিঞ্চ কাতুং সামগ্গী উপোসথঞ্চ কাতুং ভগৰতা কত্থ অনুঞ্ঞাতং, কং আরব্ভ কিস্মিং ৰত্থুস্মিং অনুঞ্ঞাতং.

ৰিস্সজ্জনা – সাৰত্থিযং ভন্তে তেযেৰ উক্খিত্তকানুৰত্তকে ভিক্খূ আরব্ভ অনুঞ্ঞাতং, তে ভন্তে উক্খিত্তকানুৰত্তকা ভিক্খূ তং উক্খিত্তকং ভিক্খুং ওসারেত্ৰা যেন উক্খেপকা ভিক্খূ তেনুপসঙ্কমিংসু উপসঙ্কমিত্ৰা তে উক্খেপকে ভিক্খূ একদৰোচুং ‘‘যস্মিং আৰুসো ৰত্থুস্মিং অহোসি সঙ্ঘস্স ভণ্ডনং কলহো ৰিগ্গহো ৰিৰাদো সঙ্ঘভেদো সঙ্ঘরাজি সঙ্ঘৰৰত্থানং সঙ্ঘনানাকরণং, সো এসো ভিক্খুং আপন্নো চ উক্খিত্তো চ পস্সি চ ওসারিতো চ, হন্দ মযং আৰুসো তস্স ৰত্থুস্স ৰূপসমায সঙ্ঘসামগ্গিং করোমা’’তি, তস্মিং ভন্তে ৰত্থুস্মিং অনুঞ্ঞাতং.

পুচ্ছা – কোসম্বকং পুচ্ছিস্সং, সনিদানং সনিদ্দেসং. সমুক্কট্ঠপদানং আৰুসো কতি আপত্তিযো.

ৰিস্সজ্জনা – কোসম্বকং ৰিস্সজ্জিস্সং, সনিদানং সনিদ্দেসং. সমুক্কট্ঠপদানং ভন্তে একা আপত্তি.